Wo Gyidi Yɛ Den Dɛn?
Wo Gyidi Yɛ Den Dɛn?
‘Ɛyɛ mo gyidi na mode gyina hɔ.’—2 KORINTOFO 1:24.
1, 2. Dɛn nti na ɛsɛ sɛ yenya gyidi, na ɔkwan bɛn so na emu betumi ayɛ den?
YEHOWA asomfo nim sɛ ɛsɛ sɛ wonya gyidi. Nokwarem no, ‘sɛ gyidi nnim a, obi ntumi nsɔ Onyankopɔn ani.’ (Hebrifo 11:6) Enti, yefi nyansam bɔ mpae srɛ honhom kronkron ne gyidi a ɛyɛ honhom no aba a ɛso bi nni no bi. (Luka 11:13; Galatifo 5:22, 23) Mfɛfo gyidifo gyidi a yebesuasua betumi ahyɛ yɛn nso yɛn gyidi den.—2 Timoteo 1:5; Hebrifo 13:7.
2 Sɛ yɛkɔ so nantew ɔkwan a Onyankopɔn Asɛm abɔ ato hɔ ama Kristofo nyinaa no so a, yɛn gyidi mu bɛyɛ den kɛse. Sɛ yɛkenkan Bible da biara na yɛde nhoma ahorow a “ofiepanyin nokwafo” no de ma no sua Kyerɛwnsɛm no a, ebetumi ama yɛanya gyidi kɛse. (Luka 12:42-44; Yosua 1:7, 8) Yenya nkuranhyɛ denam gyidi a yɛn mu biara da no adi wɔ Kristofo nhyiam, amansin, ne amantam nhyiam a yɛkɔ daa so. (Romafo 1:11, 12; Hebrifo 10:24, 25) Sɛ yɛkasa kyerɛ afoforo wɔ asɛnka mu a, ɛhyɛ yɛn gyidi den.—Dwom 145:10-13; Romafo 10:11-15.
3. Ɛdefa gyidi ho no, mmoa bɛn na yenya fi Kristofo mpanyimfo a wɔwɔ dɔ hɔ?
3 Sɛ Kristofo mpanyimfo a wɔwɔ dɔ de Kyerɛwnsɛm mu afotu ne nkuranhyɛ ma yɛn a, wɔboa yɛn ma yɛn gyidi yɛ den. Wɔwɔ su a ɔsomafo Paulo a ɔkaa nea edi hɔ yi kyerɛɛ Korintofo no wɔ no bi: ‘Yɛyɛ mo anigye ho yɔnko adwumayɛfo, efisɛ ɛyɛ mo gyidi na mode gyina hɔ.’ (2 Korintofo 1:23, 24) Nkyerɛase foforo kenkan sɛ: “Yɛne mo reyɛ adwuma ama mo ani agye, efisɛ mo gyidi yɛ den.” (Contemporary English Version) Treneefo tra ase wɔ gyidi mu. Nokwarem no, obi foforo biara ntumi nnya gyidi mma yɛn anaasɛ ɔmma yentumi nyɛ mudi mu kurafo anokwafo. Wɔ eyi mu no, ‘ɛsɛ sɛ obiara soa n’ankasa n’adesoa.’—Galatifo 3:11; 6:5.
4. Ɔkwan bɛn so na Onyankopɔn asomfo anokwafo ho nsɛm a ɛwɔ Kyerɛwnsɛm mu no betumi aboa ahyɛ yɛn gyidi den?
4 Wɔn a na wɔwɔ gyidi ho nsɛm pii wɔ Kyerɛwnsɛm no mu. Yebetumi ahu nneyɛe pa pii a wɔdaa no adi, na so yenim gyidi a wɔdaa no adi wɔ wɔn da biara da asetram, a ebia wɔyɛɛ saa bere tenteenten no? Afei, susuw a yebesusuw sɛnea wɔdaa saa aba no adi wɔ tebea horow a ɛte sɛ yɛn de mu ho no betumi aboa yɛn na ahyɛ yɛn gyidi den.
