Wiase a N’adwene Akyea Wɔ Nokwaredi Ho

FIDA anwummere bi a na wim yɛ hyew wɔ Tel Aviv, Israel no, aberante bi de ne ho kɔbɔɔ mmabun kuw bi a wogyina asanombea bi akyi retwɛn ho. Ankyɛ biara na ɔtopae bi a ɛsɛe ade towee wɔ wɔn mu.

Ná onipa foforo de ɔtopae ahyɛ ne ho ma akum ɔne mmabun afoforo 19. Ɔbarima bi a ɔhwɛ ayarefo kaa akyiri yi sɛ: “Nnipa, a wɔn nyinaa yɛ mmabun a wonnyinii koraa, nkwaa tu petee baabiara—minhuu ade a ɛyɛ hu saa da wɔ m’asetram.”

Thurstan Brewin kyerɛwee wɔ nhoma The Lancet mu sɛ: “Ɛyɛ su horow a obiara ani gye ho . . . a ebetumi ama wɔafi ɔko ase ntɛm ara nanso ɛbɛyɛ den sɛ wobegyae.” Yiw, efi Kristoman Mmeamudua Ho Akodi so kosi Nasi Germany okunkɛse so no, wɔagyina nokwaredi so ahwie nnipa pii mogya agu wɔ adesamma abakɔsɛm mu.

Nnipa a Nokware a Wonni Ama Wɔrehu Amane Redɔɔso

Akyinnye biara nni ho sɛ, nokwaredi a enni nnyinaso betumi asɛe ade, nanso nokware a wonni betumi asɛe ɔman. Webster’s New Encyclopedic Dictionary ka sɛ, sɛ́ obi bedi nokware no kyerɛ sɛ ‘ɔmpa obi akyi anaasɛ obedi nhyehyɛe bi so,’ na ɛkyerɛ sɛ “wubegyina obi akyi pintinn wɔ sɔhwɛ mu na wunnyaw no.” Bere a nnipa pii ka sɛ wɔn ani gye nokwaredi a ɛte saa ho no, ɔmanfo rehyia ɔhaw wɔ nokware a wonni wɔ baabi a ehia paa—abusua asetra mu. Awaregyae dodow renya nkɔanim ntɛmntɛm, denam nneɛma a ankorankoro pɛ a wɔde adwene besi so, asetram haw ne ahoyeraw, ne nna mu ɔbrasɛe a abu so kɛse no so. Na te sɛ ɔtopae a wɔtowee wɔ Tel Aviv no, mmabun a wɔn ho nni asɛm na wɔtaa hu amane.

Amanneɛbɔ bi kyerɛ sɛ: “Adesɛe a ɛtaa fi awaregyae, ntetewmu ne ɔwofo biako a obi yɛ mu ba ne mmofra nhomasua.” Ɛte sɛ nea mmarimaa a wɔn nanom nkutoo na ɛtete wɔn no titiriw ntaa nnya sukuukɔ mu kyɛfa, wokum wɔn ho, na wodi mmofrabɔnesɛm. Afe biara mmofra a wɔn dodow si ɔpepem biako a wɔwɔ United States no awofo gyae aware, na sɛ wuyi afe biara si hɔ a, enkosi sɛ mmofra a wɔwɔ saa man no mu bedi mfe 18 no, na wɔn mu fã awofo agyae aware. Akontaabu kyerɛ sɛ wɔhwɛ kwan sɛ saa ara na mmabun a wɔwɔ mmeae a aka nso behyia ɔhaw koro no ara.

 Nokwaredi—So Ɛyɛ Gyinapɛn a Ɛkorɔn Dodo?

Nokwaredi a ɛho aba asɛm nnansa yi no ma Ɔhene Dawid nsɛm no fata koraa sen biara: “[Yehowa, NW], boa, na ahotefo rewie sa, na nokwafo ase regu, nnipa mma mu.” (Dwom 12:1) Adɛn nti na nokwaredi asa wɔ mmeae pii saa? Roger Rosenblatt kyerɛwee wɔ Time nsɛmma nhoma no mu sɛ: “Ɛwom sɛ nokwaredi yɛ gyinapɛn a ɛkorɔn de, nanso ehu aka nnipa pii, ahotoso asa, adifudepɛ ne ahantan adɔɔso wɔ yɛn mu ma ɛyɛ den sɛ yebetumi adi nokware.” Bere a Bible no reka bere a yɛwom yi ho asɛm pefee no, ɛkae sɛ: ‘Nnipa bɛyɛ ahopɛfo, wɔn a wonni nokware, wɔn a wonni tema.’—2 Timoteo 3:1-5.

Bere a yɛresusuw nkɛntɛnso kɛse a nokwaredi—anaa nokware a wonni—nya wɔ nnipa nsusuwii ne ne nneyɛe so ho no, yebetumi abisa sɛ, ‘Hena na ɔfata sɛ yedi no nokware?’ Hyɛ nea asɛm a edi hɔ no ka wɔ saa asɛmmisa yi ho no nsow.

[Mfonini Fibea wɔ kratafa 3]

Photo above: © AFP/CORBIS