Nkwa Nsu Resen Wɔ Andes

Andes Mmepɔw no ba ara bedu Peru mfinimfini, na akyɛ ɔman no mu ma atɔe fam no yɛ mpoano asase kesee na apuei fam no yɛ kwaebirentuw a nnua akɛse pii wom. Saa mmepɔw brɛmo yi so na Peru nnipa dodow ɔpepem 27 no mu bɛboro nkyem abiɛsa mu biako te. Ebinom te mmepɔw no apampam na ebinom te mmepɔw no nkyɛnmu a esian no anaasɛ abon akɛse a ɛdeda ase a ɛbɔ nnɔbae no mu.

 ESIANE sɛ Andes so yɛ mmonkyimmɔnka nti, ɛnyɛ mmerɛw sɛ afoforo bɛforo akɔ so. Ne saa nti, akɔyɛ sɛ nea nnipa ɔpepem pii a wɔte hɔ no atew wɔn ho, na nsɛm a esisi ne nneɛma a ɛkɔ so wɔ mmeae foforo no ntaa nka wɔn koraa.

Nkuraa nketewa atwa nsuten ho ahyia na ama wɔanya nsu a wohia ama wɔn nnɔbae ne nyɛmmoa te sɛ yoma, ne nguan. Nanso, nsu titiriw foforo bi wɔ hɔ a ɛsen wɔ Andes—honhom fam nsu a ɛma abotɔyam a efi Yehowa, “nkwa nsuti no,” hɔ. (Yeremia 2:13) Onyankopɔn nam N’adansefo so boa nnipa a wɔtete Andes mmepɔw apampam no ma wonya ɔne n’atirimpɔw ho nimdeɛ a edi mũ.—Yesaia 12:3; Yohane 17:3.

Esiane sɛ Onyankopɔn pɛ ne sɛ “wogye nnipa nkwa na wɔba nokware nimdeɛ mu” nti, asomfo yi bɔ mmɔden kɛse de Bible mu asɛm a ɛma nkwa no kɔma nnipa a wɔtete mmeae a ɛyɛ den sɛ obi bɛkɔ hɔ yi. (1 Timoteo 2:4) Asɛm a egyina Bible so yi bue nneɛma ani so, na ɛkorɔn. Ama nnipa komapafo a wɔwɔ saa beae yi ade wɔn ho afi gyidihunu, amammerɛ, ne nsusuwii a na ɛma wosuro awufo, ahonhommɔne, ne adebɔ mu tumi ahorow no ho. Nea ehia sen saa no, saa asɛm yi ma wonya asetra a enni awiei wɔ paradise asase ho anidaso a ɛyɛ anigye.

Mmɔden a Wɔbɔ

Ɛsɛ sɛ Ahenni asɛnkafo a wɔkɔsra mmeae a atew ne ho yi yɛ nsakrae pii. Sɛ Bible akyerɛkyerɛfo no bedu nnipa no koma mu a, ɛsɛ sɛ wonya Quechua anaa Aymara, kasa abien a wɔka wɔ hɔ, no ho nimdeɛ kakra.

Nkuraa a egu Andes so a obi bɛkɔ hɔ no nyɛ mmerɛw. Keteke akwan nnɔɔso wɔ hɔ. Ɛhɔ akwantu nna fam na wim tebea a enye ne sɛnea asase no te no ma ɛhɔ akwantu yɛ hu. Ɛnde, ɔkwan bɛn so na Adansefo no de Ahenni asɛm no du nkurɔfo no nkyɛn?

Asɛmpakafo akokodurufo no agyina ɔhaw no ano na wɔada odiyifo Yesaia honhom no bi adi: “Mini, soma me!” (Yesaia 6:8) Wɔde kar a ɔdan si so abiɛsa atu kwan akɔ atifi, mfinimfini, ne anafo fam. Akwampaefo, anaa bere nyinaa asomfo, a wɔyɛ nsi no nam Bible ne Bible ho nhoma pii so agu Bible mu nokware ho aba no wɔ nnipa komapafo a wɔte hɔ a wɔwɔ adamfofa ne ahɔhoyɛ su no komam.

Bepɔw yi so akwan a akontɔnkontɔn no yɛ hu yiye. Akwan no bi wɔ hɔ a sɛ kar betumi afa so a, ɛsɛ sɛ ɛkɔ anim ba akyi. Bere a ɔsɛmpatrɛwfo bi te kar bi a ɛreforo bepɔw akyi no, ɔhwɛɛ mpomma mu hui sɛ akyi ntwahonan no si amoa kɛse bi a emu tenten bɛboro mita 190 ano! Ɔkataa n’ani kosi sɛ bɔs no twaam.

