Ɛhe Na Yebetumi Anya Nokware Awerɛkyekye?
Ɛhe Na Yebetumi Anya Nokware Awerɛkyekye?
‘Yɛn Awurade Yesu Kristo Nyankopɔn ne N’agya no kyekye yɛn werɛ yɛn ahohia nyinaa mu.’—2 KORINTOFO 1:3, 4.
1. Tebea horow bɛn na ebetumi ama nkurɔfo ate nka kɛse sɛ wohia awerɛkyekye?
YARE a ɛma nnipa bubu betumi ama obi ate nka sɛ n’asetra agyigya. Asasewosow, ahum, ne ɔkɔm ma nkurɔfo di hia buruburoo. Ɔko betumi ama obi abusuafo awuwu, ebetumi asɛe nkurɔfo afie, anaasɛ ebetumi ama afiewuranom aguan agyaw wɔn agyapade hɔ. Atɛnkyea betumi ama nkurɔfo ate nka sɛ baabiara nni hɔ a wobetumi adan akɔhwehwɛ ahotɔ. Wɔn a ɔhaw a ɛte saa to wɔn no hia awerɛkyekye denneennen. Ɛhe na wobetumi anya awerɛkyekye?
2. Dɛn nti na awerɛkyekye a Yehowa de ma no da nsow?
2 Ankorankoro ne ahyehyɛde ahorow bi bɔ mmɔden sɛ wɔde awerɛkyekye bɛma. Nsɛm a ɛma awerɛkyekye yɛ biribi a wɔkyerɛ ho anisɔ. Honam fam mmoa a wɔde ma nkurɔfo wɔ ahokyere mu no tumi di wɔn ahiade ho dwuma bere tiaa bi. Nanso Yehowa, nokware Nyankopɔn, no nkutoo na obetumi ayi ɔhaw no nyinaa afi hɔ na ɔde mmoa a ehia na amma ɔhaw a ɛte saa ansi bio no ama. Bible ka ne ho asɛm sɛ: “Ayeyi nka yɛn Awurade Yesu Kristo Nyankopɔn ne n’agya a ɔyɛ mmɔborohunu agya ne awerɛkyekye nyinaa Nyankopɔn a ɔkyekye yɛn werɛ yɛn ahohia nyinaa mu, na yɛatumi afa awerɛkyekye a Onyankopɔn de kyekye yɛn werɛ no so akyekye wɔn a wɔwɔ ahohia biara mu werɛ.” (2 Korintofo 1:3, 4) Ɔkwan bɛn so na Yehowa kyekye yɛn werɛ?
Nea Ɛde Ɔhaw no Ba a Yebedi Ho Dwuma
3. Ɔkwan bɛn so na awerɛkyekye a Onyankopɔn de ma no fi ase fi nea ɛde adesamma haw bae no so?
3 Adesamma abusua no nyinaa nyaa sintɔ esiane Adam bɔne nti, na ɛno na ɛde ɔhaw a enni ano a awiei koraa ekowie owu mu no aba. (Romafo 5:12) Nea ama tebea no asɛe kɛse koraa ne sɛ Satan Ɔbonsam ne “wi yi ase sodifo.” (Yohane 12:31; 1 Yohane 5:19) Yehowa anni tebea bɔne a adesamma wom no ho awerɛhow kɛkɛ. Ɔsomaa ne Ba a ɔwoo no koro no sɛ agyede de begyee adesamma, na Ɔka kyerɛɛ yɛn sɛ yebetumi ade yɛn ho afi Adam bɔne no ho bere a yɛkyerɛ Ne Ba no mu gyidi no. (Yohane 3:16; 1 Yohane 4:10) Onyankopɔn ka siei nso sɛ Yesu Kristo, a wɔde ɔsoro ne asase so tumi nyinaa ama no no, bɛsɛe Satan ne ne nneɛma nhyehyɛe bɔne no nyinaa.—Mateo 28:18; 1 Yohane 3:8; Adiyisɛm 6:2; 20:10.
4. (a) Dɛn na Yehowa de ama na ahyɛ ahotoso a yɛwɔ wɔ ne gye ho bɔhyɛ ahorow mu no mu den? (b) Ɔkwan bɛn so na Yehowa boa yɛn ma yehu bere a ogye no bɛba?