Gyidi Ma Yenya Akokoduru
5. Adanse bɛn na ɛwɔ Kyerɛwnsɛm mu a ɛkyerɛ sɛ gyidi hyɛ yɛn den ma yɛka Onyankopɔn asɛm akokoduru so?
5 Gyidi hyɛ yɛn den ma yɛde akokoduru ka Onyankopɔn asɛm. Henok de akokoduru kaa Onyankopɔn atemmu ho asɛm. Ɔkae sɛ: “Hwɛ, [Yehowa, NW] ne n’ahotefo mpempem reba abebu wɔn nyinaa atɛn, na wayi wɔn mu amumɔyɛfo nyinaa ntɛn, wɔn amumɔyɛde a wɔyɛe nyinaa ne wɔn nsɛm a ɛyɛ den a nnebɔneyɛfo amumɔyɛfo no kae de tiaa no nyinaa ho.” (Yuda 14, 15) Akyinnye biara nni ho sɛ bere a Henok atamfo a wonsuro Onyankopɔn tee nsɛm a ɛte saa no, wɔpɛe sɛ wokum no. Nanso, ɔde gyidi kasae akokoduru so, na Onyankopɔn “faa no kɔe” denam wu a ɔma owui so, sɛnea ɛbɛyɛ a na ɔrenhu owu yaw. (Genesis 5:24; Hebrifo 11:5) Yenhu anwonwade a ɛtete saa, nanso Yehowa bua yɛn mpaebɔ sɛnea ɛbɛyɛ a yebetumi de gyidi ne akokoduru aka n’asɛm no.—Asomafo no Nnwuma 4:24-31.
6. Ɔkwan bɛn so na gyidi ne akokoduru a Onyankopɔn de ma no boaa Noa?
6 Gyidi na Noa de “siesiee adaka maa ne fi nkwagye.” (Hebrifo 11:7; Genesis 6:13-22) Na Noa yɛ “treneekafo” nso, na ɔkaa Onyankopɔn kɔkɔbɔ nsɛm kyerɛɛ ne bere sofo akokoduru so. (2 Petro 2:5) Ɛbɛyɛ sɛ wodii n’asɛm a na ɛfa Nsuyiri a na ɛreba ho no ho fɛw, sɛnea ebinom di fɛw bere a yɛde Kyerɛwnsɛm si so dua kyerɛ wɔn sɛ ɛrenkyɛ na wɔasɛe mprempren nneɛma nhyehyɛe no. (2 Petro 3:3-12) Nanso, te sɛ Henok ne Noa no, yebetumi aka asɛm a ɛte saa esiane gyidi ne akokoduru a Onyankopɔn ama yɛanya nti.
Gyidi Ma Yenya Abodwokyɛre
7. Ɔkwan bɛn so na Abraham ne afoforo daa gyidi ne abodwokyɛre adi?
7 Yehia gyidi ne abodwokyɛre, titiriw bere a yɛretwɛn nhyehyɛe bɔne yi awiei no. Wɔn a ‘wɔnam gyidi ne abodwokyɛre so benya bɔhyɛ no’ bi ne tete agya Abraham a na osuro Onyankopɔn no. (Hebrifo 6:11, 12) Gyidi mu na ofii Ur, gyaw mu nneɛma pa nyinaa hɔ, kɔyɛɛ ɔhɔho wɔ ananafo asase a na Onyankopɔn de ahyɛ no bɔ no so. Ná Isak ne Yakob yɛ bɔhyɛ koro no ara difo bi. Nanso, “gyidi so na eyinom nyinaa wuwui a wɔn nsa anka bɔhyɛ no.” Gyidi mu na ‘wɔhwehwɛɛ kurow a eye kyɛn so a ɛne ɔsoro de no.’ Sɛnea ɛte no, Onyankopɔn ‘asiesie kurow bi ama wɔn.’ (Hebrifo 11:8-16) Yiw, Abraham, Isak, ne Yakob—ne wɔn yerenom a wosuro Onyankopɔn no—de boasetɔ twɛnee Onyankopɔn soro Ahenni a emu na wobenyan wɔn ma wɔabɛtra asase so no.
