Nsɛmmisa a Efi Akenkanfo Hɔ

So Yehowa ne Abraham yɛɛ N’apam no wɔ Ur anaa Haran?

Yehu apam a Yehowa dii kan ne Abraham yɛe no ho kyerɛwtohɔ wɔ Genesis 12:1-3, a ɛka sɛ: “[Yehowa, NW] ka kyerɛɛ Abram sɛ: Wo de, fi w’asase so ne w’abusua mu ne w’agya fi, kɔ asase a mɛkyerɛ wo no so. Na mɛyɛ wo ɔman kɛse . . . na wo mu na wobehyira asase so mmusua nyinaa.’” * Ebetumi aba sɛ Yehowa ne Abraham yɛɛ apam yi bere a na Abraham wɔ Ur no, na wɔhyɛɛ mu den bere a na Abraham wɔ Haran no.

Wɔ afeha a edi kan no mu no Stefano twee adwene sii ahyɛde a Yehowa de maa Abraham sɛ ontu nkɔ Kanaan no so. Bere a ɔne Sanhedrin no rekasa no, ɔkae sɛ: ‘Anuonyam Nyankopɔn yii ne ho kyerɛɛ yɛn agya Abraham bere a ɔwɔ Mesopotamia ansa na ɔrebɛtra Haran no, na ɔka kyerɛɛ no sɛ: ‘Fi w’asase so ne w’abusua mu, na bra asase a mɛkyerɛ wo no so!’ (Asomafo no Nnwuma 7:2, 3) Ná Abraham fi Ur, na sɛnea Stefano kyerɛ no, ɛhɔ na odii kan tee ahyɛde a ese omfi hɔ nkɔ Kanaan no. (Genesis 15:7; Nehemia 9:7) Stefano anka apam a Onyankopɔn ne Abraham yɛe ho asɛm, nanso, wɔ Genesis 12:1-3 no, wɔde apam no bataa ahyɛde a ese ɔnkɔ Kanaan no ho. Enti ntease wom sɛ yebegye adi sɛ Yehowa ne Abraham yɛɛ apam no wɔ Ur.

Nanso, sɛ yɛkenkan Genesis kyerɛwtohɔ no yiye a ɛda adi sɛ Yehowa san tĩĩ ɔne Abraham apam no mu wɔ Haran, sɛnea otĩĩ mu wɔ Kanaan na ɔkaa afã horow ho nsɛm mpɛn pii wɔ Kanaan no. (Genesis 15:5; 17:1-5; 18:18; 22:16-18) Sɛnea Genesis 11:31, 32 kyerɛ no, Abraham agya Tera fii Ur kɔɔ Kanaan a na Abraham, Sara, ne Lot ka no ho. Wɔbaa Haran bɛtraa hɔ kosii sɛ Tera wui. Abraham traa Haran kyɛe nyaa ahode pii. (Genesis 12:5) Bere bi akyi no, Abraham nua Nahor nso tu bɛtraa hɔ.

Bere a wɔkyerɛw Tera wu ho asɛm akyi no, Bible no bɔ Yehowa asɛm a ɔka kyerɛɛ Abraham no ho amanneɛ na ɛkɔ so ka sɛ: “Na Abram kɔe sɛnea [Yehowa, NW] ka kyerɛɛ no no.” (Genesis 12:4) Enti, Genesis 11:31–12:4 de adanse a emu yɛ den ma sɛ Yehowa kaa nsɛm a wɔakyerɛw wɔ Genesis 12:1-3 no wɔ Tera wu akyi. Sɛ saa na ɛte a, ɛnde na Abraham fii Haran kɔɔ asase a Yehowa kyerɛɛ no, wɔ ahyɛde a na ɔtee nkyɛe ne nea na wate wɔ mfe bi a abɛsen wɔ Ur no so.

Sɛnea Genesis 12:1 kyerɛ no, Yehowa hyɛɛ Abraham sɛ: “Fi w’asase so ne w’abusua mu ne w’agya fi.” Bere bi no, na Abraham ‘kurom’ ne Ur, na na n’agya “fi” wɔ hɔ. Nanso, Abraham agya de ne fiefo kɔɔ Haran, na Abraham frɛɛ hɔ sɛ ne kurow. Bere a okodii Kanaan mfe pii akyi no, ɔsomaa n’akoa sɛ ɔnkɔ ‘ne kurow ne n’abusua mu’ nkɔware yere mma Isak, na akoa no kɔɔ “Nahor kurow” (a ebia ɛyɛ Haran anaa baabi a ɛbɛn hɔ) mu. (Genesis 24:4, 10) Ɛhɔ na akoa no huu Rebeka a ɔyɛ Abraham busuani wɔ Nahor abusua kɛse no mu.—Genesis 22:20-24; 24:15, 24, 29; 27:42, 43.

Stefano kae wɔ Abraham ho wɔ ne kasa a ɔmae wɔ Sanhedrin no mu sɛ: ‘Na n’agya wu akyi no, Onyankopɔn maa ofii hɔ bɛtraa asase yi a mote so nnɛ yi so.’ (Asomafo no Nnwuma 7:4) Eyi kyerɛ sɛ Yehowa ne Abraham dii nkitaho wɔ Haran. Ntease wom sɛ yebegye atom sɛ Yehowa san tii n’apam a ɔne Abraham yɛe no mu saa bere no sɛnea wɔaka ho asɛm wɔ Genesis 12:1-3 no, efisɛ apam no dii dwuma wɔ bere a Abraham tu kɔɔ Kanaan no. Enti nokwasɛm a yɛasusuw ho no nyinaa ma yɛde asɛm no ba awiei sɛ ebetumi aba sɛ Yehowa ne Abraham pamee wɔ Ur na ɔhyɛɛ mu den wɔ Haran.

[Ase hɔ asɛm]