Ahenni Adawurubɔfo Bɔ Amanneɛ

“Ɛnyɛ Ne Nɔma Ni”

WƆ Johannesburg, South Africa no, na Leslie ne Caroline de telefon redi nkurɔfo a wɔakɔ pɛnhyɛn a wɔtete beae a wɔabɔ ho ban adanse. Nnipa kakraa bi na na wɔn nsa ka wɔn wɔ fie na na nkurɔfo kakraa bi na wɔkyerɛ Kristofo asɛm no ho anigye, enti bere a ɔbea bi gyee so no ɛhyɛɛ Caroline nkuran.

Caroline bisae sɛ: “Owurayere B ni—?”

Obi buae adamfofa kwan so kae sɛ: “O, dabi, meyɛ Owurayere G—. Ɛnyɛ ne nɔma ni.”

Bere a Caroline huu anigye a ɔde kasae no, ɔkae sɛ: “Ɛnde, ma menkyerɛkyerɛ nea anka mepɛ sɛ meka kyerɛ Owurayere B no mu nkyerɛ wo—.” Afei ɔkaa nhyira a Onyankopɔn Ahenni de bɛba no ho asɛm. Bere a ɔkae sɛ ɔde Dɛn na Onyankopɔn Hwehwɛ Fi Yɛn Hɔ nhomawa no bi bɛbrɛ no akyi no, Owurayere G—bisae sɛ: “Na asɔre bɛn na wokɔ?”

Caroline buae sɛ: “Yɛyɛ Yehowa Adansefo.

“O, dabi, m’ani nye saa asɔre no ho! Mempɛ sɛ mehu wo.”

Caroline srɛɛ no sɛ: “Nanso Owurayere G—, me ne wo abɔ anidaso a ɛyɛ nwonwa no ho nkɔmmɔ bɛyɛ simma 20 ni, ama woafi Bible mu ahu nea ɛrenkyɛ Onyankopɔn Ahenni bɛyɛ ama adesamma. W’ani gyei paa sɛ wotee nsɛm yi—na ɛkaa wo kɛse mpo—na wopɛe sɛ wusua ho nsɛm pii. Dɛn ankasa na wunim wɔ Yehowa Adansefo ho? Sɛ wo yare a, wobɛkɔ obi a osiesie kar hɔ? Dɛn nti na womma menka nea Yehowa Adansefo gye di ho asɛm nkyerɛ wo?”

Bere a ɛhɔ ayɛ dinn kakra akyi no, obuae sɛ: “Misusuw sɛ nea woreka no wom. Ɛyɛ a bra. Nanso, mepɛ sɛ wote ase sɛ wuntumi nsakra me da!”

Caroline buae sɛ: “Owurayere G—, sɛ mepɛ sɛ me sakra wo mpo a, mintumi. Yehowa nkutoo na obetumi ayɛ saa.”

Bere a ɔde nhomawa no kɔe no, wɔde anigye bɔɔ nkɔmmɔ, na Owurayere G— (Betty) kae sɛ ɛyɛ a ɔnsan mmra. Bere a Caroline san kɔe no, Betty kae sɛ wabɔ mmea a ɔne wɔn didi wɔ pon biako ho no amanneɛ sɛ ɔne Yehowa Adansefo bɔ nkɔmmɔ. Wɔtotoo wɔn nsa bisae sɛ: “Adɛn nti na woyɛ saa?” Saa nkurɔfo no nnye Yesu mpo nni!

Ntɛm ara na Caroline twee Betty adwene sii asɛm titiriw a na ɛwɔ Onyankopɔn Ahenni ho nkɔmmɔbɔ a wɔbɔe no mu no so.

Caroline bisae sɛ: “Hena na ɔbɛyɛ Ɔhene?”

Betty buae sɛ: “Sɛ ɛyɛ Yesu.”

Caroline kae sɛ: “Ɛyɛ ampa. Afei ɔkɔɔ so kyerɛkyerɛɛ mu sɛ Yehowa Adansefo gye di sɛ Yesu yɛ Onyankopɔn Ba, nanso ɔne Onyankopɔn nyɛ pɛ sɛ Baasakoro bi fã.—Marko 13:32; Luka 22:42; Yohane 14:28.

Bere a ɔde mmere kakra kɔsraa no akyi no, ɛwom sɛ Betty ani gyee nsrahwɛ ahorow no ho de, nanso na Betty yare. Nokwarem no, na ɔyare kokoram na na osuro sɛ obewu. Ɔkae sɛ: “Me yam a anka mfe bi a atwam na metee nsɛm yi nyaa wo gyidi yi bi. Caroline fi kyerɛw nsɛm mu kyekyee no werɛ, na ɔkyerɛkyerɛɛ mu sɛ owu te sɛ nnahɔɔ a sɛ obi da a obetumi asɔre wɔ owusɔre no mu. (Yohane 11:11, 25) Eyi hyɛɛ Betty nkuran kɛse na mprempren wɔne no yɛ Bible adesua daa. Ɛnyɛ ahoɔden a onni a anka ɔbɛkɔ nhyiam wɔ Ahenni Asa so.

Caroline ka sɛ: “Mahu ampa sɛ abɔfo rekyerɛ adwuma yi kwan. ‘Wanhyɛ da’ na ɔbɔɔ Betty ‘nɔma’ na nea ɛyɛ nwonwa koraa ne sɛ na wadi mfe 89!”—Adiyisɛm 14:6.