Yehowa—Papayɛ Ho Nhwɛsofo A Ɔsen Biara
Yehowa—Papayɛ Ho Nhwɛsofo A Ɔsen Biara
“Monkamfo asafo [Yehowa, “NW”], na [Yehowa, “NW”] ye.”—YEREMIA 33:11.
1. Dɛn nti na yɛte nka sɛ ɛsɛ sɛ yeyi Onyankopɔn ayɛ wɔ ne papayɛ ho?
YEHOWA NYANKOPƆN papayɛ wie pɛyɛ. Odiyifo Sakaria teɛɛm sɛ: “Ne yiye ne dɛn”! (Sakaria 9:17) Nokwarem no, papayɛ da adi wɔ biribiara a Onyankopɔn yɛe de siesiee asase maa yɛn no mu. (Genesis 1:31) Yɛrentumi nte mmara a ɛkɔ akyiri a Onyankopɔn de dii dwuma bere a ɔbɔɔ amansan yi no ase da. (Ɔsɛnkafo 3:11; 8:17) Nanso kakra a yenim no ka yɛn ma yeyi Onyankopɔn ayɛ wɔ ne papayɛ ho.
2. Wobɛkyerɛkyerɛ papayɛ mu dɛn?
2 Dɛn ne papayɛ? Ɛyɛ su pa a ɛkorɔn. Nanso ɛnyɛ nea ɛkyerɛ ara ne sɛ bɔne biara nni mu. Honhom aba a ɛyɛ akyi no, papayɛ yɛ su a mfaso wɔ so. (Galatifo 5:22, 23) Yɛyɛ papa bere a yɛyɛ nneɛma pa a mfaso wɔ so ma afoforo no. Wɔ nneɛma nhyehyɛe yi mu no, nneɛma a ebia wobu no sɛ eye wɔ mmeae bi no, wommu no ade pa wɔ mmeae foforo. Nanso sɛ yebenya asomdwoe ne anigye a, ɛsɛ sɛ yenya papayɛ ho gyinapɛn biako. Hena na ɔfata sɛ ɔhyehyɛ saa gyinapɛn yi?
3. Dɛn na Genesis 2:16, 17 kyerɛ wɔ papayɛ ho gyinapɛn ho?
3 Onyankopɔn na ɔhyehyɛ papayɛ ho gyinapɛn. Wɔ adesamma abakɔsɛm mfiase pɛɛ no, Yehowa na ɔhyɛɛ onipa a odi kan no sɛ: “Turom ha nnua nyinaa, di bi. Na papa ne bɔne hu dua no de, nni, efisɛ da a wubedi bi no, owu na wubewu.” (Genesis 2:16, 17) Yiw, ehia sɛ nnipa de wɔn ho to wɔn Bɔfo no so hwehwɛ papa ne bɔne ho nimdeɛ.
Papayɛ a Ɛnsɛ Yɛn a Ɔda no Adi
4. Efi bere a Adam yɛɛ bɔne no, dɛn na Onyankopɔn ayɛ ama adesamma?
4 Bere a Adam yɛɛ bɔne na wannye hokwan a Onyankopɔn wɔ sɛ ɔhyehyɛ papayɛ ho gyinapɛn antom no, ɛmaa anigye a nnipa benya daakye no ho baa asɛm. (Genesis 3:1-6) Nanso ansa na wɔde bɔne ne owu rewo Adam mma no, Onyankopɔn kaa Aseni bi a ɔyɛ pɛ ho asɛm siei. Bere a Yehowa rekasa akyerɛ “ɔwɔ dedaw,” Satan Ɔbonsam no, ɔkae sɛ: “Mede ɔtan mɛto wo ne ɔbea no ntam, ɛne w’asefo ne n’asefo ntam. Ɔno na ɔbɛbɔ wo ti; na wo nso woaka ne nantin.” (Adiyisɛm 12:9; Genesis 3:15) Na Yehowa atirimpɔw ne sɛ obegye adesamma abɔnefo. Wɔ papayɛ a ɛnsɛ yɛn a Yehowa da no adi mu no, wayɛ nhyehyɛe a ɛte saa a wɔnam so de begye wɔn a wɔbɛkyerɛ ne dɔ Ba no agyede afɔre no mu gyidi no.—Mateo 20:28; Romafo 5:8, 12.
5. Ɛwom sɛ yɛanya koma a ɛtɔ kɔ bɔne so de, nanso dɛn nti na yebetumi ada papayɛ kakra adi?
