Ahokyere Bere Mu Awerɛkyekye

NSƐM a yɛte nnansa yi nyɛ awerɛkyekye koraa. Obi kyerɛwee sɛ: “Nsɛm a esisi nnansa yi yɛ hu araa ma mpɛn pii no yentumi nhu sɛ yentie nnɔnsia kaseɛbɔ anaasɛ yenntie.” Akodi, amumɔyɛsɛm, amanehunu, nsɛmmɔnedi, ne nyarewa—bɔne ahorow a sɛ ebi nnya ntoo yɛn tẽẽ dedaw a, ɛrenkyɛ ebetumi ato yɛn—abu so wɔ wiase.

Bible kaa tebea yi ho asɛm siei pɛpɛɛpɛ. Bere a Yesu reka yɛn bere yi ho asɛm no, ɔkae sɛ akodi akɛse, ɔyaredɔm, aduankɔm, ne asasewosow bɛba. (Luka 21:10, 11) Saa ara na ɔsomafo Paulo kyerɛw “mmere a emu yɛ den” a nnipa bɛyɛ keka, sikapɛfo, ne wɔn a wonni dɔ ho asɛm. Ɔfrɛɛ saa bere no “nna a edi akyiri.”—2 Timoteo 3:1-5.

Enti, nsɛm tebea a ɛwɔ wiase nnɛ no ne nea Bible kaa ho asɛm siei no di nsɛ wɔ akwan pii so. Nanso ɛhɔ ara na nsɛdi no kosi. Bible ka nneɛma a atesɛm nka ho asɛm ho nsɛm. Ɛdenam Onyankopɔn Asɛm a efi honhom mu so no, ɛnyɛ nea enti a bɔne pii wɔ hɔ ase nko na yɛbɛte na mmom, nea ɛbɛba daakye nso.

Sɛnea Onyankopɔn Bu Abɔnefosɛm

Bible kyerɛkyerɛ sɛnea Onyankopɔn bu tebea horow a ɛhaw adwene a ɛwɔ yɛn bere yi so  no mu. Ɛwom sɛ ohuu ɔhaw ahorow a ɛwɔ hɔ yi siei de, nanso n’ani nnye ho na saa ara nso na ɔremma ɛntra hɔ daa. Ɔsomafo Yohane kyerɛwee sɛ: “Onyankopɔn ne dɔ.” (1 Yohane 4:8) Yehowa dwen nnipa ho yiye na okyi amumɔyɛ nyinaa. Ɛfata koraa sɛ yɛbɛdan akɔ Onyankopɔn nkyɛn akɔhwehwɛ awerɛkyekye, efisɛ oye, ɔwɔ ayamhyehye, na ɔwɔ tumi a ɔde beyi bɔne afi asase so. Odwontofo no kyerɛwee sɛ: ‘Onyankopɔn soro Hene a wapaw no no begye ohiani a osu frɛ no, ne ɔmanehunufo a onni boafo. Ɔbɛkora ɔbrɛfo ne ohiani so, na wagye ahiafo kra nkwa. Obegye wɔn kra afi nhyɛso ne atirimɔdensɛm mu, na wɔn mogya bo ayɛ den n’anim.’—Dwom 72:12-14.

So wɔn a wohu amane no asɛm yɛ wo mmɔbɔ? Ebia wɔyɛ wo mmɔbɔ. Tema yɛ su a Yehowa de hyɛɛ yɛn mu, efisɛ wɔbɔɔ yɛn wɔ ne suban so. (Genesis 1:26, 27) Enti, yebetumi anya ahotoso sɛ ɛnyɛ ade a nnipa amanehunu mfa Yehowa ho. Yesu a onim Yehowa yiye sen obi foforo biara no, kyerɛkyerɛe sɛ Yehowa ani gye yɛn ho yiye na ne yam hyehye no ma yɛn kɛse.—Mateo 10:29, 31.

Adebɔ ankasa di adanse sɛ Onyankopɔn dwen nnipa ho. Yesu kae sɛ Onyankopɔn ‘ma ne wia pue nnipa bɔne ne nnipa pa so, na ɔma osu tɔ gu wɔn a wɔteɛ ne wɔn a wɔnteɛ so.’ (Mateo 5:45) Ɔsomafo Paulo ka kyerɛɛ nnipa a wɔwɔ Listra kurow no mu no sɛ: ‘Onyankopɔn annyae ne ho adansedi, efisɛ ɔyɛɛ yiye ma mo osu fi soro ne bere a aduan ba, na ɔde aduan ne anigye maa mo abotɔyam.’—Asomafo no Nnwuma 14:17.

Hena na Asodi no Da No So?

Ɛfata sɛ yɛhyɛ no nsow nso sɛ Paulo ka kyerɛɛ nnipa a wɔwɔ Listra no sɛ: “[Onyankopɔn] na tete bere a atwam no mu no, ɔmaa amanaman nyinaa kwan sɛ wɔmfa wɔn ankasa akwan so.” Enti, amanaman no—anaa nnipa no ankasa—na ahokyere dodow no ara a wɔwom no ho asodi da wɔn so. Asodi no nna Onyankopɔn so.—Asomafo no Nnwuma 14:16.

Dɛn nti na Yehowa ma kwan ma nsɛmmɔne sisi? So ɔbɛyɛ ho biribi da bi? Onyankopɔn Asɛm mu nkutoo na yebetumi anya nsɛmmisa yi ho mmuae. Ɛte saa efisɛ mmuae no fa honhom mu nipa foforo bi ne ɔsɛmpɔw bi a ɔmaa ɛsɔree wɔ ahonhom atrae a nnipa nhu hɔ no ho.

[Mfonini ahorow wɔ kratafa 4]

Nnipa wɔ tema. So nnipa amanehunu mfa Onyankopɔn ho ahe biara?

 [Mfonini Ahorow Fibea wɔ kratafa 2]

COVER: Tank: UN PHOTO 158181/J. Isaac; earthquake: San Hong R-C Picture Company

[Nsɛm Fibea wɔ kratafa 3]

Starving child: UN PHOTO 146150 BY O. MONSEN