“Ahenni Adawurubɔfo a Wɔyɛ Nsi” De Anigye Hyiam

ƆBRASƐE, sikasɛm, ne amammuisɛm mu basabasayɛ rewosow wiase no. Nanso, wɔ saa basabasayɛ yi nyinaa mu no, Yehowa Adansefo hyiaam asomdwoe mu yɛɛ “Ahenni Adawurubɔfo a Wɔyɛ Nsi” Ɔmantam Nhyiam Ahorow. Efi May 2002 no, wɔyɛɛ nhyiam ahorow yi wɔ wiase nyinaa.

Nhyiam no yɛɛ anigye ankasa. Ma yentĩ Bible mu dwumadi a ɛma denhyɛ no kakra mu.

Da a Edi Kan no Sii Nsi a Yesu Daa no Adi So Dua

Ná nhyiam no da a edi kan no asɛmti ne “Suasua Yɛn Awurade Yesu Nsiyɛ.” (Yohane 2:17) Ɔkasa a n’asɛmti ne “Di Hyia a Yɛahyiam sɛ Ahenni Adawurubɔfo no Ho Ahurusi” no de anigye too nsa frɛɛ nhyiamfo no sɛ wonnya anigye a ɛda adi wɔ Onyankopɔn nkurɔfo nhyiam ahorow ase bere nyinaa no bi. (Deuteronomium 16:15) Nea edii ɔkasa yi akyi ne nsɛm a wobisabisaa asɛmpa no ho adawurubɔfo a wɔyɛ nsi.

Ɔkasa a n’asɛmti ne “Ma W’ani Nnye Yehowa Ankasa Ho Kɛse” no susuw Dwom 37:1-11 ho mmiako mmiako. Wɔhyɛɛ yɛn nkuran sɛ ‘yɛnnhoran yɛn bo’ wɔ nkɔso a ɛte sɛ nea amumɔyɛfo nya no ho. Ɛmfa ho sɛ ebia amumɔyɛfo bɛka yɛn ho nsɛm a ɛmfata no, bere a ɛsɛ mu no Yehowa bɛma wɔn a wɔyɛ ne nkurɔfo anokwafo ankasa no ada adi. Ɔkasa a wɔato din “Monyɛ Nnipa a Wɔwɔ Ayɛ” no kyerɛɛ sɛnea yebetumi akyerɛ anisɔ ama Onyankopɔn. Ɛsɛ sɛ Kristofo nyinaa de “ayeyi afɔre” brɛ Yehowa. (Hebrifo 13:15) Nokwarem no, bere dodow a yɛde yɛ Yehowa adwuma no gyina anisɔ a yɛwɔ ne yɛn nsɛm tebea so.

Ná nhyiam asɛmti ho ɔkasa no asɛmti ne “Ahenni Adawurubɔfo a Nsiyɛ Kanyan Wɔn.” Ɛdaa Yesu Kristo adi sɛ nsiyɛ ho nhwɛso a ɔsen biara. Bere a wɔde ɔsoro Ahenni no sii hɔ wɔ 1914 mu akyi no, na ehia sɛ nokware Kristofo da nsiyɛ adi na ama wɔabɔ asɛmpa no dawuru. Ɔkasafo no twee adwene sii nhyiam a wɔyɛe wɔ Cedar Point, Ohio, U.S.A., wɔ 1922 mu no so, na ɔkaee yɛn nsato a ɛkanyan adwene yi: “Mommɔ Ɔhene no ne N’ahenni no Dawuru”! Awiei koraa no, nsiyɛ a Onyankopɔn nokware asomfo wɔ no kanyan wɔn ma wɔkaa Ahenni ho nokware a ɛyɛ anigye no kyerɛɛ aman nyinaa.

Ɔkasa a n’asɛmti ne “Nya Akokoduru na Hu sɛ Yehowa Ka Yɛn Ho,” a wɔmaa no da a edi kan awia no, kyerɛe sɛ Satan ani sã Onyankopɔn nkurɔfo titiriw. Nanso, ɛmfa ho ɔsɔretia a yehyia no, sɛ yesusuw Bible ne nnɛyi gyidi ho nhwɛso ahorow ho a, ɛma yenya akokoduru de gyina sɔhwɛ ahorow ano a yensuro.—Yesaia 41:10.

