“Ɔsom Hokwan Da a Wɔma”

BERE a sukuu kyerɛkyerɛfo panyin bi a ɔwɔ Poland ho dwiriw no wɔ nkɔmmɔbɔ bi a ɔne Yehowa Adansefo bɔe akyi no, oyii “Ɔsom Hokwan Da” sii hɔ wɔ ne sukuu mu. Ɔhyɛɛ nyansa sɛ adesuafo no bi ntu wɔn ho mma—Katolekfo, Buddhafo, ne Yehowa Adansefo—mfa nsiesie ɔkasa tiawa bi mma adesuafo foforo nhu wɔn gyidi ne wɔn som mu nneyɛe. Yehowa Adansefo mmofra baasa a wɔadu wɔn mpanyin afe so tuu wɔn ho mae ntɛm ara.

Bere a ɛda no dui no, nea odii kan kasae ne Malwina a wadi mfe 15 no. Ɔkae wɔ ne kasa no mu sɛ: “Mo mu pii nim yɛn ansa na yɛrefi ase aba sukuu yi mu efisɛ yɛbaa mo nkyɛn wɔ mo afie mu. Ebia na munnim nea enti a yɛyɛ saa. Nea nti a yɛyɛ saa ne sɛ yedi Yesu Kristo, a ɔno ne Kristosom Farebae no akyi. Ɔkaa Onyankopɔn Ahenni ho asɛmpa baabiara a obehu nnipa. Asomafo no ne Kristofo foforo a wodii kan no nso yɛɛ saa ara. Wɔ mmeae pii no, Yehowa Adansefo gyina gyidi ho sɔhwɛ ahorow a emu yɛ den ano, nanso, ɛyɛ yɛn anigye sɛ, ɛnam mo nyinaa mmoa so no yenya asomdwoe wɔ yɛn sukuu yi mu. Yɛda mo ase wɔ ɛno ho!”

Bere a Malwina de ne kasa no reba awiei no, ɔkae sɛ: “Biribi foforo bi nso wɔ hɔ a enti yɛba mo fie no. Yedwen mo ho. Bible no ka sɛ ɛnkyɛ, adesamma rebehyia nsɛm a ɛbɛwosow wiase no. Enti yɛsrɛ mo, da foforo a yɛbɛbɔ mo pon mu no, munnye bere ntie. Yɛn ani begye sɛ yɛbɛka ɔkwan a yɛn nyinaa betumi abom atra ase daa wɔ paradise asase so ho asɛm kyerɛ mo.”

Ɔkasafo a odii hɔ ne Mateusz, a ɔno nso adi mfe 15. Mateusz ka kyerɛɛ n’atiefo no sɛ mfe pii a atwam no mu no, Yehowa Adansefo afa akwan horow pii so aka asɛmpa no. Sɛ́ nhwɛso no, wɔ 1914—bere a na wɔde sini a emu nnipa nkasa di dwuma no, Adansefo no yii “Photo-Drama of Creation” sini a emu mfonini no keka ne ho na emu nnipa kasa wom kyerɛe.

 Mateusz kaa sɛnea wɔde radio dii dwuma de trɛw Ahenni asɛm no mu ne afei kɔmputa dwumadi nwonwaso tintim afiri a etumi di kasa horow bebree ho dwuma (MEPS) a Yehowa Adansefo ayɛ no ho asɛm. Bio nso, ɔkaa sɛnea Yehowa Adansefo aboa nnuruyɛfo ama wɔahu nyansakwan a wɔfa so sa yare a mogya nka ho ho asɛm. Ɔkae sɛ: “Mprempren, Polandfo nnuruyɛfo aka yɛn gyinabea no ho asɛm papa, na wɔasi so dua sɛ afe biara wɔyɛ ayarefo pii a wɔnyɛ Adansefo oprehyɛn a wɔmfa mogya nni dwuma.”

Mateusz de ne kasa no baa awiei na ɔkaa Ahenni Asa ahorow a wosisi ho asɛm sɛ: “So mopɛ sɛ mobɛhwɛ yɛn de no? Muntua hwee na wonnyigye sika wɔ hɔ.” Bere a Mateusz reka ɔmantam nhyiambea a ɛwɔ Sosnowiec ho asɛm no, ɔkae sɛ: “Ɛsɛ sɛ mobɛhwɛ ɔdan kɛse a wɔasi a edi n’atirimpɔw ho dwuma wɔ ɔkwan a ɛfata ankasa so no. Dɛn nti na momma yɛn nyinaa mmom nkɔ hɔ? Yɛwɔ ho adwene bi, na yɛn adamfo Katarzyna rebɛka ho asɛm akyerɛ mo.”

Nea edi hɔ no, Katarzyna a wadi mfe 15 de anigye kae sɛ: “Yɛma mo akwaaba ba Sosnowiec Yehowa Adansefo ɔmantam nhyiam ase. Wobesusuw nsɛm a ɛfa mmofra ho ho. Katarzyna twee adwene sii Kristofo afahyɛ titiriw—Yesu Kristo wu Nkaedi no so nso. Ɔhyɛɛ n’atiefo no nkuran sɛ: “Afe a etwaam no, nnipa bɛboro ɔpepem 14 na wɔkɔɔ afahyɛ yi ase wɔ wiase nyinaa. Dɛn nti na wo nka yɛn ho bere foforo?”

Bere a wɔkaa wɔn nsɛm no wiei no, Malwina, Mateusz, ne Katarzyna de nhoma Jehovah’s Witnesses—Proclaimers of God’s Kingdom kaa video kasɛt abien a ɛkyerɛkyerɛ nea Yehowa Adansefo gye di ne wɔn dwumadi mu ho maa akyerɛkyerɛfo no. * Akyerɛkyerɛfo no daa wɔn ase gyei, na wɔhyɛɛ bɔ sɛ wɔde bedi dwuma wɔ abakɔsɛm ho adesua horow mu.

Bere a dwumadi no baa awiei no, Martyna a wadi mfe 12 no bɔɔ dwom a n’asɛmti ne “Yɛda W’ase, Yehowa” maa wɔn a wɔahyia hɔ no nyinaa. Adansefo mmofra yi ‘yɛɛ nnam wɔn Onyankopɔn mu’ dii adanse pa. (1 Tesalonikafo 2:2) Nhwɛso a ɛkyɛn so ma Adansefo mmofra a wɔwɔ mmaa nyinaa bɛn ara ni!

[Ase hɔ asɛm]

[Mfonini wɔ kratafa 26]

Malwina resiesie nsɛm nna kakraa bi ansa na wakɔma wɔ sukuu

[Mfonini wɔ kratafa 26]

Katarznya repaw kyerɛw nsɛm a ɔde bedi dwuma