Nsɛmmisa a Efi Akenkanfo Hɔ

Sɛ obi di ne ho dɔm a, so hokwan wɔ hɔ sɛ Kristoni somfo bi bɛma ayi ase ɔkasa?

Ɛsɛ sɛ Kristoni somfo biara si n’ankasa gyinae sɛ ebia obefi ahonim pa mu ama ɔkasa wɔ obi a ɛte sɛ nea wadi ne ho dɔm ayi ase anaasɛ ɔmma. Ɛsɛ sɛ osusuw nsɛmmisa a edidi so yi ho bere a ɔresi gyinae no: Yehowa bu ahodɔmdi dɛn? So onipa no ankasa na okum ne ho? So adwenem anaa nkate fam haw bi na ɛma odii ne ho dɔm? Wobu ahodɔmdi wɔ mpɔtam hɔ dɛn?

Sɛ́ Kristofo no, nea ehia yɛn ne sɛnea Yehowa bu ahodɔmdi. Wɔ Yehowa fam no, nnipa nkwa som bo na ɛyɛ kronkron. (Genesis 9:5; Dwom 36:9) Wobu kum a obi hyɛ da kum ne ho no sɛ awudi, ma enti ɛnsɔ Onyankopɔn ani. (Exodus 20:13; 1 Yohane 3:15) So nokwasɛm a ɛte saa no kyerɛ sɛ ɛmfata sɛ wɔma ɔkasa wɔ obi a wadi ne ho dɔm ayi ase?

Susuw Israel hene Saulo asɛm no ho hwɛ. Bere a ohui sɛ obewu wɔ ɔko a etwa to a ɔne Filistifo dii mu no, sɛ anka ɔbɛma n’atamfo ayɛ no basabasa no, “Saulo faa nkrante na ɔhwee so.” Bere a Filistifo no huu ne funu no, wɔde sɛnee Bet-San kurow no fasu ho. Bere a Yebes-Gileadfo tee nea Filistifo ayɛ no, wobeyii funu no kɔhyewee. Afei wɔfaa ne nnompe kosiei. Wodii mmuada mpo nnanson, sɛnea na Israelfo ayiyɛ ho amanne te no. (1 Samuel 31:4, 8-13; Genesis 50:10) Bere a Dawid, nea Yehowa asra no no huu nea Yabes-Gileadfo ayɛ no, ɔkae sɛ: “[Yehowa, NW] nhyira nka mo sɛ moayɛ mo wura Saulo adɔe sɛɛ, na moasie no. Na afei [Yehowa, NW] ne mo nni no adɔe ne nokware so.” (2 Samuel 2:5, 6) Bible kyerɛwtohɔ nkyerɛ sɛ wɔkasa tiaa Yabes-Gileadfo no sɛ wɔyɛɛ nea ebia ɛte sɛ ayi ho amanne maa Ɔhene Saulo. Fa eyi toto asɛm a ɛfa wɔn a wɔansie wɔn esiane wɔn abɔnefosɛm nti no ho hwɛ. (Yeremia 25:32, 33) Kristoni somfo betumi asusuw kyerɛwtohɔ a ɛfa Saulo ho no ho, bere a ɔresi gyinae sɛ ebia ɔbɛma obi a wadi ne ho dɔm ayi ase ɔkasa anaasɛ ɔmma no.

Ɔsomfo no betumi asusuw atirimpɔw nti a wɔma ayi ase ɔkasa no ho. Nea ɛnte sɛ nkurɔfo a wogye onipa kra a enwu da di no, ɛnyɛ adwene a ɛnteɛ a ɛne sɛ nea wawu no rekɔ wiase foforo bi mu no na Yehowa Adansefo gyina so yɛ ayi. Sɛ anka ɛbɛboa nea wawu no, atirimpɔw titiriw a enti wɔma ayi ase ɔkasa ne sɛ ɛbɛkyekye wɔn a wɔn biribi awu no werɛ na adi wɔn a wɔaba ase no adanse ma wɔahu tebea a awufo wom. (Ɔsɛnkafo 9:5, 10; 2 Korintofo 1:3-5) Ade foforo a ɛho hia nti a wɔma ayi ase ɔkasa ne sɛ ɛbɛboa wɔn a wɔahyia hɔ no nyinaa ma wɔasusuw nnipa nkwa a ɛyɛ tiaa no ho. (Ɔsɛnkafo 7:2) Sɛ wɔma ɔkasa wɔ obi a wadi ne ho dɔm ayi ase a, so ebedi atirimpɔw ahorow yi ho dwuma?

