ASETRAM NSƐM

Asetra A Etu Mpɔn A Manya Wɔ Yehowa Som Mu

SƐNEA RUSSELL KURZEN KA KYERƐE

Wɔwoo me September 22, 1907, mfe ason akyi ansa na bere a ɛda nsow a wiase ko a edi kan de bae no reba. Ná yɛn abusua no di yiye paa wɔ ɔkwan titiriw bi so. Sɛ wutie yɛn ho abakɔsɛm kakra a migye di sɛ wubegye atom.

ME NANABEA Kurzen fii ase hwehwɛɛ Onyankopɔn ho nokware bere a na ɔyɛ abeawa ketewaa no. Ansa na ɔredu ne mpanyin afe so no, na wakɔ asɔre ahorow pii wɔ Spiez, Switzerland kurow a ɛyɛ fɛ no mu. Wɔ 1887 mu bere a na waware mfe bi akyi no, Kurzen abusua no kaa atubrafo binom ho koduu United States mpoano.

Abusua no kɔtraa Ohio, na ɛhɔ na Nanabea huu ademude a na ɔrehwehwɛ akyi kwan no bɛyɛ afe 1900 mu. Ohui wɔ Charles Taze Russell nhoma The Time Is at Hand mu wɔ German kasa mu. Ohui ntɛm ara sɛ, nea ɔkenkanee no kura Bible mu nokware hann no. Ɛwom sɛ na Nanabea ntumi nkenkan Engiresi kasa no de, nanso ɔkraa Engiresi Ɔwɛn-Aban nsɛmma nhoma no bi. Enti bere a na ɔresua Bible mu nokware afoforo no, bere koro no ara na ɔresua Engiresi kasa nso. Nanabarima ankyerɛ honhom fam nneɛma ho anigye da sɛnea na ne yere yɛ no.

Wɔ Nanabea Kurzen mma 11 no mu no, emu mmarima 2, John ne Adolph, na wɔkyerɛɛ honhom fam agyapade a ohui no ho anigye. Ná me papa ne John, na wɔbɔɔ no asu wɔ Bible Asuafo no, sɛnea na wɔfrɛ Yehowa Adansefo saa bere no, ɔmantam nhyiam bi a wɔyɛe wɔ St. Louis, Missouri, 1904 no ase. Esiane  sɛ na Bible Asuafo no dodow no ara nni sika kɛse nti, wɔde ɔmantam nhyiam no hyɛɛ bere a na wɔreyɛ Wiase Nyinaa Guabɔ bi wɔ St. Louis sɛnea ɛbɛyɛ na wɔde hokwan no afa keteke a wɔatew ne bo so akɔ bi. Akyiri yi wɔbɔɔ me papa nua Adolph asu wɔ ɔmantam nhyiam bi a wɔyɛe wɔ Niagara Falls, New York, 1907 no ase. Me papa ne ne nua no de nsiyɛ kaa nea na wɔasua wɔ Bible no mu ho asɛm, na akyiri yi wɔn baanu nyinaa bɛyɛɛ bere nyinaa asomfo (a mprempren wɔfrɛ wɔn akwampaefo no).

Enti bere a wɔwoo me wɔ 1907 mu no, na m’abusua no di yiye wɔ honhom mu dedaw. (Mmebusɛm 10:22) Ná meyɛ akokoaa koraa wɔ 1908 mu bere a m’awofo John ne Ida de me kɔɔ “Yɛrekodi Nkonim” ɔmantam nhyiam wɔ Put-in-Bay, Ohio no. Joseph F. Rutherford, a na ɔyɛ ɔhwɛfo kwantufo no na na ɔyɛ ɔmantam nhyiam no guamtrani. Adapɛn kakra a na atwam no, na wabɛsra Bible Asuafo a wɔwɔ yɛn kurow Dalton, Ohio, mu ama ɔkasa.

Ɛwom sɛ menkae nsɛm no de, nanso mekae ɔmantam nhyiam a wɔyɛe wɔ Mountain Lake Park, Maryland, wɔ 1911 mu no. Ɛhɔ na me ne me nuabea kumaa Esther hyiaa Charles Taze Russell, a na ɔhwɛ Bible Asuafo no wiase nyinaa asɛnka adwuma so no.

