‘So Nneɛma A Woate No Mu Ma Ɛmmoro So’
‘So Nneɛma A Woate No Mu Ma Ɛmmoro So’
“Eyi nti ɛsɛ sɛ yeso nneɛma a yɛate no mu ma ɛboro so, na yɛansiane ho da bi.”—HEBRIFO 2:1.
1. Kyerɛkyerɛ sɛnea nneɛma a ɛtwetwe adwene betumi de asiane aba no mu.
KAR akwanhyia kunkum nnipa bɛyɛ 37,000 wɔ United States nkutoo afe biara. Animdefo ka sɛ sɛ mfirikafo maa wɔn ani daa hɔ yiye wɔ kwan so a, anka wobetumi akwati awuwuawuwu yi mu pii. Nsɛnkyerɛnne ne dawurubɔ apon a wɔde asisi kwan ho anaa telefon so a mfirikafo binom kasa na ɛtwetwe wɔn adwene. Ebinom nso wɔ hɔ a wodidi bere a wɔreka kar no. Wɔ tebea horow yi nyinaa mu no, nneɛma betumi atwetwe wɔn adwene ma ɛde asiane aba.
2, 3. Afotu bɛn na Paulo de maa Hebrifo Kristofo no, na dɛn nti na n’afotu no fata?
2 Aka bɛyɛ mfirihyia 2,000 ma wɔayɛ kar no, ɔsomafo Paulo huu biribi a ɛtwetwe adwene a na ɛreyɛ asiane ama Hebrifo Kristofo binom. Paulo sii so dua sɛ wɔde dibea bi ama Yesu Kristo a wɔanyan no no ma wakorɔn asen abɔfo nyinaa, efisɛ na ɔte Onyankopɔn nsa nifa. Afei ɔsomafo no kae sɛ: “Eyi nti ɛsɛ sɛ yeso nneɛma a yɛate no mu ma ɛboro so, na yɛansiane ho da bi.”—Hebrifo 2:1.
3 Dɛn nti na na ɛsɛ sɛ Hebrifo Kristofo no ‘so nneɛma a ɛfa Kristo ho a wɔate no mu ma ɛboro so’? Efisɛ na Yesu afi asase so bɛyɛ mfirihyia 30 a atwam no mu. Bere a na Hebrifo Kristofo no Wura nni hɔ no, na wɔn mu binom afi ase retwe wɔn ho afi nokware gyidi no ho. Ná Yudasom, wɔn kan som no, retwetwe wɔn adwene.
Ná Ɛsɛ sɛ Wotie Asɛm no Yiye
4. Dɛn nti na na Hebrifo Kristofo binom adwene betumi ayɛ wɔn sɛ wɔnsan nkɔ Yudasom mu?
4 Dɛn nti na na ebetumi aba sɛ Kristoni bi adwene bɛyɛ no sɛ ɔnsan nkɔ Yudasom mu? Wiɛ, na wɔnam nneɛma a ani tua so na ɛsom wɔ Mmara no ase. Na nkurɔfo tumi hu asɔfo no na na wɔte ɔhyew afɔre ahorow no hua. Nanso, akwan bi so no, na Kristosom yɛ soronko koraa. Ná Kristofo wɔ Ɔsɔfo Panyin, Yesu Kristo, nanso na wonhuu no wɔ asase so bɛyɛ mfirihyia aduasa. (Hebrifo 4:14) Na wɔwɔ asɔrefie, nanso na ne kronkronbea no wɔ soro. (Hebrifo 9:24) Nea ɛnte sɛ Mmara no ase twetiatwa no, na Kristofo twetiatwa yɛ ‘komam de, wɔ honhom mu.’ (Romafo 2:29) Enti, wɔ Hebrifo Kristofo no fam no, na ebetumi aba sɛ Kristosom afi ase reyɛ wɔn sɛ biribi a wonhu mu yiye.
