Asetram Nsɛm

Yehowa Nsato A Yebegye Atom No De Mfaso Pii Ba

SƐNEA MARIA DO CÉU ZANARDI KA KYERƐE

“Yehowa nim nea ɔreyɛ. Sɛ wato nsa afrɛ wo a, ɛsɛ sɛ wufi ahobrɛase mu gye tom.” Nsɛm yi a me papa kae bɛyɛ mfe 45 a atwam no boaa me ma migyee nsato a edi kan a efi Yehowa ahyehyɛde no hɔ a ese menkɔsom sɛ bere nyinaa somfo no toom. Ɛnnɛ, m’ani da so sɔ me papa afotu no efisɛ saa nsato a migye toom no ama m’anya mfaso pii.

NA PAAPA kra Ɔwɛn-Aban no bi wɔ 1928 mu na n’ani begyee Bible no ho. Esiane sɛ na ɔte Portugal mfinimfini fam nti, na ɔkwan koro pɛ a obetumi afa so ne Onyankopɔn asafo no adi nkitaho ne nhoma ahorow a na wɔde mena no ne Bible bi a na ɛyɛ me nanabarima de no. Wɔ 1949 mu bere a na madi mfe 13 no, yɛn abusua no tu kɔɔ Brazil, baabi a na Maame fi no, na yɛkɔtraa kurow no anaafo wɔ Rio de janeiro.

Yɛn afipamfo foforo no too nsa frɛɛ yɛn sɛ yɛnkɔ wɔn asɔre, na yɛkɔɔ mmere kakraa bi. Paapa de hellgya, ɔkra, ne asase yi daakye ho nsɛm sɔɔ wɔn adwene hwɛe—nanso wɔantumi amma ho mmuae. Na Paapa taa ka sɛ: “Ɛsɛ sɛ yɛtwɛn Bible asuafo no ankasa.”

Da koro bi, papa onifuraefo bi a ɔrekyekyɛ Ɔwɛn-Aban ne Nyan! baa yɛn fie. Paapa bisaa no saa nsɛm koro no ara, na ofi Bible no mu de mmuae a ɛtɔ asom mae. Dapɛn a edi hɔ no, Yehowa Ɔdansefo foforo bɛsraa yɛn. Bere a ɔmaa yɛn nsɛmmisa bebree ho mmuae wiei no, ɔsrɛɛ kwan sɛ ɔrekɔ “afuw” no so. Ɔkenkanee Mateo 13:38 kyerɛɛ paapa sɛ: “Afuw no ne wiase.” Paapa bisae sɛ: “Metumi akɔ bi anaa?” Ɔbea no buae sɛ, “Yiw.” Yɛn ani gyei kɛse sɛ  yɛn nsa asan aka Bible mu nokware no! Wɔbɔɔ Paapa asu wɔ ɔmantam nhyiam a edi hɔ no ase, na wɔbɔɔ me nso asu wɔ ɛno akyi pɛɛ wɔ November 1955 mu.

Nsato a Edi Kan a Migye Toom

Wɔ afe ne fã akyi no, me nsa kaa nhoma kotoku kɛse bi a efi Yehowa Adansefo baa dwumadibea a ɛwɔ Rio de Janeiro no hɔ a wɔde reto nsa afrɛ me sɛ menkɔyɛ bere nyinaa som adwuma no. Saa bere no na Maame yare paa, enti mibisaa me papa hɔ afotu. Obuae sɛ: “Yehowa nim nea ɔreyɛ, sɛ wato nsa afrɛ wo a, ɛsɛ sɛ wufi ahobrɛase mu gye tom.” Bere a saa nsɛm yi hyɛɛ me nkuran no, mehyehyɛɛ krataa no na mede me ho hyɛɛ bere nyinaa som adwuma no mu wɔ July 1, 1957 mu. Na ɛsɛ sɛ mifi me dwumadi a edi kan no ase wɔ Três Rios, kurow bi a ɛwɔ Rio de Janeiro Mantam no mu.

