Onyankopɔn Hann Hyerɛn Esum Mu!
Onyankopɔn Hann Hyerɛn Esum Mu!
“[Yehowa, “NW”] haran me sum mu.”—2 SAMUEL 22:29.
1. Ayɔnkofa bɛn na hann ne nkwa wɔ?
“ONYANKOPƆN kae sɛ: Ɛnyɛ hann! Na ɛyɛɛ hann.” (Genesis 1:3) Adebɔ ho kyerɛwtohɔ a ɛwɔ Genesis no de nsɛm a ɛho hia paa yi kyerɛ sɛ Yehowa ne hann fibea, hann a sɛ enni hɔ a anka nkwa biara ntumi ntra asase so. Yehowa ne honhom mu hann a ɛkyerɛ yɛn kwan wɔ abrabɔ mu no nso fibea. (Dwom 43:3) Ɔhene Dawid kyerɛɛ ayɔnkofa kɛse a ɛda honhom mu hann ne nkwa ntam bere a ɔkyerɛw eyi no: “Wo nkyɛn na nkwa nsuti wɔ, wo hann mu na yehu hann.”—Dwom 36:9.
2. Sɛnea Paulo kyerɛe no, dɛn na ɛne hann wɔ twaka kɛse?
2 Dawid traa ase bɛyɛ mfe 1,000 akyi no, ɔsomafo Paulo kaa adebɔ ho kyerɛwtohɔ no ho asɛm. Bere a ɔrekyerɛw Kristofo asafo a ɛwɔ Korinto no, ɔkae sɛ: ‘Onyankopɔn na ɔkae sɛ hann mfi sum mu nhyerɛn.’ Afei Paulo de nea ɔka toaa so yi kyerɛe sɛ twaka kɛse bi da honhom mu hann ne nimdeɛ a efi Yehowa hɔ ntam: “Wahyerɛn yɛn koma mu, sɛ Onyankopɔn anuonyam a ɛwɔ Kristo anim no ho nimdeɛ nharan.” (2 Korintofo 4:6) Ɔkwan bɛn na yɛnam so nya saa hann yi?
Bible—Ade a Yɛnam So Nya Hann
3. Hann bɛn na Yehowa nam Bible no so de ma yɛn?
3 Yehowa nam N’asɛm kronkron Bible no so titiriw na ɛma yenya honhom mu hann. Enti sɛ yesua Bible no na yenya nimdeɛ a efi Onyankopɔn hɔ a, na yɛrema ne hann no ahyerɛn yɛn so. Yehowa nam Bible no so ma yehu n’atirimpɔw ahorow na ɔkyerɛ yɛn nea ɛbɛma yɛatumi ayɛ n’apɛde. Ɛma yenya botae wɔ yɛn asetra mu na ɛboa ma yenya yɛn honhom mu ahiade. (Ɔsɛnkafo 12:1; Mateo 5:3) Yesu sii so dua sɛ ɛsɛ sɛ honhom mu nneɛma ho hia yɛn bere a ɔfaa Mose Mmara no mu asɛm yi kae no: “Wɔakyerɛw sɛ: Ɛnyɛ abodoo nko so na onipa nam bɛtra ase, na asɛm biara a efi Onyankopɔn anom so.”—Mateo 4:4; Deuteronomium 8:3.
4. Ɔkwan bɛn so na Yesu yɛ “wiase hann”?
4 Yentumi nkwati Yesu nnya honhom mu hann. Nokwarem no, ɔkyerɛe sɛ ɔne “wiase hann,” na ɔkae sɛ: “Nea odi m’akyi no rennantew sum mu, na obenya nkwa hann.” (Yohane 8:12) Saa asɛm yi boa yɛn ma yɛte ase sɛ Yesu ne onipa titiriw a ɔde Yehowa nokware no ma adesamma. Sɛ yɛbɛkwati sum anantew Onyankopɔn hann mu a, ɛsɛ sɛ yetie Yesu nsɛm nyinaa na yedi ne nhwɛso ne ne nkyerɛkyerɛ a ɛwɔ Bible mu no akyi pɛɛ.
