“Mommra Me Nkyɛn, . . . Na Mɛma Moahome”

Mmofra a Wɔte sɛ Obosu a Wɔma Afoforo Ho Dwo Wɔn

AKYINNYE biara nni ho sɛ bere a Yesu Kristo kae sɛ: “Mommra me nkyɛn, . . . na mɛma moahome” no, na n’akyidifo nkumaa nso ka ho. (Mateo 11:28) Bere a nkurɔfo fii ase sɛ wɔde wɔn mma reba ne nkyɛn no, n’asuafo no bɔɔ mmɔden sɛ wobesiw wɔn kwan. Nanso Yesu kae sɛ: “Momma mmofra no kwan na wɔmmra me nkyɛn, na munnsiw wɔn kwan.” Yesu “yɛɛ wɔn atuu na ohyiraa wɔn” mpo. (Marko 10:14-16) Akyinnye biara nni ho sɛ Yesu buu mmofra sɛ wɔsom bo.

Bible no ka mmerante ne mmabaa anokwafo, ne afei mmabun ne mmofra nkumaa, a wɔyɛɛ nhwɛso a ɛkyɛn so wɔ ɔsom a wɔde maa Onyankopɔn no mu ho asɛm. Nnwom nhoma no kaa “mmerante asafo” a wɔte sɛ obosu a wɔma afoforo ho dwo wɔn ho asɛm siei. Ɛsan kaa “mmerante” ne “mmabaa” a woyi Yehowa din ayɛ ho asɛm.—Dwom 110:3; 148:12, 13.

Beae a Mmerante ne Mmabaa Di Yiye

Obosu a wɔde yɛ ntotoho no fata, efisɛ wɔde obosu bata ade dodow ne nhyira ho. (Genesis 27:28) Obosu dwo, na ɛma afoforo ho dwo wɔn. Kristofo mmofra pii fi wɔn pɛ ne nsiyɛ mu de wɔn ho ma wɔ bere a Kristo aba yi mu. Te sɛ obosu a ɛma nnipa ho dwo wɔn no, mmerante ne mmabaa pii de anigye som Onyankopɔn na wɔboa wɔn mfɛfo asomfo.—Dwom 71:17.

Ɛnyɛ afoforo nkutoo na Kristofo mmabun ma wɔn ho dwo wɔn; wɔn ankasa nso ho dwo wɔn wɔ wɔn som mu. Onyankopɔn ahyehyɛde no ma wonya tebea a ebetumi ama wɔadi yiye. Abrabɔ pa a ɛkorɔn a mmerante ne mmabaa kura mu no ma wɔne Onyankopɔn nya abusuabɔ a emu yɛ den. (Dwom 119:9) Wɔ asafo no mu no, wɔde wɔn ho hyɛ dwumadi ahorow a ɛfata mu na wonya nnamfo pa nso—nneɛma a ɛma wonya akomatɔyam ne atirimpɔw wɔ asetra mu.

‘Ahoɔden ne Akomatɔyam’

So Kristofo mmabun ankasa te nka sɛ wɔte sɛ “obosu”? Tie Tania, ababaa a ɔde ne ho hyɛ asafo no dwumadi ahorow mu denneennen na ɔde nnɔnhwerew bɛboro 70 yɛ asɛnka adwuma no anigye so ɔsram biara no. Ɔte nka dɛn? Ɔka sɛ: “Mete nka sɛ mewɔ akomatɔyam ne anigye. Yehowa ne n’asase so ahyehyɛde a mahu wɔ m’asetra mu no ama manya ‘ahoɔden ne akomatɔyam’.”—Mmebusɛm 3:8.

Ariel a ɔno nso yɛ bere nyinaa somfo no ani sɔ honhom fam aduan a onya wɔ asafo no mu no. Ɔka sɛ: “Sɛ mekɔ Kristofo nhyiam, amantam ne amansin  nhyiam na sɛ mitumi didi wɔ Yehowa honhom fam pon so a, eyi ma minya akomatɔyam wɔ honhom mu. Na ɛyɛ me anigye sɛ mihu sɛ wɔ wiase nyinaa no, mewɔ mfɛfo adwumayɛfo.” Ɔreka akomatɔyam a ɛkyɛn so fibea ho asɛm no, ɔka sɛ: “Yehowa a manya no sɛ adamfo no ma minya akomatɔyam paa, titiriw bere a mete nkɛntɛnso bɔne a wiase yi nya wɔ nnipa so ho asɛm anaa mihu no.”—Yakobo 2:23.

