So Wubekura Wo Mudi mu?

NKASANOMA ahe na wowuu nnɛra? Obiara nnim, na ebia nnipa kakraa bi mpo na wodwen ho—nnomaa pii na wɔwɔ hɔ. Nanso, Yehowa hwɛ wɔn so. Bere a Yesu reka saa nnomaa a ɛda adi sɛ wɔn ho nhia yi ho asɛm no, ɔka kyerɛɛ n’asuafo no sɛ: “Wɔn mu biako mpo nkwati mo agya nhwe fam.” Ɔde kaa ho sɛ: “Munnsuro! mosen nkasanoma bebree.”—Mateo 10:29, 31.

Akyiri yi, asuafo no tee sɛnea Yehowa bu wɔn no ase yiye ankasa. Wɔn mu biako, ɔsomafo Yohane, kyerɛwee sɛ: “Eyi mu na Onyankopɔn dɔ no yii ne ho adi wɔ yɛn ho, sɛ, Onyankopɔn somaa ne ba a ɔwoo no koro no baa wiase sɛ yɛmfa no so nnya nkwa.” (1 Yohane 4:9) Ɛnyɛ agyede nko na Yehowa de ma na mmom ɔma n’asomafo no mu biara nso nya awerɛhyem sɛ: “Merennyaw wo, nanso merempa wo da.”—Hebrifo 13:5.

Ɛdaa adi pefee sɛ ɔdɔ a Yehowa wɔ ma ne nkurɔfo no mu yɛ den. Nanso, asɛmmisa bi sɔre sɛ, ‘So yɛne Yehowa anya abusuabɔ a emu yɛ den a enti yɛrennyaw no da?’

Satan Bɔ Mmɔden sɛ Ɔbɛsɛe Yɛn Mũdi mu Kura

Bere a Yehowa twee Satan adwene sii Hiob mũdi mu kura so no, Satan buae sɛ: “So ɔkwa ara na Hiob suro Onyankopɔn no?” (Hiob 1:9) Ná ɔkyerɛ sɛ nokware a nnipa di ma Onyankopɔn no gyina ‘mfaso a wobenya afi mu’ nkutoo so. Sɛ eyi yɛ nokware a, Kristoni biara betumi agyae ne mudi mu asiesie—sɛ nea wɔde rema no yɛ akɔnnɔ paa a.

Wɔ Hiob fam no, Satan kaa mfiase no sɛ sɛ Hiob hwere n’agyapade a n’ani gye ho yiye ankasa no a, nokware a odi ma Onyankopɔn no bɛyera. (Hiob 1:10, 11) Bere a saa atɛnnidi yi daa adi sɛ ɛyɛ nkontompo no, Satan kae sɛ: “Nea onipa wɔ nyinaa, ɔde ma pere ne kra.” (Hiob 2:4) Ɛwom sɛ nea Satan ka yi betumi ayɛ nokware wɔ ebinom fam de, nanso Hiob annyae ne mũdi mu. Abakɔsɛm kyerɛwtohɔ da eyi adi. (Hiob 27:5; 42:10-17) So wowɔ nokwaredi a ɛte saa ara? Anaa wobɛma Satan asɛe wo mũdi mu kura? Susuw wo ho bere a yɛhwehwɛ nokware ahorow bi a ɛfa Kristoni biara ho mu no.

Ɔsomafo Paulo gye dii sɛ nokware Kristoni nokwaredi betumi ayɛ den ankasa. Ɔkyerɛwee sɛ: “Migye midi ampa sɛ owu anaa nkwa . . . anaa nneɛma a ɛwɔ hɔ anaa nneɛma a ɛrebɛba . . . anaa abɔde foforo biara rentumi ntetew yɛne Nyankopɔn dɔ a ɛwɔ yɛn Awurade Kristo Yesu mu no mu.” (Romafo 8:38, 39) Sɛ ɔdɔ a yɛwɔ ma Yehowa no mu yɛ den a, yebetumi anya gyidi a ɛte saa. Ɔdɔ a ɛte saa no yɛ abusuabɔ a wontumi nsɛe no a owu mpo ntumi nni so nkonim.