5. Bere a Yesu wui no, adwuma bɛn na ɛbɛtɔɔ n’akyidifo no so?
5 Aka nna kakraa bi ama Yesu awu no, ɔsan kae sɛ ɔyɛ hann, na ɔka kyerɛɛ n’asuafo no sɛ: “Aka hann no bere tiaa bi wɔ mo mu. Mowɔ hann no yi, monnantew, na esum ammɛto mo; na nea ɔnam sum mu no nnim nea ɔrekɔ. Mowɔ hann no yi, munnye hann no nni, na moayɛ hann no mma.” (Yohane 12:35, 36) Wɔn a wɔbɛyɛɛ hann mma no suaa Bible ‘nsɛm pa a eye nhwɛso no.’ (2 Timoteo 1:13, 14) Afei wɔde nsɛm pa a eye no twee nnipa komapafo fii sum no mu baa Nyankopɔn hann mu.
6. Hann ne sum ho nokwasɛm titiriw bɛn na ɛwɔ 1 Yohane 1:5?
6 Ɔsomafo Yohane kyerɛwee sɛ: “Onyankopɔn yɛ hann, na esum biara nni ne mu.” (1 Yohane 1:5) Hyɛ no nsow wɔ ha sɛ nsonsonoe wɔ hann ne esum mu. Honhom mu hann fi Yehowa na honhom mu sum nni ne mu. Ɛnde na hena na esum no fi no?
Honhom mu Sum—Ne Fibea
7. Honhom mu sum a ɛwɔ wiase no fi hena, na nkɛntɛnso bɛn na ɔwɔ?
7 Ɔsomafo Paulo kaa “wi yi ase nyame” no ho asɛm. Ná ɔrekyerɛ Satan Ɔbonsam. Ɔkae nso sɛ onii no “afura wɔn a wonnye nni no adwene ani, na Kristo a ɔyɛ Onyankopɔn suban no anuonyam asɛmpa no hann anharan amma wɔn.” (2 Korintofo 4:4) Nnipa bebree ka sɛ wogye Nyankopɔn di; nanso wɔn a wonnye nni sɛ Ɔbonsam wɔ hɔ no redɔɔso. Adɛn ntia? Wɔmpɛ sɛ wogye tom sɛ tumi bɔne bi a n’ahoɔden kyɛn nnipa wɔ hɔ a obetumi akɛntɛn nnipa adwene so. Nanso, sɛnea Paulo kyerɛ no, Ɔbonsam wɔ hɔ ankasa, na wakɛntɛn nnipa so ma enti wonhu nokware hann no. Sɛnea wɔka Satan ho asɛm nkɔmhyɛ kwan so sɛ “nea ɔdaadaa amanaman nyinaa no” ma yehu sɛ ɔwɔ tumi a ɔde kɛntɛn nnipa adwene so. (Adiyisɛm 12:9) Nea Satan nnwuma de aba nti, tebea a odiyifo Yesaia hyɛɛ ho nkɔm yi ka nnipa nyinaa nnɛ, gye wɔn a wɔsom Yehowa no: “Hwɛ, esum bɛkata asase so, na sum kabii akata aman so.”—Yesaia 60:2.
8. Akwan bɛn so na wɔn a wɔwɔ honhom mu sum mu no da no adi sɛ wɔn adwene atu afra?
8 Sɛ obi wɔ sum kabii mu a, onhu hwee. Ɛnkyɛ koraa na wayera, anyɛ saa nso a na n’adwene atu afra. Saa ara nso na wɔn a wɔwɔ honhom mu sum mu no nni ntease, na ɛnkyɛ biara na wɔn adwene atu afra wɔ honhom fam. Wobetumi abɛyɛ nnipa a wontumi nhu nsonsonoe a ɛwɔ nokware ne atoro ne papa ne bɔne mu. Odiyifo Yesaia kaa wɔn a wɔwɔ sum a ɛte saa mu no ho asɛm bere a ɔkyerɛw asɛm yi no: “Wonnue, wɔn a wɔfrɛ bɔne sɛ papa, ne papa sɛ bɔne, wɔn a wɔde sum yɛ hann, na wɔde hann yɛ sum, wɔde nwenenwene yɛ fremfrem, na wɔde fremfrem yɛ nwenenwene!” (Yesaia 5:20) Satan Ɔbonsam, esum no nyame no akɛntɛn wɔn a wɔwɔ honhom mu sum mu no adwene so, na ama wɔatwe wɔn ho afi hann ne nkwa fibea no ho.—Efesofo 4:17-19.
