“Ahotefo” Ho Anigye a Wɔkyerɛ Nnɛ

“Mokae bere a na ɛte sɛ nea wɔde akunini ho nsɛm guan yɛn ho no? Ɛte sɛ nea anka Amerikafo ɔpepem 4.2 a wɔhwɛɛ Eno Teresa ayi wɔ television so wɔ Sept. 13 no. Efi bere a owui wɔ Sept. 5 no, na nkurɔfo de paw a ɛsɛ sɛ wɔpaw no sɛ ɔhotefo no ho adesrɛ aguan Vatican ho. Nnipa dodow no ara na wɔhwɛ kwan sɛ wɔbɛpaw no.”—Sun-sentinel, United States, October 3, 1997.

NNIPA pii bu mmɔborohunu ne adɔe nnwuma a Katolekni sɛmpatrɛwfo Eno Teresa yɛe no sɛ ɛkyerɛ sɛ ɔyɛ ɔhotefo ampa. Nnipa a wɔda ahofama a ɛte saa adi wɔ ɔsom ahorow mu. Nanso ebia wɔnhyɛ da mpaw wɔn sɛ ahotefo te sɛ nea Roma Katolek Asɔre no yɛ no.

Ɛkame ayɛ sɛ Pope John Paul II apaw nnipa bɛyɛ 450 sɛ ahotefo fi bere a ɔbɛyɛɛ pope no, na ɛsen nea afeha a ɛto so 20 mu popefo nyinaa yɛe a wɔaka abom. * Dɛn nti na wɔde nidi a ɛkɔ akyiri saa ma “ahotefo,” a Katolekfo pii nnim wɔn mu dodow no ara yiye no?

Notre Dame Sukuupɔn nyamekyerɛfo Lawrence Cunningham kyerɛkyerɛ mu sɛ: “Nkurɔfo ani betumi agye adwene a ɛne sɛ biribi yɛ kronkron wɔ wiase no ho. Ɛnnɛ mpo, bu a wobu sɛ ahotefo wɔ hɔ no betumi ama obi ada ahofama adi wɔ n’asetra mu.” Ɛno akyi no, wogye di sɛ “ahotefo” ne Onyankopɔn wɔ abusuabɔ titiriw bi a ɛma wɔyɛ ntamgyinafo pa ma ateasefo. Sɛ wohu “ɔhotefo” nkaede anaa nipadua nkae bi a, esiane sɛ wogye di sɛ tumi bi fi mu ba nti, wɔsom.

Trent Bagua nhyiam ho gyidikasɛm a wɔyɛ de hyɛɛ Katolek nkyerɛkyerɛ mu den wɔ afeha a ɛto so 16 no hyɛe sɛ: “Yedi bem sɛ yɛkae sɛ, sɛ yedi ahotefo a ‘wɔadeda wɔ Awurade’ mu no ni, hwehwɛ wɔn hɔ mmoa, na yɛsom wɔn nkaede ne nsõ a, sɛ́ anka ɛbɛbrɛ Onyankopɔn anuonyam ase no, ɛma so, na saa ara na ɛkanyan Kristoni anidaso na ɛhyɛ mu den, na ɛhyɛ n’ankasa nkuran ma osuasua wɔn nnwuma pa.” (The Catechism of the Council of Trent, 1905) Akyinnye biara nni ho sɛ nokware Kristofo pɛ sɛ wɔbɔ bra pa, kɔ Onyankopɔn anim ɔkwan a ɛfata so, na wonya ne hɔ mmoa. (Yakobo 4:7, 8) Ɛnde sɛnea Onyankopɔn Asɛm kyerɛ no, henanom na wɔfata sɛ ahotefo ankasa? Na dwuma bɛn na wodi?

[Ase hɔ asɛm]