Sɛ yɛne Onyankopɔn wɔ abusuabɔ a ɛte saa a, yɛremmisa da sɛ ‘So mɛkɔ so asom Yehowa wɔ mfe kakra a ɛda m’anim no mu?’ Adwenem naayɛ a ɛte saa bɛkyerɛ sɛ yɛn nokwaredi  ma Onyankopɔn no gyina nea ebia ebesi wɔ yɛn asetra mu no so. Nsɛm tebea horow a esisi ntumi nsɛe mudi mu kura a edi mu. Egyina nnipa ko a yɛyɛ wɔ yɛn mu nipa mu no so. (2 Korintofo 4:16-18) Sɛ yɛdɔ Yehowa yɛn koma nyinaa mu a, yɛrenni no huammɔ da.—Mateo 22:37; 1 Korintofo 13:8.

Nanso, ɛsɛ sɛ yɛkae sɛ, Satan hwehwɛ daa sɛ ɔbɛsɛe yɛn mũdi mu a yekura no. Ebia ɔbɛsɔ yɛn ahwɛ ma yɛagyae yɛn ho mu ama honam akɔnnɔ, agyae yɛn ho mu ama yɛn atipɛnfo nhyɛso, anaasɛ wama asiane bi ama yɛagyae nokware no. Wiase no a atwe ne ho afi Onyankopɔn ho no yɛ Satan hokafo titiriw wɔ ne ntua no mu, ɛwom sɛ yɛn ankasa sintɔ ma ɛyɛ mmerɛw ma no sɛ ɔbɛsɛe yɛn mũdi mu kura de. (Romafo 7:19, 20; 1 Yohane 2:16) Nanso, yɛwɔ tebea pa pii wɔ saa ɔko yi mu, na mfaso titiriw biako ne nokwasɛm a ɛyɛ sɛ yenim Satan adwene no.—2 Korintofo 2:11.

Dɛn ne Satan adwene? Paulo kaa ho asɛm wɔ ne krataa a ɔkyerɛw kɔmaa Efesofo no mu sɛ “mfiri” ne “nnɛɛdɛe.” * (Efesofo 6:11) Satan de nnɛɛdɛe ba yɛn akwan mu sɛnea ɛbɛyɛ a ɔbɛsɛe yɛn mũdi mu kura. Anigyesɛm ne sɛ, yetumi hu saa nnɛɛdɛe yi, efisɛ wɔakyerɛw Ɔbonsam akwan no ato hɔ wɔ Onyankopɔn Asɛm no mu. Mmɔden a Satan bɔe sɛ ɔbɛsɛe Yesu ne Hiob mũdi mu kura no ma yenya akwan a ɔfa so hwehwɛ sɛ ɔbɛsɛe yɛn Kristofo mũdi mu kura no ho nhwɛso bi.

Wantumi Ansɛe Yesu Mũdi mu Kura No

Wɔ Yesu som adwuma mfiase no, Satan de anuɔden sɔɔ Onyankopɔn Ba no hwɛe denam akokoduru a ɔde ka kyerɛɛ no sɛ ɔnnan ɔbo abodoo no so. Hwɛ sɛnea na ɛyɛ nnaadaa! Na Yesu nnidii nnafua 40, enti akyinnye biara nni ho sɛ na ɔkɔm de no. (Luka 4:2, 3) Satan kae sɛ Yesu mfa nea ne honam fam akɔnnɔ hwehwɛ mma no ntɛm ara, wɔ ɔkwan a ɛne Yehowa apɛde bɔ abira so. Saa ara na nnɛ, wiase no nnaadaasɛm hyɛ anigye a yebenya no amonom ara ho nkuran a wonsusuw nea ebefi adeyɛ no mu aba ho kakraa bi mpo. Nea ɛka kyerɛ yɛn ara ne sɛ, ‘Wofata eyi seesei ara,’ anaa ne tiawa mu no, ‘Yɛ nea wopɛ!’

Sɛ Yesu kum ne kɔm a wansusuw nea ebefi mu aba ho a, anka Satan tumi maa Yesu gyaee ne mũdi mu kura. Yesu susuw nneɛma ho honhom fam, na obuae pintinn sɛ: “Wɔakyerɛw sɛ: Ɛnyɛ abodoo nko so na onipa nam bɛtra ase.”—Luka 4:4; Mateo 4:4.