5. Ɔkwan bɛn so na Paulo daa no adi sɛ ɔsom a Yesu hyehyɛe no korɔn koraa sen nea na ɛwɔ Mmara no ase no?
5 Na ehia sɛ Hebrifo Kristofo no hu biribi a ɛho hia paa wɔ ɔsom a Kristo hyehyɛe no ho. Na egyina gyidi so kɛse mmom sen ohu, nanso na ɛkorɔn sen Mmara a wɔnam odiyifo Mose so de mae no. Paulo kyerɛwee sɛ: “Sɛ mpapo ne anantwinini mogya ne nantwibere nso a wɔde dwira wɔn a wɔn ho agu fi, tew wɔn ho kɔ ɔhonam ahofi mu a, mpɛn ahe ara na Kristo a ɔnam daa honhom so de ne ho bɔɔ afɔre a ɛho nni dɛm maa Onyankopɔn no mogya rentew mo ahonim ho mfi nnwuma funu mu nkɔsom Onyankopɔn a ɔte ase?” (Hebrifo 9:13, 14) Yiw, bɔne fafiri a ɛnam Yesu Kristo agyede afɔre mu gyidi so ba no korɔn koraa sen nea wɔnam afɔre ahorow a wɔbɔɔ no Mmara no ase de bae no wɔ akwan pii so.—Hebrifo 7:26-28.
6, 7. (a) Tebea bɛn nti na na egye ntɛmpɛ sɛ Hebrifo Kristofo no ‘so nneɛma a na wɔate no mu yiye’? (b) Bere a Paulo kyerɛw krataa kɔmaa Hebrifo no, na bere tenten ahe na aka ama Yerusalem? (Hwɛ ase hɔ asɛm no.)
6 Ná ade foforo nso wɔ hɔ a na enti ehia sɛ Hebrifo Kristofo no so nneɛma a na wɔate afa Yesu ho no mu yiye. Na waka asie sɛ wɔbɛsɛe Yerusalem. Yesu kae sɛ: “Nna bi bɛba wo so a w’atamfo betwa wo ho ka, na wɔaka wo ahyɛ mu baabiara, na wɔadwiriw wo ne wo mma a wɔwɔ wo mu no agu fam, na wɔrennyaw wo mu bo ɔbo so, efisɛ woanhu bere a wɔdom bɛhwɛɛ wo no.”—Luka 19:43, 44.
7 Bere bɛn na na eyi bɛba? Yesu ankyerɛ ɛda ne dɔn ko no. Mmom no, ɔde akwankyerɛ yi na ɛmae: “Sɛ muhu sɛ dɔm atwa Yerusalem ho ahyia a, ɛnde munhu sɛ ne bɔ abɛn. Ɛnna momma wɔn a wɔwɔ Yudea nguan nkɔ mmepɔw so, na wɔn a wɔwɔ Yerusalem mfi mu nkɔ, na wɔn a wɔwɔ nkuraase no, mommma wɔnnkɔ mu.” (Luka 21:20, 21) Bere a Yesu kaa saa nsɛm yi akyi mfirihyia 30 no, sɛnea na nneɛma gye ntɛmpɛ no fii Kristofo binom a na wɔwɔ Yerusalem no ani so na wɔmaa nneɛma twetwee wɔn adwene. Sɛnea yɛbɛka no no, woyii wɔn ani fii ɔkwan no so. Sɛ wɔansesa wɔn nsusuwii a, na asiane bɛto wɔn ɔkwan biara so. Sɛ́ ebia na wɔn adwene yɛ wɔn saa anaasɛ ɛnte saa no, na Yerusalem sɛe no abɛn ankasa! * Yegye di sɛ Paulo afotu no maa Kristofo a na wɔretɔ nko honhom fam wɔ Yerusalem no kanyan wɔn ho.
