Asetram Nsɛm

Hokwan Kɛse A Manya Wɔ Ɔko Akyi Ntrɛwmu No Mu

SƐNEA FILIP S. HOFFMANN KA KYERƐE

Ná afei ara na Wiase Ko II aba awiei wɔ May 1945 mu. Saa December no, Nathan H. Knorr a na ɔhwɛ Yehowa Adansefo wiase nyinaa asɛnka adwuma no so ne ne kyerɛwfo Milton G. Henschel a na wadi mfirihyia 25 baa Denmark nsrahwɛ. Yegyee asa kɛse bi tuaa ho ka maa saa nsrahwɛ a na yɛde anigye ahwɛ kwan no. Yɛn a na yɛyɛ mmabun no ani gyee Onua Henschel kasa no ho titiriw, esiane sɛ na ɔne yɛn bɔ tipɛn na ɔpaw: “Kae wo bɔfo wo mmerantebere mu” sɛ n’asɛmti no nti.—Ɔsɛnkafo 12:1.

SAA nsrahwɛ no mu no, yehui sɛ nneɛma a ɛyɛ anigye a na ɛbɛma wiase nyinaa asɛnka adwuma no anya nkɔanim rekɔ so a na yebetumi de yɛn ho ahyem. (Mateo 24:14) Sɛ nhwɛso no, na wɔabue sukuu foforo a wɔde bɛtete mmerante ne mmabaa ama asɛmpatrɛw adwuma no wɔ United States. Onua Knorr sii so dua sɛ sɛ wɔto nsa frɛ yɛn a, wɔbɛma yɛn “tekiti a yɛde bɛkɔ nkutoo,” na yɛrenhu baabi a wɔde yɛn bɛkɔ. Ɛno mpo no, yɛn mu bi bisaa hokwan no.

Ansa na mɛka Wiase Ko II akyi osuahu ahorow a minyae ho asɛm no, ma menkɔ m’akyi nkɔka m’awo wɔ afe 1919 mu ho asɛm. Nsɛm pii sisii ansa na ɔko no reba, na ebi sisii ɔko no mu a enyaa m’asetra so nkɛntɛnso kɛse.

Bible Mu Nokware a Yesua Fii Ɔdapaafo Bi Hɔ

Bere a na Maame yem me—n’abakan—no, ɔbɔɔ mpae sɛ sɛ meyɛ abarimaa a, memmɛyɛ ɔsɛmpatrɛwfo. Na ne nuabarima yɛ Bible  Suani, sɛnea na wɔfrɛ Yehowa Adansefo saa bere no, nanso na n’abusuafo bu no ɔdapaafo. Na yɛn fie bɛn Copenhagen, na sɛ na Bible Asuafo no yɛ wɔn afe afe nhyiam wɔ hɔ a, na Maame ma Wɔfa Thomas a na ɔte akyirikyiri no bɛtra yɛn nkyɛn. Eduu afe 1930 no na Bible mu nimdeɛ ne ne nsusuwii a egyina nokwasɛm so no ama Maame asakra abɛyɛ Bible Suani.

Ná Maame ani gye Bible ho yiye. Odii ahyɛde a ɛwɔ Deuteronomium 6:7 no akyi kyerɛkyerɛɛ me ne me nuabea ‘wɔ n’afitra mu, ne kwan so nantew mu, ne nna mu, ne ne sɔre mu.’ Bere bi akyi no, mifii ase nyaa afie afie asɛnka mu kyɛfa. M’ani gyee nsɛmpɔw te sɛ ɔkra a enwu da ne hellgya a na asɔre ahorow no rekyerɛkyerɛ no nkɔmmɔbɔ ho yiye. Na mitumi de Bible kyerɛ sɛ nkyerɛkyerɛ a ɛtete saa no nyɛ nokware.—Dwom 146:3, 4; Ɔsɛnkafo 9:5, 10; Hesekiel 18:4.