Afei Satan sakraa n’akwan. Bere a Ɔbonsam de Kyerɛwnsɛm a Yesu faa mu asɛm kae no redi dwuma wɔ ɔkwammɔne so no, ɔhyɛɛ Yesu nkuran sɛ ɔntow ne ho nkyene mfi asɔrefie no atifi. Satan kae sɛ: ‘Ɔbɔfo bɛba abɛbɔ wo ho ban.’ Ná Yesu nni adwene bi sɛ ɔbɛhwehwɛ ahobammɔ anwonwakwan so afi N’agya hɔ de atwe adwene asi ne ho so kɛkɛ. Yesu kae sɛ: ‘Nsɔ Yehowa, wo Nyankopɔn, nhwɛ!’—Mateo 4:5-7; Luka 4:9-12.

Ɔkwan a etwa to a Satan fa so no yɛ tẽẽ koraa. Ɔbɔɔ mmɔden sɛ ɔne Yesu bɛyɛ nhyehyɛe  a ɛde mfaso bɛbrɛ wɔn baanu nyinaa denam wiase ahenni ne emu anuonyam a ɔde kyerɛɛ no sɛ sɛ ɔkotow sɔre no biako pɛ a, ɔde bɛma no no so. Na nea Satan betumi de ama nyinaa ne no. Nanso ɛbɛyɛ dɛn na Yesu abɔ ne mu ase wɔ N’agya tamfo kɛse anim? Na ontumi nyɛ saa da! Yesu buae sɛ: ‘Kotow Yehowa, wo Nyankopɔn, na ɔno nko na som no.’—Mateo 4:8-11; Luka 4:5-8.

Bere a sɔhwɛ ahorow abiɛsa no anyɛ yiye no, Satan ‘gyaw Yesu hɔ kɔe ansa.’ (Luka 4:13) Eyi kyerɛ sɛ na Satan ayɛ krado daa sɛ obenya hokwan asɔ Yesu mũdi mu kura ahwɛ. Onyaa bere a eye ma no wɔ bɛyɛ mfe abien ne fa akyi bere a Yesu fii ase siesiee n’asuafo maa ne wu a na ɛreba no. Ɔsomafo Petro kae sɛ: “Ɛmpare wo, Awurade! Eyi remma wo so.”—Mateo 16:21, 22.

So ebetumi aba sɛ na Yesu ani begye afotu a ɛte saa a ɛda adwempa adi nanso enni nnyinaso pa a na efi n’asuafo mu biako hɔ no ho? Ntɛm ara na Yesu hui sɛ saa nsɛm no nna Yehowa adwene adi na mmom Satan de. Kristo buae pintinn sɛ: “Fi me so, Satan! Woyɛ me hintidua, efisɛ wunnwen Onyankopɔn de, na mmom nnipa de na wudwen yi.”—Mateo 16:23.

Esiane ɔdɔ a emu yɛ den a na Yesu wɔ ma Yehowa no nti, Satan antumi ansɛe ne mũdi mu a na okura no. Ɛmfa ho nea Ɔbonsam betumi de ama biara, sɛ ɛyɛ sɔhwɛ a ano yɛ den mpo no, entumi mmrɛ Yesu nokwaredi ma ne soro Agya no ase. So yebetumi asi gyinae a ɛte saa ara bere a tebea ahorow ma ɛyɛ den sɛ yebekura yɛn mũdi mu no? Hiob nhwɛso no bɛboa yɛn ma yɛate akwanside dennen a yebetumi ahyia no ase yiye.

Nokwaredi mu a Yebekura Wɔ Amanehunu Mu

Sɛnea Hiob hui no, amanehunu betumi ato yɛn bere biara. Na ɔyɛ ɔwarefo a ɔwɔ anigye a ɔwɔ mma du, na na ɔwɔ nhyehyɛe a ɔde di honhom fam nneɛma ho dwuma. (Hiob 1:5) Nanso, Hiob mũdi mu kura ma Onyankopɔn no bɛyɛɛ ɔsɛmpɔw wɔ ɔsoro abangua mu a na onnim ho hwee, na na Satan abɔ ne tirim sɛ ɔbɛfa ɔkwan biara a obetumi so asɛe ne mũdi mu kura.

Ntɛm ara na Hiob hweree ne honam fam ahonyade. (Hiob 1:14-17) Nanso, Hiob tumi kuraa ne mũdi mu wɔ sɔhwɛ no mu efisɛ na ɔmfaa ne ho ntoo sika so da. Hiob rekae bere a na ɔyɛ ɔdefo no, ɔkae sɛ: “Sɛ mede sika mayɛ m’ahotoso, . . . na sɛ m’ani gyei sɛ m’ahode dɔɔso, . . . ɛno nso ne amumɔyɛ bi . . . , na anka mapa Onyankopɔn a ɔwɔ soro no akyi.”—Hiob 31:24, 25, 28.

