“Mprempren De, Ebetumi Ayɛ Yaw”

SO NSƐM yi afa w’asom pɛn? Ebetumi aba sɛ oduruyɛfo anaa ɔyarehwɛfo bi na ɔka kyerɛɛ wo ansa na ɔreyɛ wo aduru.

Ɛda adi sɛ yaw a wunim sɛ wubedi no amma woampo aduruyɛ no. Mmom no, wugyinaa yaw no ano sɛnea ɛbɛyɛ a daakye w’akwahosan betu mpɔn. Wɔ tebea horow a emu yɛ den mu no, gye a obi begye aduruyɛ bi atom anaasɛ ɔrennye ntom no betumi ayɛ owu ne nkwa asɛm.

Ɛwom sɛ ɛnyɛ bere nyinaa na yebehia sɛ ɔyarehwɛfo bi bɛhwɛ yɛn, nanso sɛ́ nnipa a yɛnyɛ pɛ no, yehia nteɛso anaa animka, ɛwom sɛ ɛtɔ mmere bi a ɛyɛ yaw de. (Yeremia 10:23) Bere a Bible no resi hia a eyi ho hia ma mmofra so dua no, ɛka sɛ: “Agyimisɛm kyekyere abofra koma ho, nteɛso abaa bɛma afi ne ho.”—Mmebusɛm 22:15.

Wɔ eyi mu no, abaa no gyina hɔ ma tumi a awofo wɔ. Ɛyɛ nokware sɛ mmofra kakraa bi na wɔpɛ nteɛso. Sɛ asotwe bi ka ho a, ebia wɔrempɛ. Nanso, awofo a wonim nyansa na wɔwɔ dɔ no bu wɔn ani gu yaw a abofra no bedi no so de wɔn ani si mfaso a ebefi mu aba no so. Kristofo awofo nim sɛ Onyankopɔn Asɛm yɛ nokware bere a ɛka sɛ: “Asotwe biara asotwe, mprempren de, ɛnyɛ yɛn sɛ anigyede, na mmom awerɛhowde, nanso akyiri no, ɛsow asomdwoe aba a ɛyɛ trenee” no.—Hebrifo 12:11; Mmebusɛm 13:24.

Nokwarem no, ɛnyɛ mmofra nkutoo na wohia nteɛso. Mpanyimfo nso hia bi. Bible no kasa kyerɛ mpanyimfo bere a ɛka eyi no: “So nteɛso mu dennen, nnyaa mu, kora no, na ɛne wo nkwa.” (Mmebusɛm 4:13) Yiw, anyansafo—mmofra ne mpanyin—begye nteɛso a egyina Onyankopɔn Asɛm, Bible, so no atom efisɛ awiei koraa no, saa a wɔbɛyɛ no bɛma wɔanya wɔn ti adidi mu.