Nea edii hɔ wɔ dwumadi no mu ne ɔkasa a wɔakyekyɛm abiɛsa a n’asɛmti ne “Mika Nkɔmhyɛ no Hyɛ Yɛn Den Ma Yɛnantew Yehowa Din Mu.” Ɔkasafo a odi kan no de ɔbrasɛe, ɔsom mu ɔwae, ne honam fam ade dodowpɛ a ɛkɔɔ so wɔ  Mika bere so no totoo yɛn mmere yi ho. Ɔkae sɛ: ‘Sɛ yenya koma a etie na yɛma yɛn abrabɔ yɛ kronkron na yɛma nyamesom pa hyɛ yɛn asetra ma—na yɛamma yɛn werɛ amfi sɛ Yehowa da no bɛba a, yɛn daakye ho anidaso bɛyɛ nea edi mu ankasa.’—2 Petro 3:11, 12.

Ɔkasafo a ɔto so abien wɔ ɔkasa a wɔakyekyɛm no mu no kaa sɛnea Mika kasa tiaa Yuda akannifo no ho asɛm. Wɔhyɛɛ ahiafo, nnipa a wonni ahobammɔ, no so. Nanso Mika san ka siei sɛ nokware som bedi nkonim. (Mika 4:1-5) Esiane sɛ Yehowa honhom kronkron kanyan yɛn nti, yɛasi yɛn bo sɛ yɛbɛka anidaso asɛm a ɛma abotɔyam yi akyerɛ afoforo. Na sɛ ɔyare anaa nneɛma foforo bi siw yɛn kwan ɛ? Ɔkasafo a ɔto so abiɛsa no kae sɛ: “Yehowa ahwehwɛde nyɛ den, na yebetumi adu ho.” Ɔkɔɔ so susuw Mika 6:8 no afã ahorow no ho, baabi a yɛkenkan eyi no: ‘Dɛn na Yehowa hwehwɛ wo hɔ sen sɛ wobɛyɛ adetrenee na woadɔ ayamye na wode ahobrɛase ne wo Nyankopɔn anantew?’

Esiane sɛ wiase no brasɛe betumi anya Kristofo so nkɛntɛnso nti, yɛn nyinaa nyaa ɔkasa a wɔato din “Kura Ahotew Mu Denam Wo Koma Ho Ban a Wobɛbɔ So” no mu mfaso. Sɛ nhwɛso no, yɛn ho a yɛbɛma atew no bɛboa ma yɛn aware ayɛ anigye. Sɛ́ Kristofo no, ɛnsɛ sɛ yesusuw ho mpo da sɛ yɛde yɛn ho bɛhyɛ nna mu ɔbrasɛe mu.—1 Korintofo 6:18.

Ɔkasa a n’asɛmti ne “Hwɛ Yiye Wɔ Nnaadaa Ho” no daa no adi sɛ nyansa wom sɛ yebebu nsɛm a ɛnyɛ nokware, na ɛyɛ atoro ankasa, a awaefo keka no sɛ awuduru. (Kolosefo 2:8) Saa ara na ɛnsɛ sɛ yɛdaadaa yɛn ho susuw sɛ yebetumi adi yɛn akɔnnɔ bɔne akyi a yentwa so aba bɔne.

Ɔkasa a ɛde da a edi kan no baa awiei no asɛmti ne “Som Nokware Nyankopɔn Koro No.” Bere a wiase tebea ahorow mu kɔ so yɛ den no, hwɛ akomatɔyam a ɛyɛ sɛ yebehu sɛ ɛrenkyɛ na Yehowa de ne trenee wiase foforo no aba! Henanom na wɔbɛtra mu? Wɔn a  wɔsom Yehowa no nkutoo. Nea ɛbɛboa ma yɛne yɛn mma, ne yɛn Bible asuafo adu saa botae yi ho no, ɔkasafo no yii adesua nhoma foforo, Som Nokware Nyankopɔn Koro No, adi. Hwɛ sɛnea yɛn ani gyei sɛ yɛn nsa kaa saa nhoma no!