Nokwarem no, ebia ebinom bɛte nka sɛ onipa no boapa na okum ne ho, a onim pefee sɛ ɔreyɛ bɔne atia Yehowa. Nanso, so bere nyinaa na yebetumi ate nka saa wɔ asɛm yi mu? So ebetumi aba sɛ ɛyɛ mpofirim adeyɛ bi? Ebinom a wɔasɔ ahodɔmdi ahwɛ no anu wɔn ho ma wɔasesa wɔn adwene. Sɛ obi wu a ɔrentumi nsesa n’adwene wɔ nea wayɛ ho.

Ade foforo nso a ɛho hia ne adwene ne nkate mu haw ahorow a ɛto wɔn a wodi wɔn ho dɔm no. Wobetumi afrɛ eyinom sɛ wɔn a ahodɔmdi ho adwene hyɛ wɔn so. Sɛnea akontaabu bi kyerɛ no, wɔn a wodi wɔn ho dɔm no mu ɔha mu 90 na  ɔkwan bi so no wɔwɔ adwenemhaw, nkate fam haw, anaa subammɔne bi a aka wɔn hɔ ho haw. So Yehowa de wɔn a wodi wɔn ho dɔm wɔ tebea a ɛte saa mu no bɔne befiri wɔn? Yɛrentumi nhu sɛ ebia nea wawu no ayɛ bɔne a wɔrentumi mfa nkyɛ no wɔ Yehowa ani so. Kristoni somfo betumi asusuw nea wawu no yare mu nsɛm tebea horow ho bere a ɔresusuw ho ahwɛ sɛ ebia ɔbɛma nea wadi ne ho dɔm ayi ase ɔkasa anaasɛ ɔmma no.

Ade foforo nso wɔ hɔ a ɛsɛ sɛ wosusuw ho: Mpɔtam hɔfo bu ahodɔmdi ne owu a onipa no awu no dɛn? Eyi ho asɛm hia asafo mu mpanyimfo a wɔwɔ hɔ no titiriw wɔ Yehowa Adansefo asafo a ɛwɔ hɔ no din ho. Ɛdenam su a mpɔtam hɔfo da no adi wɔ ahodɔmdi ho, ne ne titiriw no, nea ɛmaa onii no yɛɛ saa so no, ebia asafo mu mpanyimfo no bɛpɛ sɛ wɔrenyi wɔn anim nyɛ ayi a ɛte saa anaa wɔremma ayi ase ɔkasa wɔ Ahenni Asa so.

Nanso, sɛ wɔka sɛ Kristoni somfo bi nhwɛ ayi no so a, obetumi afa no sɛ ɛyɛ ankorankoro gyinaesi ma enti obetumi ayɛ saa. Sɛ osi gyinae sɛ ɔbɛyɛ saa a, ɛsɛ sɛ ɔyɛ anifere wɔ ka a ɔrenka no pɔtee sɛ ebia obenya owusɔre anaasɛ onnya no ho. Daakye owusɔre ho nsɛm nyinaa wɔ Yehowa nsam na obiara nni hɔ a obetumi akyerɛ sɛ ebia wobenyan nea wawu no anaasɛ wɔrenyan no. Ɔsomfo no betumi ama ne nsɛm no agyina Bible mu nokwasɛm ahorow so na wakyekye wɔn a wɔn biribi awu no werɛ.