8. Abraham, Isak, ne Yakob daa abodwokyɛre ne gyidi adi ɛmfa ho dɛn?
8 Abraham, Isak, ne Yakob ampa abaw. Wɔannya hokwan anni Bɔhyɛ Asase no so, na wɔanhu sɛ amanaman nyinaa nam Abraham aseni no so ahyira wɔn ho. (Genesis 15:5-7; 22:15-18) Ɛwom sɛ na ‘kurow a ne kyekyefo ne Onyankopɔn’ no remma kosi sɛ mfehaha pii betwam de, nanso saa mmarima yi kɔɔ so daa gyidi ne abodwokyɛre adi wɔ wɔn nkwa nna nyinaa mu. Nokwarem no, ɛsɛ sɛ yɛyɛ saa ara nnɛ bere a wɔde Mesia Ahenni no asi hɔ wɔ soro no.—Dwom 42:5, 11; 43:5.
Gyidi Ma Yenya Botae Ahorow a Ɛsen Biara
9. Nkɛntɛnso bɛn na gyidi wɔ wɔ botae ahorow so?
9 Tete agyanom anokwafo no ansuasua Kanaanfo asetra kwan a na aporɔw no, efisɛ na wɔwɔ botae ahorow a ɛkorɔn. Saa ara na gyidi ma yenya honhom fam botae ahorow a etumi ma yɛko tia twetwe a wiase a ɛda ɔbɔnefo Satan Ɔbonsam mu no bɛtwetwe yɛn no.—1 Yohane 2:15-17; 5:19.
10. Yɛyɛ dɛn hu sɛ Yosef dii botae a ɛsen wiase anuonyam koraa akyi?
10 Ɛdenam Onyankopɔn akwankyerɛ so no, Yakob ba Yosef hwɛɛ Misraim aduan so, nanso na ɛnyɛ ne botae ne sɛ ɔbɛyɛ onipa kɛse wɔ wiase yi mu. Esiane gyidi a na Yosef a wadi mfirihyia 110 wɔ wɔ Yehowa bɔhyɛ ahorow mu nti, ɔka kyerɛɛ ne nuanom sɛ: “Merewu, na Onyankopɔn bɛba abɛhwɛ mo ampa, na wabeyi mo afi asase yi so akɔ asase a ɔkaa ho ntam kyerɛɛ Abraham ne Isak ne Yakob no so.” Yosef kae sɛ wonsie no wɔ bɔhyɛ asase no so. Owui no, wɔhyɛɛ no aduru de no too adaka mu wɔ Misraim. Nanso bere a wogyee Israelfo fii Misraim nkoasom mu no, odiyifo Mose ma wɔfaa Yosef nnompe kosiei wɔ Bɔhyɛ Asase no so. (Genesis 50:22-26; Exodus 13:19) Ɛsɛ sɛ gyidi a ɛte sɛ Yosef de no kanyan yɛn ma yedi botae ahorow a ɛsen wiase anuonyam akyi.—1 Korintofo 7:29-31.
11. Ɔkwan bɛn so na Mose daa no adi sɛ na ɔwɔ honhom fam botae ahorow?
11 Mose ‘pawee sɛ ɔne Onyankopɔn man behu amane mmom kyɛn sɛ ɔbɛte bɔne mu dɛw nna tiaa bi’ na wayɛ Misrifo adehye abusua muni nhomanimfo. (Hebrifo 11:23-26; Asomafo no Nnwuma 7:20-22) Eyi ma ɔhweree wiase anuonyam ne ebia osie pa a anka obenya sɛ wɔde no bɛto adaka fɛfɛ bi mu asie no wɔ Misraim beae bi a agye din no. Nanso sɛ wɔde toto hokwan a ɛne sɛ ɔbɛyɛɛ ‘nokware Nyankopɔn no akoa,’ Mmara apam no ntamgyinafo, Yehowa diyifo, ne Bible kyerɛwfo no ho a, mfaso bɛn na anka ɛno bɛyɛ? (Esra 3:2) So wiase anuonyam ne yiyedi na wopɛ, anaasɛ gyidi ama woanya honhom fam botae ahorow a ɛkorɔn?