Abishai a wadi mfe 20 no som sɛ bere nyinaa ɔsɛmpakafo ne asafo mu somfo wɔ asafo no mu. Ɔde saa nsɛm yi ka ne suahu: “Mete nka sɛ mewɔ ahotɔ efisɛ minim ɔkwan a mɛfa so adi ɔhaw ahorow a mmabun hyia nnɛ no ho dwuma. Bible no mu nokware no aboa me ma mede m’adwene asi nea ehia sɛ meyɛ na matumi afi me kra nyinaa mu asom Yehowa no so.”

Bere a na Antoine yɛ abarimaa no, na ɔyɛ obi a na ne bo taa fuw. Bere bi ɔde agua bɔɔ ne yɔnko sukuuni bi na ɔde pɛnsere wɔɔ ɔfoforo. Na Antoine nyɛ obi a odwo! Nanso akwankyerɛ a ɛwɔ Bible mu no sesaa ne suban. Mprempren wadi mfe 19 na ɔsom sɛ asafo mu ɔsomfo ne bere nyinaa somfo wɔ asafo no mu, na ɔka sɛ: “Meda Yehowa ase sɛ wama manya ne ho nimdeɛ na waboa me ma mahu hia a ehia sɛ meda ahosodi adi na mesesa me kwan. Wɔ saa kwan yi so no, makwati ɔhaw ahorow pii.”

Afoforo hu Kristofo mmofra su pa no. Matteo yɛ Ɔdansefo aberantewa wɔ Italy. Ne kyerɛkyerɛfo sii gyinae sɛ adesuakuw no muni biara a ɔbɛka kasafĩ no betua sika bi. Bere bi akyi no, mmofra no srɛe sɛ wongu saa mmara no efisɛ wɔkae sɛ, “Wontumi nnyae kasafi ka.” Matteo kyerɛkyerɛ mu sɛ: “Nanso ɔkyerɛkyerɛfo no kae sɛ ɛnte saa, na ɔde me, sɛ Yehowa Ɔdansefo no yɛɛ nhwɛso, kamfoo me wɔ adesuakuw no nyinaa anim sɛ me kasa ho tew.”

Wɔ mmofra asowuifo sukuudan bi mu wɔ Thailand no, ɔkyerɛkyerɛfo no frɛɛ Racha a wadi mfe 11 no begyinaa adesuakuw no anim na ɔkamfoo no wɔ ne suban ho, kae sɛ: “Dɛn nti na mo nyinaa munsuasua ne nhwɛso no? Ɔyɛ nsi wɔ n’adesua mu na ɔwɔ suban pa.” Afei ɔka kyerɛɛ sukuufo no sɛ: “Misusuw sɛ ɛsɛ sɛ mobɛyɛ Yehowa Adansefo te sɛ Racha na ama mo abrabɔ ayɛ papa.”

Ɛyɛ anigye sɛ wubehu sɛ Kristofo mmabun mpempem pii renya Yehowa ho nimdeɛ pii na wɔyɛ n’apɛde. Mmofra pa a wɔte saa no da no adi sɛ wɔyɛ ade nyansam te sɛ mpanyimfo. Onyankopɔn betumi aboa wɔn ma asi wɔn yiye wɔ asetra mu nnɛ, na afei nso wama wɔanya daakye a anigye wom wɔ wiase foforo a ɛreba no mu. (1 Timoteo 4:8) Wɔ nnɛyi nneɛma nhyehyɛe yi honhom fam asasebonin a mmofra a wonni akomatɔyam na wɔn abaw mu abu ahyɛ mu ma so no, Kristofo mmofra de, wɔwɔ akomatɔyam!