5 Ɛwom, esiane Adam bɔne nti, wɔde koma a ɛtɔ kɔ bɔne so awo yɛn. (Genesis 8:21) Nanso anigyesɛm ne sɛ, Yehowa boa yɛn ma yɛda papayɛ kakra adi. Nneɛma a yɛasua afi ne kyerɛw kronkron mu a yɛbɛkɔ so de adi dwuma no ‘bɛma yɛahu nyansa akɔ nkwagye mu’ na ‘asiesie yɛn ama nnwuma pa nyinaa’ na afei nso aboa yɛn ma yɛayɛ nneɛma pa wɔ n’ani so. (2 Timoteo 3:14-17) Nanso sɛ yebenya Kyerɛwnsɛm mu afotu so mfaso na yɛada papayɛ adi a, ɛsɛ sɛ yenya odwontofo a ɔtoo dwom yi suban no bi: “[Yehowa] wuye, na woyɛ yiye, kyerɛkyerɛ me w’ahyɛde.”—Dwom 119:68.
Wɔkamfo Yehowa Papayɛ
6. Bere a Ɔhene Dawid ma wɔkɔfaa apam adaka no baa Yerusalem no, nsɛm bɛn na Lewifo no de too dwom?
6 Ɔhene Dawid a ɔtraa ase wɔ tete Israel no gyee Onyankopɔn papayɛ toom, na ɔhwehwɛɛ N’akwankyerɛ. Dawid kae sɛ: “[Yehowa, NW] ye, na ɔteɛ, enti na ɔkyerɛkyerɛ nnebɔneyɛfo ɔkwan so.” (Dwom 25:8) Na mmara du a ɛho hia—Mmara Nsɛm Du—ka Onyankopɔn akwankyerɛ a wɔde maa Israelfo no a na wɔakyerɛw no abopon abien so na wɔde siee apam adaka kronkron mu no ho. Bere a Dawid ma wɔde adaka no baa Israel ahenkurow, Yerusalem no, Lewifo no too dwom bi a emu nsɛm bi ne: “Monna [Yehowa, NW] ase, na oye, na n’adɔe wɔ hɔ daa.” (1 Beresosɛm 16:34, 37-41) Hwɛ anigye ara a ɛbɛyɛ sɛ obi bɛte nsɛm a ɛyɛ dɛ saa afi Lewifo nnwontofo no anum!
7. Bere a wɔde apam adaka no baa Kronkron mu Kronkronbea hɔ na Salomo bɔɔ mpae de buee ano akyi no, dɛn na esii?
7 Wosii ayeyi nsɛm yi ara so dua bere a na wɔrebue Yehowa asɔrefie a Dawid ba, Salomo sii no ano no. Bere a wɔde apam adaka no sii asɔrefie foforo no Kronkron mu Kronkronbea wiei no, Lewifo no fii ase yii Yehowa ayɛ sɛ “oye na n’adɔe wɔ hɔ daa.” Saa da no, mununkum hyɛɛ asɔrefie no ma anwonwakwan so ma ɛyɛɛ ba a Yehowa aba hɔ wɔ anuonyam mu no ho sɛnkyerɛnne. (2 Beresosɛm 5:13, 14) Salomo wiee mpaebɔ a ɔde buee ano no, “ogya fi soro duru bɛhyew ɔhyew afɔre ne okum afɔre no.” Bere a Israelfo huu eyi no, “wɔde wɔn anim butubutuw fam abo nsɛwee no so sɔree, na wɔdaa [Yehowa, NW] ase sɛ oye na n’adɔe wɔ hɔ daa.” (2 Beresosɛm 7:1-3) Adapɛn abien afahyɛ no akyi no, Israelfo no san kɔɔ wɔn afie mu na “wɔn ani gyei na wɔn bo tɔɔ wɔn yam, adepa a [Yehowa, NW] ayɛ Dawid ne Salomo ne ne man Israel no nti.”—2 Beresosɛm 7:10.
8, 9. (a) Ɛwom sɛ Israelfo no yii Yehowa ayɛ wɔ ne papayɛ ho de, nanso awiei koraa no, dɛn na wɔyɛe? (b) Yerusalem ho asɛm bɛn na wɔnam Yeremia so ka siei, na ɔkwan bɛn so na saa nkɔmhyɛ no nyaa mmamu?