Gyidi Ma Yenya Asetra a Abotɔyam Wom
12. Nkɛntɛnso bɛn na gyidi nyae wɔ Rahab asetra so?
12 Ɛnyɛ botae ahorow a ɛsen biara nko na gyidi ma nnipa nya na mmom asetra a abotɔyam wom nso. Ɛbɛyɛ sɛ na Rahab a ofi Yeriko no te nka sɛ mfaso nni n’asetra sɛ aguaman no so. Nanso, hwɛ sɛnea ɛno sesae bere a ɔdaa gyidi adi no! ‘Gyidi nnwuma so na wɔnam buu no bem, sɛ ogyee Israelfo abɔfo no na ɔma wɔfaa ɔkwan foforo so kɔe,’ na amma wɔn atamfo Kanaanfo no nsa anka wɔn no. (Yakobo 2:24-26) Bere a Rahab gyee Yehowa toom sɛ nokware Nyankopɔn no, ɔdaa gyidi adi nso denam n’aguamammɔ a ogyaee no so. (Yosua 2:9-11; Hebrifo 11:30, 31) Ɔwaree Yehowa somfo, ɛnyɛ Kanaanni a onnye nni. (Deuteronomium 7:3, 4; 1 Korintofo 7:39) Rahab nyaa hokwan kɛse bɛyɛɛ Mesia no nanabea. (1 Beresosɛm 2:3-15; Rut 4:20-22; Mateo 1:5, 6) Te sɛ afoforo a wɔn mu bi agyae ɔbrasɛe bi no, obenya akatua foforo—owusɔre a obenya aba paradise asase so.
13. Ɔkwan bɛn so na Dawid ne Bat-Seba yɛɛ bɔne, nanso su bɛn na ɔdaa no adi?
13 Bere a Rahab gyaee n’asetra bɔne no, ɛda adi sɛ ɔkɔɔ so bɔɔ ɔbra pa. Nanso, ebinom a na wɔahyira wɔn nkwa so ama Onyankopɔn bere tenteenten no yɛɛ bɔne a anibere wom paa. Ɔhene Dawid ne Bat-Seba sɛee aware, na ɔma wokum ne kunu wɔ akono, na afei ɔfaa no sɛ ne yere. (2 Samuel 11:1-27) Bere a Dawid nuu ne ho wɔ awerɛhow kɛse mu no, ɔsrɛɛ Yehowa sɛ: “Nyi wo honhom kronkron mfi me so.” Dawid anhwere Onyankopɔn honhom no. Na ogye di sɛ Yehowa wɔ mmɔborohunu na ɔrempo “koma a abubu na apɛtɛw” wɔ bɔne ho no. (Dwom 51:11, 17; 103:10-14) Esiane gyidi nti, Dawid ne Bat-Seba nyaa hokwan bɛyɛɛ Mesia no nananom.—1 Beresosɛm 3:5; Mateo 1:6, 16; Luka 3:23, 31.
