“W’asɛm no Yɛ Nokware, Asetra Yɛ Anigye!”

SO W’ANI begye sɛ wubehu nea asetra kyerɛ ankasa? Magdalena a wadi mfirihyia dunwɔtwe a ɔyɛ Yehowa Dansefo a ɔte Szczecin, Poland no, boaa ne yɔnko sukuuni Katarzyna, ma ɔyɛɛ saa. Ná Katarzyna yɛ obi a onnye nni koraa sɛ Onyankopɔn wɔ hɔ, nanso bere a Magdalena kaa Bible ho asɛm kyerɛɛ no no, ɔkyerɛɛ ho anigye ankasa.

Ɛwom sɛ Katarzyna ani gyee Bible mu asɛm a Magdalena ka kyerɛɛ no no ho de, nanso wannye antom koraa. Bere a Katarzyna ne Magdalena kaa nokware nnamfo ho asɛm no, ɔkae bere bi sɛ: “Wowɔ Bible no; wunim nnyinasosɛm a ɛsɛ sɛ wudi akyiri ne baabi a wubenya nnamfo. Na wɔn a anyɛ yiye koraa no, wontumi nnye saa nnyinasosɛm ahorow no ntom saa bere yi no nso ɛ?”

Nsakrae bae bere a Katarzyna tuu kwan kɔɔ London, England no. Ɔkɔɔ nsrahwɛ wɔ Yehowa Adansefo baa dwumadibea a ɛwɔ hɔ no, na ayamye a wɔdaa no adi kyerɛɛ no no kanyan no. N’ani gyee nneɛma nketenkete te sɛ ɔpon a wobue maa no ne ne nsɛm a ɔkae a wɔkyerɛɛ ho anigye ankasa no ho.

Bere a wofii sukuu afe foforo ase wɔ September 2001 mu no, Katarzyna sii gyinae sɛ ɔbɛma wɔne no ayɛ Bible adesua daa. Ɔrenya anisɔ kɛse ama Bible nnyinasosɛm, na wafi ase de redi dwuma wɔ n’asetram da biara da. Nnansa yi, ɔka kyerɛɛ Magdalena sɛ: “Mete nka sɛ nea merefi asetra foforo ase.” Ɔkaa asɛm tiawa bi wɔ telefon so nso kyerɛɛ no sɛ: “Meda wo ase pii wɔ nnɛ adesua no ho! W’asɛm no yɛ nokware, asetra yɛ anigye! Ɛyɛ anigye sɛ yebehu onii a ɛsɛ sɛ yɛda no ase wɔ eyi ho.”