Ɛnnɛ, yebetumi ahwere biribiara a yɛwɔ nyinaa prɛko pɛ ankasa. Wosisii oguadini bi a ɔyɛ Yehowa Dansefo ma ɔhweree sika kɛse paa ara, ma ɔbɔɔ ka buruburoo. Ogye toom sɛ: “Anka mereyɛ anya komayare. Nokwarem no, misusuw sɛ sɛ ɛnyɛ me ne Onyankopɔn ntam abusuabɔ a, anka minyaa bi. Nanso, saa osuahu yi ma mihui nokwarem sɛ na memfa honhom fam nneɛma nni kan wɔ m’asetra mu. Sikapɛ ho anigye taa bunkam biribiara so.” Efi saa bere no, saa Ɔdansefo yi atew n’aguadi so aba fam koraa, na ɔsom daa sɛ akwampaefo boafo, a ɔde nnɔnhwerew 50 anaa nea ɛboro saa yɛ Kristofo som adwuma no. Nanso, ɔhaw afoforo betumi ahaw adwene yiye asen honam fam agyapade a obi bɛhwere no.

Hiob nnya nhuu amanneɛbɔ a ɛfa n’ahonyade a wahwere ho no ano no, wɔde asɛm brɛɛ no sɛ ne mma no awuwu. Ɔkɔɔ so kae sɛ: ‘Yehowa din na nhyira nka.’ (Hiob 1:18-21) Sɛ yɛhwere yɛn abusua dodow no ara mpofirim a, so yɛbɛkɔ so akura yɛn mudi mu? Francisco, Kristoni ɔhwɛfo bi a ɔwɔ Spain, hweree ne mma baanu wɔ bɔs akwanhyia a ɛyɛ awerɛhow mu. Onyaa awerɛkyekye denam bɛn a ɔbɛn Yehowa kɛse ne Kristofo som adwuma no mu a ɔde ne ho hyɛɛ pii no so.

Wɔ Hiob mma a ɔhweree wɔn ma ɛyɛɛ ahodwiriw no akyi mpo no, ná n’ahohia to ntwae ɛ. Satan de ɔyare a ɛyɛ abofono na ɛyɛ  yaw bɔɔ no. Saa bere no mu no, Hiob yere maa no afotu bɔne. Ɔhyɛɛ no sɛ: “Dome Onyankopɔn, na wu!” Hiob buu n’ani guu n’afotu no so, na wamfa “n’ano anyɛ bɔne.” (Hiob 2:9, 10) Ná ne mũdi nnyina n’abusua mmoa so na mmom n’ankasa abusuabɔ a ɔne Yehowa wɔ so.

Flora, a ne kunu ne ne babarima panyin agyae Kristofo asafo bɛboro mfe du ne akyi ni no, te nkate a ɛbɛyɛ sɛ Hiob nyae no ase. Ogyee toom sɛ: “Sɛ wohwere w’abusua honhom ne nkate fam mmoa mpofirim a, ebetumi ayɛ ahometew. Nanso, na minim sɛ merennya anigye wɔ Yehowa ahyehyɛde no akyi. Enti migyinaa pintinn na mede Yehowa dii kan wɔ m’asetra mu na bere koro no ara mebɔɔ mmɔden sɛ mɛyɛ ɔyere pa ne ɛna pa. Mebɔɔ mpae daa, na Yehowa hyɛɛ me den. Ɛmfa ho sɛ me kunu sɔre tia me denneennen no, m’ani gye, efisɛ masua sɛnea mede me ho bɛto Yehowa so korakora.”

Ɔkwan a edi hɔ a Satan faa so sɛ ɔde bɛsɛe Hiob mũdi mu kura no ne ne nnamfo baasa no. (Hiob 2:11-13) Hwɛ sɛnea ɛbɛyɛ ahometew bere a wofii ase kasa tiaa no no. Sɛ odii wɔn akyinnyegye no akyi a, anka n’ahotoso a ɔwɔ wɔ Yehowa Nyankopɔn mu no sae. Na wɔn afotu a ɛnhyɛ nkuran no betumi abubu ne honhom na abrɛ ne mũdi mu kura ase, na ama Satan tirimbɔ adi nkonim.