Da a Ɛto So Abien no Sii Nsi a Yɛbɛyɛ Wɔ Papayɛ Ho So Dua

Ná nhyiam no da a ɛto so abien no asɛmti ne “Yɛ Nsi Wɔ Papayɛ Ho.” (1 Petro 3:13) Ɔkasafo a odii kan no susuw Bible kyerɛwsɛm ma ɛda no ho. Osii so dua sɛ daa asɛm no a yebesusuw ho daa wɔ ɔkwan a etu mpɔn so no bɛma yɛayɛ nsi kɛse.

Nea edii ɛno akyi ne ɔkasa a wɔakyekyɛm, “Ahenni Adawurubɔfo a Wɔkamfo Wɔn Som.” Ɔfã a edi kan no sii hia a ehia sɛ yekura Onyankopɔn Asɛm mu pɛpɛɛpɛ so dua. (2 Timoteo 2:15) Bible no a yɛde di dwuma ɔkwampa so no ‘de tumi’ ba nkurɔfo asetram. (Hebrifo 4:12) Ɛsɛ sɛ yɛtwe nkurɔfo adwene kɔ Bible no so na yɛkyerɛkyerɛ nsɛm mu ma ɛtɔ asom. Ɔkasa a wɔakyekyɛm no fã a ɛto so abien no hyɛɛ yɛn nkuran sɛ yɛnsan nkɔ anigyefo nkyɛn bere nyinaa. (1 Korintofo 3:6) Ahosiesie ne akokoduru ho hia na ama yɛasan akɔ wɔn a wɔkyerɛɛ anigye nyinaa nkyɛn ntɛmpa ara. Ɔfã a ɛto so abiɛsa no kamfo kyerɛe sɛ yemmu obiara a yehyia no wɔ asɛnka mu no sɛ obi a obetumi abɛyɛ osuani, na ɛdaa no adi sɛ Bible adesua a yebefi ase bere a edi kan a yɛkɔ hɔ no betumi ama yɛanya anigye aboa ankorankoro ma wɔabɛyɛ asuafo.

Ná ɔkasa a edi hɔ no asɛmti ne “Nea Enti a ‘Ɛsɛ sɛ Wobɔ Mpae Daa.’” Bible  no tu Kristofo fo sɛ wɔnkɔ Onyankopɔn nkyɛn nkɔhwehwɛ akwankyerɛ wɔ asetra afã nyinaa mu. Ɛsɛ sɛ yegye bere ma kokoam mpaebɔ. Afei nso, ɛsɛ sɛ yɛbɔ mpae daa efisɛ ebia na Yehowa bɛma yɛakɔ so abɔ mpae akosi bere bi ansa na wadi yɛn abisade ho dwuma.—Yakobo 4:8.

Ɔkasa a n’asɛmti ne “Honhom Fam Nkɔmmɔbɔ Hyɛ Den” no hyɛɛ yɛn nkuran sɛ yɛmfa kasa ho akyɛde a yɛwɔ no nni dwuma mfa mmoa yɛn ankasa yɛn ho ne afoforo. (Filipifo 4:8) Ehia sɛ awarefo ne wɔn mma bɔ honhom fam nkɔmmɔ daa. Sɛ eyi betumi ayɛ yiye a, ɛsɛ sɛ anyɛ yiye koraa no mmusua bɔ mmɔden sɛ wɔbɛbom adidi pɛnkoro da biara, na ama wɔanya kwan abɔ nkɔmmɔ a ɛhyɛ den.

Anɔpa dwumadi no de ɔkasa a ɛka koma, “Sɛnea Ahosohyira ne Asubɔ Ma Yenya Nkwagye,” na ɛbaa awiei. Ná asubɔfo no anya nimdeɛ, akyerɛ nimdeɛ no mu gyidi, anu wɔn ho, adan afi wɔn akwammɔne ho, ahyira wɔn ho so ama Onyankopɔn. Ɔkasafo no kae sɛ, wɔ wɔn asubɔ akyi no, ɛsɛ sɛ wɔkɔ so nyin wɔ honhom fam na wokura wɔn nsiyɛ ne abrabɔ pa mu.—Filipifo 2:15, 16.

