Monkɔ So Mfa Nea Moasua No Nyɛ Adwuma
Monkɔ So Mfa Nea Moasua No Nyɛ Adwuma
“Nea moasua nso na moagye na moate na moahu wɔ me ho no, ɛno ara na monyɛ! Na asomdwoe Nyankopɔn bedi mo akyi.”—FILIPIFO 4:9.
1, 2. So Bible renya nnipa pii a wɔkyerɛ sɛ wɔyɛ nyamesomfo no asetra so nkɛntɛnso? Kyerɛkyerɛ mu.
“NYAMESOM Renya Nkɔanim, Nanso Abrabɔ Pa Rekɔ Fam.” Asɛmti yi a epuee Emerging Trends atesɛm krataa mu no bɔɔ nea efii nhwehwɛmu bi a wɔyɛe wɔ United States man no nyinaa mu bae no mua. Ɛda adi sɛ, ɔman no mu nnipa a wɔkɔ asɔre adɔɔso na wɔka sɛ nyamesom yɛ ade a ɛho hia wɔ wɔn asetra mu. Nanso, amanneɛbɔ no ka sɛ: “Nnipa dodow yi nyinaa akyi no, ɛda adi pefee sɛ Amerikafo pii adwenem yɛ wɔn nãã wɔ nkɛntɛnso a nyamesom renya wɔ ankorankoro ne ɔman mũ no nyinaa asetra so no ho.”
2 Tebea yi nni ɔman biako pɛ mu. Wɔ wiase nyinaa no, nnipa pii a wɔka sɛ wogye Bible di na wɔyɛ nyamesomfo no mma Kyerɛwnsɛm no nnya wɔn asetra so nkɛntɛnso ahe biara. (2 Timoteo 3:5) Ɔpanyin a ɔda nhwehwɛmu kuw bi ano kae sɛ: “Yɛda so ara wɔ obu kɛse ma Bible no, nanso ɛdefa bere a yebegye de akenkan, asua, na yɛde adi dwuma ankasa ho de—ɛyɛ ade a ne bere atwam.”
3. (a) Ɔkwan bɛn so na Bible nya wɔn a wɔbɛyɛ nokware Kristofo no asetra so nkɛntɛnso? (b) Ɔkwan bɛn so na Yesu akyidifo de Paulo afotu a ɛwɔ Filipifo 4:9 no di dwuma?
3 Nanso, tebea no nte saa wɔ nokware Kristofo fam. Onyankopɔn Asɛm mu afotu a wɔde di dwuma ama wɔayɛ nsakrae wɔ wɔn nsusuwii ne wɔn nneyɛe mu. Na afoforo hu nipasu foforo a wɔda no adi no ntɛm ara. (Kolosefo 3:5-10) Wɔ Yesu akyidifo fam no, Bible no nyɛ nhoma a wɔde hyɛ nhomakorabea ma mfutuma bɔ ho. Mmom no, ɔsomafo Paulo ka kyerɛɛ Kristofo a wɔwɔ Filipi no sɛ: ‘Nea moasua nso na moagye na moate na moahu wɔ me ho no, ɛno ara na monyɛ! Na asomdwoe Nyankopɔn bedi mo akyi.’ (Filipifo 4:9) Kristofo yɛ pii sen Onyankopɔn Asɛm mu nokware no a wogye tom ara kwa. Wɔde nea wosua no yɛ adwuma, na wɔkɔ so de Bible afotu di dwuma—wɔ abusua mu, adwumam, asafo no mu, ne asetram mmeae foforo nyinaa.
4. Dɛn nti na ɛyɛ den sɛ wode Onyankopɔn mmara bɛyɛ adwuma?
4 Ɛnyɛ mmerɛw sɛ yɛde Onyankopɔn mmara ne nnyinasosɛm bedi dwuma. Yɛte wiase a ɛhyɛ Satan Ɔbonsam a Bible frɛ no “wi yi ase nyame” no tumi ase mu. (2 Korintofo 4:4; 1 Yohane 5:19) Enti, ehia sɛ yɛma yɛn ani da hɔ wɔ biribiara a ɛbɛyɛ akwanside ama yɛn wɔ yɛn mudi mu a yebekura ama Yehowa Nyankopɔn no ho. Yɛbɛyɛ dɛn atumi ayɛ mudi mu kurafo?
