So Ahonhommɔne Reyɛ Adwuma?

“Wiase no adwene atu afra, na ɛte sɛ nea ahonhommɔne rebɔ mmɔden sɛ wobetuatua akwan a yebetumi afa so atwitwa agye yɛn ho wɔ ahokyere bere mu nyinaa.”—Jean-Claude Souléry, sɛnkyerɛwfo.

‘Ɛte sɛ nea nneɛma a ankorankoro ntumi nyɛ ho hwee no ama wɔanya adwene sɛ ahonhommɔne bi a ɔwɔ tumi kɛse rehyɛ wɔn so.’—Josef Barton, abakɔsɛm kyerɛwfo.

EHU kɛse a September 11, 2001 amumɔyɛfo ntua no ma ɛkaa nkurɔfo no ama wɔasusuw nneɛma ho anibere so. Bere a Michael Prowse rekyerɛw n’asɛm wɔ Financial Times a ɛwɔ England mu no, ɔkae sɛ: “Aboa biara renyɛ eyi, na ɔrentumi nyɛ amumɔyɛde a ɛte sɛɛ da.” Samufo nsɛm a ɛwɔ New York Times mu no kae sɛ, sɛ nhyehyɛe a na ɛsɛ sɛ wɔyɛ ansa na wɔde ntua no aba da nkyɛn a, “ehia sɛ yesusuw nitan a ɛma wotumi de yɛɛ saa no nso ho. Ɛyɛ nitan a ɛboro nea ɛde akodi ba no so, enni anohyeto, na ennyina mmara biara so.”

Nnipa a wofi ɔsom ahorow nyinaa mu susuw nokwasɛm a ebetumi ayɛ sɛ tumi kɛse bi na ɛhyɛ akyi no ho anibere so. Oguadini bi a ofi Sarajevo a ohuu abusua mu nitan mu ahodwiriwde a ɛkɔɔ so wɔ Bosnia no kae sɛ: “Bere a Bosnia ɔko no baa awiei afe akyi no na migye dii sɛ Satan na ɔhyɛ akyi. Eyi yɛ abɔdamsɛm ankasa.”

Bere a wobisaa abakɔsɛm kyerɛwfo Jean Delumeau sɛ ogye di sɛ Ɔbonsam wɔ hɔ no, obuae sɛ: “Ɛbɛyɛ dɛn na magye kyim sɛ Ɔbonsam nni tumi bere a mihu nea ɛrekɔ so ne nea mahu fi bere a wɔwoo me no: Wiase ko a ɛto so abien, a ekunkum nnipa bɛboro ɔpepem 40; Auschwitz ne owu nsraban; Cambodia okunkɛse; Ceauşescu nniso a ɛnam ɔhyɛ ntraso so hwiee mogya pii gui no ase; aninyanne a wɔde yɛ nkurɔfo de di wɔn so wɔ wiase mmeae pii. Ahodwiriwde a ɛrekɔ so no nni ano. . . . Enti migye di sɛ edi sɛ yɛfrɛ nneyɛe a ɛtete saa ‘abonsamsɛm’, a ɛnyɛ sɛ Ɔbonsam a ɔwɔ mmɛn ne anan a wɔapaapae mu bi na ɔma wɔyɛ, na mmom Ɔbonsam a ɔyɛ honhom ne tumi a ɛreyɛ adwuma wɔ wiase ho sɛnkyerɛnne no na ɔhyɛ akyi.”

Te sɛ Jean Delumeau no, nnipa pii ka sɛ nneɛma a ɛyɛ hu a ɛrekɔ so wɔ nnipa asetram nnɛ, fi abusua mu kosi amanaman ntam no, yɛ “abonsamsɛm.” Nanso dɛn na eyi kyerɛ? So yebetumi de ahodwiriwde a ɛresisi yi ho asodi ato tumi bɔne bi a enni nipasu so, anaasɛ tumi bɔne bi ankasa na ɛrepiapia nnipa ma wɔadi nsɛmmɔne a ɛyɛ hu a ɛboro nea nnipa betumi ayɛ so no? So bɔne hene—Satan Ɔbonsam—na ɔhyɛ akyi?

[Mfonini Fibea wɔ kratafa 3]

Children: U.S. Coast Guard photo