4 Nea ɛbɛyɛ na Onyankopɔn bɔhyɛ ahorow mu ahotoso a yɛwɔ no mu ayɛ den no, wakora adanse pii so a ɛkyerɛ sɛ nea ɔka biara bam. (Yosua 23:14) Wakora nea wayɛ a ɔnam so begye ne nkurɔfo afi ɔhaw mu, a nnipa fam no na ɛte sɛ nea entumi nyɛ yiye, no ho kyerɛwtohɔ so wɔ Bible no mu. (Exodus 14:4-31; 2 Ahene 18:13–19:37) Na Yehowa nam Yesu Kristo so ada no adi sɛ nea ɛka n’atirimpɔw ho ne sɛ ɔbɛsa nkurɔfo “ahoɔmmerɛw nyinaa,” na wanyan awufo mpo. (Mateo 9:35; 11:3-6) Bere bɛn na eyinom nyinaa bɛbam? Wɔ mmuaema mu no, Bible no ka nhyehyɛe dedaw yi nna a edi akyiri ansa na Onyankopɔn soro foforo ne asase foforo no aba no ho asɛm. Nsɛm a Yesu kae no abam pɛpɛɛpɛ wɔ yɛn mmere yi mu.—Mateo 24:3-14; 2 Timoteo 3:1-5.
Awerɛkyekye Ma Nnipa a Wɔwɔ Ahohia Mu
5. Bere a Yehowa rekyekye tete Israel werɛ no, dɛn na ɔtwee wɔn adwene sii so?
5 Yehu sɛnea Yehowa maa tete Israelfo no awerɛkyekye wɔ ahohia mmere mu no wɔ ɔkwan a ɔne wɔn dii nsɛm no mu. Ɔkaee wɔn Onyankopɔn ko a ɔyɛ. Eyi hyɛɛ ne bɔhyɛ ahorow mu ahotoso a wɔwɔ no mu den. Yehowa maa n’adiyifo de nsonsonoe ahorow a emu da hɔ a ɛda ɔno, sɛ nokware ne ateasefo Nyankopɔn no, ne ahoni a wontumi mmoa wɔn ankasa ho ne wɔn asomfo ntam no dii dwuma. (Yesaia 41:10; 46:1; Yeremia 10:2-15) Bere a na Yehowa reka akyerɛ Yesaia sɛ, “Monkyekye, monkyekye me man werɛ” no, ɔmaa ne diyifo no de mfatoho ne N’adebɔ nnwuma ho nsɛm dii dwuma de sii Yehowa kɛseyɛ sɛ nokware Nyankopɔn koro pɛ no so dua.—Yesaia 40:1-31.
6. Adanse bɛn na ɛtɔ mmere bi a, na Yehowa de ma de kyerɛ bere a obegye ne nkurɔfo?
6 Bere bi, Yehowa de awerɛkyekye mae denam bere pɔtee bi a na abɛn anaasɛ na ɛwɔ akyiri a ɔkyerɛe sɛ ɔde begye ne nkurɔfo no so. Bere soe sɛ obegye Israelfo a na wɔhyɛ wɔn so afi Misraim no, ɔka kyerɛɛ wɔn sɛ: “Mɛma ɔhaw biako aba Farao ne Misraim so bio, na ɛno akyi no, ɔbɛma moafi ha akɔ.” (Exodus 11:1) Bere a aman abiɛsa bi yɛɛ apam tow hyɛɛ Yuda so wɔ Ɔhene Yehosafat bere so no, Yehowa ka kyerɛɛ wɔn sɛ obetwitwa agye wɔn “ɔkyena.” (2 Beresosɛm 20:1-4, 14-17) Ɔkwan foforo so no, Yesaia dii kan yɛɛ gye a wobegye wɔn afi Babilon no ho kyerɛwtohɔ bɛyɛ mfirihyia 200, na wɔnam Yeremia so de ɛho nsɛm foforo mae bɛyɛ mfirihyia ɔha ansa na ogye no reba. Hwɛ nkuranhyɛ ara a na saa nkɔmhyɛ ahorow yi yɛ ma Onyankopɔn asomfo bere a wɔn gye bɛnee no!—Yesaia 44:26–45:3; Yeremia 25:11-14.
