Wɔn Ani Agye sɛ Wɔahu Akenkan!

WƆ Solomon Islands mmeae bi no, wɔn a seesei wɔyɛ Yehowa Adansefo no ɔha biara mu 80 na wonnim akenkan ne akyerɛw. Ɛnyɛ sɛ eyi yɛɛ akwanside maa wɔn wɔ wɔn ho a na wɔde bɛhyɛ asafo nhyiam ahorow a wɔyɛ no dapɛn biara mu no nko, na mmom ɛma ɛyɛɛ den sɛ wɔbɛkyerɛkyerɛ afoforo Ahenni ho nokware no. So nnipa a wɔanyinyin a wonsoo pɛnsere mu da betumi ahu akenkan ne akyerɛw?

Wɔde nhomawa a wɔato din Apply Yourself to Reading and Writing, a Yehowa Adansefo tintimii no akyerɛ akenkan ne akyerɛw wɔ anyɛ yiye koraa no Yehowa Adansefo asafo biara a ɛwɔ Solomon Islands no mu. Osuahu ahorow a edidi so yi kyerɛ sɛnea wɔaboa nnipa ɔhaha pii ma wɔanya nkɔso wɔ dwumadi yi mu. Nea ehia sen biara no, akenkan a wɔasua no aboa wɔn ma wotumi ka wɔn gyidi ho asɛm kyerɛ.—1 Petro 3:15.

Ɔsɛmpatrɛwfo bi a wɔmaa no dwumadi wɔ asafo bi a emu Ahenni adawurubɔfo boro ɔha hui sɛ wɔ dapɛn biara Bible adesua a wɔde Ɔwɛn-Aban yɛ ase no, nnipa kakraa bi pɛ na wokura nsɛmma nhoma no bi, na wɔn mu kakraa bi na na wɔma mmuae. Adɛn ntia? Wonnim akenkan. Bere a wɔmaa nkaebɔ wɔ asafo no mu sɛ wɔayɛ nhyehyɛe sɛ wɔretew sukuu a wɔbɛkyerɛ akenkan ne akyerɛw wom no, ɔsɛmpatrɛwfo no de anigye tuu no ho mae sɛ ɔbɛkyerɛ ade. Mfiase no, adesuafo kakraa bi pɛ na wɔbae, nanso ankyɛ na nnipa a wɔn dodow boro 40 a ɛsono mfe a obiara adi fii ase bae.

Dɛn na efii mu bae? Ɔsɛmpatrɛwfo no ka sɛ: “Bere a akenkan ne akyerɛw sukuu no fii ase bere tiaa bi akyi no, mekɔɔ gua so anɔpa nnɔnsia sɛ merekɔtotɔ aduan a asɛmpatrɛwfo no bedi wɔ fie. Miduu hɔ no, mihuu adesuafo no bi, a mmofra nkumaa mpo ka ho, sɛ wɔretɔn  kube ne nnuadewa. Dɛn ntia? Efisɛ na wɔpɛ sɛ wonya sika a wɔde bɛtɔ pɛnsere ne nhoma a wɔbɛkyerɛw mu wɔ sukuu no mu! Afei nso, sukuu no a na wɔbɛkɔ no bɛma wɔn mu biara anya n’ankasa Ɔwɛn-Aban.” Ɔde ka ho sɛ: “Mprempren sɛ yɛreyɛ Ɔwɛn-Aban Adesua a, mmofra ne mpanyin nyinaa de wɔn ho hyem, na ɛma nkɔmmɔbɔ no yɛ anika.” Ɔsɛmpatrɛwfo yi ani gyei titiriw bere a kuw no mufo baanan bɛka kyerɛɛ no sɛ wɔpɛ sɛ wɔka asɛm no bi, efisɛ sɛnea wɔkae no, ‘wonsuro bio.’

Mfaso a adesuafo a wɔwɔ akenkan ne akyerɛw sukuu no mu anya no sen akenkan ne akyerɛw a wɔahu ara kwa. Sɛ nhwɛso no, bɛyɛ mfe pii ni na Ɔdansefo bi yere a ɔnyɛ gyidini no ho asɛm haw asafo no. Na ɔtotow abo bobɔ nkurɔfo wɔ asɛm ketewaa bi a wɔbɛka a ɛbɛhyɛ no abufuw ho, na mpo ɔde nnua boro mmea foforo. Sɛ ɛtɔ bere bi na ɔne ne kunu kɔ Kristofo nhyiam ahorow a, na ɔtwe ne kunu no ho ninkunu araa ma ɔbarima no fii ase hyɛɛ kyikyi sɛnea ɛbɛyɛ a ne yere no renka sɛ ɔrehwɛ mmea foforo.

Nanso, bere a wofii akenkan ne akyerɛw no ase bere tiaa bi akyi no, ɔbea yi bisae bɔkɔɔ sɛ: “Metumi aba sukuu no bi?” Wobuae sɛ yiw. Efi saa bere no sukuu no anaa asafo nhyiam biara mpaa ne ti so da. Ɔyeree ne ho suaa n’akenkan no ma onyaa nkɔso a ɛyɛ nwonwa, na ɛmaa n’ani gyei. Ade a ɔsan bisaa bio ne sɛ: “Wobetumi ne me ayɛ Bible adesua?” Ne kunu fii ase de anigye ne no suaa ade, na ɔkɔɔ so nyaa nkɔanim wɔ n’akenkan ne akyerɛw ne ne Bible mu nimdeɛ mu.

Wɔ obi a wadi mfe 50 a onsoo pɛnsere mu da fam no, na ɛnyɛ mmerɛw koraa sɛ obeso pɛn mu, na kampɛsɛ ɔde akyerɛw. Ebinom nsateaa ho hyehyɛɛ nsu esiane sɛnea womiaa wɔn nsam de soo pɛnsere mu de kyerɛw krataa so bere a na wɔrefi adesua no ase no nti. Wɔ adapɛn kakra a wɔbɔɔ mmɔden suae sɛ wobeso pɛnsere mu akyi no, adesuafo no mu bi de anigye kae sɛ: “Me nsa mu ayɛ hare wɔ krataa no so kakra!” Sɛ adesuafo no nya nkɔanim a, ɛno nso ma akyerɛkyerɛfo no ani gye. Ɔkyerɛkyerɛfo biako kae sɛ: “Sɛ worekyerɛ adesua kuw bi ade a ɛyɛ anigye, na adesuafo no taa de nsambɔ kyerɛ sɛnea wofi wɔn komam kyerɛ nhyehyɛe a Yehowa ayɛ yi ho anigye.”

Asɛmpatrɛwfo no ne Adansefo a afei wɔahu akenkan yi nyinaa ani gye. Dɛn ntia? Efisɛ afei de wotumi de nimdeɛ a wɔanya wɔ akenkan ne akyerɛw mu no hyɛ Yehowa anuonyam.

[Mfonini ahorow wɔ kratafa 8, 9]

Mmofra ne mpanyin nyinaa kyerɛ akenkan ne akyerɛw sukuu no ho anisɔ