‘Aso a Yɛbɛyɛ Atie Asɛm Yiye’ Nnɛ
8. Dɛn nti na ehia sɛ ‘yɛyɛ aso tie’ Onyankopɔn Ahenni mu nokware ahorow no ‘yiye’?
8 Te sɛ afeha a edi kan no mu Kristofo no, ɛsɛ sɛ ‘yɛyɛ aso tie’ Onyankopɔn Asɛm mu nokware ahorow no ‘yiye.’ Dɛn ntia? Efisɛ yɛn nso yɛrehyia ɔsɛe bi a ɛnyɛ ɔman biako bi so na ɛbɛba na mmom nneɛma nhyehyɛe yi nyinaa so. (Adiyisɛm 11:18; 16:14, 16) Ɛwom sɛ yennim da ne dɔn ko a Yehowa bɛyɛ saa ade yi de. (Mateo 24:36) Nanso, yɛrehu Bible nkɔmhyɛ ahorow a ɛrenya mmamu a ɛkyerɛ pefee sɛ yɛte “nna a edi akyiri mu.” (2 Timoteo 3:1-5) Enti, ɛsɛ sɛ yɛma yɛn ani da hɔ wɔ biribiara a ebetumi atwetwe yɛn adwene no ho. Ɛsɛ sɛ yetie Onyankopɔn Asɛm na yɛkɔ so yɛ yɛn ade sɛnea nneɛma gye ntɛmpɛ. Sɛ yɛyɛ saa nkutoo a na ‘yebeguan afi nneɛma a ɛrebɛba yi nyinaa mu.’—Luka 21:36.
9, 10. (a) Ɔkwan bɛn so na yebetumi de yɛn adwene asi honhom fam nneɛma so yiye? (b) Ɔkwan bɛn so na Onyankopɔn asɛm yɛ yɛn ‘nan ase kanea’ ne ‘yɛn kwan so hann’?
9 Wɔ mmere a ɛho hia yi mu no, ɔkwan bɛn so na yebetumi ada no adi sɛ ‘yɛreso’ honhom fam nneɛma mu ‘yiye’? Ɔkwan biako ne sɛ yɛbɛkɔ asafo nhyiam, amansin ne amantam nhyiam ahorow daa. Ɛsɛ sɛ yɛyɛ Bible asuafo a yɛyɛ nsi nso na ama yɛatumi abɛn ne Kyerɛwfo Yehowa. (Yakobo 4:8) Sɛ yɛnam kokoam adesua ne asafo nhyiam ahorow so nya Yehowa ho nimdeɛ a, yɛbɛyɛ sɛ odwontofo a ɔkaa eyi no: “W’asɛm yɛ me nan ase kanea, ne me kwan so hann.”—Dwom 119:105.
10 Bible yɛ ‘yɛn kwan so hann’ bere a ɛka Onyankopɔn atirimpɔw ahorow a ɛfa daakye ho kyerɛ yɛn no. Ɛyɛ ‘yɛn nan ase kanea’ nso. Ɔkwan foforo so no, sɛ yehyia asetram nsɛm a emu yɛ den a, ebetumi aboa yɛn wɔ anammɔn a edi hɔ a yebetu no mu. Ɛno nti na ɛho hia sɛ sɛ yɛne yɛn mfɛfo gyidifo hyiam ma nkyerɛkyerɛ na yɛn ankasa kenkan Onyankopɔn Asɛm a, ‘yɛyɛ aso tie asɛm yiye no.’ Nsɛm a yetie no bɛboa yɛn ma yɛasisi gyinae ahorow a mfaso wɔ so a ɛsɔ Yehowa ani na ama ne koma ani agye. (Mmebusɛm 27:11; Yesaia 48:17) Yɛbɛyɛ dɛn atumi de yɛn adwene asi nneɛma so akyɛ wɔ asafo nhyiam ahorow ase ne kokoam adesua mu sɛnea ɛbɛyɛ a yebenya Onyankopɔn honhom fam nsiesiei ahorow so mfaso kɛse?