Mfiase no, na nnipa a wɔwɔ Três Rios no mpɛ sɛ wobetie yɛn asɛm no esiane sɛ yɛmfa Katolekfo Bible no nni dwuma nti. Yenyaa mmoa bere a yɛne Geraldo Ramalho a ɔyɛ Katolekni suaa Bible no. Ɔboaa me ma minyaa Bible a kurom hɔ sɔfo bi nsaano agyirae wɔ so. Efi saa bere no, sɛ obi gye me akyinnye a na mede ɔsɔfo no nsaano agyirae no akyerɛ no na wagyae. Akyiri yi wɔbɔɔ Geraldo asu.

M’ani gyei mmoroso bere a wɔyɛɛ ɔmansin nhyiam wɔ Três Rios kurow no mfinimfini pɛɛ wɔ 1959 mu no. Polisi panyin a saa bere no mpo na ɔresua Bible no na ɔyɛɛ nhyehyɛe ma wɔde ntamasin a wɔakyerɛw so sisii hɔ de bɔɔ dwumadi no ho dawuru faa kurow no mu nyinaa. Bere a meyɛɛ adwuma wɔ Três Rios bɛyɛ mfe abiɛsa no, wɔmaa me dwumadi foforo wɔ Itu, a efi hɔ kɔ São Paulo bɛyɛ kilomita 110.

Nhoma Horow a ne Kɔla Yɛ Kɔkɔɔ, Bruu, ne Akokɔ Srade

Bere a me ne me hokafo no kyinkyin hwehwɛ fie a ɛhɔ dwo atra no, yekonyaa bi wɔ okunafo yamyefo bi a wɔfrɛ no Maria fi. Maria ne yɛn dii sɛ n’ankasa mma. Ankyɛ koraa na Roma Katolek sɔfo a ɔwɔ Itu no bɛsraa no ka kyerɛɛ no sɛ ɔmpam yɛn mfi ne fie hɔ, nanso ɔbea no gyinaa pintinn kae sɛ: “Bere a me kunu wui no, woanyɛ hwee amfa ankyekye me werɛ. Saa Yehowa Adansefo yi, ɛwom sɛ me ne wɔn nni ɔsom biako mu de nanso wɔaboa me.”

Wɔ saa bere no mu no, na ɔbea bi aka akyerɛ yɛn sɛ Katolek asɔfo a wɔwɔ Itu no abɔ wɔn asɔremma no kɔkɔ sɛ wonnye “Ɔbonsam nhoma kɔkɔɔ no bi.” Na wɔrekyerɛ “Let God Be True,” Bible ho nhoma a na saa nnawɔtwe no yɛde rema nkurɔfo no. Esiane sɛ na asɔfo no “abara” nhoma kɔkɔɔ no nti, yɛyɛɛ nhyehyɛe sɛ yɛde nhoma bruu no bɛmema (“New Heavens and a New Earth”). Akyiri yi, bere a asɔfo no tee nsakrae a yɛayɛ no, yɛdan kɔɔ nhoma a kyi yɛ akokɔsrade no so (What Has Religion Done for Mankind?), na yɛtoaa so saa  ara. Mfaso wɔ so sɛ yɛwɔ nhoma ahorow a ɛsono ebiara kɔla!

Midii bɛyɛ afe wɔ Itu akyi no, me nsa kaa telegram a wɔde reto nsa afrɛ me sɛ memmɛyɛ adwuma bere tiaa bi wɔ Betel, Yehowa Adansefo baa dwumadibea a ɛwɔ Rio de Janeiro no mfa nyɛ nhyehyɛe mma amanaman ntam nhyiam no. Mede anigye gyee pene.

Dwumadi Afoforo ne Nsɛnnennen Ahorow

Wɔ Betel no, adwuma nsa da, na m’ani gyei sɛ meboaa wɔ ɔkwan biara a metumi so. Hwɛ nhyira ara a ɛyɛ sɛ minyaa da biara da asɛm no mu nkɔmmɔbɔ ne abusua Ɔwɛn-Aban Adesua a wɔyɛ no Dwoda anwummere biara no mu kyɛfa! Otto Estelmann ne Betel abusua no mufo afoforo a wɔn ho akokwaw mpae a efi komam a wɔbɔe no kaa me yiye.