“So Nsɛm Pa a Eye” Nhwɛso no Mu Yiye
5. Dɛn na Yesu asɛm a ese: ‘Yɛnkɔ so nni n’akyi’ no kyerɛ?
5 Nea yɛasua a yɛde bɛyɛ adwuma no ho ade biako ne sɛ yɛde nokwaredi begyina nokware som akyi ɛmfa ho ɔsɔretia a wɔn a wonnye nni de bɛba yɛn so. Egye mmɔdenbɔ na ama yɛada boasetɔ adi. Yesu kae sɛ: “Sɛ obi pɛ sɛ odi m’akyi a, ma ɔmpa ne ho akyi, na ɔmma n’asɛndua so, na [ɔnkɔ so nni, NW] m’akyi.” (Mateo 16:24) Yesu anka sɛ ɛsɛ sɛ yedi n’akyi dapɛn biako, ɔsram biako, anaa afe biako pɛ. Mmom no, ɔkae sɛ: ‘Yɛnkɔ so nni n’akyi.’ Ne nsɛm no kyerɛ sɛ asuafo a yɛbɛyɛ no ntumi nyɛ bere tiaa bi adeyɛ wɔ yɛn asetram anaasɛ ɔsom bi a yɛde ma nnɛ na ɔkyena yɛagyae. Nokwaredi a yɛde begyina nokware som akyi kyerɛ sɛ yɛde nokwaredi bekura asetra kwan a yɛapaw no mu, a nea ɛbɛba biara mfa ho. Yɛbɛyɛ dɛn atumi ayɛ saa?
6. Dɛn ne nsɛm pa a eye nhwɛso a afeha a edi kan no mu Kristofo sua fii Paulo hɔ no?
6 Paulo hyɛɛ ne yɔnko dwumayɛni Timoteo nkuran sɛ: “So nsɛm pa a eye a wotee me nkyɛn no nhwɛso no mu yiye, gyidi ne ɔdɔ a ɛwɔ Kristo Yesu mu mu.” (2 Timoteo 1:13) Ná Paulo kyerɛ dɛn? Nea Hela asɛmfua a wɔkyerɛɛ ase “nhwɛso” wɔ ha no kyerɛ ankasa ne mfoniniyɛfo nsensanee. Ɛwom sɛ nkyerɛkyerɛmu pii nni mfonini a ɛte saa ho de, nanso ne yɛbea no ma obi a ɔwɔ nhumu a ɔhwɛ no tumi hu n’ani so nyinaa. Saa ara na wɔanyɛ nokware nhwɛso a Paulo kyerɛkyerɛɛ Timoteo ne afoforo no sɛ ɛbɛma asɛmmisa biara ho mmua pɔtee. Nanso, nkyerɛkyerɛ yi ma obi nya akwankyerɛ a ɛfata—sɛnea yɛbɛka no no, ɛma ohu nneɛma ani so—sɛnea ɛbɛyɛ a nnipa komapafo betumi ahu nea Yehowa hwehwɛ fi wɔn hɔ. Nokwarem no, sɛ wɔbɛsɔ Onyankopɔn ani a, ebehia sɛ wɔkɔ so so nokware nhwɛso no mu denam nea wɔasua no a wɔde bedi dwuma no so.
7. Ɔkwan bɛn so na Kristofo betumi aso nsɛm pa a eye nhwɛso no mu?
