Wuhia Ahonim a Wɔatete No

Na ɛte sɛ da titiriw ma wɔn a na wɔte Air New Zealand Flight 901 wimhyɛn mu rekɔ Antartica no. Na wɔn a wotwa mfonini ayɛ krado, na wɔn a wɔwɔ wimhyɛn no mu no wɔ anigye mu bere a DC-10 no bɛn Antartica na ɛbaa fam sɛnea ɛbɛyɛ a akwantufo no befi wim ahu sɛnea asase no yɛ fɛ fa no.

NÁ WIMHYƐN no kwankyerɛfo a ɔde mfe 15 aka wimhyɛn no de bɛboro nnɔnhwerew 11,000 na atwa kwan. Ansa na ɔrebetu hyɛn no, ɔhwɛɛ nhyehyɛe a wɔayɛ ama akwantu no a na ɛwɔ ne wimhyɛn kɔmputa so no yiye, na na onnim sɛ mfomso wɔ nsɛm a wɔbɔ hyɛɛ kɔmputa no so no mu. Bere a wɔnam omununkum no mu rekɔ no na kwan a ɛda wɔne asase ntam bɛyɛ mita 600 pɛ no, DC-10 no kɔbɔɔ Bepɔw Erebus mu, ma nnipa 257 a wɔwɔ mu no nyinaa wuwui.

Sɛnea wɔnam kɔmputa so na ɛkyerɛ wimhyɛn ahorow a ɛwɔ hɔ nnɛ no kwan no, saa ara na wɔama adesamma ahonim ma abɔ wɔn ho ban wɔ wɔn asetra kwan nyinaa mu. Na asiane a ɛyɛ hu a ɛtoo Flight 901 no betumi ama yɛanya yɛn ahonim ho asuade a tumi wom kɛse. Sɛ nhwɛso no, sɛnea wimhyɛn ahobammɔ gyina akwantu ho nhyehyɛe ne akwankyerɛ pa so no, saa ara na yɛn honhom fam, abrabɔ fam, ne mpo honam fam yiyedi gyina ahonim a ɛyɛ adwuma a abrabɔ pa ho akwankyerɛ a ɛfata kyerɛ no kwan so.

Awerɛhosɛm ne sɛ, wɔ nnɛ wiase yi mu no, abrabɔ ho akwankyerɛ reyera ntɛmntɛm anaasɛ wɔrebu ani gu so. Amerikani kyerɛkyerɛfo bi kae sɛ: “Yɛte sɛnea United States sukuuni abarimaa ntumi nkenkan ade, ntumi nkyerɛw ade na ontumi nsua asase mfonini ho ade no ho nsɛm pii. Ɛyɛ nokware nso sɛ ontumi nyiyi papa ne bɔne mu. Ɛdefa nhomasua mu nsɛnnennen ho no, ɛsɛ sɛ yɛde sukuufo no adwene a atu afra kɛse wɔ abrabɔ ho no ka akenkan ne akyerɛw ne nkontaabu a wonnim no ho.” Ɔkae bio sɛ, “nnɛyi mmofra te wiase bi a wɔnkyerɛkyerɛ abrabɔ ho nsɛm mu yiye mu. Wode bisa wɔn mu biako sɛ ebia onim nsonsonoe a ɛda ‘papa ne bɔne’ ntam anaa, anka nea wubehu ara ne sɛ ɔbɛyɛ basaa, ontumi nkasa, ehu bɛka no, na ɔbɛyɛ te sɛ obi a onni ahotoso. . . . Sɛ wɔkɔ kɔlege a, asɛm no sɛe koraa sen sɛ anka ɛbɛyɛ yiye.

Ade biako a ɛde adwene a atu afra yi aba ne adwene a ɛne sɛ obiara betumi apaw nea n’ankasa pɛ, nsusuwii a abu so a ɛne sɛ obiara gyina n’ankasa anaa n’amammerɛ so na ɛpaw ne gyinapɛn ahorow a ɔpɛ. Susuw ho hwɛ sɛ sɛ wimhyɛnkafo nni akwankyerɛ pɔtee bi a wɔhwɛ so na mmom wɔhwɛ nkanea a entumi nnyina faako anaasɛ ɛtɔ mmere bi a edunnum a, anka dɛn na ebesi! Akyinnye biara nni ho sɛ asiane ahorow te sɛ nea esii wɔ Bepɔw Erebus so no bi na ebesisi. Saa ara na esiane sɛ wiase no agyae abrabɔ gyinapɛn ahorow a wɔde asi hɔ akyidi nti, ehu ne awerɛhow ne awuwuawuwu ahyɛ wiase no ma na awaresɛe repaapae mmusua mu ma nnipa ɔpepem pii rehu amane esiane AIDS anaa nyarewa foforo bi a wonya fi nna mu nti.

Ɛte sɛ nea nyansa wɔ yɛ a obi bɛyɛ nea ɔpɛ no mu, nanso nokwasɛm ankasa ne sɛ wɔn a wosusuw saa no te sɛ tete Niniwefo a na wonnim ‘wɔn nifa ne wɔn benkum no.’ Wɔn a wokura saa adwene no te sɛ Israelfo awaefo a wɔfrɛɛ  “bɔne sɛ papa, ne papa sɛ bɔne” no.—Yona 4:11; Yesaia 5:20.

Enti ɛhe na yebetumi adan akɔ akonya mmara ne nnyinasosɛm ahorow a emu da hɔ fann a yɛde bɛtete yɛn ahonim na abɔ ho ban? Nnipa mpempem pii ahu sɛ Bible no tumi di saa ahiade no ho dwuma wɔ ɔkwan a etu mpɔn so. Bible no ka abrabɔ, adwumayɛ, mmofra ntetee, ne Onyankopɔn ho nsɛm a ɛho hia nyinaa ho nsɛm. (2 Timoteo 3:16) Ada adi sɛ ɛyɛ nea wotumi de ho to so koraa wɔ mfehaha pii mu. Esiane sɛ obi a ɔwɔ tumi sen biara, yɛn Bɔfo no, na ɔhyehyɛɛ abrabɔ ho gyinapɛn ahorow a ɛwɔ Bible mu no nti, ɛho hia ma nnipa nyinaa. Ɛno nti, ɛho nhia sɛ yɛtra ase a yennim papa ne bɔne ho hwee.

Nanso, nnansa yi, w’ahonim ho aba asɛm sen bere biara. Ɛyɛɛ dɛn na ɛbaa saa? Na wobɛyɛ dɛn atumi abɔ w’ahonim ho ban? Ɔkwan pa a wubetumi afa so ne sɛ wubehu nea ɔde ntua no ba ne akwan a ɔfa so de ba. Yebesusuw eyi ho wɔ asɛm a edi hɔ no mu.