“Wo Hann Mu na Yehu Hann”

HANN yɛ biribi a yɛtaa bu yɛn ani gu so gye sɛ wodunnum kanea na yɛn mpɔtam hɔ yɛ sum ansa. Anigyesɛm ne sɛ, yɛn “hann fibea” a ɛwɔ wim—owia—no yɛ biribi a yetumi de yɛn ho to so bere nyinaa. Na esiane hann a efi owia mu ba nti, yetumi hu ade, yedidi, yɛhome, na yetumi tra nkwa mu.

Esiane sɛ hann ho hia ma yɛatumi atra ase nti, ɛnsɛ sɛ ɛyɛ yɛn nwonwa bere a yɛkenkan wɔ Genesis sɛ hann bae wɔ adebɔ da a edi kan no. “Onyankopɔn kae sɛ: Ɛnyɛ hann! Na ɛyɛɛ hann.” (Genesis 1:3) Nnipa a wɔwɔ nidi te sɛ Ɔhene Dawid huu Yehowa bere nyinaa sɛ nkwa ne hann fibea. Dawid kyerɛwee sɛ: “Efisɛ wo nkyɛn na nkwa nsuti wɔ, wo hann mu na yehu hann.”—Dwom 36:9.

Yebetumi afa Dawid asɛm no sɛnea ɛte no ara ne wɔ sɛnkyerɛnne kwan so nso. Encyclopædia Britannica no kyerɛ sɛ: “Akyinnye biara nni ho sɛ, nkate a ɛma wohu ade no gyina hann so.” Ɛsan de ka ho sɛ: “Nsɛm pii fa aniwa no mu kɔ ɔdesani amemene no mu sen akwaa biara a etumi te ade nka no mu.” Esiane sɛ nneɛma pii a yesua no gyina akyɛde a efi ade a yehu mu—a ehia hann na atumi adi dwuma yiye nti—wɔde hann di dwuma wɔ Kyerɛwnsɛm no mu wɔ sɛnkyerɛnne kwan so nso.

Enti, Yesu ka kyerɛɛ n’asuafo no sɛ: “Mene wiase hann; nea odi m’akyi no rennantew sum mu, na obenya nkwa hann.” (Yohane 8:12) Sɛnkyerɛnne kwan so hann a Yesu kaa ho asɛm no ne nokware nkrasɛm a ɔkae no, a ebetumi ahyerɛn wɔ n’atiefo no adwene ne wɔn koma mu no. Mfe pii a Yesu asuafo no de traa sum mu akyi no, awiei koraa no wotumi tee Onyankopɔn atirimpɔw ma adesamma ne Ahenni ho anidaso no ase. Esiane sɛ saa nimdeɛ no betumi akyerɛ kwan akɔ daa nkwan mu nti, na ɛno ne “nkwa hann no.” Yesu kae wɔ ne mpae a ɔbɔɔ ne soro Agya no mu sɛ: “Eyi ne daa nkwa, sɛ wobehu wo, nokware Nyankopɔn koro no, ne nea wosomaa no, Yesu Kristo no.” (Yohane 17:3) Mommma yemmu yɛn ani ngu saa honhom mu hann yi so da!