Aso a Yɛbɛyɛ Atie Asɛm Yiye Wɔ Asafo Nhyiam Ase
11. Dɛn nti na ɛtɔ bere bi a ɛyɛ den sɛ yɛbɛyɛ aso atie asɛm wɔ Kristofo nhyiam ahorow ase?
11 Ɛtɔ bere bi a ɛyɛ den sɛ yɛbɛyɛ aso atie asɛm wɔ Kristofo nhyiam ahorow ase. Ɛnyɛ den koraa sɛ biribi betumi atwetwe yɛn adwene, ebia abofra bi su anaa obi a waka akyiri a ɔrehwehwɛ akongua atra aso. Bere a yɛayɛ adwuma bere tenten ɛda no mu no, yebetumi abrɛ ankasa. Ebetumi aba sɛ nea ɔrekasa wɔ asɛnka agua so no nyɛ ɔkasafo a ɔkanyan anigye pii, na yɛn ani bɛba yɛn ho so no na yɛn adwene nenam baabi—ebia na yɛretɔ nko mpo! Esiane sɛnea nsɛm a wɔreka no ho hia nti, ɛsɛ sɛ yɛbɔ mmɔden de yɛn adwene si nneɛma so kɛse wɔ asafo nhyiam ahorow ase. Nanso, yɛbɛyɛ dɛn atumi ayɛ eyi?
12. Dɛn na ebetumi ama ayɛ mmerɛw ama yɛn sɛ yɛbɛyɛ aso atie asɛm wɔ asafo nhyiam ahorow ase?
12 Sɛ yedi kan sua nneɛma a yebesusuw ho wɔ asafo nhyiam ahorow ase no yiye a, ɛtaa yɛ mmerɛw sɛ yebedi akyiri. Ɛnde, afei, dɛn nti na wunyi bere bi nsi hɔ nni kan nsusuw nneɛma a yebesua no ho? Egye simma kakraa bi pɛ da biara na yɛde akenkan Bible no ti ahorow bi a wɔde ama sɛ yɛnkenkan wɔ dapɛn no mu no asusuw ho. Sɛ yɛyɛ nhyehyɛe bi a, yebetumi anya bere nso de adi kan asua nneɛma a yebesua wɔ Asafo Nhoma Adesua ne Ɔwɛn-Aban Adesua ase no nso. Nhyehyɛe biara a yɛbɛpaw no, ade biako na ɛda adi: Ade a yebedi kan asua no bɛboa yɛn ma yɛde yɛn adwene asi nea yɛresusuw ho wɔ asafo nhyiam ahorow ase no so.
13. Dɛn na ebetumi aboa yɛn ma yɛde yɛn adwene asi ade a yɛresua wɔ asafo nhyiam ahorow ase no so?
13 Nea ɛka nneɛma a yebedi kan asua ho no, ebinom ahu sɛ sɛ wɔtra anim wɔ Ahenni Asa so a wotumi yɛ aso tie asɛm yiye. Ɔkasafo no a yɛbɛhwɛ no, Bible akenkan akyi a yebedi bere a wɔrekenkan kyerɛwsɛm bi, ne nsɛm a yɛbɛkyerɛkyerɛw agu hɔ yɛ akwan foforo a yɛbɛfa so ama yɛn adwene nkyinkyin. Nanso, yɛn koma a yebesiesie yɛ ade a ɛho hia koraa sen ɔkwan foforo biara a yɛbɛfa so de yɛn adwene asi biribi so no. Ehia sɛ yɛte nea enti a yɛahyiam no ase. Ne titiriw no, yɛne yɛn mfɛfo gyidifo hyiam som Yehowa. (Dwom 26:12; Luka 2:36, 37) Asafo nhyiam ahorow yɛ ɔkwan titiriw a wɔnam so ma yɛn honhom fam aduan. (Mateo 24:45-47) Afei nso, ɛma yenya hokwan ahorow de ‘twetwe yɛn ho yɛn ho kɔ ɔdɔ ne nnwuma pa mu.’—Hebrifo 10:24, 25.