Efi Sum Mu Kɔ Hann Mu—Emu Nsɛnnennen
9. Kyerɛkyerɛ sɛnea nnebɔneyɛfo ani gye sum ankasa ne honhom mu sum ho no mu.
9 Ɔnokwafo Hiob kaa no pefee wɔ n’asɛm yi mu sɛ nnebɔneyɛfo ani gye sum ankasa ho: “Ɔwaresɛefo aniwa twɛn sum bere, ɔka sɛ: Aniwa bi renhu me; na ɔde nkataho kata n’anim.” (Hiob 24:15) Nnebɔneyɛfo wɔ honhom mu sum nso mu, na esum a ɛte saa betumi afa wɔn nnommum. Ɔsomafo Paulo kae sɛ aguamammɔ, korɔnbɔ, adifudepɛ, asabow, atɛnnidi, ne apoobɔ yɛ nneɛma a wɔn a esum akyere wɔn no taa yɛ. Nanso obiara a ɔba Onyankopɔn Asɛm mu hann ho no betumi asakra. Paulo da no adi wɔ ne krataa a ɔkyerɛw kɔmaa Korintofo no mu sɛ saa nsakrae no betumi ayɛ yiye. Ná Kristofo a wɔwɔ Korinto no pii yɛ sum nnwuma, nanso Paulo ka kyerɛɛ wɔn sɛ: “Na afei wɔaguare mo, na wɔatew mo ho, na wɔabu mo bem Awurade Yesu Kristo din ne yɛn Nyankopɔn honhom mu.”—1 Korintofo 6:9-11.
10, 11. (a) Ɔkwan bɛn so na Yesu huu ɔbarima bi a obuee n’ani no mmɔbɔ? (b) Adɛn nti na nnipa bebree mpɛ hann no?
10 Sɛ obi fi sum kabii mu ba hann mu a, ebia ɛbɛyɛ kakra ansa na n’ani ahu ade yiye. Yesu saa onifuraefo bi yare wɔ Betsaida, nanso ofi ayamye mu yɛɛ no nkakrankakra. “Osoo onifuraefo no nsa de no fii akuraa no ase, na ɔtoo ntasu guu n’ani so de ne nsa guu no so bisaa no sɛ: Wuhu ade anaa? Na ɔmaa n’ani so kae sɛ: Mihu nnipa a ɛnennam hɔ, nanso mihu wɔn sɛ nnua. Afei ɔde ne nsa guu n’ani so bio, na ɔhwɛɛ ade haa; na ne ho san no, na ohuu biribiara kann.” (Marko 8:23-25) Ɛda adi sɛ Yesu buee ɔbarima no ani nkakrankakra sɛnea ɛbɛyɛ a owia hann no remma n’ani so nwowɔ no. Yentumi nka sɛnea ɔbarima no ani gyei bere a ohuu ade no.
11 Nanso wɔn a wɔboa wɔn ma wofi honhom mu sum mu ba nokware hann mu nkakrankakra no nya anigye kɛse koraa sen anigye a ɔbarima no nyae no. Sɛ yehu anigye a wonya no a, ɛma ɛyɛ yɛn nwonwa sɛ nnipa pii mma hann no ho. Yesu kyerɛ nea enti a ɛte saa: “Eyi mmom ne atemmu no, sɛ hann no aba wiase, na nnipa dɔ sum sen hann no; efisɛ wɔn nnwuma yɛ bɔne. Na obiara a ɔyɛ bɔne no tan hann no, na ɔmma hann no ho, na wɔanyi no ne nnwuma ho ntɛn.” (Yohane 3:19, 20) Ampa, nnipa bebree ani gye “bɔne”—te sɛ aguamammɔ, nhyɛso, atorodi, amimdi, ne adewia—ho, na Satan honhom mu sum no yɛ baabi a ɛfata a wobetumi ayɛ nea wɔpɛ.