Mmom no, Hiob kae sɛ: “Meremma wonyi me mudi mfi me ho de bɛkɔ akosi sɛ megyaa mu.” (Hiob 27:5) Wanka sɛ, ‘Meremma mo mmarima yi nyi me mũdi mfi me ho nkɔ!’ Na Hiob nim sɛ ne mũdi mu a obekura no gyina ɔno ne ɔdɔ a ɔwɔ ma Yehowa so.

Nnaadaa Dedaw a Wɔde Kyere Dommum Foforo

Satan da so ara de afotu a enni nnyinaso anaa nsɛm a wonsusuw ho a efi nnamfo ne mfɛfo gyidifo hɔ di dwuma. Abasamtu a efi asafo no mu no betumi asɛe yɛn ahotoso ntɛm asen ɔtaa a efi asafo no akyi. Kristoni bi a ɔyɛ ɔpanyin a wakɔ ɔko pɛn bere a na ɔyɛ ɔsraani no de ɛyaw a mfɛfo Kristofo bi nsɛm a wonsusuw ho a wɔkekae ne wɔn nneyɛe ma odii no totoo akodi mu de no ho. Ɔka faa mfɛfo Kristofo de no ho sɛ: “Ɛyɛ asɛm a emu yɛ den a mahyia pɛn.”

Wɔ ɔkwan foforo so no, yebetumi ama yɛn mfɛfo gyidifo sintɔ ahaw yɛn ara ama yɛagyae sɛ yɛne wɔn mu bi bɛkasa anaa mpo sɛ yebefi ase ama Kristofo nhyiam apa yɛn ti so. Ebetumi ayɛ yɛn sɛ yɛn yaw ano a yebedwudwo no ne ade titiriw. Nanso, hwɛ awerɛhow ara a ɛbɛyɛ sɛ yɛbɛma nea afoforo yɛ anaa wɔka ama yɛanya adwene a ɛnna nhumu adi na yɛama yɛn agyapade a ɛsom bo sen biara no—yɛne Yehowa ntam abusuabɔ—ayɛ mmerɛw. Sɛ yɛma eyi kwan ma esi a, na yɛrema Satan nnɛɛdɛe a akyɛ no biako akyere yɛn.

Ntease wom sɛ yɛhwehwɛ gyinapɛn a ɛkorɔn wɔ Kristofo asafo no mu. Nanso, sɛ yɛhwehwɛ pii fi yɛn mfɛfo gyidifo a wɔda so ara tɔ sin no hɔ a, ɛnde yɛn abam bebu. Nanso, Yehowa nim nneɛma a ɔhwehwɛ fi n’asomfo hɔ. Sɛ yesuasua ne nhwɛso no a, yɛbɛyɛ krado sɛ yebegye afoforo sintɔ atom. (Efesofo 4:2, 32) Ɔsomafo Paulo de saa afotu yi mae sɛ: “Mo bo mfuw, na monnyɛ bɔne! Mommma owia nnkɔtɔ mo abufuw so, na mommma ɔbonsam kwan!”—Efesofo 4:26, 27.

Sɛnea Bible no kyerɛkyerɛ pefee no, Satan fa anifere akwan pii so na—sɛ ebetumi a—ama wahu ɔkwan a ɔbɛfa so asɛe Kristoni mũdi mu kura. Ne nnaadaa no bi twetwe honam a ɛyɛ mmerɛw no, na afoforo nso de ɛyaw na ɛba. Wɔ nsɛm a yɛasusuw ho dedaw yi mu no, wubetumi ahu nea enti a ɛnsɛ sɛ yɛma ne nsa ka yɛn bere a yɛn ani nna yɛn ho so. Bere a wowɔ Onyankopɔn ho dɔ a emu yɛ den wɔ wo koma mu no, si gyinae sɛ wobɛma Ɔbonsam ayɛ ɔtorofo, na ma Yehowa koma ani nnye. (Mmebusɛm 27:11; Yohane 8:44) Kae sɛ, ɛnsɛ sɛ yegyae Kristofo mũdi mu kura siesie, ɛmfa ho sɔhwɛ ahorow biara a ɛbɛba yɛn akwan mu.

[Ase hɔ asɛm]