So Wudi Kan Susuw Ho?

YESU KRISTO maa n’asuafo no nyaa anidaso sɛ wobetumi anya daa nkwa, nanso ɔsan ka kyerɛɛ wɔn sɛ wonsusuw yɛ a wɔbɛyɛ Kristofo no ho. Ɔde asɛmmisa yi kyerɛkyerɛɛ mu sɛ: “Mo mu hena na ɔpɛ sɛ ɔto abantenten, na ɔrentra ase mmu ho akontaa ansa sɛ ɔwɔ nea ɔde betumi awie?” (Luka 14:28) Dɛn na na Yesu se wonsusuw ho no?

Sɔhwɛ to Kristofo nyinaa—ebi mu yɛ den. (Dwom 34:19; Mateo 10:36) Enti ɛsɛ sɛ yesiesie yɛn ho wɔ adwene ne honhom mu nyinaa sɛnea ɛbɛyɛ a sɛ ɔsɔretia anaa ɔhaw bi ba yɛn akwan mu a, ɛrenyɛ yɛn nwonwa. Ebia yenim dedaw sɛ, ɛnam sɛ yɛyɛ Kristo asuafo nti, nea ɛbɛyɛ biara, sɔhwɛ bɛto yɛn, a yenim sɛ ɛso akatua no—nkwagye a yebenya afi bɔne ne owu mu—kyɛn wiase yi mu biribiara. Ampa, biribiara a Onyankopɔn ma kwan biara—owu mpo—ntumi nsɛe yɛn kodwoo bere a yɛkɔ so som no no.—2 Korintofo 4:16-18; Filipifo 3:8.

Ɛbɛyɛ dɛn na yɛn gyidi atumi ayɛ den saa? Bere biara a yebesi gyinae pa, akura Kristofo nnyinasosɛm mu pintinn anaasɛ yɛbɛyɛ biribi sɛnea Onyankopɔn pɛ te—ɛnkanka bere a biribi hyɛ yɛn so sɛ yɛnyɛ bɔne—no, yɛn gyidi mu yɛ den. Sɛ yɛn nokwaredi nti Yehowa hyira yɛn a, ɛma yɛn gyidi yɛ den na ɛyɛ kɛse nso. Sɛ ɛba no saa a, na yɛresuasua Yesu ne n’asuafo a wodi kan no, ne mmea ne mmarima gyidifo a wɔatra ase pɛn a ‘wosusuw’ Onyankopɔn a wɔbɛsom no ho yiye no nyinaa.—Marko 1:16-20; Hebrifo 11:4, 7, 17, 24, 25, 32-38.