Saa awia no, wosii nsɛm atitiriw abien so dua wɔ ɔkasa a wɔato din “Ma W’ani Nna Hɔ, na Kwati Akɛsesɛm” no mu. Yɛn ani a yɛbɛma ada hɔ no kyerɛ sɛ yebenya yɛn sintɔ ahorow ne yɛn gyinabea wɔ Onyankopɔn anim ho adwene a ɛfata. Anidahɔ boa ma ‘yɛkwati akɛsesɛm’—yɛde adwene si Onyankopɔn Ahenni so, ɛnyɛ honam fam nneɛma. Sɛ yɛyɛ eyi a, ɛho nhia sɛ yebedwennwen, efisɛ Yehowa bɛma yɛn nsa aka yɛn ahiade.—Mateo 6:22-24, 33, 34.

Ɔkasafo a odi hɔ no kyerɛɛ nea enti a ɛsɛ sɛ ‘Yenya Yehowa Mu Ahotoso Koraa Wɔ Ahohia Bere Mu.’ Yɛbɛyɛ dɛn atumi agyina nneɛma te sɛ yɛn ankasa sintɔ ahorow ne sikasɛm mu ahokyere anaa yare ano? Momma yemmisa Yehowa hɔ nyansa na yɛnhwehwɛ mmoa mfi afoforo hɔ. Sɛ́ anka yɛbɛma ehu anaa abasamtu adi yɛn so no, ɛsɛ sɛ yenya Onyankopɔn mu ahotoso koraa denam N’asɛm a yɛbɛkenkan so.—Romafo 8:35-39.

Ná ɔkasa a wɔakyekyɛm a etwa to wɔ nhyiam no mu no asɛmti ne “Wɔnam Sɔhwɛ Ahorow So Sɔ Yɛn Gyidi Hwɛ.” Ɔfã a edi kan no kaee yɛn sɛ nokware Kristofo nyinaa hyia ɔtaa. Ɛyɛ adanse ma afoforo, ɛhyɛ yɛn gyidi den, na ɛma yenya hokwan de da yɛn nokwaredi ma Onyankopɔn no adi. Ɛwom sɛ yɛmmoapa mfa yɛn nkwa nto asiane mu de, nanso yɛremfa biribi a ennyina Kyerɛwnsɛm so nni dwuma mfa nkwati ɔtaa.—1 Petro 3:16.

Ɔkasafo a ɔto so abien wɔ ɔkasa a wɔakyekyɛm yi mu no dii nsɛmmisa a ɛfa ɔfã biara a  yenni ho no ho dwuma. Ná tete Kristofo no nkyi akodi de, nanso wohui sɛ Onyankopɔn nkutoo na ɛsɛ sɛ wodi no nokware. Saa ara na nnɛ, Yehowa Adansefo kura nnyinasosɛm yi mu pintinn: ‘Monyɛ wiase no fã.’ (Yohane 15:19) Esiane sɛ ɔfã biara a yenni no ho sɔhwɛ betumi asɔre ntɛm nti, ɛsɛ sɛ mmusua gye bere susuw Bible akwankyerɛ a ɛfa asɛm yi ho no ho. Sɛnea ɔkasa a etwa to wɔ ɔkasa a wɔakyekyɛm yi mu daa no adi no, ɛnyɛ Satan botae ankasa ne sɛ obekum yɛn, na mmom sɛ ɔbɛhyɛ yɛn ma yɛagyae yɛn nokwaredi mu. Sɛ yɛde nokwaredi gyina fɛwdi, ɔbrasɛe ho nhyɛso, nkate fam yawdi, ne nyarewa ahorow ano a, yɛde ayeyi brɛ Yehowa.

Ná nsato a ɛyɛ anigye, “Bɛn Yehowa,” no ne ɔkasa a etwa to wɔ da no mu no asɛmti. Yehowa su atitiriw no a yehu no twe yɛn bɛn no. Ɔde ne tumi a enni ano no di dwuma bɔ ne nkurɔfo ho ban wɔ honhom fam titiriw. N’atɛntrenee mma ɔnyɛ katee, na mmom ɛka no ma ɔma obiara a odi asɛntrenee no nya nkwa a enni awiei. Onyankopɔn nyansa da adi wɔ ɔkwan a ɔde nnipa a wɔnyɛ pɛ dii dwuma kyerɛw Bible no mu. Ne su a ɛyɛ anigye sen biara ne ɔdɔ, a ɛkaa no ma ɔyɛɛ nsiesiei de gyee adesamma nkwa denam Yesu Kristo so no. (Yohane 3:16) Ɔkasafo no de dwumadi no baa awiei denam nhoma foforo a ɛka koma, Bɛn Yehowa, a oyii no adi no so.