Gyidi a Wɔnam Awerɛhyem so Hyɛ no Den
14. Awerɛhyem bɛn na Gideon nyae, na ɔkwan bɛn so na asɛm yi betumi aka yɛn gyidi?
14 Ɛwom sɛ yɛnam gyidi mu de, nanso ɛtɔ mmere bi a yebehia Onyankopɔn mmoa ho awerɛhyem. Ná ɛte saa wɔ Ɔtemmufo Gideon, wɔn a “wɔnam gyidi so ko dii ahenni horow so nkonim” no mu biako no fam. (Hebrifo 11:32, 33) Bere a Midianfo ne wɔn a wɔne wɔn ayɛ apam bɛtow hyɛɛ Israel so no, Onyankopɔn honhom baa Gideon so. Bere a na ɔpɛ sɛ onya awerɛhyem sɛ Yehowa ka ne ho no, ɔde sɔhwɛ ahorow bi a na ɛfa oguan nhwi ho a na ɔde bɛhata awiporowbea anadwo ho adwene bae. Wɔ sɔhwɛ a edi kan no mu no, obosu fɔw oguan nhwi no nko ara, na fam woe. Wɔ sɔhwɛ a ɛto so abien no mu no, bosu no fɔw fam hɔ nko ara na amfɔw oguan nhwi no. Bere a saa awerɛhyem yi hyɛɛ Gideon gyidi den no, ɔde ahwɛyiye yɛɛ ade wɔ gyidi mu na odii Israel atamfo so nkonim. (Atemmufo 6:33-40; 7:19-25) Sɛ yɛhwehwɛ biribi ho awerɛhyem bere a yɛresi gyinae bi a, ɛnkyerɛ sɛ yenni gyidi. Sɛ yɛresisi gyinae na yɛhwehwɛ Bible ne Kristofo nhoma ahorow mu, na yɛbɔ mpae hwehwɛ honhom kronkron akwankyerɛ a, na yɛreda gyidi adi ankasa.—Romafo 8:26, 27.
15. Sɛ yesusuw Barak gyidi ho a, ɔkwan bɛn so na ebetumi aboa yɛn?
15 Awerɛhyem a ɛhyɛ nkuran hyɛɛ Ɔtemmufo Barak gyidi den. Odiyifobea Debora hyɛɛ no nkuran sɛ onni anim nnye Israelfo mfi Kanaanfo hene Yabin nhyɛso ase. Bere a na Barak wɔ gyidi ne awerɛhyem sɛ Onyankopɔn gyina n’akyi no, odii mmarima 10,000 a na wonni akode papa anim kodii ako dii Yabin asraafo a wɔdɔɔso koraa a na Sisera di wɔn anim no so nkonim. Debora ne Barak too anigye dwom de dii saa nkonimdi no ho ahurusi. (Atemmufo 4:1–5:31) Debora hyɛɛ Barak nkuran sɛ ɔnsom sɛ Israel kannifo a Onyankopɔn apaw no, na na ɔyɛ Yehowa asomfo a wɔnam gyidi so “kaa ananafo mpasua gui” no mu biako. (Hebrifo 11:34) Sɛ yɛretwentwɛn yɛn nan ase wɔ Yehowa som mu dwumadi bi a ɛyɛ den ho, na sɛ yesusuw sɛnea Onyankopɔn hyiraa Barak wɔ gyidi mu a ofi yɛɛ ade no ho a, ebetumi akanyan yɛn ma yɛayɛ ho biribi.
Gyidi De Asomdwoe Ba
16. Nhwɛso pa bɛn na Abraham yɛe wɔ asomdwoe a ɔhwehwɛe wɔ ɔne Lot asɛm no mu no mu?
16 Sɛnea gyidi boa yɛn ma yetumi yɛ Onyankopɔn som adwuma a ɛyɛ den no, saa ara na ɛde asomdwoe ne abotɔyam ba. Abraham a na n’ani afi no maa ne wɔfase Lot paw mmoa adidibea a eye sen biara no bere a wɔn mmoahwɛfo koe na ɛho behiae sɛ wɔtetew mu no. (Genesis 13:7-12) Ɛbɛyɛ sɛ Abraham bɔɔ mpae wɔ gyidi mu hwehwɛɛ Onyankopɔn mmoa a ɔde besiesie asɛm yi. Sɛ́ anka ɔde n’ankasa ahiade bedi kan no, osiesiee asɛm no asomdwoe mu. Sɛ akasakasa bi ba yɛne yɛn nua Kristoni bi ntam a, momma yɛmmɔ mpae wɔ gyidi mu mfa ‘nhwehwɛ asomdwoe,’ na yɛnkae Abraham nhwɛso a ɔdɔ wom no.—1 Petro 3:10-12.
