Wudi Nyaatwomyɛ Ho Dwuma Dɛn?

YUDA ISKARIOT kɔɔ Yesu nkyɛn ‘kɔfew n’ano’ wɔ Getsemane turo no mu. Na wɔtaa yɛ eyi de da ɔdɔ adi. Nanso nea Yuda yɛe no yɛ ɔkwan a ɔfaa so yii Yesu maa wɔn a na wɔrebɛkyere no anadwo no ara kɛkɛ. (Mateo 26:48, 49) Na Yuda yɛ nyaatwomni—obi a ɔma nkurɔfo hu no ɔkwan foforo so, obi a ɔyɛ ne ho sɛ oye nanso onye. Hela asɛmfua a wɔkyerɛ ase “nyaatwom” no kyerɛ “obi a obua nsɛm” anaa obi a oyi aseresɛm wɔ agohwɛbea. Akyiri yi, na wɔde asɛmfua no gyina hɔ ma obi a ɔyɛ biribi de daadaa nkurɔfo.

Wudi nyaatwomyɛ ho dwuma dɛn? Sɛ nhwɛso no, sɛ wuhu sɛ wɔn a wɔyɛ sigaret no kamfo ne nom kyerɛ ɛmfa ho sɛ nnuruyɛfo ka sɛ edi awu no a, wo bo fuw? So wo bo fuw bere a wuhu sɛ nyaatwomyɛ ma nkurɔfo a wɔhwɛ afoforo so no yɛ wɔn ayayade no? Sɛ wuhu sɛ w’adamfo bi a wowɔ ne mu ahotoso abɛdan ɔfatwafo a, ɛhaw wo? Ɔkwan bɛn so na nyamesom mu nyaatwomyɛ ka wo?

“Munnue, . . . Nyaatwomfo!”

Susuw nneɛma a na ɛkɔ so wɔ nyamesomfo mu bere a na Yesu wɔ asase so no ho hwɛ. Na kyerɛwfo ne Farisifo no yɛ wɔn ho sɛ Onyankopɔn Mmara no ho akyerɛkyerɛfo anokwafo, nanso nokwarem no, na wɔde nnipa nkyerɛkyerɛ a ɛdan nkurɔfo adwene fi Onyankopɔn ho na ɛma. Na kyerɛwfo ne Farisifo no hyɛ nkurɔfo bere nyinaa ma wodi Mmara no mu nsɛm so, nanso na wɔn ankasa mfa emu nnyinasosɛm akɛse a ɛne ɔdɔ ne mmɔborohunu no nni dwuma. Na wɔma obiara hu wɔ baguam sɛ wɔsom Onyankopɔn, nanso na wodi bɔne akɛse wɔ sum ase. Na wɔnyɛ nea wɔka. Na wɔyɛ wɔn nnwuma nyinaa “sɛnea nnipa behu wɔn.” Na wɔte sɛ “ɔda a wɔasra ho a ɛho a wohu yɛ fɛ, na emu de, afunu nnompe ne efi nyinaa ayɛ no ma.” Yesu de akokoduru kaa wɔn anim mpɛn pii sɛ: “Mo kyerɛwfo ne Farisifo, nyaatwomfo, munnue!”—Mateo 23:5, 13-31.

Sɛ na wowɔ hɔ saa bere no a, anka w’ani nnye nyamesom mu nyaatwomyɛ a ɛte saa no ho koraa te sɛ nnipa komapafo afoforo no ara. (Romafo 2:21-24; 2 Petro 2:1-3) Nanso, anka wobɛma kyerɛwfo ne Farisifo no nyaatwomyɛ no ahaw wo ma woakwati nyamesom biara a nea Yesu Kristo ne n’asuafo no kaa ho asɛm na wɔde bɔɔ wɔn bra no ka ho? Anka ɛno ntumi nyɛ asiane mma wo?

Nyamesomfo nyaatwomyɛ betumi ama yɛde abufuw apo nyamesom. Nanso, saa a yɛbɛyɛ no nso betumi ama yɛabu yɛn ani agu nokware asomfo nokwaredi so. Nyaatwomyɛ a yɛbɛpɛ sɛ yɛkwati no nso betumi ama yɛatwe yɛn ho afi nnamfo pa ho. Enti ɛsɛ sɛ yɛfa ɔkwan a ntease wom na ɛkari pɛ so di nyaatwomyɛ ho dwuma.

