Hena na Ɛsɛ sɛ Wudi no Nokware?

“Yɛn man: . . . Ɛmmra sɛ ebedi bem bere nyinaa; sɛ́ edi bem anaa edi fɔ no, ɛbɛkɔ so ara ayɛ yɛn man.”—Stephen Decatur, U.S. po so sraani panyin wɔ afe 1779-1820 mu.

NNIPA pii bu koma nyinaa mu a wobefi adi wɔn man nokware no sɛ asɛyɛde a ɛsen biara. Ebinom ka Stephen Decatur nsɛm yi wɔ ɔkwan foforo so sɛ, ‘Me som, ɛmmra sɛ ebedi bem bere nyinaa; sɛ́ edi bem anaa edi fɔ no, ɛbɛkɔ so ara ayɛ me som.’

Nokwarem no, ɔman anaa ɔsom a ɛhwehwɛ sɛ yedi no nokware no taa gyina faako a wɔwoo yɛn so, nanso gyinae a yebesi afa nea ɛsɛ sɛ yedi no nokware ho no ho hia dodo sɛ yɛbɛma agyina biribi te sɛ baabi a wɔwoo yɛn so. Nanso, egye akokoduru na obi atumi akasa atia adwuma ne ɔsom a wɔtete obi wom, na ɛde nsɛnnennen ba.

Nokwaredi Ahorow Ho Sɔhwɛ

Ɔbea bi a onyinii wɔ Zambia ka sɛ: “Na mepɛ nyamesom fi me mmofraase. Mpae a na mebɔ daa wɔ yɛn abusua no abosonnan mu, ɔsom mu nnapɔnna a na midi, ne asɔre a na mekɔ  daa no nyinaa ka ntetee a minyae no ho. Na me som ne m’amammerɛ ne me man ne abusua a mifi mu no wɔ abusuabɔ a emu yɛ den.”

Nanso bere a aka kakra ma wadi mfe aduonu no, ɔne Yehowa Adansefo fii ase suaa Bible no na ɛno akyi bere tiaa bi no osii gyinae sɛ ɔbɛsesa ne som. So eyi kyerɛ sɛ wanni nokware?

Wɔtetee Zlatko wɔ Bosnia, na odii ako kakra wɔ basabasayɛ a esii wɔ ne kurom no mu. Ɔno nso fii ase ne Yehowa Adansefo suaa Bible no. Mprempren ɔmfa akode nko ntia obiara bio. So ɛno kyerɛ sɛ onni nokware?

Sɛnea wubua saa nsɛm no gyina wo nsusuwii so. Ɔbea a yedii kan kaa ne ho asɛm no ka sɛ: “Wɔ ɔman a mifi mu no mu no, obi som a ɔbɛsesa no de animguase a ne popa yɛ den na ɛba; na wobu saa a obi bɛyɛ no sɛ ɛnkyerɛ nokwaredi, ɛkyerɛ po a obi apo n’abusua ne ne man.” Saa ara nso na na Zlatko kan mfɛfo asraafo no bu obi a ɔmpɛ sɛ ɔbɛko ama wɔn no sɛ ɔyɛ ɔfatwafo. Nanso saa ɔbea no ne Zlatko nyinaa te nka sɛ nokwaredi a ɛkorɔn—nokwaredi ma Onyankopɔn—na ɛkanyan wɔn ma wɔyɛ wɔn ade. Nea ɛho hia sen biara no, Onyankopɔn bu wɔn a wɔpɛ sɛ wodi no nokware no dɛn?

