“Munim Nea Enti a Mede Mo Sika no Rebrɛ Mo?”

NANA a ɔyɛ ɛna a onni ɔhokafo a ɔwɔ mmarimaa baasa na ɔte Kaspi a ɛwɔ Republic of Georgia no kyerɛwee sɛ: “Mihia sika paa!” Da koro anɔpa bi, hwɛ a na ɔhwɛ kwan sɛ obenya bi no baa mu. Onyaa sika lari 300 wɔ polisifo adwumayɛbea nkyɛn pɛɛ. Ná obiara nni hɔ. Ɛyɛ sika a na emu yɛ duru paa. Nokwasɛm ni, na Nana nhuu lari a ɛbom 100 da fi bere a lari bɛyɛɛ ɔman no sika a wodi mfe anum ni no. Sɛ aguadifo a wɔwɔ kurom hɔ de mfe pii yɛ adwuma a, wɔrennya sika a ɛte saa.

Nana susuwii ho sɛ, ‘Sɛ mefa sika yi na mehwere me gyidi, Onyankopɔn suro, ne me honhom fam yiyedi a, dɛn na mede sika yi bɛyɛ?’ Ná wanya Kristofo su horow a ɛte saa, na mpo na wagyina ɔtaa a emu yɛ den ne ɔhwe ano esiane ne gyidi nti.

Bere a Nana kɔɔ polisifo adwumam hɔ no, ohuu polisifo baanum bi a wɔn ani abere rehwehwɛ biribi denneennen. Ohui sɛ ɛyɛ sika no na wɔrehwehwɛ, enti ɔbɛn wɔn bisaa wɔn sɛ: “Mo biribi ayera anaa?”

Wobuae sɛ, ɛyɛ “sika.”

“Ahe?”

“Lari ahasa!”

Nana kae sɛ, “Mahu mo sika no.” Ɛnna obisaa wɔn sɛ: “Munim nea enti a mede mo sika no rebrɛ mo?” Na wonnim.

Ɔtoaa so sɛ, “Meyɛ Yehowa Dansefo ntia. Sɛ ɛnyɛ saa a, anka meremfa mo sika no mmrɛ mo.”

Polisi panyin a ɔyeraa sika no kyɛɛ Nana lari 20 de kyerɛɛ ne nokwaredi no ho anisɔ.

Ankyɛ na asɛm no trɛw Kaspi mantam no nyinaa mu. Ade kyee no, ɔbea bi a ɔprapra polisifo adwumam hɔ ka kyerɛɛ Nana sɛ: “[Polisi panyin] no taa de mo nhoma no bi to n’adwumayɛdan mu hɔ. Nanso mprempren de ɛda adi sɛ ɔbɛkyerɛ ho anisɔ kɛse.” Polisi panyin bi mpo kae sɛ: “Sɛ nnipa nyinaa te sɛ Yehowa Adansefo a, hena na anka obedi nsɛmmɔne?”