Akwan no bi nye na esusua koraa. Bere a wɔde kar a ɔdan si so no biako resian ɔkwan ketewaa bi a ɛso nye no, wohui sɛ kar kɛse bi rehyia wɔn. Ná ɛsɛ sɛ kar a ɔdan si so no kɔ n’akyi ma kar kɛse no yɛ brɛoo bɛsen.

Nanso, biribi pa bi afi mmɔdenbɔ kɛse a ɛte saa no mu aba. So wobɛpɛ sɛ wusua nsiyɛ a ɛte saa ho nsɛm pii?

Ɔtare Titicaca a “Wogugu So Nsu”

Ɔtare Titicaca a ɛda Andes Mmepɔw ase no wɔ soro sen po mita 3,800, na ɛyɛ ɔtare a ɛda soro na wotu akwan wɔ so sen biara wɔ wiase. Mmepɔw a asukyenee wɔ so, a emu bi sorokɔ boro mita 6,400 no yɛ nsubɔnten 25 a ɛsen kɔ Titicaca mu no mu dodow no ti. Esiane sɛ ɛda soro nti, ɛma beae hɔ yɛ nwini, na ɛma awɔw de afoforo a wɔkɔ hɔ no na wɔn ani so biri wɔn.

Bere bi a atwam no, akwampaefo kuw bi a wɔka Quechua ne Aymara kasa tuu kwan kɔɔ Amantani ne Taquile nsupɔw a ɛwɔ Ɔtare Titicaca so no so. Wɔde sini bi kaa wɔn ho kɔe a wobeyi akyerɛ a wɔato din “Asɔre Ahorow no Mu Nhwehwɛmu a Ɛkɔ Akyiri a Yɛbɛyɛ,” a ɛfa  Kristoman atosɛm mu nhwehwɛmu a edi mu a wɔyɛ ho. Nnipa pii kyerɛɛ eyi ho anigye. Ɔbarima bi gyee anuanom no fɛw so na ɔmaa wɔn ɔdan a emu sõ wɔ ne fie, baabi a wobetumi atra akyerɛkyerɛ Bible no.

Nnipa 100 na wɔkɔɔ nhyiam a edi kan a wɔyɛe wɔ Amantani no; na nnipa 140 na wɔkɔɔ nhyiam a wɔyɛe wɔ Taquile no. Wɔyɛɛ nhyiam no wɔ Quechua kasa mu. Awarefo bi a na wɔatra supɔw no so pɛn no kae sɛ: “Bere adu sɛ mo Yehowa Adansefo kae yɛn. Yɛbɔ mpae sɛ mommra.”

Sɛ nsupɔw akɛse abien yi da nkyɛn a, nsupɔw “a ɛtetɛ nsu ani” 40 a wobu akontaa sɛ ɛwɔ Ɔtare Titicaca so no mu bi yɛ nea wɔaka asɛmpa no wɔ hɔ. Nsupɔw a ɛtetɛ nsu ani? Yiw, wɔde totoras, demmire a enyin wɔ ɔtare no mmeae a ɛhɔ nhyɛ da nnɔ no na wɔde yɛ. Demmire no nyin pue nsu no ani. Sɛ wɔbɛyɛ supɔw a, ɛhɔfo no koakoa demmire no mu, bere a ɛda so ara sisi ɔtare no mu, na wɔnwen ma ɛyɛ sɛ apa. Wɔde dɔte tare apa no na wɔde dimmire foforo a wɔatwitwa hyehyɛ mu ma egyina. Nkurɔfo tra demmire asese a wosisi no apa no so mu.

Yehowa Adansefo nyaa hyɛmma a wɔde bɛka asɛm no akyerɛ nnipa a wɔtete Ɔtare Titicaca so nsupɔw ahorow so no. Hyɛmma no tumi fa nnipa 16. Sɛ Adansefo no du nsupɔw a ɛtetɛ nsu ani no so a, wɔnantew apa a wɔde demmire ayɛ no so kɔ afie ahorow mu. Wɔka sɛ mpɛn pii no, sɛ wonam so a, wote sɛ ase rehinhim kakra. Eyi yɛ beae a ɛnsɛ sɛ wɔn a wosuro nsu nantew!

Nnipa a wɔka Aymara kasa no tete nkurow ne nkuraa pii a egu ɔtare no hwene ano no mu. Ahyɛmma titiriw na wotumi de kɔ saa mmeae yi. Ne nyinaa mu no, akontaabu kyerɛ sɛ nnipa bɛyɛ 400,000 na wɔte ɔmantam no mu a wɔnam ahyɛmma so de Ahenni asɛm no kɔma wɔn. Ahyɛmma no benya adwuma pii ayɛ daakye.