Wɔ June 28, 1914 bere a wiase no hyɛnee ɔko mu denam Ɔheneba Ferdinand ne ne yere a wokum wɔn wɔ Sarajevo so no, me ne m’abusua kɔɔ ɔmantam nhyiam wɔ Columbus, Ohio wɔ asomdwoe mu. Manya hokwan ne Yehowa nkurɔfo abɔ wɔ ɔmantam nhyiam ahorow pii ase fi me mmofra ase. Ebi yɛ nhyiam a nnipa ɔha pɛ anaa nea ɛte saa na ehyiaa mu. Afoforo nso yɛ nhyiam akɛse a wɔyɛɛ no wiase agumadibea akɛse bi so.

Yɛn Fi Wɔ Beae Titiriw Bi

Efi bɛyɛ 1908 kosi 1918 no, yɛn fi a na ɛwɔ Dalton—a na ɛwɔ Pittsburgh, Pennsylvania, ne Cleveland, Ohio ntam no—bɛyɛɛ beae a na Bible Asuafo no asafo ketewa no hyia. Yɛn fie bɛyɛɛ beae a anuanom a wotutu akwan kɔma ɔkasa pii bɛsoɛ titiriw. Na wɔde wɔn mpɔnkɔ ne kar a pɔnkɔ twe bɛbɔ yɛn san no ho na wɔka osuahu a ɛyɛ anigye ne honhom fam nneɛma foforo a ɛyɛ anigye ho asɛm kyerɛ yɛn. Hwɛ sɛnea na saa mmere no ma denhyɛ!

 Ná paapa yɛ sukuu kyerɛkyerɛfo, nanso, na ne koma wɔ ɔkyerɛkyerɛ adwuma a ɛsen biara, Kristofo som adwuma no so. Ɔbɔɔ mmɔden sɛ ɔbɛkyerɛkyerɛ n’abusua Yehowa ho ade, na na yɛbom bɔ mpae anwummere biara sɛ abusua. Wɔ fefɛw bere mu wɔ 1919 no, Paapa tɔn yɛn pɔnkɔ ne kar a pɔnkɔ twe no $175 tɔɔ 1914 Ford kar sɛnea ɛbɛyɛ na watumi adu nkurɔfo pii nkyɛn wɔ asɛnka adwuma no mu. Wɔ 1919 ne 1922 mu no, saa kar no na yɛn abusua no de kɔɔ Bible Asuafo no ɔmantam nhyiam ahorow a agye din wɔ Cedar Point, Ohio no.

Yɛn abusua no nyinaa—Maame; Paapa; Esther; me nuabarima kumaa John; ne me—nyinaa nyaa baguam asɛnka adwuma no mu kyɛfa. Mekae bere a edi kan a ofiewura bi bisaa me Bible mu asɛm bi no yiye. Ná madi bɛyɛ mfe ason. Ɔbarima no bisaa me sɛ: “Abofra, dɛn ne Harmagedon?” Mitumi de Bible mu mmuae maa no denam mmoa kakra a me papa de maa me no so.

Mede Me Ho Hyɛɛ Bere Nyinaa Som Adwuma Mu

Yɛn abusua no kɔɔ ɔmantam nhyiam wɔ Columbus, Ohio wɔ 1931, na yɛn ani gyei sɛ na yɛka wɔn a wogyee din foforo Yehowa Adansefo toom no ho. John ani gyei araa ma osii gyinae sɛ me ne no mfa yɛn ho nhyɛ akwampae adwuma no mu. * Yɛyɛe, na Maame, Paapa, ne Esther nso yɛɛ bi. Hwɛ agyapade ara a yenyae—abusua a wɔayɛ biako wɔ Onyankopɔn Ahenni ho asɛmpaka adwuma a ɛyɛ anigye mu! Mekɔ so da Yehowa ase daa wɔ saa nhyira no ho. Ɛwom sɛ yɛn ani gyei kɛse de, nanso, na anigye pii da yɛn anim.