Yɛn Abusua no Bɛyɛɛ Biako

Bere a yewiee Copenhagen ɔmantam nhyiam no wɔ afe 1937 mu no, na bere tiaa mu mmoa ho abehia wɔ baabi a wɔkora nhoma so wɔ Yehowa Adansefo baa dwumadibea a ɛwɔ Denmark no. Afei ara na na mawie aguadi ho kɔlege adesua, na na minni asɛyɛde ahorow biara nti, mede me ho mae sɛ mɛkɔ akɔboa. Bere a yewiee nhomakorabea hɔ adwuma no, wɔkae sɛ memmoa wɔ baa dwumadibea hɔ. Ɛno akyi bere tiaa bi no, mifii fie kɔtraa Copenhagen baa dwumadibea hɔ, nanso na minnya mmɔɔ asu. Kristofo a wɔn ho akokwaw a me ne wɔn bɔe daa no boaa me ma minyaa honhom fam nkɔso. Afe a edi hɔ, January 1, 1938 no, mede nsu mu asubɔ yɛɛ m’ahosohyira ma Yehowa Nyankopɔn no ho sɛnkyerɛnne.

Wɔ September 1939 mu no, Wiase Ko II fii ase. Afei, wɔ April 9, 1940 no, German asraafo ko faa Denmark. Esiane sɛ wɔmaa Denmarkfo ahofadi kakra nti, yetumi kɔɔ so yɛɛ yɛn asɛnka adwuma no.

Afei anigyesɛm bi sii. Paapa bɛyɛɛ Ɔdansefo nokwafo a ɔyɛ nnam maa yɛn abusua no anigye bewiee pɛyɛ. Enti bere a wɔtoo nsa frɛɛ me ne Denmarkfo foforo baanan sɛ yɛnkɔ Gilead Sukuu adesuakuw a ɛto so awotwe no, m’abusua no nyinaa boaa me. Wɔyɛɛ asram anum sukuu adesua a efii ase September 1946 no wɔ sukuu  fɛfɛ bi a ɛwɔ South Lansing kurotia wɔ New York atifi fam.

Gilead a Mekɔe ne Ntetee a Minyae Akyiri Yi

Gilead ma minyaa nnamfo foforo a wɔn ho yɛ anika. Da koro anwummere a me ne Harold King a ofi England retu mpase wɔ sukuu mu no, yɛbɔɔ baabi a sɛ yewie yɛn ntetee no a, ebia wɔde yɛn bɛkɔ no ho nkɔmmɔ. Harold kae sɛ: “Minnye nni sɛ eyi ne nea edi akyiri a mahu Dover abotan fitaa [a ɛwɔ England Anafo fam] no.” Ɔkaa nokwasɛm, nanso egyee mfirihyia 17 ansa na ɔrekɔ England bio, na odii saa mfe no mu mfirihyia anan ne fã wɔ obiakofo afiase dan mu wɔ Chinafo afiase! *

Yewiee yɛn adesua no, wɔde me kɔɔ Texas, U.S.A., sɛ menkɔsom sɛ ɔhwɛfo kwantufo, na mesrasraa Yehowa Adansefo asafo ahorow boaa wɔn honhom fam. Wogyee me fɛw so. Wɔ anuanom a wɔwɔ Texas no fam no, na ɛyɛ wɔn anigye sɛ wɔanya Europani a afei ara na na wawie Gilead Sukuu no. Nanso, midii asram ason pɛ wɔ Texas no, wɔfrɛɛ me kɔɔ Yehowa Adansefo adwumayɛbea ti a ɛwɔ Brooklyn, New York no. Ɛhɔ no, Onua Knorr maa me adwuma wɔ adwumayɛdan mu sɛ minsua sɛnea nnwuma kɔ so wɔ adwumayɛbea horow no nyinaa no. Afei, bere a mesan kɔɔ Denmark no, na ɛsɛ sɛ mede nea masua no yɛ adwuma, na mehwɛ ma wɔyɛ biribiara sɛnea wɔyɛ no wɔ Brooklyn no. Na adwene no ne sɛ wɔbɛma baa dwumadibea a ɛwɔ wiase nyinaa adwuma ayɛ biako na biribiara akɔ so pɛpɛɛpɛ. Akyiri yi, Onua Knorr yii me kɔɔ Germany.

