“Yebehyia Wɔ Onyankopɔn Ahenni Mu”

“Me Yɔnko Pa! Rupert, wɔabu me kumfɔ nnɛ. Nsu me. Mede me dɔ nkyia brɛ wo ne wo fiefo nyinaa. Yebehyia wɔ Onyankopɔn Ahenni mu.”

SAA nsɛm yi na Franc Drozg kyerɛwee wɔ June 8, 1942, bere a aka simma kakraa bi ma Nasi asraafo atow no tuo akum no no. Dɛn nti na wokum no?

Sɛnea kyerɛwtohɔ a ɛwɔ Ɔman Ahofadi Tete Nneɛma Akorae wɔ Maribor, Slovenia, kyerɛ no, saa ɔtomfo a na wadi mfe 38 no poe sɛ ɔbɛdɔm Wehrmannschaft, German asraafo a wɔde wɔn beguu Slovenia a na Germanfo agye hɔ afa no. Ná ɔyɛ Bibelforscher, anaa Bible Suani, sɛnea na wonim Yehowa Adansefo saa bere no wɔ saa beae no. Nea ɛne Yesaia 2:4 hyia no, na ɔrennyina Nasifo akodi no akyi, na ɔdaa ne ho adi sɛ Onyankopɔn Ahenni no akoa.—Mateo 6:33.

Ná wonim Franc wɔ ne kurow Ptuj mu sɛ Onyankopɔn Ahenni no ho dawurubɔfo a ɔyɛ nsi. (Mateo 24:14) Wɔ amanehunu nyinaa akyi no, ɔkaa asɛmpa no a wannyae kosi sɛ wɔkyeree no wɔ May 1942 mu.

Nasifo no taa Yehowa Adansefo a wɔwɔ Slovenia no pii denneennen. Franc yɛ wɔn a wodii kan kum wɔn no mu biako esiane ne som mu gyidi ahorow nti. Te sɛ afeha a edi kan mu Kristofo no, nsɛm a edi so yi hyɛɛ no den: “Etwa yɛn sɛ yɛnam amanehunu pii mu kɔ Onyankopɔn ahenni mu.” (Asomafo no Nnwuma 14:22) Gye a na ogye di sɛ saa ɔsoro nniso no yɛ paa ara no da adi wɔ ne nsɛm a etwa to yi mu, “Yebehyia wɔ Onyankopɔn Ahenni mu.”

[Mfonini Ahorow Fibea wɔ kratafa 32]

Franc Drozg: Photo Archive-Museum of National Liberation Maribor, Slovenia; letter: Original kept in Museum of National Liberation Maribor, Slovenia