Nokwaredi a Ɛfata—Ɛyɛ Ɔdɔ a Wɔda no Adi

Ɔhene Dawid ka kyerɛɛ Yehowa Nyankopɔn sɛ: “Adɔeyɛfo na wo ne no bedi no adɔe so.” (2 Samuel 22:26) Hebri asɛmfua a wɔakyerɛ ase “adɔe” wɔ ha no da ayamye adwene a wofi ɔdɔ mu de bata biribi ho kosi sɛ atirimpɔw nti a wɔyɛ saa no bɛbam. Sɛnea ɛna kura abofra ma no nufu no, saa ara na Yehowa fi ɔdɔ mu bata wɔn a wodi no nokware no ho. Yehowa kaa n’asomfo a na wɔwɔ tete Israel no ho asɛm sɛ: “So ɔbea werɛ befi ne ba akokoaa, na ne yam renhyehye no ne yafumma ho? Sɛ eyinom werɛ befi po a, me de, me werɛ remfi wo.” (Yesaia 49:15) Wɔhyɛ wɔn a wɔpɛ sɛ wodi Onyankopɔn nokware sen ade foforo biara no bɔ sɛ Onyankopɔn ne wɔn bedi no adɔe so.

Nokware a yebedi ama Yehowa no gyina ɔdɔ so. Ɛka obi ma ɔdɔ nea Yehowa dɔ na okyi ade bɔne a Yehowa kyi. (Dwom 97:10) Esiane sɛ ɔdɔ yɛ Yehowa su titiriw nti, nokware a obi bedi ama Onyankopɔn no bɛboa no ma wakwati sɛ ɔrenna ɔdɔ adi nkyerɛ afoforo. (1 Yohane 4:8) Enti sɛ esiane nokware a obi bedi ama Onyankopɔn nti ɔsesa ne som a, ɛnkyerɛ sɛ ɔnnɔ n’abusua bio.

Nokwaredi Ma Yehowa—Ade a Mfaso Wɔ So

Ɔbea a yedii kan kaa n’asɛm no kyerɛkyerɛ sɛnea ɔyɛɛ n’ade no mu saa kwan yi so sɛ: “Ɛdenam Bible a misuae so no, mibehuu Yehowa sɛ nokware Nyankopɔn koro no, na me ne no benyaa abusuabɔ ankasa. Yehowa nte sɛ anyame a mesom wɔn kan no; ɔkari pɛ wɔ ɔdɔ, atɛntrenee, nyansa, ne tumi mu. Esiane sɛ Yehowa hwehwɛ sɛ yɛsom ɔno nkutoo nti, na ɛsɛ sɛ migyae anyame a aka no nyinaa akyi di.

“M’awofo kɔɔ so ka kyerɛɛ me sɛ wɔn ani nnye me ho koraa na madi wɔn huammɔ. Eyi bɛyɛɛ den maa me, efisɛ na m’awofo anim dom a menya no ho hia me paa. Nanso bere a minyaa nkɔso wɔ Bible mu nokware nimdeɛ mu no, mitumi hui sɛ mapaw nea eye. Ná merentumi mpo Yehowa.

“Paw a mepaw sɛ medi nokware ama Yehowa sen sɛ medi nokware nyamesom mu amanne so no nkyerɛ sɛ minni m’abusua nokware. Mebɔɔ mmɔden sɛ mede me kasa ne me nneyɛe bɛkyerɛ wɔn sɛ mete sɛnea wɔte nka no ase. Nanso sɛ manni Yehowa nokware a, ɛno mma mintumi nkyerɛ m’abusuafo sɛnea Yehowa te, na ɛno na ɛbɛkyerɛ sɛ manni nokware ankasa.”

Saa ara na bere a nokwaredi ma Onyankopɔn hwehwɛ sɛ ɛnsɛ sɛ obi de  ne ho hyɛ amammuisɛm mu na ɔmmfa otuo nnko nntia afoforo no nkyerɛ sɛ ɔyɛ ɔfatwafo. Sɛɛ na Zlatko kyerɛkyerɛɛ sɛnea ɔyɛɛ n’ade no mu: “Ɛwom sɛ wɔtetee me sɛ Kristoni de, nanso mewaree obi a ɔnyɛ Kristoni. Bere a ɔko no sii no, afanu no nyinaa hwehwɛe sɛ megyina wɔn akyi. Wɔhyɛɛ me ma mepaw ɔfã a mɛko ama no. Mede me ho hyɛɛ ɔko no mu mfe abiɛsa ne fã. Awiei koraa no, me ne me yere guan kɔɔ Croatia, faako a yehyiaa Yehowa Adansefo no.

