‘Hu Nyansa W’akyiri Nna Mu’
‘Hu Nyansa W’akyiri Nna Mu’
Franseni anwensɛm kyerɛwfo Jean de La Bruyère a ɔtraa ase wɔ afeha a ɛto so 17 mu no kae sɛ: “Adesamma mu fã kɛse no ara nam wɔn mfe a edi kan wɔ asetra mu no so ma nea etwa to no yɛ mmɔbɔ.” Nokwarem no, abofra a n’adwene yɛ no ntanta betumi ahinhim, ne bo ahaw no na ne werɛ ahow. Nanso ebia ɔbabun a wasen ne kɔn bɛkɔ so ara afa ɔkwammɔne so, na ama wahu amane akyiri yi wɔ n’asetra mu. Emu biara mu no, anibiannaso a wɔde yɛ bɔne ne anidahɔ bɔne nyinaa de ɔhaw ba.
Ɔkwan bɛn so na yebetumi akwati ade bɔne a ɛte saa? Bere a Onyankopɔn Asɛm de kɔkɔbɔ rema wɔ mmabunbere mu adwene ntanta ho no, etuu mmofra fo sɛ: “Kae wo bɔfo wo mmerantebere mu ansa na nna bɔne no aba, na mfe a wobɛka sɛ: minni ho anigye, no adu.” (Ɔsɛnkafo 12:1) Sɛ woyɛ ɔbabun a, ma w’adwene nsi wo pi wɔ ‘wo Bɔfo Kunini’ no ho nimdeɛ a wubenya wɔ wo mmofraase no ho.
Ɛnde, ɔkwan bɛn so na Bible boa mmofra ma wɔkwati mmabunbere mu nneyɛe a mfaso nni so? Ɛka sɛ: “Tie afotu na gye nteɛso, na woahu nyansa w’akyiri nna mu.” (Mmebusɛm 19:20) Bible ma ɛda adi pefee sɛ nyansa a efi Onyankopɔn hɔ a obi bebu n’ani agu so anaa ɔbɛtew so atua wɔ ne babunbere mu no de amanehunu na ɛba. (Mmebusɛm 13:18) Ɔkwan foforo so no, akwankyerɛ a efi Onyankopɔn hɔ a yebetie no de “onyinkyɛ ne nkwa mfe ne asomdwoe” ne asetra a akomatɔyam wom na ɛba.—Mmebusɛm 3:2.