Bɔ W’ahonim Ho Ban

ƐYƐ hu ankasa sɛ wobɛtra wimhyɛn a mfomso wɔ kɔmputa nhyehyɛe a ɛkyerɛ no kwan no mu. Fa no sɛ obi asakra kɔmputa dwumadi a ɛwɔ wimhyɛn no mu anaa wahyɛ da ama no akwankyerɛ bɔne! Saa pɛpɛɛpɛ na wɔ sɛnkyerɛnne kwan so no, obi rebɔ mmɔden sɛ ɔbɛyɛ w’ahonim. Wasi ne bo sɛ ɔbɛsɛe nea wode bɔ wo ho ban wɔ abrabɔ mu no. Ne botae ne sɛ ɔbɛma wo ne Nyankopɔn adi asi!—Hiob 2:2-5; Yohane 8:44.

Hena ne ɔsɛefo otirimɔdenfo yi? Wɔ Bible mu no wɔfrɛ no ‘ɔwɔ dedaw, ɔbonsam ne Satan, nea ɔdaadaa amanaman nyinaa no.’ (Adiyisɛm 12:9) Wohuu no sɛ ɔreyɛ saa wɔ Eden turo no mu, ɔnam nnaadaa so hyɛɛ Hawa nkuran sɛ ommu n’ani ngu nea onim sɛ ɛyɛ nokware no so na ɔntew atua ntia Nyankopɔn. (Genesis 3:1-6, 16-19) Efi saa bere no, Satan nam atoro ahyehyɛde nyinaa so aboa ma ɔtan abɛda nnipa nyinaa ne Nyankopɔn ntam. Ahyehyɛde yi mu nea ɛho wɔ asɛm sen biara ne atoro som.—2 Korintofo 11:14, 15.

Atoro Som Sɛe Ahonim

Wɔka atoro som ho asɛm wɔ Adiyisɛm nhoma no mu sɛ sɛnkyerɛnne kwan so aguaman a wɔfrɛ no Babilon Kɛse. Ne nkyerɛkyerɛ no akyea adwene a nnipa pii wɔ wɔ abrabɔ ho no, na ama wɔtan wɔn a ɛsono wɔn gyidi no na wɔyɛ wɔn basabasa mpo. Nokwasɛm ni, sɛnea Adiyisɛm kyerɛ no, atoro som nsam titiriw na Onyankopɔn bebisa “wɔn a wɔakum wɔn asase so no nyinaa mogya” a Onyankopɔn ankasa asomfo ka ho afi.—Adiyisɛm 17:1-6; 18:3, 24.

Yesu bɔɔ n’asuafo no kɔkɔ wɔ sɛnea atoro som bɛsɛe abrabɔ gyinapɛn akodu ho bere a ɔkae sɛ: “Wobetu mo afi hyiadan mu; mpo ɛbere reba a obiara a obekum mo besusuw sɛ ɔde resom Nyankopɔn” no. Hwɛ sɛnea basabasayɛfo a wɔte saa no ani afura wɔ abrabɔ fam! Yesu kae sɛ: ‘Wonhuu agya no ne me ɛ.’ (Yohane 16:2, 3) Yesu kaa saa nsɛm no akyi bere tiaa bi no, nyamesom akannifo a wɔn ahonim ammu wɔn fɔ no bi yɛ ma wokum ɔno ankasa. (Yohane 11:47-50) Nea ɛne eyi bɔ abira no, Yesu kae sɛ wɔde ɔdɔ a ɛwɔ ne nokware akyidifo no ntam no na ebehu wɔn. Nanso wɔn dɔ no mu da so ara trɛw, ma ebi ka wɔn atamfo mpo.—Mateo 5:44-48; Yohane 13:35.

Ɔkwan foforo a atoro som nam so asɛe nkurɔfo pii ahonim ne sɛ ɛhyɛ abrabɔ biara a nkurɔfo ani gye ho no ho nkuran sɛ́ eye anaasɛ  enye. Bere a ɔsomafo Paulo rehyɛ eyi ho nkɔm no ɔkae sɛ: “Na ɛbere bi bɛba a wɔrentie ɔkyerɛ pa a eye no, na sɛ wɔn asom yɛ wɔn hene nti, wɔbɛsoa akyerɛkyerɛfo aboa wɔn ho so, sɛnea wɔn ankasa akɔnnɔ te.”—2 Timoteo 4:3.