“Bible a yesuae no ma yebehui sɛ Yehowa titiriw na ɛsɛ sɛ yedi no nokware, ne sɛ ɔpɛ sɛ yɛdɔ yɛn yɔnko ɛmfa ho ɔsom anaa abusua a ofi mu. Mprempren me ne me yere de biakoyɛ resom Yehowa, na masua ahu sɛ merentumi nni nokware mma Onyankopɔn na bere koro no ara me ne me yɔnko ako.”

Nokwaredi a Wɔnam Nokware Nimdeɛ So Nya

Esiane sɛ Yehowa ne yɛn Bɔfo nti, ɛsɛ sɛ nokware a yebedi ama no no di nokware biara a yebedi ama biribi foforo biara no kan. (Adiyisɛm 4:11) Nanso, nea ɛbɛyɛ na nokware a yebedi ama Onyankopɔn remma yɛnyɛ katee ne basabasa no, ɛsɛ sɛ yɛma nokware nimdeɛ kyerɛ yɛn kwan. Bible tu yɛn fo sɛ: ‘Momma wɔnyɛ mo foforo mo adwene honhom mu, na monhyɛ onipa foforo a wɔbɔɔ no Nyankopɔn so, nokware trenee mu.’ (Efesofo 4:23, 24) Ɔbarima a wagye din a ɔkyerɛw saa nsɛm a efi honhom mu no nyaa akokoduru de bisaa amanne a wɔde tetee no no ho asɛm. Nhwehwɛmu a ɔyɛe no ma ɔyɛɛ nsakrae a mfaso wɔ so.

Yiw, Saul hyiaa nokwaredi ho sɔhwɛ, te sɛ nea nnipa pii ahyia wɔ yɛn bere yi mu no. Wɔde abusua amammerɛ a ɛyɛ katee na ɛtetee Saul, na ofi nokwaredi a emu yɛ den mu dii ɔsom a wɔwoo no toom no akyi. Nokware a na odi wɔ ne som mu no mpo kanyan no ma ɔyɛɛ wɔn a wɔne no nyɛ adwene no basabasa. Ná wonim Saul sɛ obi a na ɔhyɛn afie mu kɔtwe Kristofo kɔ ma wɔkɔtwe wɔn aso na mpo wokunkum wɔn.—Asomafo no Nnwuma 22:3-5; Filipifo 3:4-6.

Nanso, bere a Saul nyaa Bible mu nokware nimdeɛ no, ɔyɛɛ nneɛma bi a na n’atipɛnfo pii susuw sɛ ɛnsɛ sɛ anka ɔyɛ. Ɔsesaa ne som. Saul a akyiri yi wɔbɛfrɛɛ no ɔsomafo Paulo no paw sɛ obedi Onyankopɔn nokware sen sɛ obedi atetesɛm akyi. Nokwaredi ma Onyankopɔn a egyina nokware nimdeɛ so no kanyan Saul ma onyaa afoforo ho koma, ɔdaa ɔdɔ adi, hyɛɛ afoforo nkuran, ma ɛne ne kan suban a na ɛma ɔyɛ basabasa ne katee no bɔɔ abira.

Dɛn Nti na Ɛsɛ sɛ Yedi Nokware?