7 Wɔ afeha a edi kan mu no, na nnipa bi te sɛ Himeneo, ne Fileto rekyerɛkyerɛ nneɛma bi a ɛne ‘nsɛm pa a eye nhwɛso’ no nhyia. (1 Timoteo 1:18-20; 2 Timoteo 2:16, 17) Ná ɛbɛyɛ dɛn na awaefo no ntumi nnaadaa tete Kristofo no? Denam nkyerɛwee a efi honhom mu no a wobesua no yiye na wɔde adi dwuma wɔ wɔn asetram no so. Wɔn a na wɔredi Paulo ne anokwafo foforo nhwɛso akyi no tumi huu biribiara a na ɛne nokware nhwɛso a wɔakyerɛkyerɛ wɔn no nhyia no na wɔpoe. (Filipifo 3:17; Hebrifo 5:14) Sɛ́ anka ‘wɔbɛyare akyinnyegye ne ɔnokotwa’ no, wɔkɔɔ wɔn anim wɔ onyamesom pa mu. (1 Timoteo 6:3-6) Sɛ yɛkɔ so de nokware ahorow a yɛasua no di dwuma a, yɛyɛ saa ara. Hwɛ sɛnea ɛhyɛ gyidi den sɛ yebehu sɛ nnipa ɔpepem pii a wɔresom Yehowa wɔ wiase nyinaa no reso Bible mu nokware nhwɛso a wɔakyerɛkyerɛ wɔn no mu pintinn.—1 Tesalonikafo 1:2-5.
Po “Anansesɛm”
8. (a) Ɔkwan bɛn so na Satan bɔ mmɔden sɛ ɔbɛsɛe yɛn gyidi nnɛ? (b) Paulo kɔkɔbɔ bɛn na ɛwɔ 2 Timoteo 4:3, 4 no?
8 Satan bɔ mmɔden sɛ ɔbɛma yɛn adwenem ayɛ yɛn nãã wɔ nea wɔakyerɛkyerɛ yɛn no ho na ɔnam so ama yɛagyae yɛn mudi mu kura. Ɛnnɛ, sɛnea na ɛte wɔ afeha a edi kan no mu no, awaefo ne afoforo bɔ mmɔden sɛ wɔbɛsɛe wɔn a wɔn ho nni asɛm no gyidi. (Galatifo 2:4; 5:7, 8) Ɛtɔ bere bi a wɔnam nsɛm ho amanneɛbɔ so keka akwan a Yehowa nkurɔfo fa so yɛ wɔn ade ne adwene a wokura ho nsɛm kyinkyim no anaasɛ wotwa atoro to wɔn so ankasa mpo. Paulo bɔɔ kɔkɔ sɛ ebinom bɛtwe wɔn ho afi nokware no ho. Ɔkyerɛwee sɛ: “Ɛbere bi bɛba a wɔrentie ɔkyerɛ pa a eye no, na sɛ wɔn asom yɛ wɔn hene nti, wɔbɛsoa akyerɛkyerɛfo aboa wɔn ho so, sɛnea wɔn ankasa akɔnnɔ te. Na wobeyi wɔn aso afi nokware ho, na wɔadan akotie anansesɛm.”—2 Timoteo 4:3, 4.
9. Bere a Paulo kaa “anansesɛm” ho asɛm no, na dɛn na ɛbɛyɛ sɛ ɛwɔ n’adwenem?
9 Sɛ́ anka ebinom beso nsɛm pa a eye nhwɛso no mu no, wɔmaa wɔn ho dwiriw wɔn “anansesɛm” ho. Na dɛn ne saa anansesɛm yi? Ebia na atosɛm a wɔbɔ tirim ka te sɛ nea ɛwɔ apokrifa nhoma a ɛne Tobit mu no ho asɛm na na ɛwɔ Paulo adwenem. * Ebetumi aba sɛ na nsɛm a ɛkanyan adwene ne atesɛm a wɔbɔ tirim ka nso ka anansesɛm no ho. Afei nso, ebia—‘sɛnea ebinom ankasa akɔnnɔ te’ nti—wɔmaa nkurɔfo a na wɔpene so ma wobu Onyankopɔn gyinapɛn ahorow animtiaa anaa wɔn a na wɔkasa tia wɔn a na wodi asafo no anim no nam nyansakwan so daadaa wɔn. (3 Yohane 9, 10; Yuda 4) Ɛmfa ho akwanside biara a na ɛwom no, ebinom ani gyee atosɛm ho sen Onyankopɔn Asɛm mu nokware ahorow no. Ankyɛ na wogyaee nneɛma a na wɔasua no akyi di, na eyi de wɔn ankasa honhom fam yiyedi too asiane mu.—2 Petro 3:15, 16.
