Ahenni Adawurubɔfo Bɔ Amanneɛ

Wogye Ahenni Asa Bi Tom Ma Ho Abasobɔde

FINLAND Asoɛe a Ɛhwɛ Nneɛma a Atwa Yɛn Ho Ahyia so no de afe 2000 sii hɔ sɛ “Asase Ani Siesie Afe.” Wɔn a wɔyɛɛ nhyehyɛe no mu biako kae sɛ “nea enti a wɔafa asase ani siesie sɛ afe no asɛmti ne sɛ ɛbɛkae yɛn nkɛntɛnso a afifide frɔmfrɔm a atwa yɛn ho ahyia no wɔ wɔ yɛn da biara da asetra ne yɛn yiyedi so no.”

January 12, 2001 no, Yehowa Adansefo baa dwumadibea a ɛwɔ Finland no nsa kaa krataa bi fii Finland Asase Ani Siesie Nnwuma Fekuw no hɔ. Krataa no kyerɛkyerɛɛ mu sɛ wɔde afe no asɛmti a ɛne asase ani siesie ho abasobɔde ahorow no mu biako ama Yehowa Adansefo Ahenni Asa a ɛwɔ Tikkurila no esiane sɛnea wɔasiesie asase a ɛda ho no na wɔayɛ hɔ kama no nti. Krataa no de kaa ho sɛ “sɛnea asase no te wɔ ahohurubere ne awɔwbere mu nyinaa no yɛ anika, ɛyɛ fɛ yiye, na ɛsɔ ani ankasa.”

Wɔde abasobɔde no maa Yehowa Adansefo wɔ Rosendahl Ahɔhodan mu wɔ Tampere, Finland, wɔ adeyɛ bi a nhomanimfo ne adwumawuranom 400 kɔɔ ase no ase. Finland Asase Ani Siesie Nnwuma Fekuw no de asɛm bi too nsɛnkyerɛwfo anim nso sɛ: “Ɛkame ayɛ sɛ, Yehowa Adansefo Ahenni Asa yɛ nea wosiesie no fɛfɛɛfɛ bere nyinaa wɔ yɛn man yi mmeae ahorow. Na ɛkame ayɛ sɛ sɛnea wɔhwɛ nneɛma a atwa yɛn ho ahyia yiye no ma obiara a otwam fa hɔ no kyerɛ ho anigye. Ahenni Asa a ɛwɔ Tikkurila no yɛ turo a ɛyɛ fɛ yiye no ho nhwɛso biako. Ɔdan no ne asase kɛse a ɛda ho no ma ɛhɔ yɛ baabi a edwo na ɛyɛ anika.”

Ahenni Asa 233 na ɛwɔ Finland, na turo ahorow a ɛyɛ fɛ atwa pii ho ahyia. Nanso, nea ɛma saa mmeae yi yɛ fɛ ankasa ne sɛ ɛyɛ mmeae a wɔde nokware som ne Bible nkyerɛkyerɛ ma. Wɔ Yehowa Adansefo bɛboro ɔpepem asia a wɔwɔ wiase nyinaa fam no, Ahenni Asa—nea wɔde nneɛma pii asiesie mu anaa wɔmfaa nneɛma pii nsiesiee mu—yɛ beae a wɔn ani gye ho. Ɛno nti na wɔde anigye hwɛ so yiye no. Obiara wɔ ho kwan sɛ ɔkɔ Ahenni Asa horow a ɛwɔ mo mpɔtam hɔ no so!