Mifii ase yɛɛ adwuma wɔ Yehowa Adansefo wiase nyinaa adwumayɛbea ti (a wɔfrɛ no Betel no) wɔ Brooklyn, New York wɔ February 1939 mu. Wɔ adapɛn kakra akyi no, John bɛkaa me ho wɔ hɔ. Yɛtraa dan koro mu kosii sɛ ɔwaree ne yere a ɔdɔ no, Jessie, wɔ 1953 mu.

Bere a me ne John kɔɔ Betel akyi no, yɛn awofo penee so kɔyɛɛ akwampae adwuma wɔ ɔman no mu mmeae ahorow, na Esther ne ne kunu, George Read, ne wɔn kɔe. Yɛn awofo kɔɔ so yɛɛ akwampae adwuma kosii sɛ wowiee wɔn asase so adwuma wɔ 1963 mu. Esther ne ne kunu hyehyɛɛ abusua a ɛyɛ anigye, na manya mmarima ne mmea wɔfasenom a medɔ wɔn yiye.

Adwuma ne Betel Fekubɔ

John de mfiridwuma ho nimdeɛ a ɔwɔ dii dwuma wɔ Betel, na ɔne Betelfo afoforo yɛɛ gramafon ho adwuma. Yehowa Adansefo mpempem pii de eyinom dii dwuma wɔ wɔn afie afie som adwuma mu. John nso boae ma wɔyɛɛ afiri a wɔde yɛ krataa kyekyere nsɛmma nhoma a wɔde mena ankorankoro a wɔkra bi ho no.

Mifii me Betel som adwuma no ase wɔ baabi a wɔpam nhoma no. Mmerante afoforo a me ne wɔn yɛɛ adwuma wɔ adwinnan no mu saa bere no da so ara de nokwaredi resom wɔ Betel. Eyinom bi ne Carey Barber ne Robert Hatzfeld. Wɔn a wɔka ho nso a mekae wɔn paa a saa bere yi wɔawuwu ne Nathan Knorr, Karl Klein, Lyman Swingle, Klaus Jensen, Grant Suiter, George Gangas, Orin Hibbard, John Sioras, Robert Payne, Charles Fekel, Benno Burczyk, ne John Perry. Wɔde nokwaredi yɛɛ adwuma no mfe pii a wɔanwiinwii anaa wɔanhwɛ kwan sɛ “wɔbɛbɔ wɔn aba so” da. Nanso, asɛyɛde a emu yɛ duru bɛdaa saa Kristofo a wɔasra wɔn yi mu pii so bere a ahyehyɛde no nyinii no. Ebinom mpo somee wɔ Yehowa Adansefo Sodikuw no mu.

Misuaa biribi titiriw fii anuanom mmarima a wɔwɔ ahofama a me ne wɔn yɛɛ adwuma yi hɔ. Wɔ nnwuma bi mu no, wɔma adwumayɛfo ɔsram akatua wɔ wɔn adwuma ho. Ɛno ne wɔn akatua. Betelsom de honhom fam nhyira pii na ɛba, na mmarima ne mmea a wɔyɛ honhom mufo nkutoo na wɔn ani sɔ akatua a ɛte saa.—1 Korintofo 2:6-16.

 Ná Nathan Knorr a ɔbaa Betel sɛ obi a onnii mfe aduonu wɔ 1923 mu no ne adwinnan sohwɛfo wɔ 1930 mfe no mu. Ná ɔkɔ adwinnan no mu da biara kɔ odwumayɛni biara nkyɛn kokyia no. Yɛn a na yɛyɛ foforo wɔ Betel no ani gyee nnipa ho anigye a ɛte saa a ɔkyerɛe no ho. Wɔ 1936 mu no, yenyaa nhoma tintim afiri foforo fii Germany, na na ɛyɛ den ma anuanom mmerante no binom sɛ wobetumi ahyehyɛ. Enti Onua Knorr hyɛɛ adwuma atade ne wɔn yɛɛ adwuma bɛboro ɔsram biako kosii sɛ wɔhyehyɛ wiei ma ɛyɛɛ adwuma.