7. Dɛn na mpɛn pii no na wɔde ka ogye ho bɔhyɛ ahorow no ho, na ɔkwan bɛn so na eyi kaa agyidifo a na wɔwɔ Israel no?
7 Ɛsɛ sɛ yɛhyɛ no nsow sɛ na nsɛm a ɛfa Mesia no ho taa wɔ bɔhyɛ ahorow a ɛde awerɛkyekye brɛɛ Onyankopɔn nkurɔfo no mu. (Yesaia 53:1-12) Eyi de anidaso maa gyidifo wɔ awo ntoatoaso a edi hɔ no nyinaa mu bere a wohyiaa sɔhwɛ ahorow no. Wɔ Luka 2:25 no, yɛkenkan sɛ: “Hwɛ, ɔbarima bi wɔ Yerusalem a wɔfrɛ no Simeon; saa onipa yi teɛ, ɔfɛre ade, na ɔretwɛn Israel awerɛkyekye [nokwarem no, Mesia no ba no], na Honhom Kronkron wɔ no so.” Ná Simeon nim Mesia ho anidaso a wɔada no adi wɔ Kyerɛwnsɛm no mu no, na ne mmamu a ɔhwɛɛ kwan no nyaa n’asetra so nkɛntɛnso. Wante ɔkwan a ne nyinaa bɛfa so abam no ase, na n’ankasa antra ase anhu nkwagye a wɔkaa ho asɛm no mmamu, nanso n’ani gyei bere a ohuu Onii a Onyankopɔn ‘nam no so de nkwagye bɛba’ no.—Luka 2:30.
Awerɛkyekye a Wɔnam Kristo So De Ma
8. Ɔkwan bɛn so na wɔde mmoa a Yesu de mae no toto nea na nnipa pii susuw sɛ wohia no ho?
8 Bere a Yesu Kristo reyɛ n’asase so som adwuma no, ɛnyɛ bere nyinaa na ɔde mmoa a na nkurɔfo susuw sɛ wohia no mae. Ná ebinom hia Mesia a obegye wɔn afi Roma kɔndua a wɔmpɛ no ase. Nanso Yesu anka ɔman anidan ho asɛm; ɔka kyerɛɛ wɔn sɛ ‘wɔmfa Kaesare de mma Kaesare.’ (Mateo 22:21) Ná Onyankopɔn atirimpɔw no kɔ akyiri koraa sen nkurɔfo a amammui nniso bi hyɛ wɔn so a obegye wɔn no. Nkurɔfo no pɛe sɛ wosi Yesu hene, nanso ɔkae sɛ ɔde ‘ne kra bɛyɛ agyede ama nnipa pii.’ (Mateo 20:28; Yohane 6:15) Ná bere nsoe sɛ obedi hene, na na Yehowa na ɔde tumi no bɛma no sɛ onni ade, ɛnyɛ nnipakuw bi a nneɛma haw wɔn.
9. (a) Awerɛkyekyesɛm bɛn na Yesu bɔɔ ho dawuru no? (b) Ɔkwan bɛn so na Yesu kyerɛɛ hia a asɛm no hia ma tebea horow a na nkurɔfo no ankasa rehyia no? (d) Yesu som adwuma no too fapem maa dɛn?
9 Ná awerɛkyekye a Yesu de bae no gyina “Onyankopɔn Ahenni ho asɛmpa” no so. Eyi ne asɛm a Yesu bɔɔ ho dawuru baabiara a ɔkɔe. (Luka 4:43) Osii sɛnea na saa asɛm no ho hia ma ɔhaw a nkurɔfo hyia no da biara no so dua denam nea, sɛ́ Mesia Hene no, ɔbɛyɛ ama adesamma a ɔdaa no adi no so. Ɔmaa nnipa a na wɔrehu amane no nyaa ntease foforo a wobegyina so atra ase denam anifuraefo ne asotifo a ɔsaa wɔn yare (Mateo 12:22; Marko 10:51, 52), mmubuafo a ɔsaa wɔn yare (Marko 2:3-12), ne mfɛfo Israelfo a ɔtew wɔn ho fii yare bɔne ho (Luka 5:12, 13), ne yare ahorow a ɛhaw adwene a ogyee wɔn fii mu no so. (Marko 5:25-29) Ɔmaa mmusua a na wɔredi awerɛhow nyaa ahotɔ kɛse denam wɔn mma a onyanee wɔn fii awufo mu no so. (Luka 7:11-15; 8:49-56) Ɔdaa no adi sɛ ɔwɔ ahum a ano yɛ den so tumi na ɔmaa nnipadɔm aduan. (Marko 4:37-41; 8:2-9) Bio nso, Yesu kyerɛkyerɛɛ wɔn asetra mu nnyinasosɛm a ebetumi aboa wɔn ma wɔadi ɔhaw ahorow ho dwuma yiye na ama wɔanya trenee nniso a ɛwɔ Mesia no ase no ho anidaso. Enti bere a Yesu yɛɛ ne som adwuma no, ɛnyɛ sɛ ɔkyekyee wɔn a wɔde gyidi tiee no no werɛ nko, na mmom ɔtoo fapem a na wobegyina so ahyɛ nnipa nkuran mfe mpempem pii a na edi hɔ no nso.
