Onnyinii Dodo Sɛnea Ontumi Nsua Ade

WƆWOO Kseniya 1897 mu. Ɔwoo mmabea 3 ne ɔbabarima biako, na onyaa mmanana 15 ne nanankansowanom 25. N’asetra nyinaa mu no, nea n’awofo kyerɛɛ no na ɔyɛe. Ɛwom sɛ ɔko a na asɛe Abkhaz Republic a ɛhyɛ Ɛpo Tuntum ne Caucasus mmepɔw no ntam nti na oguan baa Moscow de, nanso na n’ani gye n’asetra ho, ɛnkanka gyidi a ɔse ne nananom de gyaw no no.

Kseniya babea Meri bɛyɛɛ Yehowa Dansefo wɔ 1993 mu. Meri fii ase kaa Yehowa Nyankopɔn ne Bible ho asɛm kyerɛɛ Kseniya nanso na ɔmfa ne ti nnye. Nea na Kseniya taa ka kyerɛ ne ba no ne sɛ: “Mapa ho, mintumi nsua ade foforo biara.”

Ne nyinaa akyi no, ne ba Meri; ne nana yere Londa; ne ne nanankansowa Nana ne Zaza, a na wɔn nyinaa abɛyɛ Yehowa Adansefo no, kɔɔ so kaa Bible no ho asɛm kyerɛɛ no. Afe 1999 anwummere bi, wɔkenkanee kyerɛwsɛm bi kyerɛɛ Kseniya maa ɛkaa ne koma. Ɛyɛ Yesu nsɛm a ɛka koma a ɔka kyerɛɛ asomafo anokwafo no bere a ɔde Awurade Anwummeduan no resi hɔ no. (Luka 22:19, 20) Bere a na Kseniya adi mfe 102 no, ɔyɛɛ n’adwene saa anwummere no sɛ obefi ase asua Bible.

Kseniya ka sɛ: “Madi mfe 102, na afei de, mabehu nea enti a yɛte ase. Seesei mahu sɛ biribiara nkyɛn sɛ yɛbɛsom yɛn Nyankopɔn Yehowa a ɔdɔ yɛn no. Meda so ara tumi yɛ biribiara, na mewɔ apɔwmuden. Mitumi kenkan ade a menhyɛ ahwehwɛniwa, na me ne m’abusuafo di akɔneaba.”

Kseniya bɔɔ asu November 5, 2000. Ɔka sɛ: “Seesei mede me ho ama Yehowa sɛ mɛsom no ɔdɔ mu. Metra bɔs gyinabea a ɛbɛn me fie de nsɛmma nhoma ne nkratawa mema nkurɔfo. Abusuafo taa bɛsra me na mede anigye ka Yehowa ho nokwasɛm kyerɛ wɔn.”

Kseniya rehwɛ kwan sɛ da bi ‘ne honam bɛyɛ sɔɔsɔɔ sɛ mmofra de, na wasan akɔ ne mmabaa bere mu.’ (Hiob 33:25) Sɛ obi a wadi mfe ɔha nte nka sɛ wapa ho sɛ obesua nea enti a yɛte ase afi Bible mu a, wo nso ɛ?