‘Mo Ani Nna Hɔ’

Nea edi kan no, ɛsɛ sɛ yetumi hu wɔn a wɔyɛ nyaatwomfo no. Eyi nyɛ mmerɛw bere nyinaa. Asɛnkɛse bi a ɛtoo abusua bi na ɛmaa  wɔtee ase. Ɛna no yare maa ade tɔɔ no so. Abusua no de ayaresabea a asɛm yi sii hɔ no kɔɔ asɛnnibea na wɔhwehwɛɛ mmaranimfo bi a na ɔsan yɛ ɛhɔ asɔre bi mu sɔfo. Ɛwom sɛ ayaresabea no tuaa dɔla ɔpepem 3.4 maa abusua no de, nanso ɛde ɔhaw kɛse na ɛbrɛɛ wɔn. Maame no wui ne hia mu, na wɔannya sika anyɛ n’ayi. Adɛn ntia? Efisɛ mmaranimfo no de sika no kɛse hyɛɛ ne ho. Mmaranim nhoma bi ka faa saa mmaranimfo yi ho sɛ: “Sɛ ne suban ho asɛm na na ɔka a . . . , anka ɛsɛ sɛ ɔka sɛ: Momma yɛmmɔ apoo.” Yɛbɛyɛ dɛn abɔ yɛn ho ban wɔ nnipa a wɔte saa ho?

Yesu tuu nkurɔfo a na wɔwɔ ne bere so a na wohu nyamesom mu nyaatwomyɛ bere nyinaa no fo sɛ wɔmma wɔn ‘ani nna hɔ.’ (Mateo 16:6; Luka 12:1) Ampa, ɛsɛ sɛ yɛma yɛn ani da hɔ. Nkurɔfo betumi ada nsusuwii pa adi na wɔayɛ wɔn ho sɛ nnipa a asɛm biara nni wɔn ho, nanso ɛsɛ sɛ yɛde yɛn ani to fam na amma yɛannye biribiara a wɔyɛ no antom kɛkɛ. Sɛ yehu sɛ wɔatwa sikabɔne afra nea ɛwɔ hɔ no mu a, so yɛrenhwɛ sika biara a yebenya no yiye?

Nyaatwomfo aba nokware Kristofo asafo no mpo mu. Osuani Yuda bɔɔ wɔn ho kɔkɔ sɛ: “Eyinom yɛ mo dɔ adidi mu nkekae, wɔne mo redidi, wɔmfɛre ade, wɔyɛn wɔn ho; wɔyɛ amununkum a nsu nni mu a mframa twetwe kyinkyini, nnua a ɛso nhaban aporow a enni aba na awuwu.”—Yuda 12.

‘Yɛn ani a yɛbɛma ada hɔ’ no kyerɛ sɛ yɛremma obi a ɔyɛ ne ho sɛ ɔwɔ ɔdɔ nanso ɔyɛ pɛsɛmenkominya na ɔhyɛ nkyerɛkyerɛ a ennyina Onyankopɔn Asɛm so ho nkuran no nnaadaa yɛn. Te sɛ ɔbotan kɛse bi a ɛhyɛ asubɔnten a atɛm dinn ase no, nipa a ɔte saa no betumi ama wɔn a wɔn ani nna hɔ no ahwe ase honhom fam. (1 Timoteo 1:19) Ebia obi a ɔyɛ nyaatwom no bɛyɛ ne ho sɛ obi a ɔma honhom fam ahotɔ, nanso na ɔte sɛ ‘amununkum a nsu nni mu’—nea mfaso biara nni so. Ɔdaadaafo a ɔte sɛ dua a ɛnsow aba biara no ntumi nsow aba pa a Kristofo sow no bi. (Mateo 7:15-20; Galatifo 5:19-21) Ampa, ɛsɛ sɛ yɛhwɛ yɛn ho yiye wɔ saa nnaadaafo yi ho. Nanso saa a yɛbɛyɛ no nkyerɛ sɛ ɛsɛ sɛ yesusuw adwemmɔne ma obiara.