10. Dɛn na Yesu afɔrebɔ no ma yetumi nya?
10 Bere a Yesu de ne desani nkwa too hɔ wɔ afɔrebɔ mu na wonyanee no kɔɔ ɔsoro asetra mu akyi bɛboro mfirihyia 60 no, honhom kaa ɔsomafo Yohane ma ɔkyerɛwee sɛ: “Me mma nkumaa, merekyerɛw eyinom mabrɛ mo, na moanyɛ bɔne. Na sɛ obi yɛ bɔne a, yɛwɔ okyigyinafo bi, agya no nkyɛn, ɔne ɔtreneeni Yesu Kristo. Na ɔno ne yɛn bɔne ho mpata, na ɛnyɛ yɛn de ho nko, na mmom wiase nyinaa de ho bi.” (1 Yohane 2:1, 2) Esiane Yesu desani afɔrebɔ a ɛyɛ pɛ no so mfaso horow nti, yenya awerɛkyekye kɛse. Yenim sɛ yebetumi anya bɔne fafiri, ahonim pa, Onyankopɔn ntam abusuabɔ pa, ne daa nkwa ho anidaso.—Yohane 14:6; Romafo 6:23; Hebrifo 9:24-28; 1 Petro 3:21.
Dwuma a Honhom Kronkron Di Sɛ Ɔwerɛkyekyefo
11. Awerɛkyekye ho nsiesiei foforo bɛn na Yesu hyɛɛ ho bɔ ansa na ɔrewu?
11 Bere a na Yesu ne n’asomafo no wɔ hɔ anwummere ansa na ɔrewu n’afɔrebɔ wu no, ɔkaa nsiesiei foforo a ne soro Agya no ayɛ a ɔde bɛkyekye wɔn werɛ no ho asɛm. Yesu kae sɛ: “Mebisa agya no, na wama mo okyigyinafo [ɔwerɛkyekyefo; Hela, pa·raʹkle·tos] foforo, na ɔne mo abɛtra daa: nokware honhom.” Yesu maa wɔn awerɛhyem sɛ: ‘Okyigyinafo a ɔne honhom kronkron no bɛkyerɛ mo nneɛma nyinaa, na ɔbɛkae mo nea maka mo nyinaa.’ (Yohane 14:16, 17, 26) Ɔkwan bɛn so na honhom kronkron no maa wonyaa awerɛkyekye ankasa?
12. Ɔkwan bɛn so na dwuma a honhom kronkron no dii sɛ biribi a ɛkaakae Yesu asuafo no aboa ma nnipa pii anya awerɛkyekye?
12 Ná asomafo no anya nkyerɛkyerɛ a emu dɔ afi Yesu hɔ. Nokwarem no, na wɔn werɛ remfi osuahu no da, nanso, so na wɔbɛkae nea ɔkae ankasa? So na wɔn werɛ befi nkyerɛkyerɛ atitiriw no esiane sɛ na wɔn adwene a wɔde bɛkae ade no tɔ sin nti? Yesu maa wɔn awerɛhyem sɛ honhom kronkron no ‘bɛkae wɔn nea waka akyerɛ wɔn nyinaa.’ Enti, wɔ Yesu wu akyi bɛyɛ mfirihyia awotwe no, Mateo tumi kyerɛw Asɛmpa a edi kan no, na emu no, ɔyɛɛ Yesu Bepɔw so Asɛnka a ɛma akomatɔyam, ne mfatoho ahorow a ɛfa Ahenni no ho, ne ne mmae ho sɛnkyerɛnne ho nkyerɛkyerɛmu a ɛkɔ akyiri ho kyerɛwtohɔ. Bɛboro mfirihyia 50 akyi no, ɔsomafo Yohane tumi yɛɛ kyerɛwtohɔ a edi mu a ɛkyerɛkyerɛɛ Yesu asase so asetra nna kakra a etwa to no mu kɔ akyiri. Hwɛ nkuranhyɛ ara a kyerɛwtohɔ a efi honhom mu yi ayɛ de besi nnɛ!