Bere a amanaman ntam nhyiam no baa awiei no, meyɛɛ ahoboa sɛ meresan akɔ Itu, na anwonwasɛm ne sɛ, Grant Miller a na ɔyɛ baa dwumadibea somfo, no de krataa bi hyɛɛ me nsa a na wɔde reto nsa afrɛ me sɛ memmɛyɛ Betel abusua no muni. Na nea mene no te dan mu ne Onuawa Hosa Yazedjian, a ɔda so som wɔ Brazil Betel no. Saa bere no na Betel abusua no sua—na yɛyɛ 28 pɛ—na na yɛn nyinaa yɛ nnamfo.

Wɔ 1964 mu no, bere nyinaa somfo kumaa bi a wɔfrɛ no João Zanardi baa Betel begyee ntetee. Saa bere no na wɔapaw no sɛ ɔmansin sohwɛfo anaasɛ ɔhwɛfo kwantufo wɔ kurow a ɛbɛn hɔ no mu. Sɛ ɔde ne kyerɛwtohɔ ba Betel a, na me ne no taa hyia. Baa dwumadibea no maa João hokwan sɛ ɔmmra abusua adesua a wɔyɛ no Dwoda anwummere no bi, enti na yɛtaa nya bere di nkɔmmɔ. Me ne João waree wɔ August 1965 mu. Mede anigye gyee nsa a wɔto frɛɛ me sɛ menkɔka me kunu ho wɔ ɔmansin adwuma no mu no so.

Saa mmere no mu no na akwantu adwuma no nna fam wɔ Brazil nkuraa no ase. Me werɛ remfi adawurubɔfo kuw a wɔwɔ Aranha, Minas Gerais State, a yɛkɔsraa wɔn no da. Na ɛsɛ sɛ yɛfa keteke na yɛsan nantew twa kwan a aka no—a yɛsõsõ bag, akyerɛw afiri, afiri a wɔde yi sini, bag a nhoma wom ne nhoma ahorow. Hwɛ sɛnea yɛn ani gyei bere a yehuu onua panyin Lourival Chantal a bere nyinaa ɔbɛtwɛn yɛn wɔ keteke gyinabea hɔ bɛsoa yɛn bag no bi de boa yɛn no.

Na wɔyɛ wɔn nhyiam ahorow a ɛwɔ Aranha no wɔ fie bi a wɔagye tua ho ka mu. Na yɛda dan ketewaa bi a ɛwɔ fi no akyi mu. Na wɔde nnyina a yɛde noa aduan ne nsu a anuanom saw gu bokiti mu brɛ yɛn no nso agu afã. Na amoa bi a ɛda mpampurofuw bi mu no mu na yɛkɔ tiafi gu. Sɛ ade sa a, na yɛsɔ bobo de pam kukurubinsin—nkoekoemmoa a wobetumi ama yare bi a wɔfrɛ no Chagas no. Sɛ yɛsɔre anɔpa a na wusiw ayɛ yɛn hwenem tumm. Ɛyɛ suahu bi a ɛyɛ anika!

Bere a na yɛresom wɔ Paraná State mansin no mu no, yɛn nsa san kaa krataa foforo fii baa dwumadibea hɔ. Na ɛno nso yɛ nsato foforo a efi Yehowa ahyehyɛde no hɔ—saa bere yi de na wose yɛnkɔsom wɔ Portugal! Krataa no hyɛɛ yɛn nyansa sɛ yensusuw nnyinasosɛm a ɛwɔ Luka 14:28 no ho yiye ansa na yɛapene  dwumadi no so efisɛ wɔabara yɛn Kristofo adwuma no wɔ hɔ, a na Portugal aban no akyere anuanom no bi dedaw.

So yɛbɛkɔ ɔman a yebehyia ɔtaa wɔ hɔ no mu? João kae sɛ: “Sɛ yɛn nuanom a wɔwɔ Portugal no betumi atra hɔ asom Yehowa nokwaredi mu a, dɛn nti na yentumi?” Bere a mekaee me papa nkuranhyɛsɛm no, migyee pene sɛ: “Sɛ Yehowa ato nsa afrɛ yɛn a, ɛsɛ sɛ yegye tom na yɛde yɛn ho to no so.” Ankyɛ na yɛkɔɔ São Paulo Betel kogyee akwankyerɛ foforo kɔyɛɛ yɛn akwantu no ho nkrataa.