8 Awerɛhosɛm ne sɛ, Israelfo no antra ase amma ɛne ayeyi nnwom a wɔto maa Onyankopɔn no anhyia. Bere bi akyi no, Yudafo no ‘de wɔn anofafa ara kwa na edii Yehowa ni.’ (Yesaia 29:13) Sɛ anka wobedi Onyankopɔn papayɛ gyinapɛn ahorow akyi no, wofii ase yɛɛ nneɛma bɔne. Nneɛma bɔne bɛn saa na na wɔyɛ? Hwɛ, wodii fɔ wɔ abosonsom, brasɛe, ahiafo a na wosisi wɔn ne bɔne afoforo a anibere wom ho! Ne saa nti, wɔsɛee Yerusalem na wɔfaa Yudafo no nnommum kɔɔ Babilon wɔ 607 A.Y.B.
9 Enti Onyankopɔn twee ne man aso. Nanso ɛdenam odiyifo Yeremia so no, ɔka siei sɛ wɔbɛsan ate sɛ wɔka wɔ Yerusalem sɛ “Monkamfo asafo [Yehowa, NW], na [Yehowa, NW] ye na n’adɔe wɔ hɔ daa.” (Yeremia 33:10, 11) Na ɛbaa saa. Bere a asase no yɛɛ amanfo mfirihyia 70 akyi no, Yudafo nkaefo bi san baa Yerusalem wɔ 537 A.Y.B. (Yeremia 25:11; Daniel 9:1, 2) Wɔsan sii afɔremuka wɔ beae a na anka asɔrefie no si no wɔ Bepɔw Moria so na wofii ase bɔɔ afɔre wɔ hɔ. Mfe abien a wɔsan kɔɔ hɔ mu no, wɔtoo asɔrefie no fapem. Hwɛ anigye bere ara a ɛbɛyɛ! Esra kae sɛ: “Abantofo no hyɛɛ [Yehowa, NW] asɔredan no ase no, asɔfo a wɔahyehyɛ wɔn ntade kurakura ntorobɛnto ne Lewifo, Asaf mma no, wokurakura nnawuru begyinagyinaa hɔ sɛ wɔreyi [Yehowa, NW] ayɛ sɛ Israel hene Dawid hyehyɛe no. Na wobuabuaa wɔn ho [Yehowa, NW] ayeyi ne aseda no mu sɛ oye, na n’adɔe wɔ hɔ daa Israel so. Na ɔman no nyinaa bɔɔ ose.”—Esra 3:10, 11.
10. Asɛm titiriw bɛn na wɔde fi Dwom 118 ase san de wie?
10 Ayeyi nsɛm a ɛte saa ara a wɔde kamfo Yehowa papayɛ pue wɔ nnwom ahorow mu. Emu bi ne Dwom 118 a Israelfo to de wiee Twam afahyɛ no. Wɔde nsɛm yi na efi dwom no ase na wɔde wie: “Monna [Yehowa, NW] ase, na oyɛ na n’adɔe wɔ hɔ daa.” (Dwom 118:1, 29) Ɛbɛyɛ sɛ eyi ne ayeyi nsɛm a etwa to a Yesu ne n’asomafo anokwafo no toe anadwo ansa na ɔrebewu wɔ 33 Y.B. no.—Mateo 26:30.
“Ma Minhu W’anuonyam”
11, 12. Bere a Mose huu Onyankopɔn anuonyam ho biribi no, asɛm bɛn na ɔtee?
11 Wodii kan daa abusuabɔ a ɛda Yehowa papayɛ ne n’adɔe mu adi mfehaha pii ansa na Esra bere reba. Israelfo no som sika honi akyi bere tiaa bi wɔ sare so na wɔsɛee abɔnefo no, Mose srɛɛ Yehowa sɛ: “Ma minhu w’anuonyam.” Bere a Yehowa hui sɛ Mose ntumi nhu N’anim ntra ase no, ɔkae sɛ: “Mɛma me papa nyinaa asen w’anim.”—Exodus 33:13-20.