Na Onua Knorr yɛ adwumaden araa ma na ɛyɛ den ma yɛn mu binom sɛ yebetumi ne no ayɛ adwuma pɛ. Nanso, na onim ahomegye nso. Bere a wɔde Yehowa Adansefo wiase nyinaa asɛnka adwuma no hyɛɛ ne nsa wɔ January 1942 mu akyi mpo no, ɛtɔ mmere bi a na ɔtaa ne Betel abusua no mufo ne Gilead asɛmpatrɛw sukuu adesuafo no bɔ baseball wɔ beae a ɛbɛn South Lansing, New York.

Wɔ April 1950 mu no, Betel abusua no tu kɔɔ abansoro dan foforo a ɛtoa so du a yɛte mu no mu wɔ 124 Columbia Heights, Brooklyn, New York. Na ɔdan foforo a wodidi mu no tumi fa yɛn nyinaa ma yɛbom tra ase didi. Yɛantumi anyɛ yɛn anɔpa som dwumadi no wɔ bɛyɛ mfe abiɛsa a wɔde sii saa dan yi no mu. Hwɛ anigye ara a yenyae bere a wɔsan fii dwumadi yi ase bio no! Onua Knorr ma metraa ne nkyɛn wɔ oguamtrani pon ho sɛnea mɛboa no ma no akae abusua no mufo a wɔaba foforo no din. Metraa saa akongua koro yi so wɔ anɔpa som ne adidi ase mfe 50. Afei, wɔtoo ɔdan a yedidi mu yi mu wɔ August 4, 2000, na wɔde me kɔɔ adan biako a yedidi mu a wɔasiesie mu foforo wɔ kan Towers Hotel no mu.

Wɔ 1950 mfe no mu no, meyɛɛ Linotype afiri bi ho adwuma wɔ adwinnan no mu, a na mehyehyɛ nnade a yɛde tintim nkyɛnsee so yɛ nhoma no. Na saa adwuma yi nyɛ nea m’ani gye ho, nanso na William Peterson, a na ɔhwɛ mfiri no so no ye ma me araa ma minyaa anigye bere a na mewɔ hɔ no. Afei wɔ 1960 mu no, na wohia wɔn a wobetu wɔn ho ama akɔka ɔdan foforo a na wɔasi wɔ 107 Columbia Heights no ho aduru. M’ani gyei sɛ mɛboa ma wɔasiesie saa ɔdan foforo yi ama yɛn Betel abusua no mufo a na yɛredɔɔso no.

Bere a yɛkaa 107 Columbia Heights ɔdan no ho aduru wiei no, ankyɛ na m’ani gyei kɛse sɛ wɔmaa me dwumadi sɛ minnye ahɔho a wɔba Betel nsrahwɛ no. Mfe 40 a atwam a mede asom sɛ obi a ogye nsrahwɛfo no yɛ anika te sɛ nea mede atra Betel no ara. Sɛ́ ɛyɛ Betel abusua no mufo foforo anaa nsrahwɛfo a wɔbɛsra Betel no, ɛyɛ anigye sɛ yehu nea afi yɛn mmɔdenbɔ mu aba wɔ Ahenni nkɔso no mu.

Bible Asuafo a Wɔyɛ Nnam

Yɛn Betel abusua no tu mpɔn wɔ honhom fam efisɛ emufo no ani gye Bible no ho. Mebaa Betel foforo no, mibisaa Emma -Hamilton a na ɔyɛ adwuma sɛ obi a ɔkenkan nhoma mu siesie emu mfomso no mpɛn dodow a wakenkan Bible no. Obuae sɛ: “Mpɛn aduasa anum, na afei migyaee ho akontaabu.” Ná Anton Koerber, Kristoni foforo a ɔyɛ nnam a ɔsomee wɔ Betel saa bere no ara mu no taa ka sɛ: “Ma Bible no mmɛn wo bere nyinaa.”