10. Dɛn ne nnɛyi anansesɛm no bi, na ɔkwan bɛn so na Yohane sii so dua sɛ ɛsɛ sɛ yɛyɛ ahwɛyiye?
10 Sɛ yɛyɛ nea yetie ne nea yɛkenkan mu nhwehwɛmu na yeyiyi mu a, yebetumi akwati anansesɛm a yebetie no. Sɛ nhwɛso no, nsɛm ho amanneɛbɔfo taa hyɛ ɔbrasɛe ho nkuran. Nnipa pii hyɛ Onyankopɔn a wontumi nhu sɛ ɔwɔ hɔ anaa onni hɔ anaa gyidi a ɛkyerɛ sɛ Onyankopɔn bi nni hɔ ankasa ho nkuran. Akasatiafo di ka a Bible ka sɛ efi Onyankopɔn home mu no ho fɛw. Na nnɛyi awaefo kɔ so bɔ mmɔden sɛ wɔbɛma afoforo adwenem ayɛ wɔn nãã sɛnea ɛbɛyɛ a wɔde bɛsɛe Kristofo gyidi. Ɛdefa asiane a ɛte saa a atoro adiyifo de bae wɔ afeha a edi kan no mu ho no, ɔsomafo Yohane kyerɛwee sɛ: “Adɔfo, munnnye ahonhom nyinaa nnni, na mmom monsɔ ahonhom no nhwɛ sɛ wofi Nyankopɔn anaa? Efisɛ atoro adiyifo bebree aba wiase.” (1 Yohane 4:1) Enti ɛsɛ sɛ yɛhwɛ yiye.
11. Dɛn ne ɔkwan biako a yebetumi afa so asɔ yɛn ho ahwɛ sɛ yɛwɔ gyidi no mu?
11 Eyi mu no, Paulo kyerɛwee sɛ: “Monsɔ mo ho nhwɛ sɛ mowɔ gyidi no mu anaa?” (2 Korintofo 13:5) Ɔsomafo Paulo hyɛɛ yɛn nkuran sɛ yɛnkɔ so nsɔ yɛn ho nhwɛ sɛ ebia yekura Kristofo gyidi ahorow no nyinaa mu anaa. Sɛ yɛbrɛ yɛn aso ase tie nnipa a wɔahaw nsɛnkeka a, ɛnde ɛsɛ sɛ yɛde mpaebɔ hwehwɛ yɛn ho mu hwɛ. (Dwom 139:23, 24) So yɛtaa hwehwɛ Yehowa nkurɔfo ho mfomso? Sɛ ɛte saa a, dɛn ntia? So obi akeka nsɛm bi anaasɛ wayɛ biribi ma ahaw yɛn? Sɛ ɛte saa a, so yɛredi nneɛma ho dwuma wɔ ɔkwan a ɛfata so? Amanehunu biara a yehyia wɔ nneɛma nhyehyɛe yi mu no yɛ bere tiaa mu de. (2 Korintofo 4:17) Sɛ yehyia sɔhwɛ bi mpo wɔ asafo no mu a, dɛn nti na ɛsɛ sɛ yegyae Onyankopɔn som? Sɛ biribi haw yɛn a, so ɛnyɛ papa koraa sɛ yɛbɛyɛ nea yebetumi nyinaa de adi asɛm no ho dwuma na afei yɛagyae ama Yehowa?—Dwom 4:4; Mmebusɛm 3:5, 6; Efesofo 4:26.
12. Ɔkwan bɛn so na Beroiafo no yɛɛ nhwɛso pa maa yɛn?