“Mummmu Ntɛn”

Hwɛ sɛnea ɛyɛ mmerɛw koraa sɛ nnipa a wɔnyɛ pɛ bɛtwe adwene asi nkurɔfo mfomso so na wɔabu ani agu wɔn ankasa de so! Su a ɛte saa no ma yetumi bɛyɛ nyaatwomfo. Yesu kae sɛ: “Nyaatwomni! Yi mpuran no fi w’aniwa mu kan, ɛno ansa na wubehu ade yiye ayi duaa no afi wo nua aniwa mu.” Ɛfata sɛ yetie n’afotu yi: “Mummmu ntɛn, na wɔammu mo ntɛn. Na atɛn ko a mubu no, wɔde bebu mo; . . . Na adɛn na wohwɛ duaa a ɛwɔ wo nua aniwa mu, na wo ankasa aniwa mu mpuran de, wunhu?”—Mateo 7:1-5.

Sɛ ɛtɔ da na nkurɔfo yɛ wɔn ade te sɛ nyaatwomfo a, enni sɛ yɛpere yɛn ho ka sɛ wɔyɛ nyaatwomfo. Sɛ nhwɛso no, ɔsomafo Petro ‘twee ne ho fii’ agyidifo a wɔyɛ Amanaman mufo a wofi Antiokia no ho sɛnea ɛbɛyɛ a ɔbɛsɔ Yudafo a wofi Yerusalem aba no ani. ‘Petro ne afoforo nkɔnkɔnsa  no twetwee’ Barnaba nso. Petro daa su a ɛte saa adi ɛmfa ho sɛ ɔno na onyaa hokwan buee kwan maa Amanaman mufo baa Kristofo asafo no mu no. (Galatifo 2:11-14; Asomafo no Nnwuma 10:24-28, 34, 35) Nanso, mfomso a ɛte saa no nkyerɛ ankasa sɛ na Barnaba ne Petro te sɛ kyerɛwfo ne Farisifo no anaa na wɔte sɛ Yuda Iskariot.

“Mommma Nyaatwom Mmfra Ɔdɔ Mu”

Yesu tuu fo sɛ: “Sɛ woyɛ adɔe a, nhyɛn torobɛnto nni w’anim—sɛnea yɛ-ma-menhwɛfo no yɛ wɔ hyia adan mu ne mmorɔn so, na ama wɔanya nnipa anim anuonyam no.” (Mateo 6:2, Phillips) Ɔsomafo Paulo kyerɛwee sɛ: “Mommma nyaatwom mmfra ɔdɔ mu!” (Romafo 12:9) Ɔhyɛɛ aberante Timoteo nkuran sɛ onnya “ɔdɔ a efi koma kronn . . . ne gyidi a nyaatwom biara nnim mu.” (1 Timoteo 1:5, NW) Sɛ yɛwɔ ɔdɔ ne gyidi a edi mũ—na pɛsɛmenkominya ne nkontompo biara nnim—a, afoforo benya yɛn mu ahotoso. Yebetumi ama wɔn a yɛne wɔn bɔ no anya denhyɛ ne nkuranhyɛ a ɛfata. (Filipifo 2:4; 1 Yohane 3:17, 18; 4:20, 21) Na ne titiriw no, yebenya Yehowa anim dom.

Nanso, wɔ nyaatwomfo fam no, su a ɛte saa no kowie owu mu. Ɛyɛ dɛn ara a, nyaatwom no bɛda adi. Yesu Kristo kae sɛ: “Biribiara nni hɔ a ɛso akata a ɛrenna adi, anaa ahintaw a wɔrenhu.” (Mateo 10:26; Luka 12:2) Ɔhene nyansafo Salomo kae sɛ: “Nokware Nyankopɔn no de nneyɛe nyinaa bɛba atemmu mu, na nea ahintaw nyinaa nso, papa oo, bɔne oo, wabu so atɛn.”—Ɔsɛnkafo 12:14.

Nanso, adɛn nti na ɛsɛ sɛ yɛma ebinom nyaatwomyɛ haw yɛn araa ma enti yɛkwati nokware nnamfo a wɔwɔ ɔdɔ a edi mu no? Yebetumi ama yɛn ani ada hɔ a yɛrennya nkurɔfo ho adwemmɔne. Na ne papa mu no, momma yɛnna ɔdɔ ne gyidi a nyaatwom biara nnim adi.—Yakobo 3:17; 1 Petro 1:22.

[Mfonini ahorow wɔ kratafa 22, 23]

Anka wobɛma kyerɛwfo ne Farisifo no nyaatwomyɛ no ahaw wo ma woakwati Yesu Kristo ne n’asuafo no?