Bere a Onua Russell wui wɔ 1916 mu no, ahyehyɛde no ho asɛyɛde a na ɛda ne so no bɛdaa Joseph F. Rutherford so. Na Rutherford yɛ baguam ɔkasafo a ɔyɛ nnam, a sɛ́ mmaranimfo no, odii nsɛm pii maa Yehowa Adansefo wɔ Asɛnnibea Kunini wɔ United States. Bere a Rutherford wui akyi wɔ 1942 mu no, Onua Knorr besii n’anan mu, na ɔbɔɔ mmɔden kɛse maa ne baguam kasa tuu mpɔn. Esiane sɛ na mete dan a ɛbɛn ne de no mu nti, na metaa te sɛ ɔrebobɔ ne kasa so mpɛn pii. Wɔ bere bi akyi no, ɛdenam mmɔden a ɛte saa so no, ɔbɛyɛɛ baguam kasafo pa.

Wɔ February 1942 mu no, Onua Knorr boae maa wɔhyehyɛɛ dwumadi bi a wɔde bɛboa anuanom mmarima a wɔwɔ Betel no ama yɛatu mpɔn wɔ ɔkyerɛkyerɛ ne ɔkasa mu. Sukuu  no de adwene sii Bible nhwehwɛmu a wɔbɛyɛ ne baguam kasa so. Mfiase no, wɔmaa yɛn mu biara dwumadi sɛ ɔmma ɔkasa tiawa bi mfa Bible mu nnipa ahorow bi ho. Na me kasa a edi kan no fa ɔbarima Mose ho. Wɔ 1943 mu no, wofii sukuu a ɛte saa ara ase wɔ Yehowa Adansefo asafo ahorow mu, na akɔ so abedu nnɛ. Nea wosi so dua wɔ Betel ne sɛ wobenya Bible mu nimdeɛ na wɔatu mpɔn titiriw wɔ ɔkyerɛkyerɛ mu.

Wofii Gilead asɛmpatrɛw sukuu adesuakuw a edi kan ase wɔ February 1943 mu. Merekasa yi Gilead adesua kuw a ɛto so 111 wiee wɔn adesua nkyɛe! Wɔ bɛboro mfe 58 a ɛde adi adwuma no mu no, sukuu no de ntetee ama nnipa bɛboro 7,000 ama wɔasom sɛ asɛmpatrɛwfo wɔ wiase nyinaa. Nea ɛsɛ sɛ yɛhyɛ no nsow ne sɛ, bere a sukuu no fii ase wɔ 1943 mu no, na Yehowa Adansefo a wɔwɔ wiase nyinaa dodow bɛboro 100,000 kakraa bi. Mprempren, nnipa bɛboro 6,000,000 na wɔrenya Onyankopɔn Ahenni ho asɛmpaka no mu kyɛfa!

M’ani Sɔ Me Honhom Fam Agyapade No

Aka bere tiaa bi ama wɔabue Gilead ano no, wɔmaa yɛn nnipa baasa a yefi Betel no kɔsrasraa asafo ahorow a ɛwɔ United States no. Nea ɛbɛyɛ na yɛahyɛ saa asafo ahorow yi den honhom fam no, na yɛtra hɔ da koro, nna kakra, anaa dapɛn mpo. Ná wɔfrɛ yɛn anuanom asomfo, din a akyiri yi wɔsesaa no yɛɛ no ɔmansin somfo, anaa ɔmansin sohwɛfo. Nanso, bere a wobuee Gilead Sukuu no ano bere tiaa bi no, wɔmaa mesan m’akyi kɔkyerɛɛ ade wɔ hɔ. Mesomee sɛ ɔkyerɛkyerɛfo wɔ adesuakuw 2 kosii 5 so, na afei nso, meyɛɛ akyerɛkyerɛfo no biako boafo kyerɛɛ ade wɔ adesuakuw a ɛto so 14 no mu. Esiane sɛ mitumi ka nsɛm a esisii wɔ nnɛyi Yehowa ahyehyɛde abakɔsɛm mfiase ho asɛm a ɛyɛ anigye kyerɛ sukuufo no—a emu pii no fi m’ankasa suahu  mu—nti, ɛma m’ani sɔ me honhom fam agyapade no kɛse.