Akwankyerɛ a Mede Maa Baa Dwumadibea Ahorow

Bere a miduu Wiesbaden, Germany, wɔ July 1949 mu no, na German nkurow pii da so ara yɛ amamfõ. Na wɔn a wodi asɛnka adwuma no anim no yɛ mmarima a na wɔataa wɔn fi bere a Hitler bedii tumi wɔ afe 1933 mu no. Na ebinom ada afiase ne adwumayɛban mu mfirihyia awotwe kosi du anaa nea ɛboro saa! Me ne Yehowa asomfo a wɔte saa no yɛɛ adwuma mfirihyia abiɛsa ne fã. Wɔn nhwɛso soronko no kae me asɛm bi a Germanni abakɔsɛm kyerɛwfo Gabriele Yonan a ɔkyerɛw eyi kae no: “Sɛ ɛnyɛ Kristofo kuw yi a wogyinaa pintinn wɔ Ɔman Sohyialist kankabi nniso no ase a, anka—Auschwitz ne Okunkɛse no akyi no—yɛn adwenem bɛyɛ yɛn nãã sɛ ebia yebetumi adi Kristofo nkyerɛkyerɛ a Yesu de mae no ho dwuma anaa.”

Adwuma a na meyɛ wɔ baa dwumadibea hɔ no te sɛ nea na meyɛ wɔ Denmark no ara pɛ: sɛ mɛkyerɛ ɔkwan foforo biako a wɔfa so di ahyehyɛde no mu nneɛma ho dwuma no. Bere a German anuanom no tee ase sɛ nsakrae no nyɛ nea wɔde rekasa atia wɔn adwuma—na mmom sɛ na bere adu sɛ baa dwumadibea ahorow no yɛ biako—no, ankyɛ na wɔn ani gyei na wɔdaa biakoyɛ honhom adi.

Wɔ afe 1952 mu no, krataa bi fi Onua Knorr adwumayɛbea bae, na ɛkyerɛe sɛ menkɔ baa dwumadibea a ɛwɔ Bern, Switzerland no. Wɔmaa me dwumadi sɛ efi January 1, 1953 no, menkɔsom sɛ baa dwumadibea sohwɛfo wɔ hɔ.

 Anigye Foforo Wɔ Switzerland

Miduu Switzerland no, ankyɛ na mihyiaa Esther wɔ ɔmantam nhyiam bi ase, na ankyɛ na yɛyɛɛ aware nhyehyɛe. Wɔ August 1954 mu no, Onua Knorr kae sɛ memmra Brooklyn, baabi a wɔkyerɛɛ me adwuma foforo a ɛyɛ anigye ani so. Esiane sɛ na baa dwumadibea dodow a ɛwɔ wiase nyinaa adɔɔso yiye na emu atrɛw nti, na wɔreyɛ nhyehyɛe foforo. Wɔkyekyɛɛ wiase mu yɛɛ no dantaban ahorow, a na dantaban sohwɛfo bɛsom emu biara. Wɔmaa me dantaban yi mu abien sɛ mensom: Europa ne Mediterranea mpɔtam hɔ.

Brooklyn nsrahwɛ no akyi bere tiaa bi no, mesan kɔɔ Switzerland kosiesiee me ho maa dantaban adwuma no. Me ne Esther waree, na ɔkaa me ho ma yɛsomee Switzerland baa dwumadibea hɔ. M’akwantu a edi kan no mu no, mekɔɔ asɛmpatrɛwfo afie ne baa dwumadibea horow a ɛwɔ Italy, Greece, Cyprus, Mediterranea Supɔw no so aman ne Afrika Atifi fam mpoano, ne Spain ne Portugal—ne nyinaa si aman 13. Bere a mesan kɔsraa Bern akyi no, metoaa akwantu no so kɔɔ Europa aman foforo a ɛwɔ Soviet Union atɔe fam no nyinaa so. Afe a edi kan wɔ yɛn aware mu no, mifii fie tutuu akwan asram asia a na meresom yɛn nuanom Kristofo.