Nkɔso a Yebenya Wɔ Hann no Mu
12. Hann a yɛaba mu no aboa yɛn akwan bɛn so?
12 Efi bere a yenyaa hann no ho nimdeɛ no, nsakrae bɛn na yɛahu wɔ yɛn ankasa yɛn ho? Ɛtɔ da bi a, eye sɛ yebetwa yɛn ani ahwɛ yɛn akyi na yɛahwɛ honhom mu nkɔso a yɛanya. Subammɔne bɛn na yɛagyae? Yɛn asetra mu nsɛm bɛn na yɛatumi atoto no yiye? Ɔkwan bɛn so na nea yɛabɔ yɛn tirim sɛ yɛbɛyɛ daakye no asesã? Yehowa ahoɔden ne ne honhom kronkron no mmoa nti, yebetumi akɔ so ayɛ nsakrae wɔ yɛn suban ne sɛnea yɛdwene mu ama ada adi sɛ yɛrema hann no ahyerɛn yɛn so. (Efesofo 4:23, 24) Paulo ka no saa kwan yi so sɛ: “Kan no anka moyɛ sum, na afei de, moyɛ hann, Awurade mu; monnantew sɛ hann mma,—efisɛ hann aba da adi papayɛ ne trenee ne nokware nyinaa mu.” (Efesofo 5:8, 9) Sɛ yɛma Yehowa hann no kyerɛ yɛn kwan a, ɛma yenya anidaso ne botae wɔ asetra mu na ɛma wɔn a wɔatwa yɛn ho ahyia no nso asetra kɔ yiye. Hwɛ sɛnea nsakrae a yɛyɛ yi ma Yehowa koma ani gye!—Mmebusɛm 27:11.
13. Ɔkwan bɛn so na yebetumi akyerɛ anisɔ wɔ Yehowa hann no ho, na dɛn na ehia na ama yɛatumi ayɛ saa?
13 Yɛnam Yehowa hann a yɛbɛma ahyerɛn—aka nea yɛasua afi Bible mu no bi akyerɛ abusuafo, nnamfo ne afipamfo—no so kyerɛ sɛ yɛn ani sɔ abrabɔ pa a yɛwɔ no. (Mateo 5:12-16; 24:14) Yɛn asɛnka adwuma ne yɛn Kristofo abrabɔ pa no yi wɔn a wontie yɛn no ntɛn. Paulo kyerɛkyerɛ mu sɛ: “Monsɔ nea ɛsɔ Awurade ani yiye no nhwɛ. Na monnyɛ esum nnwuma a ɛnsow aba no bi, na mmom munyi ho ntɛn!” (Efesofo 5:10, 11) Ehia akokoduru na ama yɛatumi aboa afoforo ma wɔafi esum no mu aba hann no ho. Nea ehia kɛse ne sɛ, egye mmɔborohunu ne tema ne komapa na ama yɛatumi ne afoforo akyɛ nokware hann no ma asi wɔn yiye daa.—Mateo 28:19, 20.
Hwɛ Yiye Wɔ Atoro Hann Ho!
14. Hann no ho kɔkɔbɔ bɛn na ɛsɛ sɛ yetie?
14 Sɛ esum duru apofofo wɔ po so a, kanea a wobehu biara ma wɔn ani gye. Tete no, na wɔsɔ gya wɔ abotan akɛse so wɔ England de kyerɛ baabi a nkurɔfo betumi aguan akɔpɛ hintabea bere a ahum tu no. Po so hyɛn mu adwumayɛfo ani gyei sɛ kanea yi maa wohuu kwan kɔɔ hyɛn gyinabea a asiane biara nni hɔ no. Nanso na ogya no bi daadaa wɔn. Ahyɛn no bebree anhu kwan ankɔ hyɛn gyinabea, mmom no, ogya no bi maa wɔyeraa kwan kɔfaa abo so wɔ mpoano bɔe, maa akorɔmfo wiaa wɔn nneɛma. Wɔ wiase a nnaadaa ahyɛ mu ma yi mu no, ɛsɛ sɛ yɛhwɛ yiye na atoro hann antwetwe yɛn annaadaa yɛn amma yɛangu asu wɔ honhom mu. Wɔka kyerɛ yɛn sɛ, “Satan ankasa po dan ne ho sɛ hann bɔfo.” Saa ara na n’asomfo, a awaefo ka ho no, yɛ “nnaadaa adwumayɛfo” a wɔn nso “wɔdan wɔn ho yɛ sɛ Kristo asomafo.” Sɛ yetie atosɛm a nkurɔfo yi ka no de kɔ adwennwene mu a, awerɛhyem a yɛwɔ wɔ Yehowa Asɛm a ɛyɛ nokware, Bible, mu no betumi abrɛ ase ama yɛapa gyidi.—2 Korintofo 11:13-15; 1 Timoteo 1:19.