Nnansa yi, nyamesom akannifo nunu nkurɔfo asom denam ka a wɔka sɛ Nyankopɔn betumi apene nna mu kyɛfa a obi nya wɔ n’aware mu hokafo akyi no so. Afoforo nso pene nnipa a wokura bɔbeasu koro a wɔne wɔn ho da so. Nokwarem no, asɔfo binom ankasa de wɔn ho hyɛ nnipa a wokura bɔbeasu koro ntam nna mu denneennen. Asɛm bi a epuei wɔ Britania nsɛmma nhoma The Times mu kae sɛ, wɔapene “asɔfo dumiɛnsa a wonim wɔn yiye sɛ wɔyɛ mmarima a wɔne mmarima da” no so kɔ Bagua a Ɛhwɛ Church of England so no mu. Sɛ asɔre akannifo pa Bible abrabɔ gyinapɛn no na wɔn asɔre ahorow no nso anyɛ hwee wɔ ho a, gyinapɛn bɛn na wɔn asɔremma no bekura? Ɛnyɛ nwonwa koraa sɛ nnipa ɔpepem pii adwene atu afra.

Hwɛ sɛnea eye sɛ yɛbɛma abrabɔ ho akwankyerɛ pa ne honhom mu nokware a efi Bible no mu no abɔ yɛn ho ban! (Dwom 43:3; Yohane 17:17) Sɛ nhwɛso no, Bible no kyerɛkyerɛ sɛ aguamammɔfo ne awaresɛefo “rennya Onyankopɔn ahenni no.” (1 Korintofo 6:9, 10) Ɛka kyerɛ yɛn sɛ mmarima ne mmea a wɔde “honam fam ayɔnkofa yɛbea a ɛyɛ ne kwan so no sesaa nea ɛmfa ne kwan so” no “yɛɛ adapaade” wɔ Nyankopɔn ani so. (Romafo 1:26, 32) Nokwasɛm a ɛfa abrabɔ ho yi nyɛ bɔsrɛmka a efi nnipa a wɔnyɛ pɛ hɔ; ɛyɛ gyinapɛn a efi Nyankopɔn home mu, a ontwaa mu da. (Galatifo 1:8; 2 Timoteo 3:16) Nanso Satan wɔ akwan foforo a ɔnam so sɛe ahonim no.

Yɛ Nyiyim Wɔ Anigyede Mu

Ɛsono sɛ wobɛhyɛ obi ma wayɛ bɔne, na ɛsono sɛ wobɛma wanya ɔpɛ sɛ ɔbɛyɛ saa bɔne no. Eyi ne Satan “wiase sodifo” no botae. Sɛnea ɛbɛyɛ a ɔde ne nsusuwii bɔne no bɛhyɛ nkwasea anaa wɔn a wɔn ani nna hɔ—titiriw wɔn a wɔyɛ mmerɛw, mmofra—tirim ne wɔn adwenem no, ɔma wonya nneɛma a asɛm wɔ ho te sɛ nhoma, sini, nnwom, kɔmputa so agodie, ne intanɛt so nguamansɛm ho anigye.—Yohane 14:30; Efesofo 2:2.

Pediatrics nsɛmma nhoma no bɔ amaneɛ sɛ: “Mmofra [a wɔwɔ United States] hwɛ basabasayɛ a ne dodow si 10 000 afe biara, na dwumadi a wɔahyɛ da ayɛ ama mmofra no na basabasayɛ a enye koraa wɔ so.” Amanneɛbɔ no san da no adi sɛ, “afe biara, mmofra a wɔadu mpanyin afe so hwɛ nguamansɛm, mfonini a ɛtwe wɔn adwene kɔ nneɛma bɔne so, ne nsɛnkwaa 15 000.” Ɛkae mpo sɛ bere a nnipa pii hwɛ television anadwo no, “woyi nguamansɛm bɛboro awotwe dɔnhwerew biara, na ɛboro nea na woyi wɔ 1976 mu no mpɛn anan.” Na ɛnyɛ nwonwa koraa sɛ nhwehwɛmu no san kyerɛe  sɛ “kasafi redɔɔso ntɛmntɛm” no. Nanso, Bible no ne nyansahu nhwehwɛmu ahorow bɔ kɔkɔ sɛ sɛ nkurɔfo taa de wɔn ho hyɛ nneyɛe a ɛtete saa mu ma ɛka wɔn hɔ a, ɛsɛe wɔn koraa. Enti sɛ wopɛ sɛ wosɔ Nyankopɔn ani ampa na esi wo yiye a, tie kɔkɔbɔ a ɛwɔ Mmebusɛm a ɛka sɛ: “Kora wo koma so sen nea wode sie nyinaa, na emu na nneyɛe nyinaa fi” no.—Yesaia 48:17.