Yɛn Nsɛm Tebea a Ɛsakrae

Wɔ afe 1957 mu no, Esther hui sɛ ɔyem, na esiane sɛ wɔanyɛ baa dwumadibea sɛ baabi a awofo ne wɔn mma bɛtra nti, yesii gyinae kɔɔ Denmark, baabi a Paapa gyee yɛn fɛw so ne yɛn trae. Esther hwɛɛ yɛn babea, Rakel, ne me papa, bere a na mereboa adwuma a na wɔreyɛ wɔ yɛn baa dwumadibea a na wɔasi no foforo no. Mesomee sɛ Ahenni Som Sukuu a wɔyɛ ma asafo mu ahwɛfo no kyerɛkyerɛfo, na mekɔɔ so somee nso sɛ dantaban sohwɛfo.

Na dantaban adwuma no hwehwɛ sɛ yetu kwan bere tenten, a nea ɛyɛ yaw ne sɛ ɛmaa yɛne yɛn babea no ntam tetewee bere tenten. Na ɛno nso wɔ ne haw ahorow. Bere bi mikodii bere kakra wɔ Paris, baabi a yɛhyehyɛɛ nhoma tintimbea ketewa bi no. Esther ne Rakel de keteke baa hɔ bɛhwɛɛ me, na wobeduu Gare du Nord. Me ne Léopold Jontès a na ɔwɔ baa dwumadibea hɔ kɔɔ hɔ kohyiaa wɔn. Rakel gyinaa keteke no kwan ano hwɛɛ Léopold, na afei ɔhwɛɛ me, na ɔsan hwɛɛ Léopold bio, na afei ɔyɛɛ Léopold atuu!

 Bere a midii mfirihyia 45 no, nsakrae kɛse foforo bae. Migyaee bere nyinaa som adwuma no kɔyɛɛ honam fam adwuma de hwɛɛ m’abusua. Bere a na mewɔ osuahu sɛ Yehowa Adansefo somfo no, mitumi nyaa adwuma sɛ adwuma sohwɛfo wɔ adwuma bi a wɔde nneɛma kɔ amannɔne kɔtɔn mu. Bere a meyɛɛ adwuma maa adwumayɛkuw koro no ara bɛyɛ mfirihyia akron na Rakel wiee sukuu no, yesii gyinae gyee nkuran a wɔhyɛe sɛ yɛnkɔ baabi a na Ahenni adawurubɔfo ho hia kɛse no toom.

Bere a meyɛɛ adwuma hokwan ahorow a ɛwɔ Norway ho nhwehwɛmu no, mibisaa adwuma a na metumi anya ho asɛm fii asoɛe bi hɔ. Na mmuae no nhyɛ nkuran. Na anidaso biara nni hɔ sɛ ɔbarima a wadi mfirihyia 55 no benya adwuma. Nanso, me ne baa dwumadibea a ɛwɔ Oslo no dii nkitaho, na afei mikogyee fie bi a ɛbɛn Drøbak kurow no mu tuaa ho ka a na mewɔ ahotoso sɛ menya adwuma bi ayɛ. Minyaa bi, na Ahenni som adwuma a ɛyɛ anigye kɛse dii akyiri bae wɔ Norway.

Na mmere a ɛyɛ anigye sen biara no ne bere a yɛn asafo no mufo dodow no ara tutu akwan kɔ atifi fam kɔyɛ asasesin a wɔmfa nhyɛɛ obiara nsa mu adwuma no. Yegyigyee asese wɔ nsraban bi mu tuaa ho ka, na da biara na yɛkɔsrasra nnipa a wɔwɔ mfuw a apete wɔ mmepɔw a ɛyɛ fɛ no so no. Na ɛyɛ anigye yiye ankasa sɛ yɛbɛka Onyankopɔn Ahenni ho asɛm akyerɛ nnipa a wɔwɔ adamfofa su yi. Yɛmaa nhoma pii, nanso na ɛsɛ sɛ yɛtwɛn afe a edi hɔ ansa na yɛakɔyɛ sankɔhwɛ ahorow. Ne nyinaa mu no, nkurɔfo no werɛ amfi yɛn! Esther ne Rakel da so ara kae bere a yɛsan kɔe na wɔyɛɛ yɛn atuu sɛ abusuafo a wohuu yɛn akyɛ no. Bere a yedii mfirihyia abiɛsa wɔ Norway wiei no, yɛsan kɔɔ Denmark.