Hokwan foforo a ɛsom bo a manya wɔ mfe no mu ne amanaman ntam nhyiam horow a Yehowa nkurɔfo yɛ no. Me ne ananmusifo foforo bɛboro 500 a wɔwɔ wiase nyinaa no tuu kwan kɔɔ “Daa Asɛmpa” ɔmantam nhyiam wɔ 1963 mu. Nhyiam akɛse foforo a agye din a mekɔe ne nea wɔyɛe wɔ Warsaw, Poland, wɔ 1989; Berlin, Germany, wɔ 1990; ne Moscow, Russia, wɔ 1993 mu no. Wɔ nhyiam yi mu biara ase no, minyaa hokwan hyiaa yɛn nuanom adɔfo mmarima ne mmea a wogyinaa ɔtaa a emu yɛ den ano wɔ Nasi nniso, Kɔmunis nniso, anaa n’abien nyinaa ano mu binom. Hwɛ sɛnea osuahu a ɛte saa hyɛ gyidi den!

Nokwarem no, m’asetra ayɛ nea etu mpɔn wɔ Yehowa som mu! Honhom mu nhyira horow a ɔde ma to ntwa da. Na nea ɛnte sɛ honam fam ahonyade no, dodow a yɛne afoforo kyɛ nneɛma a ɛsom bo yi no, dodow no ara na yɛn ahode dɔɔso. Ɛtɔ mmere bi a mete sɛ ebinom ka sɛ ɛkaa wɔn nko a anka wɔantete wɔn sɛ Yehowa Adansefo. Wɔka sɛ wɔte nka sɛ anka wɔbɛkyerɛ Bible mu nokware no ho anigye kɛse sɛ wodii kan bɔɔ bra wɔ Onyankopɔn ahyehyɛde no akyi a.

Sɛ mete sɛ mmofra ka nsɛm a ɛte saa a, ɛhaw me bere nyinaa, efisɛ wɔreka ankasa sɛ ɛnyɛ papa sɛ wɔde Yehowa akwan ho nimdeɛ bɛtete wɔn. Nanso, susuw subammɔne ne nsusuwii bɔne a ɛsɛ sɛ nkurɔfo gyae bere a wohu Bible mu nokware wɔ asetram akyiri no ho hwɛ. M’ani sɔ bere nyinaa sɛ m’awofo tetee wɔn mma baasa no nyinaa wɔ trenee kwan so. John kɔɔ so dii nokware sɛ Yehowa somfo kosii sɛ owui wɔ July 1980 mu, na Esther nso akɔ so adi nokware sɛ Ɔdansefo besi nnɛ.

Sɛ mehwɛ m’akyi a, ɛyɛ me anigye pii sɛ me ne Kristofo anokwafo mmarima ne mmea pii anya ayɔnkofa. Mprempren mede bɛboro mfe 67 na asom anigye so wɔ Betel. Ɛwom sɛ manware da de, nanso mewɔ honhom fam mmabarima ne mmabea pii ne honhom fam mmanananom. Na m’ani gye bere a misusuw adɔfo foforo a wɔwɔ yɛn wiase nyinaa honhom fam abusua no mu a minnya nhyiaa wɔn, a wɔn mu biara som bo ho no. Hwɛ sɛnea nsɛm yi yɛ nokware: “[Yehowa, NW] nhyira na ɛyɛ ɔdefo.”—Mmebusɛm 10:22.

[Ase hɔ asɛm]

[Mfonini wɔ kratafa 20]

Efi benkum kɔ nifa so: me papa a me nua John si ne nan so, Esther, me, ne me maame

[Mfonini ahorow wɔ kratafa 23]

Merekyerɛ Gilead adesuakuw ade wɔ 1945 mu

Atifi nifa so: Gilead Sukuu akyerɛkyerɛfo Eduardo Keller, Fred Franz, me, ne Albert Schroeder

[Mfonini wɔ kratafa 24]

Meresusuw m’asetra a atu mpɔn wɔ Yehowa som mu ho