12 Ade kyee no, Yehowa papayɛ sen faa Mose anim wɔ Bepɔw Sinai so. Saa bere no Mose huu Onyankopɔn anuonyam na ɔtee asɛm yi: “[Yehowa, Yehowa, NW], Onyankopɔn mmɔborohunufo ne ɔdomfoɔ, nea n’abodwo kyɛ na n’adɔeyɛ ne ne nokware dɔɔso pii, nea ɔkora adɔeyɛ ma mpem mpem, na ɔde amumɔyɛ ne mmarato ne bɔne firi, na bem na ɔmma ɔbɔnefo nni, na otua agyanom amumɔyɛ so ka fa mma ne mma mma so kosi awo ntoatoaso abiɛsa ne anan so.” (Exodus 34:6, 7) Nsɛm yi kyerɛ sɛ Yehowa papayɛ ne n’adɔe ne ne nipasu afoforo wɔ abusuabɔ. Eyinom a yebesusuw ho no bɛboa yɛn ma yɛayɛ papa. Ma yenni kan nsusuw su a wɔkaa ho asɛm mpɛn abien wɔ Onyankopɔn papayɛ ho asɛm a wɔkae yi mu ho nhwɛ.
‘Onyankopɔn a N’adɔeyɛ Dɔɔso Pii’
13. Onyankopɔn papayɛ ho mpaemuka no akyi no, su bɛn na wɔbɔ so mpɛn abien, na dɛn nti na eyi fata?
13 ‘Yehowa yɛ Onyankopɔn a n’adɔeyɛ dɔɔso pii, na ɔkora adɔeyɛ ma mpem mpem.’ Hebri asɛmfua a wɔkyerɛ ase “adɔeyɛ” no san kyerɛ ‘nokware dɔ.’ Ɛno nkutoo ne su a wɔbɔɔ so mprenu wɔ asɛm a Onyankopɔn ka kyerɛɛ Mose no mu. Hwɛ sɛnea ɛfata, esiane sɛ Yehowa su titiriw ne ɔdɔ! (1 Yohane 4:8) Yehowa ayeyisɛm a wonim no yiye “oye na n’adɔeyɛ wɔ hɔ daa” no si su yi so dua.
14. Henanom titiriw na wonya Onyankopɔn papayɛ ne n’adɔeyɛ so mfaso?
14 Yehowa papayɛ ho ade biako a ɛda adi ne sɛ ‘n’adɔeyɛ dɔɔso.’ Eyi da adi titiriw wɔ ɔkwan a ɔfa so yɛ nnipa anokwafo a wɔsom no no brɛbrɛ no ho. (1 Petro 5:6, 7) Sɛnea Yehowa Adansefo betumi adi ho adanse no, ‘ɔkora adɔeyɛ’ so ma wɔn a wɔdɔ no na wɔsom no no. (Exodus 20:6) Honam fam Israel man no ankɔ so annya Yehowa adɔeyɛ, anaa nokware dɔ so mfaso bio bere a wɔpoo ne Ba no. Nanso Onyankopɔn bɛkɔ so ada ne papayɛ ne n’adɔeyɛ adi wɔ Kristofo anokwafo a wɔwɔ aman nyinaa mu no so daa.—Yohane 3:36.
Yehowa—Mmɔborohunufo ne Ɔdomfo
15. (a) Asɛm bɛn na wɔka de fii mpaemuka a Mose tee wɔ Bepɔw Sinai so no ase? (b) Mmɔborohunu kyerɛ dɛn?
15 Nsɛm a Mose tee wɔ Bepɔw Sinai so no fii ase sɛ: Yehowa, Yehowa, Onyankopɔn mmɔborohunufo ne ɔdomfoɔ.’ Hebri asɛmfua a wɔkyerɛ ase “mmɔborohunufo” no fa “yafunu mu ade” ho na ɛne asɛmfua a wɔde gyina hɔ ma “awotwaa” wɔ abusuabɔ kɛse. Enti mmɔborohunu kyerɛ obi yam a ɛhyehye no. Nanso mmɔborohunu kyerɛ pii sen sɛ obi ho bɛyɛ yɛn mmɔbɔ. Ɛsɛ sɛ ɛka yɛn ma yɛyɛ biribi wɔ afoforo amanehunu ho. Sɛ nhwɛso no, Kristofo mpanyimfo a wɔwɔ dɔ no hu hia a ehia sɛ wɔda mmɔborohunu adi kyerɛ mfɛfo gyidifo, na wofi ‘anigye mu da mmɔboruhu adi’ bere a eyi fata no.—Romafo 12:8; Yakobo 2:13; Yuda 22, 23.