Wodwudwo Honhom Fam Sukɔm Ano

Ná Flavio te Santa Lucía akuraa a ɛbɛn Juliaca no ase wɔ Andes. Ná wɔde hellgya nkyerɛkyerɛ no akyerɛkyerɛ no wɔ Evangelical Asɔre no mu. Ná ɔde mfe pii anya ogya mu a wɔtwe nkurɔfo aso daa no ho suro. Ná ɔtaa susuw nea enti a ɔdɔ Nyankopɔn betumi ayɛ nnipa ayayade wɔ ogya mu daa saa ho. Bere a Tito, a ɔyɛ Yehowa Adansefo bere nyinaa somfo, kɔɔ saa akuraa no ase no, ɔkɔsraa Flavio.

Nsɛm a Flavio dii kan bisae no biako ne sɛ, “So mo som no kyerɛkyerɛ sɛ wɔyɛ nkurɔfo ayayade wɔ hellgya mu?” Tito buae sɛ saa nkyerɛkyerɛ no yɛ Ɔbɔadeɛ no akyiwade, na egu Yehowa, ɔdɔ Nyankopɔn no, din ho fĩ nso. Tito de Flavio ankasa Bible dii dwuma de kyerɛɛ no sɛ awufo nnim biribiara na wɔretwɛn sɛ wobenya asase so wusɔre wɔ Onyankopɔn Ahenni no mu. (Ɔsɛnkafo 9:5; Yohane 5:28, 29) Eyi buee Flavio ani. Ɔpenee Bible adesua so ntɛm ara na ankyɛ na wɔbɔɔ no asu sɛ Kristoni.

Akuraa a Wɔkyerɛ Anisɔ

Hwɛ anigye ara a ɛyɛ sɛ wɔde Kyerɛwnsɛm no bɛbrɛ nnipa a wɔte akuraa ase a wonhuu Bible no bi da anaasɛ wɔbɛka asɛm no wɔ nkuraa a ɛhɔfo ntee Yehowa Adansefo anaa asɛmpa a wɔka no da! Ɛno ne anuanom mmea baasa—Rosa, Alicia, ne Cecilia—a wɔkaa asɛm no wɔ Izcuchaca ne Conayca nkuraa a egu bepɔw bi a ne tenten boro mita 3,600 so wɔ Peru mfinimfini fam no suahu.

Bere a woduu akuraa a edi kan ase no, na wonni baabi a wɔbɛtra. Wɔkaa ho asɛm kyerɛɛ hɔnom polisi panyin no, na wɔkyerɛɛ no nea enti a wɔaba akuraa no ase. Dɛn na efii mu  bae? Ɔmaa wɔdaa polisi adwumayɛbea hɔ anadwo no. Ade kyee no, akwampaefo no tumi nyaa baabi a wobetumi atra daa ayɛ wɔn adwuma.

Ankyɛ na Kristo wu afe Nkaedi no duu so. Ná akwampaefo no akɔsrasra afie a ɛwɔ Izcuchaca akuraa ase no nyinaa amema Bible pii afi Bible adesua pii ase. Ansa na Nkaedi no reba no, wɔtoo nsa frɛɛ nkurɔfo sɛ wɔmmra afahyɛ yi, na wɔkyerɛɛ afahyɛ yi atirimpɔw ne nea abodoo ne bobesa a wɔde di dwuma wom no kyerɛ. Wɔtoo nsa frɛɛ anuanom mmarima bi sɛ wɔmmɛboa mma wonni afahyɛ no, na wɔn mu biako maa ɔkasa no. Hwɛ anigye a na ɛyɛ sɛ akuraa ketewa yi asefo 50 baa saa afahyɛ titiriw yi ase! Bere a edi kan no, wɔtee nea Awurade Anwummeduan no kyerɛ ankasa ase. Afei nso, hwɛ sɛnea na ɛsom bo ma wɔn sɛ wɔanya Onyankopɔn Asɛm no bi!

Wɔde Wɔn Ho Fi Adesoa Duruduru Ase

Ahotɔ nsu a ɛne Bible mu nokware a wɔde brɛ nnipa a atoro som afa wɔn nnommum no yɛ anigye bere nyinaa. Ná Pisac yɛ kurow titiriw wɔ tete Inca Ahemman no mu. Wɔde hellgya nkyerɛkyerɛ a ennyina Kyerɛwnsɛm so no akyerɛkyerɛ nnipa a wɔwɔ hɔ no fã kɛse no ara. Wɔn asɔfo no ka kyerɛ wɔn sɛ wɔrentumi nkɔ soro gye sɛ asɔfo no asrɛ bɔne fafiri ama wɔn ansa.