12 Sɛ́ anka yɛbɛyɛ akasatiafo no, momma yennya nsɛm a yɛnam kokoam adesua ne asafo nhyiam ahorow so nya no ho adwene a ɛfata wɔ honhom fam. (1 Korintofo 2:14, 15) Na sɛ anka yebegye Onyankopɔn Asɛm ho akyinnye no, hwɛ sɛnea nyansa wom kɛse sɛ yebenya afeha a edi kan no mu Beroiafo a wɔhwehwɛɛ Kyerɛwnsɛm no mu yiye no su no bi! (Asomafo no Nnwuma 17:10, 11) Na afei, momma yɛmfa nea yɛasua no nni dwuma, na yɛmpo anansesɛm ahorow na yɛmmata nokware no ho.
13. Ɔkwan bɛn so na yebetumi atrɛw atosɛm mu a yɛn ani nni so?
13 Atosɛm foforo wɔ hɔ a ɛsɛ sɛ yɛko tia. Nsɛm pii a ɛkanyan adwene kyinkyin, na mpɛn pii no, wɔde fa kɔmputa so. Nyansa wom sɛ yɛbɛyɛ ahwɛyiye wɔ nsɛm a ɛtete saa ho, titiriw bere a yennim baabi a nsɛm no fi no. Sɛ Kristoni bi a ɔwɔ din pa mpo de osuahu anaa asɛm bi brɛ wo a, ebetumi aba sɛ onii no nnim nokwasɛm a ɛwɔ asɛm no mu nyinaa ankasa. Ɛno nti na ɛho hia sɛ yɛyɛ ahwɛyiye wɔ asɛm a yɛnyɛɛ mu nhwehwɛmu a yebetĩ mu aka anaasɛ yɛde bɛkɔ akɔma afoforo ho no. Akyinnye biara nni ho sɛ yɛrempɛ sɛ yebetĩ “atosɛm a ɛne Onyankopɔn asɛm nhyia,” anaa “anansesɛm huhuw” mu aka. (1 Timoteo 4:7) Esiane sɛ yɛn nso yɛwɔ asɛyɛde sɛ yɛka nokware kyerɛ yɛn ho yɛn ho nti, sɛ yɛkwati biribiara a ɛbɛma yɛatrɛw atosɛm mu bere a yɛn ani nni so a, na yɛreyɛ yɛn ade nyansa mu.—Efesofo 4:25.
Nokwaredi Mu Mfaso Horow
14. Mfaso ahorow bɛn na yenya fi nneɛma a yɛasua afi Onyankopɔn Asɛm a yɛde di dwuma no mu?
14 Sɛ yɛde nneɛma a yesua fi kokoam Bible adesua ne Kristofo nhyiam ahorow mu no di dwuma a, yebenya mfaso pii. Sɛ nhwɛso no, yebetumi ahu sɛ yɛne wɔn a wɔyɛ gyidi fiefo no ntam abusuabɔ atu mpɔn. (Galatifo 6:10) Sɛ yɛde Bible nnyinasosɛm ahorow di dwuma a, yɛn ankasa suban bɛyɛ papa. (Dwom 19:8) Afei nso, sɛ yɛde nea yesua di dwuma a, na ‘yɛrehyɛ yɛn Nyankopɔn nkyerɛkyerɛ,’ na ɛda adi sɛ ɛbɛtwetwe afoforo aba nokware som mu.—Tito 2:6-10.
15. (a) Ɔkwan bɛn so na abofra bi nyaa akokoduru de dii adanse wɔ sukuu mu? (b) Dɛn na wusua fii osuahu yi mu?