João Maria ne Maria João

Yɛn ahyɛmma a na yɛde rekɔ a wɔfrɛ no Eugênio C no siim September 6, 1969 fii Santos hyɛn gyinabea a ɛwɔ São Paulo State no. Bere a yedii nna akron wɔ po so no, yeduu Portugal. Mfiase no, yɛde asram bebree ne anuanom a wɔn ho akokwaw a wɔwɔ Alfama ne Mouraria mantam a ɛwɔ Lisbon mu no yɛɛ adwuma. Wɔtetee yɛn sɛnea ɛbɛyɛ a yɛbɛyɛ ahwɛyiye na polisifo ankyere yɛn ntɛm.

Na wɔyɛ asafo nhyiam ahorow no wɔ Adansefo no afie. Bere a yehui sɛ afipamfo no ani reba yɛn so no, yeyii nhyiam no fii hɔ ntɛm de kɔɔ beae foforo sɛnea ɛbɛyɛ a wɔrentow nhyɛ fie no so anaasɛ wɔnkyere anuanom no. Na yɛyɛ yɛn nhyiam ahorow a na yɛtaa frɛ no piknik no wɔ Monsanto Park, wɔ Lisbon kurotia, ne Costa da Caparica, faako a nnua pii wɔ wɔ mpoano no. Na yensiesie yɛn ho kyenkyenee nkɔ nhyiam no ase, na na anuanom a wogye ahɔho a wɔn ani da hɔ wɛn mmeae titiriw no. Sɛ na obi a wosusuw sɛ onkura adwene pa ba hɔ a, na yedi agoru bi mpofirim, yɛyɛ piknik, anaasɛ yɛbɔ momome.

Nea ɛbɛyɛ na ayɛ den ama polisifo no sɛ wobehu yɛn no, yɛamfa yɛn din ankasa amfrɛ yɛn ho. Anuanom no frɛɛ yɛn João Maria ne Maria João. Ná wɔmfa yɛn din ahorow no nkyerɛw yɛn krataa anaa na enni kyerɛwtohɔ biara mu. Wɔde nɔma mmom na ɛmaa yɛn. Misii me bo sɛ meremma anuanom no address ahorow no nka me tirim. Wɔ saa kwan no so no, sɛ ɛba sɛ wɔkyere me a, merentumi nyi wɔn mma.

Ɛmfa ho anohyeto a na ɛda yɛn so no, na me ne João asi yɛn bo sɛ yɛde hokwan biara bedi adanse, esiane sɛ yenim dedaw sɛ wobetumi agye hokwan a yɛwɔ no afi yɛn nsam wɔ  bere biara mu nti. Yesuae sɛ yɛde yɛn ho bɛto yɛn soro Agya, Yehowa, so. Sɛ́ yɛn Bammɔfo no, ɔde n’abɔfo no di dwuma ma yɛte nka sɛ ‘yɛrehu nea wonhu no no.’—Hebrifo 11:27.

Da koro bi a na yɛreyɛ afie afie asɛnka wɔ Porto no, yehyiaa ɔbarima bi a ɔhyɛɛ yɛn katee sɛ yɛmmra ne fie. Onuawa a me ne no reyɛ adwuma no penee so a wantwentwɛn ne nan ase, a na hwee nni hɔ a mɛyɛ sɛ me ne no bɛkɔ. Nea ɛmaa me ho dwiriw me no, mihuu mfonini a obi a ɔhyɛ ɔsraani atade wom wɔ abranaa no so. Afei dɛn na yɛbɛyɛ? Nea ɔtoo nsa frɛɛ yɛn no ka kyerɛɛ yɛn sɛ yɛntra ase, na afei obisaa me sɛ: “Sɛ wɔhyɛ wo ba sɛ ɔnkɔ sraadi a wobɛma no akɔ anaa?” Na tebea no gye anifere ankasa. Meyɛɛ koom, nanso mebɔɔ mpae wɔ me tirim wiei no, mibuae sɛ: “Minni ba biara, na migye di sɛ sɛ mibisa wo nsɛm a wɔde sɔ adwene hwɛ saa ara a, mmuae koro no ara na wode bɛma me.” Ɔyɛɛ koom. Enti metoaa so sɛ: “Sɛ anka wubisaa me sɛ sɛ me nuabarima anaa me papa wu a mɛte nka dɛn a, anka ɛno de metumi abua efisɛ me nuabarima ne me papa nyinaa awuwu.” Bere a merekasa no m’ani tetɛɛ nusu, na mihui sɛ ɔno nso reyɛ asu. Ɔkyerɛkyerɛɛ mu sɛ ne yere awu nnansa yi ara. Bere a mekaa owusɔre ho anidaso ho asɛm kyerɛɛ no no otiee no yiye. Ɛna yefi obu mu ne no dii nkra na yɛkɔe dwoodwoo de asɛm no hyɛɛ Yehowa nsa.