Da a Ɛto So Abiɛsa no Twee Adwene Sii Nsi a Yɛbɛyɛ Wɔ Nnwuma Pa Ho So

Ná nhyiam no da a ɛto so abiɛsa no asɛmti ne “Nnipa a Wɔyɛ Nsi Wɔ Nnwuma Pa Ho.” (Tito 2:14) Ɛda no fii ase wɔ ɔkwan a ɛyɛ anigye so denam abusua bi a wosusuw daa asɛm no ho so. Ɔkasa a edii hɔ no asɛmti ne “So Yehowa na Wode Wo Ho To No So?” Amanaman  no ahwere wɔn ahotoso denam wɔn ho a wɔde to wɔn ankasa nyansa ne wɔn ahoɔden so no so. Nanso, nea ɛne no bɔ abira no, Yehowa asomfo de akokoduru ne anigye de wɔn ho to ne so ɛmfa ho ɔhaw ahorow no.—Dwom 46:1-3, 7-11.

Ɔfã a wɔato din “Mmabun—Munnyina Yehowa Ahyehyɛde no So Nhyehyɛ Mo Daakye” no dii asɛmmisa yi ho dwuma: Ɔkwan bɛn so na ɔbabun betumi anya nea eye sen biara afi n’asetra mu? Sikapɛ, honam fam nneɛma akyidi, ne edin rentumi mma onnya eyi. Yɛn Bɔfo no fi ɔdɔ mu hyɛ mmabun nkuran sɛ wɔnkae no bere a wɔda so yɛ mmabun no. Ɔkasafo no bisabisaa ebinom a wɔyeree wɔn ho wɔ Kristofo adwuma mu bere a na wɔyɛ mmabun no nsɛm, na yetumi huu anigye a na wɔwɔ no. Na hwɛ sɛnea ɛyɛɛ mfaso sɛ yɛn nsa kaa kratawa foforo a wɔato din Mmabun—Dɛn na Mode Mo Asetra Bɛyɛ?, a wɔasiesie na aboa mmabun a wɔyɛ Adansefo ma wɔato fapem ama daakye a enni awiei wɔ Yehowa ahyehyɛde mu no!

Nea edii hɔ ne Bible drama a ɛka koma a n’asɛmti ne “Gyina Pintinn Wɔ Mmere a Enye Mu.” Ɛkaa Yeremia adwuma a ɔyɛe fi ne mmabunbere mu kosi Yerusalem sɛe a ɔde nsiyɛ hyɛɛ ho nkɔm no ho asɛm. Yeremia tee nka sɛ ɔmfata mma adwuma no, nanso ɔyɛɛ adwuma no wɔ ɔsɔretia mu, na Yehowa twitwa gyee no.—Yeremia 1:8, 18, 19.

Ɔkasa a edii drama no akyi no asɛmti ne “Yɛ sɛ Yeremia—Fa Akokoduru Bɔ Onyankopɔn Asɛm No Dawuru.” Ahenni adawurubɔfo a wɔwɔ hɔ nnɛ no titiriw na wɔde ani si wɔn so keka atosɛm fa wɔn ho sɛe wɔn din. (Dwom 109:1-3) Nanso, te sɛ Yeremia no, yebetumi agyina abasamtu ano denam Yehowa Asɛm ho anigye a yɛbɛkyerɛ so. Na yɛwɔ ahotoso sɛ wɔn a wɔne yɛn di asi no bedi nkogu.