Sɛ yɛma Onyankopɔn gyinapɛn ahorow kyerɛ yɛn nokwaredi kwan a, yenya so mfaso pii. Sɛ nhwɛso no, 1999 amanneɛbɔ a efi Australiafo Abusua Adesua Ahyehyɛde hɔ kyerɛe sɛ, nneɛma atitiriw a ɛma aware tumi kyɛ na ɛsɔ ne “ahotoso ne nokwaredi . . . [ne] honhom fam yiyedi.” Adesua koro no ara ma ɛdaa adi sɛ  “aware a egyina na ɛsɔ” no boa ma mmarima ne mmea nya anigye, akwahosan pa, na wonyin kyɛ, na afei aware a egyina no boa ma mmofra nya asetra pa daakye.

Wɔ wiase a biribiara tumi si wom mu yi, nokwaredi te sɛ hama a wofi hyɛmma mu atow ama osuguarefo a nsu reyɛ afa no. Sɛ “nea ɔreguare” no nni biribiara a obeso mu a, obedi akɔneaba te sɛ asorɔkye ne mframa. Nanso sɛ n’adwenem yɛ no naa a, ɛbɛyɛ te sɛ nea wɔde hama a wɔde beyi no no asa hyɛmma a ɛremem ho. Te sɛ Saul no, ebetumi ama wayɛ ade a ɛde no bɛkɔ asiane mu. Nanso, nokware a yebedi ama Yehowa no yɛ sɛkyɛ a ɛma yegyina pintinn na ɛde yɛn kɔ nkwagye mu.—Efesofo 4:13-15.

Yehowa hyɛ wɔn a wodi no nokware no bɔ yi: “[Yehowa, NW] dɔ atemmu, na ɔrennyaw n’ahotefo. Ɔhwɛ wɔn so daa, na abɔnefo asefo de, wobeyi wɔn hɔ.” (Dwom 37:28) Ɛrenkyɛ biara wɔbɛma wɔn a wodi Yehowa nokware no nyinaa akɔ paradise asase bi a wɔbɛde wɔn ho afi awerɛhow ne yaw ho na wɔanya abusuabɔ a nyamesom ne amammui mu mpaapaemu biara nni mu mu daa.—Adiyisɛm 7:9, 14; 21:3, 4.

Mprempren mpo, ankorankoro ɔpepem pii a wɔwɔ wiase nyinaa ahu sɛ nokware anigye a wobenya no fi Yehowa a wobedi no nokware nkutoo mu. Dɛn nti na womma Yehowa Adansefo mfa Bible mu nokware mmoa wo mma wonhwehwɛ wo nokwaredi mu? Bible ka kyerɛ yɛn sɛ: “Monsɔ mo ho nhwɛ sɛ mowɔ gyidi no mu anaa? Mummisa mo ho nhwɛ!”—2 Korintofo 13:5.

Egye akokoduru na ama yɛatumi ayɛ yɛn gyidi mu nhwehwɛmu ahu nea enti a yɛbata ho, nanso sɛ mfaso horow a yebenya afi mu no betumi de yɛn abɛn Yehowa Nyankopɔn a, ɛnde na eye. Ɔbea yi a yɛfaa n’asɛm kae mfiase no ka sɛnea nnipa pii te nka bere a ɔkae sɛ: “Mahu sɛ nokware a yebedi ama Yehowa ne ne gyinapɛn ahorow no boa yɛn ma yɛkari pɛ wɔ sɛnea yɛne yɛn mmusua di nsɛm mu na ɛma yɛyɛ ɔman mma pa. Ɛmfa ho sɛnea sɔhwɛ ahorow no yɛ den fa biara no, sɛ yedi Yehowa nokware a, ɔne yɛn bedi no adɔe so bere nyinaa.”

[Mfonini ahorow wɔ kratafa 6]

Nokware nimdeɛ na ɛkaa Saul ma ɔsesaa ne botae wɔ nokwaredi ho

[Mfonini wɔ kratafa 7]

Dɛn nti na wunnyina Bible mu nokware so nyɛ wo nokwaredi mu nhwehwɛmu?

[Mfonini Ahorow Fibea wɔ kratafa 4]

Churchill, upper left: U.S. National Archives photo; Joseph Göbbels, far right: Library of Congress