14. Dɛn na ɛma asafo nhyiam yɛ nea etu mpɔn ankasa?
14 Ebia ebinom begyina sɛnea akasafo no kyerɛkyerɛ so na akyerɛ sɛnea asafo nhyiam no som bo. Sɛ akasafo no yɛ akasafo pa a, yebetumi aka sɛ asafo nhyiam no yɛ anigye. Nanso, sɛ nkyerɛkyerɛ no ntu mpɔn papa a, yebetumi anya adwene foforo. Ɛyɛ nokware sɛ ɛsɛ sɛ wɔn a wɔwɔ dwumadi no yɛ nea wobetumi nyinaa ma wɔn nkyerɛkyerɛ tu mpɔn na edu komam titiriw. (1 Timoteo 4:16) Nanso, ɛnsɛ sɛ yɛn a yɛyɛ atiefo no kasa tia nneɛma sɛnea ɛnsɛ. Ɛwom sɛ akasafo no mmɔdenbɔ ho hia de, nanso ɛnyɛ ɛno nkutoo ne ade a ɛma asafo nhyiam tu mpɔn. So wunnye ntom sɛ ɛsɛ sɛ yɛma sɛnea yɛbɛyɛ aso atie asɛm no yɛ yɛn ahiasɛm titiriw mmom sen sɛnea ɔkasafo no ma ɔkasa no? Sɛ yɛkɔ asafo nhyiam ahorow na yɛyɛ aso tie nea wɔreka no a, na yɛresom Onyankopɔn wɔ ɔkwan a ɛne n’apɛde hyia so. Ɛno na ɛma asafo nhyiam no yɛ nea mfaso wɔ so. Sɛ yɛn ani gye ho sɛ yebenya Onyankopɔn ho nimdeɛ a, yebenya asafo nhyiam ahorow so mfaso a ɔkasafo no mmɔdenbɔ mfa ho. (Mmebusɛm 2:1-5) Ɛnde, momma yensi yɛn bo ɔkwan biara so sɛ ‘yɛbɛyɛ aso atie asɛm yiye’ wɔ yɛn asafo nhyiam ahorow ase.
Nya Kokoam Adesua So Mfaso Pii
15. Ɔkwan bɛn so na yebetumi anya adesua ne nneɛma ho a yesusuw so mfaso?
15 ‘Sɛ yɛde yɛn adwene si nneɛma so yiye’ bere a yɛreyɛ kokoam adesua ne bere a yɛredwennwen nneɛma ho no a, yenya so mfaso pii. Sɛ yɛkenkan Bible ne Kristofo nhoma ahorow dwennwen ho a, ɛbɛma yɛanya hokwan ahorow a edi mũ de Onyankopɔn Asɛm ahyɛ yɛn komam. Eyi nso benya nkɛntɛnso kɛse wɔ sɛnea yesusuw nneɛma ho na yɛyɛ yɛn ade no so. Nokwarem no, ɛbɛboa yɛn ma yɛanya anigye wɔ Yehowa apɛdeyɛ mu. (Dwom 1:2; 40:8) Enti, ɛsɛ sɛ yɛma sɛnea yɛde yɛn adwene si nneɛma so no tu mpɔn na aboa yɛn bere a yɛresua ade no. Ɛnyɛ den koraa sɛ biribi bɛtwetwe yɛn adwene! Nneɛma nketenkete—telefon nnyigyei anaa dede bi betumi atwetwe yɛn adwene. Anaasɛ yebetumi ayɛ nkurɔfo a yentumi mfa yɛn adwene nsi biribi so nkyɛ. Yebetumi de adwempa atra ase sɛ yɛredidi honhom fam, nanso ebia ɛrenkyɛ biara na yɛn adwene nenam baabi. Ɔkwan bɛn so na sɛ yɛn ankasa yɛresua Onyankopɔn Asɛm a, yebetumi ‘de yɛn adwene asi so yiye’?
