“Momfa Nkyekyɛ Mo Ho”

SO WUGYE di sɛ Onyankopɔn de wo bɔne ahorow akyɛ wo? Wɔ United States no, ɛte sɛ nea mpanyimfo dodow no ara te nka saa. Ɔbenfo Loren Toussaint a odii kan kyerɛw nhwehwɛmu bi a Michigan Sukuupɔn Suabea a ɛyɛ Nnipa Asetra Ho Nhwehwɛmu yɛe ho amanneɛbɔ ho asɛm no kae sɛ wɔ Amerikafo 1,423 a wobisabisaa wɔn nsɛm mu no, mpanyimfo a wɔadi boro mfirihyia 45 no ɔha mu 80 kae sɛ Onyankopɔn de wɔn bɔne horow akyɛ wɔn.

Nanso, ɛyɛ nwonwa sɛ nnipa a wobisabisaa wɔn nsɛm no ɔha mu 57 pɛ na wɔkae sɛ wɔde afoforo bɔne afiri wɔn. Saa akontaabu yi ma yɛkae Yesu nsɛm a ɔkae wɔ Bepɔw so Asɛnka no mu no: “Sɛ mode nnipa mfomso firi wɔn a, mo soro agya de mo de befiri mo nso. Na sɛ moamfa nnipa mfomso amfiri wɔn a, mo agya no nso remfa mo mfomso mfiri mo.” (Mateo 6:14, 15) Yiw, yɛn bɔne ahorow a Onyankopɔn de befiri yɛn no fã bi gyina ɔpɛ a yɛwɔ sɛ yɛde afoforo de befiri wɔn no so.

Ɔsomafo Paulo kaee Kristofo a wɔwɔ Kolose no nnyinasosɛm yi. Ɔhyɛɛ wɔn nkuran sɛ: “Sɛ obi ne obi nya asɛm bi a, munhuhu mma mo ho na momfa nkyekyɛ mo ho; sɛnea [Yehowa, NW] de akyɛ mo no, sɛnea mo nso monyɛ ne no.” (Kolosefo 3:13) Nokwarem no, eyi yɛ nyɛ mmerɛw bere nyinaa. Sɛ nhwɛso no, sɛ obi keka nsɛnhunu anaa nsɛm a ɛyɛ yaw fa wo ho a, ebetumi ayɛ den sɛ wode bɛkyɛ no.

Nanso, bɔne fafiri so mfaso dɔɔso. Ɔbenfo David R. Williams, a ɔyɛ nnipa fekubɔ ho nimdefo no kae wɔ nhwehwɛmu bi a ɔyɛe no mu sɛ: “Yehu abusuabɔ bi a emu yɛ den wɔ bɔne a wɔde firi afoforo ne adwenem akwahosan pa a Amerikafo a wɔayɛ mmasiriwa ne wɔn a wɔn mfe akɔ anim wɔ mu.” Eyi ne Ɔhene Salomo nyansafo no nsɛm a ɔkyerɛw bɛyɛ mfirihyia 3,000 atwam ni no hyia: “Komam dwo yɛ ɔhonam nkwa, na nitan yɛ nnompe mu porɔw.” (Mmebusɛm 14:30) Esiane sɛ bɔne fafiri su ma yɛne Onyankopɔn ne yɛn yɔnko nnipa nya abusuabɔ pa nti, yɛwɔ ntease a edi mu nti a ɛsɛ sɛ yefi komam de bɔne kyekyɛ yɛn ho.—Mateo 18:35.