Nnwom a agye din no nso pii sɛe ahonim. Amanneɛbɔ bi a ɛwɔ Australia atesɛm krataa The Sunday Mail mu no bɔ kɔkɔ sɛ, odwontofo bi a ne nnwom agye din kɛse wɔ Atɔe fam aman pii so no “bɔ mmɔden kɛse sɛ ɔbɛma nkurɔfo ho adwiriw wɔn.” Krataa no ka sɛ ‘ne nnwom no kamfo nnubɔne, mogyafra ne mmonnaato, na ne nnwom bi kyerɛ sɛ obekum ne yere atow ne funu akyene ɔtare mu.’ Nnwom no bi mu nsɛm mfata koraa sɛ yɛbɛka wɔ ha. Nanso ne nnwom no ma no nyaa abasobɔde a edi mũ. So wobɛpɛ sɛ wode nsusuwii a ɛyɛ abofono te sɛ nea yɛabobɔ din no bɛhyɛ w’adwene ne wo koma mu, sɛ wɔde hyehyɛ nnwom mu ma ɛyɛ sɛnea ɛyɛ dɛ mpo a? Dabida, efisɛ wɔn a wɔyɛ wɔn ade wɔ saa kwan no so no sɛe wɔn ahonim na awiei koraa no wonya “koma bɔne,” na ɛma wɔbɛyɛ Nyankopɔn atamfo.—Hebrifo 3:12; Mateo 12:33-35.

Enti paw w’anigyede nyansam. Bible ka kyerɛ yɛn sɛ: “Nea ɛyɛ nokware, nea anim yɛ duru, nea ɛteɛ, nea ɛho tew, nea ɛwɔ ɔdɔ, na ɛwɔ din pa, sɛ ɔbra pa bi wɔ hɔ a, sɛ ayeyi bi wɔ hɔ a, saa nneɛma yi ho na munnwen.”—Filipifo 4:8.

Fekubɔ Ka W’ahonim

Neil ne Franz ne Kristofo a wodi nokware nyaa fekubɔ a ɛfata bere a wɔyɛ mmofra no. * Neil kae sɛ, nanso bere kɔɔ so no, “mifii ase de me ho bɔɔ fekubɔne.” Nea efii mu bae a ɛyɛ no yaw yiye ne nsɛmmɔnedi ne afiasenna. Asɛm koro no ara na ɛtoo Franz? Ɔka sɛ: “Misusuwii sɛ metumi ahwɛ me ho yiye bere a me ne mmofra a wɔwɔ wiase no mu bɔ no a merenyɛ nea wɔyɛ no bi, nanso sɛnea Galatifo 6:7 ka no “Onyankopɔn wonsi no atwetwe; efisɛ nea onipa gu no, ɛno ara na obetwa.” Ɔhaw a ɛtoo me no ma midii yaw sɛ midii mfomso na na Yehowa asɛm na ɛyɛ nokware. Wɔde me akɔto afiase me nkwa nna nyinaa wɔ bɔne bi a mayɛ ho.”

Nnipa te sɛ Neil ne Franz ntaa mfa wɔn ho nhyɛ basabasayɛ mu prɛko pɛ; nea edi kan no, wɔbɛte nka sɛ nyansa biara nnim. Wofi ase nkakrankakra, nea edi kan taa yɛ fekubɔne a wɔde wɔn ho kɔbɔ. (1 Korintofo 15:33) Nnubɔnenom anaa asanom mmoroso na ebia ebedi hɔ. Nokwasɛm ni, wɔka ahonim ho asɛm ma ɛfata sɛ “nipasu no fa a mmosa tumi nya so tumi.” Ɛno akyi no, ɛnyɛ den sɛ wɔde wɔn ho bɛhyɛ basabasayɛ anaa abrabɔ bɔne mu.