Ná baguam ɔkasa a wɔato din ‘Wiase Yi Su Resakra’ no yɛ ne bere mu de ankasa. Nsakrae akɛse akɔ so wɔ yɛn bere yi so. Bible no ka siei sɛ tebea horow, te sɛ “asomdwoe” a wobesu afrɛ, no bɛkɔ akowie Onyankopɔn atemmuda a ɛyɛ hu no mu. (1 Tesalonikafo 5:3) Ɛde nsakrae a ɛyɛ anigye bɛba—akodi, nsɛmmɔnedi, basabasayɛ, ne yare nyinaa bɛba awiei. Sɛ́ anka yɛde yɛn ho bɛto nneɛma nhyehyɛe yi so no, ɛnnɛ ne bere a ɛsɛ sɛ yɛde onyamesom pa tra ase na yekura abrabɔ a ɛho tew mu.

Nea edii Ɔwɛn-Aban adesua ma dapɛn no a wɔbɔɔ no mua akyi ne nhyiam no kasa a etwa to a n’asɛmti ne “Monyɛ Nnwuma Pa Pii sɛ Ahenni Adawurubɔfo a Wɔyɛ Nsi.” Ɔkasafo no kyerɛɛ sɛnea dwumadi no ahyɛ yɛn den wɔ honhom fam no, na ɔhyɛɛ yɛn nkuran sɛ yɛmfa yɛn ho nto Yehowa so. Awiei koraa no, wɔhyɛɛ yɛn nkuran sɛ yɛnyɛ Onyankopɔn Ahenni adawurubɔfo a wɔn ho tew, wɔwɔ dɔ, na wɔyɛ nsi.—1 Petro 2:12.

Akyinnye biara nni ho sɛ yɛde honhom a ɛte sɛ nea Yehowa asomfo a wɔtraa ase Nehemia bere so daa no adi no bi na ɛsan kɔɔ fie a na yɛredi honhom fam nhyira horow a yɛn nsa kae wɔ “Ahenni Adawurubɔfo a Wɔyɛ Nsi” Ɔmantam Nhyiam Ahorow ase no ho ahurusi. (Nehemia 8:12) So nhyiam a ɛka koma yi mmaa wunnyaa anigye ne akokoduru a wode bɛkɔ so asom sɛ Ahenni ɔdawurubɔfo a ɔyɛ nsi?

[Adaka/Mfonini wɔ kratafa 23]

Adesua Nhoma Foforo!

Bere a nhyiam no da a edi kan reba awiei no, nhyiamfo no ani gyei sɛ woyii nhoma foforo, Som Nokware Nyankopɔn Koro No, adi. Wɔasiesie nhoma yi na yɛne wɔn a wɔasua Nimdeɛ a Ɛde Kɔ Daa Nkwa Mu nhoma no awie no asua, na akyinnye biara nni ho sɛ ɛbɛhyɛ wɔn a ‘wɔpɛ daa nkwa’ no gyidi den.—Asomafo no Nnwuma 13:48.

[Asɛm Fibea]

Image on book cover: U.S. Navy photo

[Adaka/Mfonini wɔ kratafa 24]

Mmoa a Ɛbɛma Yɛabɛn Onyankopɔn

Ɔkasafo a na otwa to wɔ nhyiam no da a ɛto so abien no bɔɔ amanneɛ sɛ wɔayi nhoma foforo, Bɛn Yehowa, adi. Ekura afã atitiriw anan, na emu biara ka tumi, atɛntrenee, nyansa, ne ɔdɔ, Yehowa su atitiriw no, biako ho asɛm. Nhoma no fã biara kura eti a ɛkyerɛ sɛnea Yesu Kristo de Onyankopɔn su horow a wɔda no adi ho nhwɛso a edi mu mae. Nhoma yi atirimpɔw titiriw ne sɛ ɛbɛboa yɛne yɛn Bible asuafo ma yɛne Yehowa Nyankopɔn anya abusuabɔ pa a emu yɛ den.

[Adaka/Mfonini wɔ kratafa 26]

Honhom Fam Akwankyerɛ Ma Mmabun

Woyii kratawa titiriw a wɔato din Mmabun—Dɛn na Mode Mo Asetra Bɛyɛ? adi wɔ nhyiam no da a ɛto so abiɛsa no. Saa kratawa yi a wɔasiesie na aboa Adansefo mmofra ma wɔasisi wɔn daakye ho gyinae pa no de afotu a egyina Kyerɛwnsɛm so ma fa sɛnea wɔbɛhyehyɛ adwuma a ɛtra hɔ daa wɔ Yehowa som mu ho.