15. Dɛn na ɛbɛboa yɛn ma yɛanantew nkwa kwan no so?
15 Ɔdwontofo no kyerɛwee sɛ: “W’asɛm yɛ me nan ase kanea, ne me kwan so hann.” (Dwom 119:105) Yiw, ɔdɔ Nyankopɔn, Yehowa, “a ɔpɛ sɛ wogye nnipa nyinaa nkwa na wɔba nokware nimdeɛ mu no” ama ‘ɔkwan hihiaa a ɛkɔ nkwa mu no’ so ahyerɛn hann. (Mateo 7:14; 1 Timoteo 2:4) Sɛ yɛde Bible nnyinasosɛm yɛ adwuma a, ɛbɛbɔ yɛn ho ban na yɛamfi ɔkwan hihiaa no so ankɔfa sum mu. Paulo kyerɛwee sɛ: “Kyerɛw nyinaa fi Nyankopɔn home mu, na eye ma ɔkyerɛkyerɛ, ntɛnyi, nteɛso ne trenee mu yɛn.” (2 Timoteo 3:16) Bere a yɛrenyin wɔ honhom mu no, na Onyankopɔn Asɛm rekyerɛkyerɛ yɛn. Yebetumi de Onyankopɔn Asɛm mu hann no ayi yɛn ho ntɛn anaasɛ, sɛ ɛho behia a, asafo mu ahwɛfo a wɔwɔ dɔ no betumi ayi yɛn ntɛn. Saa ara nso na yebetumi atoto nneɛma yiye de ahobrɛase agye nteɛso atom wɔ trenee mu na ama yɛakɔ so anantew nkwa kwan no so.
Fa Anisɔ Nantew Hann no Mu
16. Yɛbɛyɛ dɛn akyerɛ hann a Yehowa fi ɔdɔ mu de ama yɛn no ho anisɔ?
16 Yɛbɛyɛ dɛn akyerɛ hann a Yehowa fi ɔdɔ mu de ama yɛn no ho anisɔ? Yohane ti 9 ka kyerɛ yɛn sɛ, bere a Yesu buee ɔbarima bi a wɔwoo no onifuraefo ani no, ɛkaa ɔbarima no maa no yɛɛ biribi de kyerɛe sɛ n’ani asɔ. Ɔkwan bɛn so? Onyaa Yesu mu gyidi sɛ ɔyɛ Onyankopɔn Ba, na ɔkaa no wɔ baguam sɛ ɔyɛ “odiyifo.” Afei nso ɔde akokoduru kasa tiaa wɔn a wɔbɔɔ mmɔden sɛ wobebu Yesu anwonwade no animtia no. (Yohane 9:17, 30-34) Ɔsomafo Petro frɛ Kristofo asafo no mufo a wɔasra wɔn no sɛ “ɔman a wafa wɔn ayɛ ne de.” Adɛn ntia? Efisɛ wɔn nso wɔkyerɛ nneɛma ho anisɔ te sɛ ɔbarima a wɔwoo no onifuraefo a wɔsaa no yare no. ‘Wɔka nea ɔfrɛɛ wɔn fii esum mu baa ne hann a ɛyɛ nwonwa mu no mmaninyɛ kyerɛ’ de da no adi sɛ wɔn ani sɔ nea Yehowa, wɔn Dimafo no, yɛ ma wɔn no. (1 Petro 2:9; Kolosefo 1:13) Wɔn a wɔwɔ anidaso sɛ wɔbɛtra asase so no nso kyerɛ nneɛma ho anisɔ saa ara, na wɔboa wɔn nuanom a wɔasra wɔn no ma wɔka Yehowa “mmaninyɛ” kyerɛ nnipa nyinaa. Hwɛ hokwan kɛse a ɛte saa a Onyankopɔn de ama nnipa a yɛtɔ sin no!
