Mframa Ano Hintabea

WƆ ALPINE mmepɔw so wɔ Europa no, wubetumi ahu afifide bi a wɔfrɛ no alpine nhwiren. Saa nnua ntiatiaa yi taa fifi yɛ nkyɛkyerɛ bɔ asase no ho ban wɔ mmepɔw so mframa a ano yɛ den no ho. Mframa a ano yɛ den a ɛbɔ bere nyinaa no haw alpine nnua no denam wim hyew a ɛbrɛ no ase, na ɛma mframa ne dɔte no mu yɛ wesee, na etutu nnua no gu no so.

Alpine nhwiren no taa kwati mframa a ano yɛ den no denam fifi a efifi wɔ abotan ntam no so. Ɛwom sɛ ebetumi aba sɛ dɔte a ɛwɔ saa mmeae yi no nnɔɔso de, nanso abotan no bɔ nnua no ho ban fi mframa no ho na ɛma nnua no nya nsu. Esiane sɛ ɛkame ayɛ sɛ alpine nhwiren yi hintaw wɔ mframa no ano afe no nyinaa mu nti, wɔ ahohurubere mu no, nhwiren yi bere ma mmepɔw no so yɛ kɔɔ fɛfɛɛfɛ.

Odiyifo Yesaia kyerɛkyerɛɛ mu sɛ Onyankopɔn bɛpaw “asafohene,” na wɔn mu biara bɛyɛ “mframa ano hintabea.” (Yesaia 32:1, 2) Wɔ Ɔhene, Kristo Yesu, akwankyerɛ ase no, saa honhom fam asafohene, anaa ahwɛfo yi bɛyɛ sɛ abotan a wonhinhim wɔ ɔhaw anaa ahokyere mu. Wɔbɛma wɔanya nokware hintabea wɔ ahokyere mu na wɔaboa wɔn a wohia mmoa no ma wɔabɔ wɔn honhom fam nsu a efi Onyankopɔn Asɛm mu no ho ban.

Sɛ wɔammɔ Kristoni bi ho ban a, ɔtaa, abasamtu, ne yare betumi ama ne gyidi ayɛ mmerɛw. Kristofo mpanyimfo betumi de ahobammɔ ama denam aso a wɔbɛyɛ atie ne haw, de Bible mu afotu ama, na wɔde nkuranhyɛ anaa mmoa ankasa ama so. Te sɛ wɔn Hene a wɔapaw no, Kristo Yesu no, wɔpɛ sɛ wɔboa wɔn a “wɔsam” hɔ no. (Mateo 9:36) Na wɔwɔ ɔpɛ sɛ wɔbɛboa afoforo a atoro nkyerɛkyerɛ ho mframa asɛe wɔn no. (Efesofo 4:14) Mmoa a ɛte saa a wɔde ma wɔ ne bere mu no betumi ayɛ nea mfaso wɔ so.

Miriam kyerɛkyerɛ mu sɛ: “Mekɔɔ ahohia mu bere a me nnamfo paa bi fii asafo no mu na bere koro no ara no, me papa amemene mu tuu mogya no. Nea ɛbɛyɛ na madi ɔhaw no so no, mifii ase ne wiaseni barima bi twee mpena. Ɛno akyi bere tiaa bi no, mebɛtee nka sɛ memfata, na mebɔɔ asafo mu mpanyimfo no amanneɛ sɛ mepɛ sɛ mifi nokware no mu efisɛ migye di sɛ Yehowa ntumi nnɔ me.

“Wɔ saa ahokyere bere yi mu no, ɔpanyin bi a ɔwɔ tema kaee me mfe a mede asom sɛ daa kwampaefo no. Ɔka kyerɛɛ me sɛ n’ani gye me nokwaredi ho bere nyinaa, na ofi ayamye mu kae sɛ memma mpanyimfo no mmoa me ma minhu sɛ Yehowa dɔ me. Ná ɔdɔ mu a wofi kyerɛɛ me ho anigye saa ahokyere bere mu no te sɛ ‘hintabea’ wɔ honhom fam ahum a ɛbɔɔ me no mu. Wɔ ɔsram biako ntam no, me ne me mpena no twaa abusuabɔ mu, na makɔ so anantew nokware no mu fi saa bere no.”

Sɛ mpanyimfo hu sɛ wɔn mfɛfo Kristofo renya honhom fam nkɔso esiane ahobammɔ a wonyae wɔ bere a ɛsɛ mu nti a, wɔn ani gye. Na saa ‘hintabea ahorow’ yi ma yehu sɛnea honhom fam mmoa pii a yebenya wɔ Kristo Mfirihyia Apem Nniso mu no bɛyɛ.