16. Dɛn nti na yebetumi aka sɛ Yehowa yɛ ɔdomfo?
16 Onyankopɔn papayɛ da adi wɔ ne dom mu nso. Obi a ɔyɛ ɔdomfo “susuw afoforo nkate ho,” na ne titiriw no, ofi ‘ɔdɔ mu da ayamye adi kyerɛ wɔn a wɔba fam no. Yehowa yɛ ɔdomfo sen biara wɔ ɔkwan a ɔfa so ne n’asomfo di nsɛm mu ho. Sɛ nhwɛso no, Onyankopɔn fi ayamye mu hyɛɛ odiyifo a na ne mfe akɔ anim, Daniel, den, na ɔkaa hokwan a ɔbaabun Maria nyae sɛ ɔbɛwo Yesu no kyerɛɛ no. (Daniel 10:19; Luka 1:26-38) Sɛ Yehowa nkurɔfo no, akyinnye biara nni ho sɛ yɛn ani sɔ ɔkwan a ɔnam Bible no so dom yɛn kasa kyerɛ yɛn no. Yeyi no ayɛ wɔ ne papayɛ a ɔda no adi saa kwan yi so no ho, na yɛhwɛ kwan sɛ yɛbɛda ayamye adi wɔ yɛne afoforo nsɛnnii mu. Sɛ wɔn a wɔyɛ honhom mufo no de “odwo honhom” teɛ yɔnko gyidini bi so a, wɔbɔ mmɔden sɛ wɔbɛyɛ wɔn brɛbrɛ na wɔada ayamye adi, “odwo honhom.”—Galatifo 6:1.
Onyankopɔn a N’abodwo Kyɛ
17. Dɛn nti na yɛn ani gye sɛ Yehowa ‘bo kyɛ fuw’?
17 ‘Onyankopɔn a n’abodwo kyɛ.’ Saa nsɛm no twe adwene si ɔkwan foforo a Yehowa fa so da ne papayɛ adi so. Yehowa fi boasetɔ mu nya yɛn sintɔ ahorow ho koma na ɔma yɛn bere a yɛde bedi mmerɛwyɛ ahorow so, na yɛanya honhom fam nkɔso. (Hebrifo 5:12–6:3; Yakobo 5:14, 15) Wɔn a wonnya mmɛyɛɛ Onyankopɔn asomfo no nso nya ne boasetɔ so mfaso. Wɔda so ara wɔ hokwan a wɔde betie Ahenni asɛm no na wɔasakra wɔn adwene. (Romafo 2:4) Ɛwom sɛ Yehowa wɔ bosetɔ, nanso ɛtɔ mmere bi a ne papayɛ ka no ma ɔda n’abufuw adi, sɛnea ɔyɛe bere a Israelfo kɔsom nantwi ba honi wɔ Bepɔw Sinai so no. Ɛrenkyɛ, Onyankopɔn bɛda n’abufuw adi wɔ ɔkwan kɛse so bere a ɔde Satan nneɛma nhyehyɛe bɔne no ba awiei no.—Hesekiel 38:19, 21-23.
18. Ɛdefa nokware no ho no, ntotoho bɛn na ɛwɔ Yehowa ne nnipa sodifo ntam?
18 ‘Yehowa yɛ Onyankopɔn a ne nokware dɔɔso pii.’ Hwɛ sɛnea ɛsono Yehowa koraa wɔ nnipa sodifo a wɔhyehyɛ bɔ akɛse nanso wontumi nni ho dwuma no ho! Sɛ yɛyɛ ntotoho a, Yehowa asomfo betumi de wɔn ho ato biribiara a wɔaka wɔ N’asɛm a efi honhom mu no so. Esiane sɛ Onyankopɔn nokware dɔɔso nti, yebetumi de yɛn ho ato ne bɔhyɛ ahorow so bere nyinaa. Yɛn soro Agya no papayɛ nti, obua mpae a yɛbɔ de hwehwɛ honhom fam nokware no denam ma a ɔma yenya ma ɛboro so so.