Ɛmfa ho sɛ na wɔabra yɛn no, yɛboaa nnipa komapafo ma wobenyaa nokware no ho nimdeɛ. Porto na me kunu fii ase ne adwumawura bi a wɔfrɛ no Horácio suaa ade ma onyaa nkɔanim ntɛmntɛm. Akyiri yi ne babarima Emílio, a ɔyɛ oduruyɛfo a ne ho akokwaw, nso gyinaa Yehowa afã na wɔbɔɔ no asu. Ɛyɛ nokware sɛ, biribiara rentumi nsiw Yehowa honhom kronkron no kwan.

“Munnim Nea Yehowa Bɛma Ho Kwan”

Wɔ 1973 mu no, wɔtoo nsa frɛɛ me ne João sɛ yɛnkɔ “Ɔsoro Nkonimdi” amanaman ntam nhyiam a wɔyɛɛ wɔ Brussels, wɔ Belgium no bi. Spain ne Belgium anuanom mpempem pii ne wɔn a wofi Mozambique, Angola, Cape Verde, Madeira, ne Azores bae. Bere a Onua Knorr a ofi asafo ti a ɛwɔ New York de ne kasa no reba awiei no, ɔde afotusɛm yi mae sɛ: “Monkɔ so nsom Yehowa wɔ nokwaredi mu. Munnim nea Yehowa bɛma ho kwan. Hena na onim sɛ ebia mobɛsan akɔ amanaman ntam ɔmantam nhyiam a edi hɔ no wɔ Portugal!”

Afe a edi hɔ no wogyee asɛnka adwuma no toom wɔ mmara kwan so wɔ Portugal. Onua Knorr asɛm a ɔkae no baa mu, na wɔ April 25 1978 no, yɛyɛɛ yɛn amanaman ntam nhyiam a edi kan no wɔ Lisbon. Hwɛ hokwan ara a ɛyɛ sɛ yɛde dawurubɔ nkrataa, nsɛmma nhoma ne nkrataasin foforo too nsa frɛɛ nkurɔfo  ma wobetiee baguam kasa no! Ná ɛyɛ biribi a yɛahwɛ kwan akyɛ a abam.

Yɛbɛpɛɛ yɛn nuanom a wofi Portugal, a wɔn mu pii huu amane wɔ afiasenna, ne ɔhwe ho esiane sɛ wokuraa ɔfa biara a wonni sɛ Kristofo mu no nti no asɛm. Na yɛn pɛ ne sɛ yɛbɛkɔ so asom wɔ Portugal. Nanso, antumi anyɛ yiye saa. Wɔ 1982 mu no, João benyaa komayare bi a emu yɛ den, na baa dwumadibea no kyerɛe sɛ yɛnsan mmra Brazil.

Bere a Emu Yɛ Den

Anuanom a wɔwɔ Brazil baa dwumadibea no yɛɛ yɛn mmoa kɛse, na wɔma yɛsomee wɔ Quiririm Asafo no mu wɔ Taubaté, wɔ São Paulo State. João yare no mu yɛɛ den ntɛmntɛmma na ontumi nkɔ baabiara. Na anigyefo no binom ba yɛn fie hɔ ma yɛne wɔn sua Bible no, na na wohyiam wɔ hɔ da biara da kɔ asɛnka yɛ nhoma mu adesua wɔ hɔ nso dapɛn biara. Nsiesiei yi boaa yɛn ma yɛyɛɛ den wɔ honhom fam.

