Awofo Munni Mo Mma Ahiade Ho Dwuma!

MMOFRA hia akwankyerɛ ne nteɛso a ɔdɔ wom fi wɔn awofo nkyɛn titiriw. Eyi nti, Brazilni kyerɛkyerɛfo bi a ne din de Tania Zagury ka sɛ: “Abofra pɛ sɛ onya anigye. Ɛho hia sɛ wɔma wɔn anohyeto ahorow. Ɛyɛ awofo na ɛsɛ sɛ wɔyɛ eyi. Sɛ wɔanyɛ saa a mmofra no begye wɔn nsam.”

Nanso, wɔ nsase pii so no, esiane sɛ wɔma biribiara ho kwan na obiara tumi yɛ nea ɔpɛ nti, ɛma ɛyɛ den sɛ wobedi afotu a ɛwɔ atifi hɔ no so. Ɛnde ɛhe na awofo betumi akɔhwehwɛ mmoa? Awofo a wosuro Onyankopɔn nim sɛ wɔn mma yɛ ‘agyapade a efi Yehowa hɔ.’ (Dwom 127:3) Enti wɔde wɔn ho to Onyankopɔn Asɛm Bible no akwankyerɛ so de tete wɔn. Sɛ nhwɛso no, Mmebusɛm 13:24 ka sɛ: “Nea ɔkora n’abaa tan ne ba, na nea ɔdɔ no no teɛ no so ntɛmso.”

Ɛnsɛ sɛ wobu sɛnea Bible de ‘abaa’ di dwuma no sɛ asotwe nkutoo; egyina hɔ ma ɔkwan a wɔfa so de nteɛso ma ɛmfa ho sɛnea wɔde ma no. Nokwarem no, mpɛn pii no ebia ano a wɔde bɛteɛ abofra soɔdenfo so no ara dɔɔso. Mmebusɛm 29:17 ka sɛ: “Teɛ wo ba so na wama woahome, na wama wo kra anika.”

Mmofra hia nteɛso a efi ɔdɔ mu na ama wɔagyae subammɔne biara. Nteɛso a ɛfata na efi ayamye mu a ɛte saa yɛ adanse a ɛkyerɛ sɛ ɔwofo dwen ne ba ho. (Mmebusɛm 22:6) Enti awofo, momma mo bo ntɔ mo yam! Sɛ wudi Bible afotu a mfaso wɔ so yi akyi a, wo mma bebu wo na woasɔ Yehowa Nyankopɔn ani.