Abusua Asetra Mu Anigye

Ankyɛ na Rakel ne Niels Højer, bere nyinaa somfo mmɔdenbɔfo bi yɛɛ aware nhyehyɛe. Bere a Niels ne Rakel waree no, wɔkɔɔ so yɛɛ akwampae adwuma no kosii sɛ wɔwoe. Niels ayɛ okunu pa ne agya pa, n’ani ku n’abusua ho ankasa. Da koro anɔpatutuutu bi ɔde ne babarima traa sakre so kɔɔ mpoano kɔhwɛɛ sɛnea owia pue. Ofipamfo bi bisaa abarimaa no nea wɔkɔyɛe wɔ hɔ. Obuae sɛ: “Yɛkɔbɔɔ Yehowa mpae.”

Mfe kakraa bi akyi no, me ne Esther hwɛɛ yɛn mmanananom mpanyimfo baanu, Benjamin ne Nadja asubɔ. Na Niels ka wɔn a wɔrehwɛ no ho, na mpofirim ara obegyinaa m’anim. Ɔhwɛɛ me kae sɛ: “Mmarima nsu.” Nanso, ankyɛ na yɛn baanu nyinaa abembam yɛn ho resu. Hwɛ anigye ara a ɛyɛ sɛ wubenya asebarima a wubetumi ne no abom aserew asu!

Yɛda so Reyɛ Tebea Horow Mu Nsakrae

Nhyira foforo bae bere a wɔfrɛɛ me ne Esther ma yɛsan kɔsomee wɔ Denmark baa dwumadibea no. Nanso, saa bere no, na wɔreyɛ nhyehyɛe asi baa dwumadibea dan kɛse paa wɔ Holbæk. Minyaa hokwan hwɛɛ ɔdansi adwuma a atuhoama adwumayɛfo a wontua wɔn ka sii no so. Ɛmfa ho awɔwbere a na emu yɛ den no, eduu afe 1982 awiei no, na yɛawie ɔdan no si ara ne sa, na yɛn nyinaa ani gyei sɛ yetu kɔɔ ɔdan kɛse a emu nneɛma yɛ papa no mu!

Ankyɛ na mekɔyɛɛ adwuma wɔ adwumayɛdan a ɛma minyaa abotɔyam kɛse mu, bere a na Esther reyɛ telefon ho adwuma no. Nanso, bere bi akyi no, na ɛsɛ sɛ wɔyɛ no oprehyɛn sesa ne dwonku dompe, na afe ne fã akyi no wɔyɛɛ no oprehyɛn wɔ ne bɔnwoma kotoku mu. Ayamye a baa dwumadibea adwumayɛfo no yii no adi kyerɛɛ yɛn nyinaa akyi no, yesii gyinae sɛ sɛ yefi baa dwumadibea hɔ a, ɛbɛyɛ papa ama wɔn nyinaa. Yɛkɔɔ asafo a yɛn babea no ne n’abusua wom no mu.

Ɛnnɛ Esther akwahosan nyɛ papa. Nanso, metumi aka no nokwarem sɛ mfe a yɛabom ayɛ ɔsom adwuma no nyinaa a yɛayɛ nsakrae ahorow wɔ tebea horow ho mu no, wayɛ ɔboafo ne ɔhokafo pa. Ɛmfa ho sɛ yɛn akwahosan akɔ fam no, yɛn baanu nyinaa da so ara yɛ asɛnka adwuma no sɛnea yebetumi. Sɛ misusuw m’asetra ho a, mede anigye kae odwontofo no nsɛm no, “Onyankopɔn, wo na wufi me mmofraase kyerɛkyerɛɛ me.”—Dwom 71:17.

[Ase hɔ asɛm]

[Mfonini wɔ kratafa 24]

Yɛreyi nhoma wɔ Germany baa dwumadibea a na wɔresi wɔ afe 1949 mu

[Mfonini wɔ kratafa 25]

Adansefo a wɔte sɛ eyinom a na wofi adwumayɛban mu aba no ka me mfɛfo adwumayɛfo ho

[Mfonini ahorow wɔ kratafa 26]

Me ne Esther nnɛ ne yɛn ayeforohyia da wɔ Bern Betel, October 1955