Ɛnde, dɛn nti na ɛsɛ sɛ wode wo ho hyɛ nea edi kan no mu? Sɛ anka wobɛyɛ saa no,  wo ne anyansafo a wɔdɔ Nyankopɔn ampa no mmɔ. Wobetumi aboa wo ma w’ahonim ayɛ den sɛnea ɛbɛyɛ a ɛbɛbɔ wo ho ban yiye, na woade wo ho afi ɔyaw pii mu. (Mmebusɛm 13:20) Ɛwom sɛ Neil ne Franz da so ara wɔ afiase de, nanso wohu sɛ wɔn ahonim yɛ akyɛde a efi Nyankopɔn nkyɛn a ɛsɛ sɛ wɔtete no yiye, na wɔkyerɛ ho anisɔ. Bio nso, wɔrebɔ mmɔden ne wɔn Nyankopɔn Yehowa anya abusuabɔ pa. Yɛ onyansafo, na sua biribi fi wɔn mfomso no mu.—Mmebusɛm 22:3.

Hwɛ W’ahonim Yiye

Sɛ yenya ɔdɔ ma Nyankopɔn na yenya ne mu gyidi ne osuro pa a, na yɛreda no adi sɛ yɛpɛ sɛ yɛhwɛ yɛn ahonim yiye. (Mmebusɛm 8:13; 1 Yohane 5:3) Bible no da no adi sɛ obi a nneɛma a ɛte saa nkyerɛ n’ahonim kwan no, ntaa mmɔ bra pa. Sɛ nhwɛso no, Dwom 14:1 ka biribi fa wɔn a wɔka wɔ wɔn koma mu sɛ: ‘Yehowa biara nni hɔ’ no ho. Ɔkwan bɛn so na gyidi a wonni yi ka wɔn asetra? Nkyekyem no toa so sɛ: “Wɔasɛe wɔn nneyɛe ayɛ no akyide, obi nni hɔ a ɔyɛ papa.”

Nnipa a wonni Nyankopɔn mu gyidi ankasa no nso nni daakye ho anidaso a emu yɛ den. Enti nea wobenya no nnɛ nkutoo na ehia wɔn, na wodi honam akɔnnɔ akyi. Wɔn asɛm a wɔka ara ne sɛ: “Momma yennidi na yɛnnom, na ɔkyena na yɛawu.” (1 Korintofo 15:32) Wɔ ɔkwan foforo so no, wɔn a wɔhwɛ daa nkwa akatua no kwan no mma anigyede a ɛwɔ wiase a ɛretwam no nsesa wɔn adwene. Te sɛ kɔmputa a edi mũ a ɛkyerɛ wimhyɛn kwan no, wɔn ahonim a wɔatete no no kyerɛ wɔn kwan ma wofi nokwaredi mu yɛ osetie ma Nyankopɔn.—Filipifo 3:8.

Sɛnea ɛbɛyɛ a w’ahonim bɛkɔ so ayɛ den na akyerɛ wo kwan yiye no, ehia sɛ woma Nyankopɔn Asɛm kyerɛ no kwan daa. Bible no ka kyerɛ yɛn sɛ akwankyerɛ a ɛte saa wɔ hɔ bere a ɛka wɔ sɛnkyerɛnne kwan so sɛ: “W’aso nso bɛte w’akyi asɛm bi sɛ: Eyi ne kwan, sɛ mofa nifa oo, mofa benkum oo, monnantew so” no. (Yesaia 30:21) Enti nya bere ma wo Bible akenkan da biara da. Eyi bɛboa wo na ahyɛ wo nkuran bere a worepere ayɛ nea ɛteɛ anaa bere a dadwen ahyɛ wo so no. Nya awerɛhyem sɛ sɛ wode wo ho to Yehowa so a, ɔbɛbɔ wo ho ban wɔ abrabɔ fam ne honhom fam. Yiw, suasua odwontofo a ɔkyerɛwee sɛ: “Mede [Yehowa, NW] masi m’anim daa yi, na ɔwɔ me nifa yi, merenhim” no.—Dwom 16:8; 55:22.

[Ase hɔ asɛm]

[Mfonini ahorow wɔ kratafa 5]

Atoro som a wɔka ho asɛm wɔ Bible mu sɛ “Babilon Kɛse,” no na ɛsɛe nnipa pii ahonim no

[Asɛm Fibea]

Priest blessing troops: U.S. Army photo

[Mfonini ahorow wɔ kratafa 6]

Basabasayɛ ne ɔbrasɛe a wobɛhwɛ wɔ television so no bɛsɛe w’ahonim

[Mfonini wɔ kratafa 7]

Akwankyerɛ a efi Nyankopɔn Asɛm mu a wubenya no daa no bɛbɔ w’ahonim ho ban