16. (a) Dɛn nti na ɛho hia sɛ yɛyɛ bere nhyehyɛe ma kokoam adesua? (b) Ɔkwan bɛn so na woayɛ bere nhyehyɛe ama Onyankopɔn Asɛm sua?
16 Mfaso wɔ so sɛ yɛbɛyɛ nhyehyɛe na yɛapaw tebea a eye sen biara ama adesua no. Yɛn mu dodow no ara fam no, ɛyɛ den ankasa sɛ yebenya bere ne baabi a yɛn nkutoo bɛhyɛ ayɛ yɛn ade. Yebetumi ate nka sɛ adagyew a yenni wɔ da biara da asetram no repia yɛn sɛnea asuten bi a ano yɛ den repia dubaa bi no. Nokwarem no, sɛnea yɛbɛka no no, ɛsɛ sɛ yɛko tia ɔhweam no, na bere ne bere mu no, yɛpɛ baabi a ɛhɔ yɛ komm kɔtra sua ade. Ɛnsɛ sɛ yɛtwɛn sɛ yebenya kwan ansa na yɛasua ade. Mmom no, ɛsɛ sɛ yedi tebea no so denam bere a yebegye de asua ade so. (Efesofo 5:15, 16) Ebinom ayi bere tiaa bi asi hɔ anɔpa, bere a ebia nneɛma pii ntwetwe wɔn adwene no. Afoforo nso ahu sɛ anwummere yɛ bere pa ma wɔn. Asɛm no ne sɛ ɛnsɛ sɛ yebu yɛn ani gu hia a ɛho hia sɛ yenya Onyankopɔn ne ne Ba no ho nimdeɛ no so. (Yohane 17:3) Enti, momma yɛnyɛ nhyehyɛe mfa bere bi nyɛ kokoam adesua na afei yenni saa nhyehyɛe no so.
17. Dɛn ne nsusuwho, na ɔkwan bɛn so na yebetumi anya so mfaso?
17 Nsusuwho—adeyɛ a ɛne sɛ yebedwennwen nneɛma a yɛahu wɔ adesua no mu ho—som bo yiye. Ɛboa yɛn ma yeyi Onyankopɔn adwene fi nhoma mu kɔ yɛn koma mu. Nsusuwho boa yɛn ma yehu sɛnea yɛde Bible mu afotu bedi dwuma na yɛayɛ ‘asɛm no yɛfo, na yɛanyɛ atiefo nko ansisi yɛn ho.’ (Yakobo 1:22-25) Afei nso, nsusuwho boa yɛn ma yɛbɛn Yehowa bere nyinaa, efisɛ ɛma yetumi susuw ne su ahorow ne sɛnea wɔasisi so dua wɔ asɛm a yesuae no mu no ho.
18. Tebea horow bɛn na yehia na ama yɛatumi asusuw nneɛma ho yiye?
18 Sɛ yebenya adesua ne nneɛma ho a yesusuw so mfaso yiye a, ɛnsɛ sɛ yɛma nneɛma foforo twetwe yɛn adwene. Sɛ yɛresusuw nneɛma ho a, nea ɛbɛyɛ na yɛanya nsɛm foforo no, ɛsɛ sɛ yeyi nnɛyi asetram nneɛma a ɛtwetwe adwene no fi hɔ koraa. Eyi yɛ gye bere ne baabi a yɛn nkutoo benya ahyɛ, nanso, hwɛ abotɔyam a ɛyɛ sɛ yebenya honhom fam aduan ne nokware nsu a ɛwɔ Onyankopɔn Asɛm mu no!
19. (a) Ɛdefa kokoam adesua ho no, dɛn na aboa ebinom ma wɔatumi de wɔn adwene asi ade biako so akyɛ? (b) Su bɛn na ɛsɛ sɛ yenya wɔ adesua ho, na mfaso ahorow bɛn na yebetumi anya afi dwumadi a ɛho hia yi mu?