17. Dɛn nti na yebetumi aka sɛ wosiesiee asɛm a ɛbae wɔ Paulo, Barnaba, ne Marko ntam no asomdwoe mu?
17 Susuw sɛnea Kristofo nnyinasosɛm a yɛde bedi dwuma gyidi mu no betumi aboa ma yɛahwehwɛ asomdwoe no ho. Bere a na Paulo rebefi n’asɛmpatrɛw akwantu a ɛto so abien ase no, Barnaba penee adwene a ɛne sɛ wɔnsan nkɔsra asafo ahorow a ɛwɔ Kipro ne Asia Kumaa no so. Nanso, na Barnaba pɛ sɛ ɔma ne nua Marko ka wɔn ho kɔ. Paulo ampene so efisɛ na Marko aguan agyaw wɔn wɔ Pamfilia. “Akasakasa a emu yɛ den” bae, na akyinnyegye yi ma wɔpaapae wɔn mu. Barnaba faa Marko kaa ne ho kɔɔ Kipro, na Paulo nso faa Silas kaa ne ho kɔɔ ‘Siria ne Kilikia kɔhyɛɛ asafo ahorow no den.’ (Asomafo no Nnwuma 15:36-41) Bere kɔɔ so no, ɛda adi sɛ wosiesiee akasakasa no, efisɛ na Marko ka Paulo ho wɔ Roma, na ɔsomafo no kaa ne ho asɛm pa. (Kolosefo 4:10; Filemon 23, 24) Bere a na Paulo da afiase wɔ Roma wɔ bɛyɛ afe 65 Y.B. no, ɔka kyerɛɛ Timoteo sɛ: “Fa Marko ka wo ho bra, na oye ma me ɔsom mu.” (2 Timoteo 4:11) Ɛda adi sɛ na Paulo de ɔne Barnaba ne Marko ntam abusuabɔ no ho asɛm akɔ ne gyidi mpaebɔ mu, na eyi ma wonyaa abotɔyam a ɛne “Onyankopɔn asomdwoe” wɔ abusuabɔ no.—Filipifo 4:6, 7.
18. Ɛda adi sɛ dɛn na esii wɔ Euodia ne Sintike ntam?
18 Nokwarem no, esiane sɛ yɛnyɛ pɛ nti “yɛn nyinaa fom nneɛma pii mu.” (Yakobo 3:2) Nsɛnnennen sɔree Kristofo mmea baanu bi a Paulo kyerɛw wɔn ho asɛm no ntam: “Mitu Euodia fo, na mitu Sintike nso fo sɛ wonnwen ade koro Awurade mu. . . . So wɔn mu abia, efisɛ wɔn na wɔkaa me ho peree asɛmpa no.” (Filipifo 4:1-3) Ɛda adi paa sɛ mmea a wosuro Onyankopɔn yi siesiee wɔn ntam asɛm asomdwoe mu denam afotu te sɛ nea wɔayɛ ho kyerɛwtohɔ wɔ Mateo 5:23, 24, a wɔde dii dwuma no so. Kyerɛwnsɛm mu nnyinasosɛm ahorow a yɛde bedi dwuma no bɛboa kɛse ma yɛanya asomdwoe nnɛ.