19. Papayɛ ho nhwɛso a ɛda nsow bɛn na Yehowa ada no adi akyerɛ abɔnefo a wɔanu wɔn ho?
19 ‘Yehowa yɛ Onyankopɔn a ɔde amumɔyɛ ne mmarato ne bɔne firi.’ Yehowa papayɛ nti, wayɛ krado sɛ ɔde abɔnefo a wonu wɔn ho bɔne befiri wɔn. Akyinnye biara nni ho sɛ, yɛn ani gye sɛ yɛn soro Agya no ayɛ nhyehyɛe a ɔnam Yesu afɔrebɔ no so de bɔne befiri. (1 Yohane 2:1, 2) Nokwarem no, yɛn ani gye sɛ wɔn a wɔkyerɛ agyede no mu gyidi nyinaa betumi ne Yehowa anya abusuabɔ pa, na wɔanya daa nkwa ho anidaso wɔ ne wiase foforo a wɔahyɛ ho bɔ no mu. Hwɛ nneɛma pa a enti ɛsɛ sɛ yeyi Yehowa ayɛ sɛ wada ne papayɛ adi akyerɛ adesamma!—2 Petro 3:13.
20. Adanse bɛn na yɛwɔ a ɛkyerɛ sɛ Onyankopɔn mfoa bɔneyɛ so?
20 ‘Bem na Yehowa remma ɔbɔnefo nni.’ Nokwasɛm ne sɛ eyi ka ho bi nti na ɛsɛ sɛ yɛkamfo Yehowa wɔ ne papayɛ ho no. Dɛn ntia? Efisɛ papayɛ ho ade biako a ehia ne sɛ ɛmfoa bɔneyɛ so ɔkwan biara so. Bio nso, “ɛda a wobeyi Awurade Yesu adi afi soro, ne ne tumi abɔfo” adi no wobedi “wɔn a wonnim Nyankopɔn ne wɔn a wɔantie . . . asɛmpa no were. Wɔn na wobenya akatua a ɛne, daa ɔsɛe.” (2 Tesalonikafo 1:6-9) Yehowa asomfo a wobefi mu aka no benya asetra mu anigye a nnipa abɔnefo a “wɔmpɛ papa” renhaw wɔn asomdwoe.—2 Timoteo 3:1-3.
Munsuasua Yehowa Papayɛ
21. Dɛn nti na ɛsɛ sɛ yɛda papayɛ adi?
21 Yɛwɔ biribiara a enti ɛsɛ sɛ yeyi Yehowa ayɛ na yɛda no ase wɔ ne papayɛ ho. Sɛ́ n’asomfo no, so ɛnsɛ sɛ yɛyɛ nea yebetumi nyinaa de da su yi adi? Yiw, ɔsomafo Paulo hyɛɛ mfɛfo Kristofo nkuran sɛ: “Enti munsua Onyankopɔn sɛ mma adɔfo.” (Efesofo 5:1) Yɛn soro Agya no da papayɛ adi bere nyinaa, na saa ara na ɛsɛ sɛ yɛn nso yɛyɛ.
22. Dɛn na yebesusuw ho wɔ adesua a edi hɔ no mu?
22 Sɛ yefi koma nyinaa mu ahyira yɛn ho so ama Yehowa a, akyinnye biara nni ho sɛ yɛwɔ ɔpɛ a emu yɛ den sɛ yebesuasua ne papayɛ. Esiane sɛ yɛyɛ ɔbɔnefo Adam asefo nti, ɛyɛ den ma yɛn sɛ yɛbɛyɛ papa. Nanso wɔ adesua a edi hɔ mu no, yebehu nea enti a yebetumi ada papayɛ adi. Afei nso yebesusuw akwan a yebetumi afa so asuasua Yehowa—papayɛ ho nhwɛsofo a ɔsen biara—ne nea enti a ɛsɛ sɛ yɛyɛ saa ho.
Wubebua Dɛn?
• Dɛn ne papayɛ?
• Kyerɛwnsɛm bɛn na esi Onyankopɔn papayɛ so dua?
• Nneɛma bɛn na ɛda Yehowa papayɛ adi?
• Dɛn nti na ɛsɛ sɛ yesuasua nhwɛso a Yehowa yɛ wɔ papayɛ ho no?
[Adesua no ho Nsɛmmisa]
[Mfonini wɔ kratafa 12]
Yehowa twee ne nkurɔfo a na wɔwɔ hɔ tete no aso esiane sɛ wɔanni nsɛm a wɔka de yii no ayɛ no ho dwuma nti
[Mfonini wɔ kratafa 12]
Nkaefo anokwafo bi san baa Yerusalem
[Mfonini wɔ kratafa 13]
Mose tee Onyankopɔn papayɛ ho mpaemuka bi a na ɛyɛ nwonwa
[Mfonini wɔ kratafa 15]
Yehowa papayɛ da adi wɔ ɔkwan a ɔnam Bible so ne yɛn kasa no so