João kɔɔ so yɛɛ nea obetumi biara wɔ Yehowa som mu kosii sɛ owui wɔ October 1, 1985 mu. Me werɛ howee ma meyɛɛ basaa, nanso misii me bo sɛ mɛkɔ so wɔ me dwumadi mu. Ɔhaw foforo nso sii wɔ April 1986 bere a awifo bɔ wuraa me fie bewiaa biribiara a mewɔ no. Eyi ne bere a edi kan wɔ m’asetra mu a metee ankonamyɛ ne ehu nka. Awarefo bi fi ɔdɔ mu too nsa frɛɛ me sɛ me ne wɔn mmɛtra kakra, na m’ani sɔe kɛse.

João wu no ne awifo a wobewiaa me no nso kaa ɔsom a na mede ma Yehowa no. Mannya ahotoso wɔ me som adwuma no mu bio. Mekyerɛw nsɛnnennen a merehyia no ho nsɛm de kɔɔ baa dwumadibea akyi no, me nsa kaa krataa bi a ɛreto nsa afrɛ me sɛ memmɛyɛ adwuma bere tiaa bi wɔ Betel na aboa me ma makari pɛ wɔ nkate fam. Hwɛ sɛnea minyaa denhyɛ wɔ saa bere no mu!

Me ho tɔɔ me kakra pɛ, na mepenee dwumadi a ɛkyerɛ sɛ menkɔsom wɔ Ipuã, kurow a ɛwɔ São Paulo no so. Asɛnka adwuma no maa meyɛɛ hyew, nanso ɛtɔ mmere bi a na mete huammɔdi nka. Wɔ mmere a ɛte saa mu no, na mefrɛ anuanom a wɔwɔ Quiririm asafo no mu no wɔ telefon so, na abusua bi ba bɛsra me nna kakra. Na nsrahwɛ a ɛte saa no hyɛ nkuran yiye! Wɔ m’afe a edi kan mu wɔ Ipuã no, anuanom mmarima ne mmea a wɔn dodow si 38 na wofi mmeae ahorow wɔ akyirikyiri bɛsraa me.

João wu akyi mfe asia wɔ 1992 mu no, me nsa kaa krataa foforo a efi Yehowa ahyehyɛde no hɔ, na saa bere yi de na ɛsɛ sɛ mekɔ Franca a ɛwɔ São Paulo State, baabi a meda so ara som sɛ bere nyinaa somfo no. Asasesin a ɛwɔ ha no sow aba yiye. Wɔ 1994 mu no, me ne kurow sohwɛfo no fii ase suaa Bible no. Saa bere no, na ɔrepere tumi sɛ Brazil mmarahyɛ baguani, ɛmfa ho sɛ onni bere no, yɛyɛɛ nhyehyɛe suaa ade Dwoda awia biara. Ná yeyi telefon no to hɔ na antwitware yɛn ananmu. Hwɛ sɛnea m’ani gyei bere a mihui sɛ ɔde nkakrankakra retwe ne ho afi amammuisɛm ho, na ɛdenam nokware no mmoa so no, wahyɛ n’aware mu den no! Wɔbɔɔ ɔne ne yere asu wɔ 1998 mu.

Sɛ mehwɛ m’akyi a, metumi aka sɛ m’asetra sɛ bere nyinaa somfo no ama manya nhyira kɛse ne hokwan pii. Nsa a Yehowa nam n’ahyehyɛde no so to frɛɛ me a migyee so no ama manya mfaso kɛse. Na ɔpɛ a mewɔ sɛ megye nsato biara a ɛbɛba daakye so no mu yɛ den sen bere biara.

[Mfonini ahorow wɔ kratafa 25]

Bere a mede me ho hyɛɛ bere nyinaa som adwuma no mu wɔ 1957 mu, ne nnɛ

[Mfonini wɔ kratafa 26]

Me ne Brazil Betel abusua, wɔ 1963 mu

[Mfonini wɔ kratafa 27]

Yɛn ayeforohyia wɔ August 1965 mu

[Mfonini wɔ kratafa 27]

Nhyiam a yɛyɛe wɔ Portugal bere a na wɔabra yɛn dwumadi no

[Mfonini wɔ kratafa 28]

Borɔn so adansedi wɔ Lisbon wɔ 1978 mu bere a yɛreyɛ “Gyidi Nkonimdi” Amanaman Ntam Ɔmantam Nhyiam no