15 Mmofra pii wɔ Yehowa Adansefo mu a wɔde nea wɔnam kokoam Bible adesua ne Kristofo nhoma ahorow ne nea wosua wɔ asafo nhyiam ahorow ase daa no di dwuma. Wɔn suban pa no yɛ adanse a emu yɛ den ma akyerɛkyerɛfo ne wɔn mfɛfo sukuufo wɔ sukuu. (1 Petro 2:12) Susuw Leslie, abeawa a wadi mfirihyia 13 a ɔwɔ United States no ho hwɛ. Ɔka sɛ na ɛtaa yɛ den sɛ ɔbɛka ne gyidi ho asɛm akyerɛ ne sukuufo, nanso ɛno sesae da koro. “Adesuakuw no kaa ɔkwan a nkurɔfo fa so tɔn nneɛma ma wo ho asɛm. Abeawa biako maa ne nsa so bɔɔ Yehowa Adansefo din.” Sɛ́ Ɔdansefo no, Leslie yɛɛ n’ade dɛn? Ɔka sɛ: “Mekaa me gyidi ho asɛm kyerɛe, na migye di sɛ ɛyɛɛ obiara nwonwa, efisɛ meyɛ obi a mentaa nkasa wɔ sukuu.” Dɛn na efii akokoduru a Leslie de kasae no mu bae? Leslie ka sɛ: “Esiane sɛ na sukuuni no wɔ nsɛmmisa foforo nti, mitumi de nhomawa ne kratawa maa no.” Sɛ mmofra a wɔde nea wosua di dwuma no de akokoduru di adanse wɔ sukuu a, hwɛ sɛnea ɛbɛyɛ sɛ Yehowa ani gye!—Mmebusɛm 27:11; Hebrifo 6:10.
16. Ɔkwan bɛn so na Ɔdansefo kumaa bi anya Teokrase Ɔsom Sukuu no so mfaso?
16 Nhwɛso biako ne Elizabeth de no. Efi bere a na abeawa kumaa yi adi mfirihyia ason ne bere a ɔde kɔɔ mfitiase sukuu nyinaa no, bere biara a na obenya dwumadi wɔ Teokrase Ɔsom Sukuu mu no, na ɔto nsa frɛ n’akyerɛkyerɛfo ma wɔba Ahenni Asa so. Sɛ na ɔkyerɛkyerɛfo bi ntumi mma a, na Elizabeth yɛ dwumadi no kyerɛ ɔkyerɛkyerɛfo no bere a wɔapɔn sukuu no. Wɔ Elizabeth afe a edi akyiri wɔ ntoaso sukuu mu no, ɔkyerɛw amanneɛbɔ bi a ɛyɛ nkratafa du a ɛfa mfaso horow a ɛwɔ Teokrase Ɔsom Sukuu so ho, na ɔkenkan kyerɛɛ akyerɛkyerɛfo baanan. Wɔma ɔmaa Teokrase Ɔsom Sukuu ɔkasa ho nhwɛso nso, na ɔpaw “Dɛn Nti na Onyankopɔn Ma Nsɛmmɔnedi Ho Kwan?” sɛ n’asɛmti. Elizabeth anya nkyerɛkyerɛ adwuma a Yehowa Adansefo yɛ wɔ Teokrase Ɔsom Sukuu mu no so mfaso. Ɔyɛ Kristofo nkumaa pii a wɔnam nneɛma a wɔasua afi Yehowa Asɛm mu a wɔde di dwuma so de ayeyi abrɛ no no mu biako pɛ.
17, 18. (a) Nokwaredi ho afotu bɛn na Bible de ma? (b) Ɔkwan bɛn so na Yehowa Dansefo bi nokwaredi nyaa ɔbarima bi so nkɛntɛnso?
17 Bible tu Kristofo fo sɛ wɔmmɔ wɔn bra yiye ade nyinaa mu. (Hebrifo 13:18) Atorodi betumi asɛe yɛne afoforo ntam abusuabɔ, na nea ɛho hia sen saa koraa no, ɛbɛsɛe yɛne Yehowa ankasa ntam abusuabɔ. (Mmebusɛm 12:22) Nokwaredi a yɛde bɔ yɛn bra no yɛ adanse a ɛkyerɛ sɛ yɛde nneɛma a yɛasua no redi dwuma, na ama nnipa pii anya obu kɛse ama Yehowa Adansefo.
