Nnyinasosɛm a Wobɛpaw

WOYƐ obi a wode nnyinasosɛm di dwuma? Anaa wubu abrabɔ ho nnyinasosɛm sɛ ɔkwan bi so no ɛyɛ ntetekwaasɛm? Nokwasɛm no ne sɛ obiara wɔ nnyinasosɛm bi a osusuw sɛ ehia sɛ ɔde di dwuma. Sɛnea The New Shorter Oxford English Dictionary kyerɛ no, wɔkyerɛ nnyinasosɛm ase sɛ “ade a ɛteɛ ho mmara a obi hyehyɛ.” Nnyinasosɛm na ɛma yesisi yɛn gyinae na ɛno na ɛkyerɛ yɛn asetra kwan. Yebetumi de nnyinasosɛm atoto kɔmpase ho.

Sɛ nhwɛso no, Yesu tuu n’akyidifo fo sɛ wonni Mmara Pa a wɔka ho asɛm wɔ Mateo 7:12 no so: “Enti ade biara a mopɛ sɛ nnipa nyɛ mma mo no, mo nso monyɛ wɔn saa ara.” Konfusio akyidifo di li ne jen nnyinasosɛm a esi su te sɛ ayamye, ahobrɛase, obu ne nokwaredi so dua no so. Wɔn a wɔnnyɛ nyamesomfo mpo wɔ gyinapɛn anaa akwankyerɛ bi a ɛkyerɛ wɔn asetra kwan.

Nnyinasosɛm Bɛn?

Nanso, ɛsɛ sɛ yɛma ɛtra yɛn adwenem sɛ nnyinasosɛm betumi ayɛ ade a eye anaa nea enye. Sɛ nhwɛso no, nea wɔafrɛ no ahopɛ wɔ mfe du anaa nea ɛboro saa a atwam no anya nnipa pii so tumi. Ɛwom sɛ nnipa pii nnim saa asɛm no anaasɛ wɔte nka sɛ ɛmfa wɔn ho de, nanso ahopɛ yɛ su a nnipa pii da no adi bere a wobu wɔn ani gu abrabɔ mu gyinapɛn ahorow so no. Sɛ obi nim saa asɛmfua no anaasɛ onnim no, mpɛn pii no, ahopɛ da pɛsɛmenkominya su adi, na ɛne honam fam adedodowpɛ akyidi na ɛtaa nam. TV adwumakuw bi a ɛwɔ China no panyin bi kae sɛ: “Yɛwɔ nnyinasosɛm abien pɛ. Biako ne sɛ obi betumi atɔ ade. Foforo no ne sɛ obi benya sika.”

Ahopɛ betumi ayɛ adwuma te sɛ twebo. Na tumi bɛn na twebo nya wɔ kɔmpase so? Sɛ abien no bɛn ho a, paane a ɛwɔ kɔmpase no so dan hwɛ baabi foforo. Saa ara na ahopɛ betumi asɛe abrabɔ kɔmpase, anaa nea ɛma wɔda suban pa adi, denam nea onipa no pɛ a ɔbɛma ahia no asen ade foforo biara so.

Sɛ wuhu sɛ ahopɛ nyɛ biribi a afei na aba so a, ɛbɛyɛ wo nwonwa? Abrabɔ su a ɛte saa no fii ase wɔ Eden turo no mu bere a yɛn awofo a wodi kan no buu wɔn ani guu abrabɔ gyinapɛn a yɛn Bɔfo no de mae so no. Ɛno na ɛsesaa wɔn abrabɔ kɔmpase no. Sɛ Adam ne Hawa asefo no, asetra ho adwene a ɛte saa ara, a nnansa yi wɔato din “ahopɛ” na ɛhaw adesamma nyinaa.”—Genesis 3:6-8, 12.

Su a ɛte saa no da adi kɛse wɔ bere a Bible nkɔmhyɛ frɛ no “nna a edi akyiri” a “emu yɛ den” yi mu. Nnipa pii yɛ “ahopɛfo.” Ɛnyɛ nwonwa sɛ yenya ɔpɛ a emu  yɛ den sɛ yɛbɛyɛ ahopɛfo.—2 Timoteo 3:1-5.

Ebia wo ne aberante bi a wɔfrɛ no Olaf a ɔkyerɛw krataa yi kɔmaa Yehowa Adansefo baa dwumadibea a ɛwɔ Europa man bi mu no yɛ adwene: “Ɛyɛ den paa sɛ wobebu bra pa, ɛnkanka yɛn a yɛyɛ mmofra no. Yɛsrɛ sɛ monkɔ so nkaakae yɛn na yɛatumi de Bible nnyinasosɛm adi dwuma.”

Olaf daa adwempa adi. Onyankopɔn nnyinasosɛm betumi aboa yɛn—sɛ ebia yɛyɛ mmofra anaa mpanyin—na yɛatumi akura abrabɔ gyinapɛn a ɛkorɔn mu. Ebetumi aboa yɛn nso ma yɛakwati ahopɛ, sɛ wonim no saa anaasɛ wonnim no saa no. Sɛ wopɛ sɛ wuhu sɛnea Bible nnyinasosɛm betumi aboa wo paa a, yɛsrɛ sɛ susuw asɛm a edi hɔ no ho.

[Mfonini ahorow wɔ kratafa 4]

Ɛnnɛ, nnipa pii nnwene afoforo ahiade ho