So Wokae?

So w’ani agye Ɔwɛn-Aban a aba nnansa yi akenkan ho? Ɛnde hwɛ sɛ wubetumi abua nsɛmmisa a edidi so yi anaa:

• Dɛn ne tema, na dɛn nti na ɛsɛ sɛ Kristofo nya bi?

Ɛyɛ tumi a obi tumi fa ne ho sɛ ɔno na ɔwɔ ɔfoforo tebea mu te sɛ nea yɛte ɛyaw a obi foforo di nka wɔ yɛn komam no. Wotu Kristofo fo sɛ wɔnna ‘tema, onuadɔ ne mmɔborohunu’ adi. (1 Petro 3:8) Yehowa yɛ tema ho nhwɛso ma yɛn sɛ yenni akyi nna bi adi. (Dwom 103:14; Sakaria 2:8) Yebetumi akanyan yɛn nkate wɔ eyi ho denam asɛm a yebetie, ade a yɛbɛhwɛ, ne yɛn adwene a yɛde bebu nneɛma so.—4/15, nkratafa 24-6.

• Sɛ yebenya nokware anigye a, dɛn nti na ɛsɛ sɛ honhom fam ayaresa ba ansa na awiei koraa no, honam fam ayaresa aba?

Nnipa a wɔwɔ nipaduam ahoɔden pii nni anigye, na ɔhaw abunkam wɔn so. Ɔkwan foforo so no, Kristofo pii a wɔadi dɛm honam fam de anigye kɛse resom Yehowa. Wɔn a wɔrenya honhom fam ayaresa no benya honam fam dɛmdi a wobeyi afi hɔ wɔ wiase foforo no mu no so mfaso.—5/1, nkratafa 6-7.

• Dɛn nti na Hebrifo 12:16 bu Esau sɛ oguamammɔfo?

Bible mu asɛm no kyerɛ sɛ Esau daa adwene a ɔde hwehwɛɛ akatua amonom hɔ ara adi na obuu akronkronne animtiaa. Sɛ obi fi ase nya adwene a ɛte saa a, ebetumi ama wayɛ bɔne a anibere wom, te sɛ aguamammɔ.—5/1, nkratafa 10-11.

• Na hena ne Tertullian, na dɛn na na wɔde nim no?

Ɔyɛ nhomakyerɛwfo ne nyamekyerɛfo a ɔtraa ase wɔ afeha a ɛto so abien ne abiɛsa Y.B. mu. Wonim no sɛ obi a ɔkyerɛw nhoma pii de gyinaa nea na wɔfrɛ no Kristosom no akyi. Ɔnam nsusuwii ne nyansapɛ kwan a ɔfaa so yii ne ho ano no so too fapem maa atoro nkyerɛkyerɛ te sɛ Baasakoro.—5/15, nkratafa 29-31.

• Dɛn nti na ɛnyɛ awosu nkutoo na ɛma nnipa yare, da suban bi adi, na wowu?

Nyansahufo aka sɛ ɛda adi sɛ awosu na ɛde nnipa nyarewa ba, na ebinom gye di sɛ yɛn awosu na ɛkyerɛ suban a yɛbɛda no adi. Nanso Bible ma yenya adesamma mfiase ho nhumu, a ɔkwan a bɔne ne sintɔ faa so kaa adesamma nso ka ho. Bere a awosu betumi aka sɛnea yɛn nipasu bɛyɛ no, yɛn sintɔ ne nneɛma a atwa yɛn ho ahyia nso di mu akoten bi.—6/1, nkratafa 9-11.

• Ɔkwan bɛn so na mmɛw nhomasin a wohui wɔ Oxyrhynchus, Egypt, no twe adwene kɔ Onyankopɔn din a wɔde dii dwuma so?

Tetragrammaton (Hebri nkyerɛwde anan a egyina hɔ ma Onyankopɔn din) no wɔ Hiob 42:11, 12 nhomasin yi a efi Hela Septuagint mu no mu. Eyi yɛ adanse foforo a ɛkyerɛ sɛ Onyankopɔn din a ɛwɔ Hebri mu no puei wɔ Septuagint no mu, na Kristofo Hela Kyerɛwnsɛm akyerɛwfo no fa kaa asɛm mpɛn pii.—6/1, kratafa 30.

• Nnɛyi agoprama so akansi bɛn na wɔde Roma Ahemman no agoprama so akansi a na basabasayɛ ne awudisɛm kɔ so wom no toto ho?

Nneɛma bi a wɔde kyerɛe nnansa yi wɔ Agumadibea a ɛwɔ Roma no ma yɛkae nneɛma bi a ɛne no di nsɛ nnɛ a nea ɛka ho bi ne video so mfonini a ɛfa anantwinini ntɔkwaw, akuturukubɔ, kar ne moto mmirika akansi, ne bɛhwɛadefo ntɔkwaw a ɛkɔ so wɔ nnɛyi agumadi ahorow mu ho a woyi kyerɛe no. Tete Kristofo no faa asɛm a ɛne sɛ Yehowa mpɛ basabasayɛ anaa nnipa a wɔyɛ basabasa no aniberesɛm, na saa ara na ɛsɛ sɛ Kristofo a wɔwɔ hɔ nnɛ nso yɛ. (Dwom 11:5)—6/15, kratafa 29.

• Bere a yɛbɔ mmɔden sɛ yɛbɛyɛ akyerɛkyerɛfo a yetu mpɔn no, dɛn na yebetumi asua afi Esra nhwɛso no mu?

Esra 7:10 si nneɛma anan a Esra yɛe a yebetumi abɔ mmɔden asuasua, so dua. Ɛka sɛ: ‘Na Esra ankasa [1] asiesie ne koma [2] sɛ obehu Yehowa mmara na [3] wadi so na [4] wakyerɛkyerɛ ahyɛde ne atemmude wɔ Israel.’—7/1, kratafa 20.

• Tebea horow abien bɛn mu na ɛfata sɛ Kristoni bea kata ne ti so?

Biako ne tebea a ɛsɔre wɔ abusua no mu wɔ fie. Ne ti so a ɔbɛkata no kyerɛ obu a ɔwɔ ma asɛyɛde a ne kunu wɔ sɛ odi anim wɔ mpaebɔ ne Bible nkyerɛkyerɛ mu no. Nea ɛka ho no wɔ asafo dwumadi ahorow mu, baabi a ɔbea no da obu adi wɔ asɛyɛde a mmarima a wɔabɔ asu wɔ sɛ wɔn na Kyerɛwnsɛm no ma wɔn kwan sɛ wɔnkyerɛkyerɛ na wɔmfa akwankyerɛ mma mu no. (1 Korintofo 11:3-10)—7/15, nkratafa 26-7.

• Dɛn nti na Kristofo bu yoga sɛ ɛnyɛ apɔw-mu-teɛteɛ kɛkɛ, na asiane wom?

Adwene a ɛwɔ yoga akyi ne sɛ ɛbɛma obi ne honhom a ɛboro nnipa de so anya abusuabɔ. Nea ɛne Onyankopɔn akwankyerɛ bɔ abira no, nea yoga kyerɛ ne sɛ yebegyae adwennwene mpofirim. (Romafo 12:1, 2) Yoga betumi ama obi de ne ho ahyɛ ahonhonsɛmdi ne asumansɛm mu. (Deuteronomium 18:10, 11)—8/1, nkratafa 20-2.