18 Susuw ɔsraani bi a ne din de Philip asɛm no ho hwɛ. Ɔyeraa krataa a wɔde yi sika wɔ sikakorabea a ɔde ne nsa ahyɛ ase a wɔnkyerɛw hwee wɔ so, na n’ani amma ne ho so kosii sɛ wɔsan de menaa no. Yehowa Dansefo bi na ohui, na ɔkyerɛw asɛm bi kaa ho sɛ nea ohui no nyamesom mu gyidi nti na ɔde abrɛ wo no. Philip ho dwiriw no. Ɔkae sɛ: “Anka wobetumi atwe $9,000 afi me ho!” Ná wɔawia ne kyɛw wɔ asɔredan mu da bi ma n’abam abu. Ɛda adi sɛ ɔmannifo bi na owiaa ne kyɛw no, bere a ɔhɔho de krataa a wobetumi de ayi sika dɔla mpempem pii asan abrɛ no! Nokwarem no, Kristofo a wodi nokware no hyɛ Yehowa Nyankopɔn anuonyam!
Monkɔ So Mfa Nea Moasua no Nni Dwuma
19, 20. Ɔkwan bɛn so na sɛ yɛyɛ yɛn ade ma ɛne Kyerɛwnsɛm no mu nneɛma a yesua no hyia a, yebenya so mfaso?
19 Wɔn a wɔde nea wɔasua afi Onyankopɔn Asɛm mu di dwuma no nya mfaso ahorow pii. Osuani Yakobo kyerɛwee sɛ: “Nea ɔkotow hwɛɛ adehyedi mmara a ɛyɛ pɛ no mu, na ɔtraa mu, na ɔnyɛ otiefo werɛfirifo, na mmom ɔyɛ adwuma no yɛfo no, onii no na wobehyira no n’adeyɛ no mu.” (Yakobo 1:25) Yiw, sɛ yɛyɛ yɛn ade ma ɛne Kyerɛwnsɛm mu nneɛma a yesua no hyia a, yebenya nokware anigye, na yebetumi agyina asetram nhyɛso ahorow ano yiye. Nea ɛsen ne nyinaa no, yebenya Yehowa nhyira ne daa nkwa ho anidaso!—Mmebusɛm 10:22; 1 Timoteo 6:6.
20 Ɛnde, sɛnea ɛte biara no, kɔ so sua Onyankopɔn Asɛm no. Wo ne Yehowa asomfo nhyiam daa, na yɛ aso tie asɛm a wɔka wɔ Kristofo nhyiam ahorow ase no. Kɔ so fa nea wusua no yɛ adwuma, na ‘asomdwoe Nyankopɔn bedi w’akyi.’—Filipifo 4:9.
[Ase hɔ asɛm]
^ nky. 9 Ná Yudani bi a ne din de Tobias anansesɛm a egyina gyidihunu so ahyɛ Tobit a ebetumi aba sɛ wɔkyerɛw no afeha a ɛto so abiɛsa A.Y.B. no mu ma. Wɔkyerɛ sɛ na ɔwɔ tumi a ɔde sa yare ne nea ɔde tu ahonhommɔne denam apataa nwonwaso bi koma, bɔnwoma, ne ne berɛbo a ɔde yɛ aduru so.
So Wokae?
•Dɛn ne ‘nsɛm pa a eye nhwɛso’ no, na ɔkwan bɛn so na yebetumi akɔ so aso mu?
•Dɛn ne “anansesɛm” a ɛsɛ sɛ yɛ- po no?
•Mfaso bɛn na wɔn a wɔde nea wosua fi Onyankopɔn Asɛm mu di dwuma no nya?
[Adesua no ho Nsɛmmisa]
[Mfonini wɔ kratafa 17]
Na tete Kristofo no bɛyɛ dɛn atumi akwati kwan a na awaefo bɛma wɔafom no?
[Mfonini ahorow wɔ kratafa 18]
Nsɛm ho amanneɛbɔfo nam Intanɛt ne nnɛyi awaefo so betumi ama yɛn adwenem ayɛ yɛn nãã
[Mfonini wɔ kratafa 19]
Nyansa nnim sɛ wobɛtrɛw amanneɛbɔ bi a wonyɛɛ mu nhwehwɛmu yiye mu
[Mfonini ahorow wɔ kratafa 20]
Yehowa Adansefo de nea wɔakenkan afi Onyankopɔn Asɛm mu di dwuma wɔ adwumam, sukuu mu, ne mmeae foforo