17, 18. (a) Yɛn mu biara asɛde ne dɛn? (b) Dɛn na wɔhyɛ Kristoni biara nkuran sɛ ɔnkwati mfa nsuasua Timoteo?
17 Ehia sɛ yefi yɛn komam kyerɛ nokware hann no ho anisɔ. Kae sɛ wɔmfa nokware no nwo yɛn mu biara. Ebinom nyin wie ansa na wɔasua, na ɛnkyɛ biara na wɔahu sɛ hann no korɔn koraa sen esum no. Ebinom nso anya hokwan kɛse paa sɛ awofo a wosuro Onyankopɔn na ɛtete wɔn. Ɛnyɛ den sɛ wɔn a wonya hokwan a ɛte saa no betumi de nokware no adi agoru. Ɔdansefo bi a na n’awofo som Yehowa ansa na wɔrewo no no gye toom sɛ egyee bere ne mmɔdenbɔ pii ansa na ɔrete nokware a na wɔde atete no fi ne mmofraase no ase ahu hia a ɛho hia. (2 Timoteo 3:15) Ehia sɛ yɛn mu biara, mpanyin ne mmofra nyinaa, nya anisɔ ma nokware a Yehowa ada no adi akyerɛ yɛn no.
18 Ná wɔde “nkyerɛwee kronkron no” akyerɛkyerɛ aberantewaa Timoteo fi ne mmofraase, nanso ɔyeree ne ho wɔ ɔsom adwuma no mu ansa na ɔrebɛyɛ Kristoni a ne ho akokwaw. (2 Timoteo 3:15) Afei de ná obetumi aboa ɔsomafo Paulo a ɔmaa no saa afotu yi no: “Bɔ mmɔden fa wo ho gyina Onyankopɔn anim sɛ nea ɔfata, sɛ odwumayɛni a enhia sɛ ɔfɛre, na okura nokwasɛm no mu pɛpɛɛpɛ.” Ɛmmra sɛ yɛn nyinaa bɛyɛ sɛ Timoteo akwati biribiara a ɛbɛma yɛn ani awu—anaa biribiara a ɛbɛma yɛn ho ayɛ Yehowa aniwu!—2 Timoteo 2:15.
19. (a) Dɛn na ɛsɛ sɛ yɛn nyinaa ka te sɛ Dawid? (b) Dɛn na yebesusuw ho wɔ adesua a edi hɔ no mu?
19 Yɛwɔ nea enti a ɛsɛ sɛ yeyi Yehowa a ɔmaa yehuu nokware hann no ayɛ akwan nyinaa so. Yɛne Ɔhene Dawid yɛ adwene wɔ n’asɛm yi ho: “Wo, [Yehowa, NW] wone me kanea, na [Yehowa, NW] haran me sum mu.” (2 Samuel 22:29) Ne nyinaa mu no, ɛnsɛ sɛ yegye yɛn ho di dodo, anyɛ saa a yɛbɛwatiriw ahwe esum a wɔayi yɛn afi mu no mu bio. Enti adesua a edi hɔ no bɛboa yɛn ma yɛahwɛ sɛnea nokware a efi Onyankopɔn nkyɛn no som bo ma yɛn wɔ yɛn asetra mu.
Dɛn na Woasua?
• Ɔkwan bɛn na Yehowa nam so ma yɛn nsa ka honhom mu hann?
• Honhom mu sum a atwa yɛn ho ahyia no ma ɛyɛ den sɛ yɛbɛyɛ dɛn?
• Asiane ahorow bɛn na ɛsɛ sɛ yɛkwati?
• Ɔkwan bɛn so na yebetumi ada yɛn anisɔ adi wɔ nokware hann no ho?
[Adesua no ho Nsɛmmisa]
[Mfonini wɔ kratafa 8]
Yehowa na ɔma yenya honam fam hann ne honhom mu hann nyinaa
[Mfonini wɔ kratafa 10]
Sɛnea Yesu buee onifuraefo bi ani nkakrankakra no, saa ara na ɔboa yɛn ma yefi honhom mu sum mu
[Mfonini wɔ kratafa 11]
Satan atoro hann no daadaa nnipa ma wogu asu wɔ honhom mu