Ntease wom sɛ, Bible mu nokware ho nsu a ɛma abotɔyam no ho kɔm de nnipa a wɔte saa. Bere a Santiago, Yehowa Adansefo bere nyinaa somfo bi, reka asɛm no wɔ afie afie no, onyaa hokwan kyerɛkyerɛɛ mu kyerɛɛ ɔbarima bi sɛ atreneefo bɛtra paradise asase so. (Dwom 37:11) Santiago fi Bible no mu kyerɛe sɛ wobenyan awufo ne sɛ wɔbɛkyerɛkyerɛ adesamma wɔ Yehowa akwan a ɛyɛ pɛ so a wɔhwɛ kwan sɛ wɔbɛtra ase daa. (Yesaia 11:9) Ansa na wɔrehyia no, na ɔbarima yi yɛ Katolekni mapa, na odi ahonhonsɛm na na ɔyɛ ɔsabofo. Afei obenyaa anidaso a egyina Bible so ne asetra mu atirimpɔw—sɛ ɔbɛtra Paradise. Ɔhyew nneɛma a ɔde di ahonhonsɛm no nyinaa na ogyaee asabow nso. Ɔboaa n’abusua ano na wɔpenee Bible adesua so. Bere bi akyi no, abusua no mufo nyinaa hyiraa wɔn ho so maa Yehowa Nyankopɔn na wɔbɔɔ wɔn asu.

Wɔwɔ Ahɔhoyɛ Su

Nnipa a wɔte mmepɔw so yi wɔ ahɔhoyɛ su ankasa. Ɛwom sɛ wɔtete asese mu na wodi hia de, nanso wɔyɛ nea wobetumi ma ahɔho a wɔbɛsra hɔ no. Ansa na ofiewura bi besua Bible gyinapɛn ahorow a ɛkorɔn ho ade no, obetumi ama ɔhɔho no coca ahaban sɛ ɔnwe bere a wɔrebɔ nkɔmmɔ no. Nanso sɛ ɔbɛyɛ Ɔdansefo a, obetumi de asikre atere mã, a ɛhɔ de, ɛne coca ahaban yɛ pɛ no ama no.

Onua bi srɛɛ ɔsɛmpatrɛwfo bi sɛ onkogyaw no ma ɔnkɔyɛ sankɔhwɛ. Bere a wɔforoo bepɔw bi a ɛware wiei no, wɔbɔɔ wɔn nsam de kyerɛɛ ofiewura no sɛ wɔabedu. Ɔkyerɛɛ wɔn sɛ wɔmmra dan a wɔde sare akuru so no mu, na na ɛsɛ sɛ wɔkoa wɔn mu ansa na wɔatumi awura mu. Wɔde nkakrankakra kogyinaa dɔtedan no mfinimfini, baabi a ɛna no atu tokuru de kuntu asɛ mu de ne ba akokoaa ato hɔ no. Esiane sɛ akokoaa yi ntumi nsɔre nti, nea otumi yɛ ara ne sɛ ɔde anigye pere di agoru wɔ fam hɔ bere a wɔn a wɔanyin no rebɔ nkɔmmɔ no. Bere a wɔbɔɔ Ahenni no mu nhyira ahorow ho nkɔmmɔ a etu mpɔn wiei no, ɔbea no de kankyee tenten bi bae a hɔnom tii no bi gu mu. Anuanom no wiei ara pɛ na wosiim kɔɔ bepɔw no so mmeae foforo kɔyɛɛ nsrahwɛ pii.

Wotwa Aba Pii

Mprempren akuw ahorow bɛyɛ ɔha a nnipa bɛboro apem na wɔwom na wɔne Yehowa Adansefo resua Bible no wɔ saa beae yi. Wɔde adesuafo a wɔawie Asomfo Ntetee Sukuu wɔ Lima no rekɔ saa mmeae yi akɔboa ma akuw no adan asafo. Nnipa komapafo a atoro som ne gyidihunu afa wɔn nnommum bere tenten no nam Ahenni ho asɛmpa no so anya ahofadi! (Yohane 8:32) Wɔredwudwo nokware ho sukɔm a ɛde wɔn no ano.

[Mfonini wɔ kratafa 10]

Wɔredi adanse wɔ Ɔtare Titicaca ho nsupɔw a “ɛtetɛ nsu ani” no so