Wugye Onyankopɔn a Ɔwɔ Hɔ Paa Di?

Nnipa bi a Amerika Asoɛe a Ɛkora Nnua ne Mmoa Ho Nsɛm So tuu wɔn no sii mu sɛ wɔrekɔhwɛ Arctic asase a Robert E. Peary kae sɛ na wadi kan ahu mfe ason a atwam ansa na afe 1906 reba no.

PEARY a na ogyina Cape Colgate, North America atifi fam atɔe nohoa no huu biribi a ɛte sɛ akyirikyiri asase bi so mmepɔw a atifi yɛ fitaa. Ɔde asase no too wɔn a wɔde sika boaa no no biako, enti ɔfrɛɛ no Crocker Land. Hwɛ sɛnea ɛbɛyɛ sɛ wɔn a wɔrekɔhwɛ asase no ani gyei bere a wɔn ani bɔɔ asase bi so na wohuu ɛso pampa, mmɔnka ne mmepɔw a ɛso fitaa no! Nanso ankyɛ na wohui sɛ wɔn ani so na ɛyɛ wɔn sɛ Arctic no. Saa ade a wohui no ara na ɛdaadaa Peary no, na wɔn mpo de na wɔasɛe bere, ne ahoɔden ne sika pii de rekɔhwehwɛ biribi a enni hɔ.

Ɛnnɛ, nnipa bebree som anyame a wogye di sɛ wɔwɔ hɔ, na wɔsɛe bere wɔ wɔn ho. Yesu asomafo no bere so no, na nkurɔfo som anyame bi te sɛ Hermes ne Seus. (Asomafo no Nnwuma 14:11, 12) Ɛnnɛ anyame ɔpepem pii na Shinto, Hindu ne ɔsom afoforo som wɔn wɔ wiase. Ampa, sɛnea Bible kyerɛ no, “anyame pii ne awurade pii wɔ hɔ.” (1 Korintofo 8:5, 6) Wɔn nyinaa betumi ayɛ anyame a wɔwɔ hɔ ampa?

Anyame a ‘Wontumi Nnye Nkwa’

Hwɛ biribi te sɛ ahoni a nkurɔfo som no. Wɔn a wogye anyame yi di na wɔbɔ mpae fa wɔn so no de, wogye di sɛ anyame yi yɛ wɔn agyenkwa a wɔwɔ tumi ankasa ma enti wotumi ma nnipa akatua gye wɔn fi mmusu mu nso. Nanso, so wugye di sɛ wobetumi agye nnipa nkwa ampa? Odwontofo no kaa anyame a ɛtete saa no ho asɛm sɛ: “Amanaman ahoni yɛ dwetɛ ne sika, nnipa nsa ano nnwuma. Wɔwɔ ano, na wɔnkasa,  wɔwɔ aniwa, na wonhu ade, wɔwɔ aso, na wɔnte asɛm, nso ɔhome biara nni wɔn anom.” Nokwarem no, wɔyɛ anyame a ‘wontumi nnye nkwa.’—Dwom 135:15-17; Yesaia 45:20.

Ampa, wɔn a wɔyɛ anyame no bɛka sɛ nkwa ne tumi wɔ wɔn nsa ano adwuma no mu. Wɔn a wɔsom bosom no nso de wɔn werɛ hyɛ mu. Odiyifo Yesaia kae sɛ: “Wɔma [bosom] so bɔ no akɔnkɔn kɔsoɛ no si ne sibea, na esi hɔ.” Ɔtoaa so sɛ: “Ɛntwe ne ho mfi n’afa; wɔteɛm frɛ no a, ommua, na ontumi nnye obi n’ahohia mu.” (Yesaia 46:7) Nokware a ɛwom ara ne sɛ, sɛ wɔn a wɔsom abosom yi gye wɔn di de wɔn werɛ hyɛ wɔn mu sɛ dɛn mpo a, nkwa nni mu. Ahoni a wɔasen yi yɛ ‘anyame huhuw.’—Habakuk 2:18.

Ɛnnɛ nso, nnipa pii hoahoa nnwontofo, ne agodifo, na wɔkamfo amammui akwan ne nyamesom mpanyimfo bi. Nnipa bebree nso de sika ayɛ wɔn nyame. Sɛnea ɛte biara no, wɔka sɛ anyame yi wɔ tumi, nanso ɛnte saa. Wontumi mfa wɔn a wogye wɔn di no ahiade nyinaa mma wɔn, na wɔrentumi mfa mma wɔn nso. Sɛ yɛbɛyɛ mfatoho a, ebia ɛbɛyɛ wo sɛ sika betumi ayɛ nneɛma bebree, nanso sika yɛ nnaadaa. (Marko 4:19) Nhwehwɛmufo bi bisae sɛ: “Adɛn nti na ade a nnipa bebree yere wɔn ho pɛ bi a yegye di sɛ etumi yɛ biribiara no, sɛ yɛn nsa ka wie a afei de etumi di yɛn huammɔ bɔ yɛn hu mpo?” Ampa, ebetumi aba sɛ sika nti, obi de nneɛma a ɛsom bo paa te sɛ apɔwmuden, aware pa, nnamfo pa anaa ɔne Ɔbɔadeɛ no ntam ayɔnkofa a edi mu bɛto nkyɛn. Ne nyame no bɛyɛ ‘atoro honi’!—Yona 2:8.

‘Obiara Annye So’

Ɛyɛ nkwaseasɛm sɛ ade a enni hɔ no wobɛka sɛ ɛwɔ hɔ. Odiyifo Elia bere so Baal asomfo no nyaa osuahu a ɛyɛ yaw bi ansa na wɔrete wɔn ho ase. So wugye dii denneennen sɛ Baal betumi ama ogya afi soro abɛhyew aboa a wɔde no bɔɔ afɔre no. Nokwarem no, “wɔbɔɔ Baal din fii anɔpa koduu owigyinae sɛ: Baal, gye yɛn so!” Wugye di sɛ na Baal wɔ aso a etumi te asɛm ne ano a etumi kasa? Asɛm no toa so sɛ: “Wɔante ɛnne bi, na obi nso annye so.” Ɛyɛ ampa sɛ “obi antie wɔn.” (1 Ahene 18:26, 29) Ná Baal nyɛ biribi a ɛwɔ hɔ, na nkwa nni ne mu na na ɔnkeka ne ho.

Hwɛ hia a ehia sɛ yebehu Onyankopɔn a ɔwɔ hɔ paa no na yɛasom no! Nanso ɔne hena? Na sɛ yegye no di a, ɔkwan bɛn so na ɛbɛboa yɛn?

[Mfonini ahorow wɔ kratafa 3]

Peary yɔnko Egingwah toto n’ani pɛ asase

Robert E. Peary

[Nsɛm Fibea]

Egingwah: From the book The North Pole: Its Discovery in 1909 Under the Auspices of the Peary Arctic Club, 1910; Robert E. Peary: NOAA

[Mfonini ahorow wɔ kratafa 4]

Nneɛma a nkurɔfo de ayɛ anyame wɔ wiase no daadaa nnipa pii