19 Na sɛ yentumi mfa yɛn adwene nsi ade biako so nkyɛ na yɛn adwene fi ase rekyinkyin bere a yɛafi adesua ase bere tiaa bi no nso ɛ? Ebinom ahu sɛ wobetumi ama wɔn adwene a wɔde si ade biako so no atu mpɔn bere a wɔresua ade no denam adesua ntiantiaa a wɔde befi ase na wɔatrɛw mu nkakrankakra no so. Nea ɛsɛ sɛ ɛyɛ yɛn botae ne sɛ yɛde bere pii besua ade mmom sen sɛ yɛde yɛn ani bɛfa mu ntɛmntɛm ara kɛkɛ. Ɛsɛ sɛ yenya ade a yɛresua no ho anigye kɛse. Na yebetumi de nhoma ahorow pii a akoa nokwafo ne ɔbadwemma kuw no ayɛ no ayɛ nhwehwɛmu foforo. Mfaso pii wɔ “Onyankopɔn ade a emu dɔ” mu a yɛbɛhwehwɛ no so. (1 Korintofo 2:10) Saa a yɛbɛyɛ no bɛma Onyankopɔn ho nimdeɛ a yɛwɔ no atu mpɔn na ama yɛn nkatede akokwaw. (Hebrifo 5:14) Sɛ yɛyɛ nkurɔfo a yɛde nsiyɛ sua Onyankopɔn Asɛm no a, ɛbɛma ‘yɛafata sɛ yɛkyerɛkyerɛ afoforo’ nso.—2 Timoteo 2:2.
20. Ɔkwan bɛn so na yebetumi ne Yehowa anya abusuabɔ a emu yɛ den na yɛakura mu?
20 Kristofo nhyiam ahorow a yɛbɛkɔ ne kokoam adesua a yɛbɛyɛ bɛboa yɛn pii ma yɛne Yehowa anya abusuabɔ a emu yɛ den na yɛakura mu. Ɛda adi sɛ saa na na ɛte wɔ odwontofo a ɔkaa eyi no fam: “Medɔ wo mmara dɛn ara! Ɛne m’adwene daa adesae.” (Dwom 119:97) Ɛnde, ɔkwan biara so no, momma yɛnkɔ asafo nhyiam, amansin, ne amantam nhyiam ahorow daa. Na momma yennye bere mfa nyɛ Bible adesua na yensusuw nsɛm ho. Wobehyira yɛn pii sɛ ‘yɛyɛɛ aso tiee’ Onyankopɔn Asɛm ‘yiye.’
[Ase hɔ asɛm]
^ nky. 7 Ɛda adi sɛ wɔkyerɛw Hebrifo krataa no wɔ afe 61 Y.B. Sɛ ɛte saa a, ɛbɛyɛ mfirihyia anum pɛ akyi na Cestius Gallus asraafo no twaa Yerusalem ho hyiae. Ankyɛ na saa asraafo no san wɔn akyi maa Kristofo a na wɔn ani da hɔ no nyaa kwan guanee. Ɛno akyi mfirihyia anan no, Romafo asraafo a Ɔsahene Titus di wɔn anim no bɛsɛee kurow no.
So Wokae?
•Dɛn nti na na Hebrifo Kristofo binom reman afi nokware gyidi no ho?
•Yɛbɛyɛ dɛn atumi ayɛ aso atie asɛm yiye wɔ Kristofo nhyiam ahorow ase?
•Dɛn na ɛbɛboa yɛn ma yɛanya kokoam Bible adesua ne nsɛm ho a yebesusuw so mfaso?
[Adesua no ho Nsɛmmisa]
[Mfonini wɔ kratafa 11]
Na ɛsɛ sɛ Hebrifo Kristofo no ma wɔn ani da hɔ wɔ Yerusalem sɛe a na ɛreba no ho
[Mfonini wɔ kratafa 13]
Awofo betumi aboa wɔn mma ma wɔanya Kristofo nhyiam ahorow so mfaso