Gyidi Ma Yetumi Gyina
19. Tebea a emu yɛ den bɛn na antumi ansɛe Isak ne Rebeka gyidi?
19 Yɛnam gyidi so nso betumi agyina amanehunu ano. Ebia yɛahaw esiane sɛ yɛn abusua muni bi a wagye asubɔ ayɛ Onyankopɔn so asoɔden aware obi a onnye nni nti. (1 Korintofo 7:39) Isak ne Rebeka huu amane esiane sɛ wɔn ba Esau waree mmea a wonsuro Onyankopɔn nti. Ne yerenom Hetifo no ‘hyɛɛ Isak ne Rebeka awerɛhow’—araa ma Rebeka kae sɛ: “Het mmabea nti m’asetra afono me. Sɛ Yakob kɔware yere Het mmabea mu, sɛ eyinom, wɔ asase yi so mmabea mu a, nkwa yɛ dɛn na ɛma me?” (Genesis 26:34, 35; 27:46) Nanso, tebea a emu yɛ den yi antumi ansɛe Isak ne Rebeka gyidi. Ɛmmra sɛ sɛ ɛyɛ den ma yɛn sɛ yebegyina tebea horow a emu yɛ den ano a, yɛbɛkɔ so akura gyidi a emu yɛ den mu.
20. Gyidi ho nhwɛso ahorow bɛn na yenya wɔ Naomi ne Rut ho?
20 Ná okunafo Naomi a wabɔ aberewa no yɛ Yudani, na na onim sɛ ɛsɛ sɛ Yudafo bi wo mmabarima a wɔbɛyɛ Mesia no tete agyanom. Nanso, esiane sɛ na ne mmabarima no awuwu a na wonni mma, na ɔno nso atwa awo nti, na anidaso biara nni hɔ sɛ Mesia no betumi afa n’abusua so aba. Nanso, n’asew Rut a na ɔyɛ okunafo no waree Boas a na n’ani afi no woo ɔbabarima maa Boas, na Naomi bɛyɛɛ Yesu, Mesia no nanabea! (Genesis 49:10, 33; Rut 1:3-5; 4:13-22; Mateo 1:1, 5) Naomi ne Rut gyidi ma wotumi gyinaa amanehunu ano na wonyaa anigye. Sɛ yɛn nso yekura yɛn gyidi mu wɔ amanehunu mu a, yebenya anigye pii.
21. Dɛn na gyidi yɛ ma yɛn, na dɛn na ɛsɛ sɛ yesi yɛn bo sɛ yɛbɛyɛ?
21 Ɛwom sɛ yentumi nkyerɛ nea ɛbɛba yɛn so nnɛ anaa ɔkyena sɛ ankorankoro de, nanso yɛnam gyidi so betumi agyina ɔhaw biara ano. Gyidi ma yenya akokoduru ne abodwokyɛre. Ɛma yenya botae ahorow a ɛsen biara ne asetra a abotɔyam wom. Gyidi ma yɛne afoforo nya abusuabɔ pa na ɛma yetumi gyina amanehunu ano. Enti ɛmmra sɛ yɛbɛyɛ “wɔn a wogye di kɔ ɔkra nkwagye mu.” (Hebrifo 10:39) Momma yɛnkɔ so nnya Yehowa, yɛn Nyankopɔn a ɔwɔ dɔ no ahoɔden mu gyidi a ɛyɛ den mfa nhyɛ no anuonyam.
Wubebua Dɛn?
• Kyerɛwnsɛm mu adanse bɛn na ɛwɔ hɔ a ɛkyerɛ sɛ gyidi betumi ama yɛanya akokoduru?
• Dɛn nti na yebetumi aka sɛ gyidi ma yenya asetra a abotɔyam wom?
• Ɔkwan bɛn so na gyidi de asomdwoe ba?
• Adanse bɛn na ɛwɔ hɔ a ɛkyerɛ sɛ gyidi tumi ma yegyina amanehunu ano?
[Adesua no ho Nsɛmmisa]
[Mfonini ahorow wɔ kratafa 16]
Gyidi maa Noa ne Henok nyaa akokoduru de kaa Yehowa asɛm
[Mfonini ahorow wɔ kratafa 17]
Gyidi a ɛte sɛ Mose de no kanyan yɛn ma yedi honhom fam botae ahorow akyi
[Mfonini ahorow wɔ kratafa 18]
Onyankopɔn mmoa ho awerɛhyem hyɛɛ Barak, Debora, ne Gideon gyidi den