13. Ɔkwan bɛn so na honhom kronkron no dii dwuma sɛ ɔkyerɛkyerɛfo maa tete Kristofo no?
13 Ɛnyɛ nsɛm kɛkɛ na honhom kronkron no ma wɔkaakaee, na mmom ɛkyerɛkyerɛɛ asuafo no, kyerɛɛ wɔn kwan ma wɔtee Onyankopɔn atirimpɔw ase yiye. Bere a na Yesu ne n’asuafo no wɔ hɔ no, ɔkaa nsɛm bi kyerɛɛ wɔn a na saa bere no wɔnte ase yiye. Nanso akyiri yi, honhom kronkron kaa Yohane, Petro, Yakobo, Yuda, ne Paulo maa wɔkyerɛw Onyankopɔn atirimpɔw ho nneɛma foforo ho nkyerɛkyerɛmu ho nsɛm. Enti honhom kronkron no dii dwuma sɛ ɔkyerɛkyerɛfo, na ɛmaa wonyaa Onyankopɔn akwankyerɛ ho awerɛhyem kɛse.
14. Akwan bɛn so na honhom kronkron no boaa Yehowa nkurɔfo?
14 Honhom no akyɛde a na wɔde yɛ anwonwade no nso boa ma emu daa hɔ pefee sɛ Onyankopɔn ayi ne dom afi honam fam Israel so kɔ Kristofo asafo no so. (Hebrifo 2:4) Ná saa honhom no aba a ɛbɛda adi wɔ ankorankoro mu no nso yɛ ade titiriw a ɛbɛma wɔahu wɔn a wɔyɛ Yesu asuafo ankasa. (Yohane 13:35; Galatifo 5:22-24) Na honhom no hyɛɛ asafo no mufo den ma wɔde akokoduru dii adanse a wɔansuro.—Asomafo no Nnwuma 4:31.
Mmoa a Yenya Bere a Yɛba Nhyɛso a Emu Yɛ Den Ase
15. (a) Nhyɛso bɛn na Kristofo a wɔtraa ase tete ne nnɛ no ahyia? (b) Dɛn nti na ɛtɔ mmere bi a, wɔn a wɔde nkuranhyɛ ma no nso behia nkuranhyɛ?
15 Wɔn a wɔahyira wɔn ho so ama Yehowa na wodi no nokware nyinaa hyia ɔtaa ɔkwan bi so. (2 Timoteo 3:12) Nanso, Kristofo pii ahyia nhyɛso a emu yɛ den ankasa. Nnɛ mmere yi mu no, basabasayɛfo akuw ahaw ebinom, na wɔde ebinom agu nneduaban mu, afiase, ne adwumayɛban ahorow mu wɔ tebea a emu yɛ den mu. Nniso ahorow adan ataafo, anaasɛ wɔama nnipa a wɔmfa mmara nyɛ adwuma adi nsɛmmɔne a wɔnka wɔn hwee. Bio nso, Kristofo ahyia nyarewa a emu yɛ den anaa abusua mu haw a emu yɛ den. Kristoni a ne ho akokwaw a ɔboa mfɛfo gyidifo ma wodi tebea horow a emu yɛ den ho dwuma nso ho betumi akyere no. Wɔ nsɛm a ɛtete saa mu no, nea ɔde nkuranhyɛ ma no nso behia nkuranhyɛ.
16. Bere a na Dawid wɔ nhyɛso kɛse ase no, ɔkwan bɛn so na onyaa mmoa?
16 Bere a na Ɔhene Saul rehwehwɛ Dawid akum no no, Dawid dan kɔɔ Onyankopɔn nkyɛn sɛ ne Boafo. Ɔsrɛe sɛ: “Onyankopɔn, tie me mpaebɔ. Wo ntaban ase nwini mu na mepɛ me guandɔbea.” (Dwom 54:2, 4; 57:1) So Dawid nyaa mmoa? Yiw, onyaa mmoa. Saa bere no, Yehowa nam odiyifo Gad ne ɔsɔfo Abiatar so de akwankyerɛ maa Dawid, na Ɔnam Saul ba Yonatan so hyɛɛ aberantewaa no den. (1 Samuel 22:1, 5; 23:9-13, 16-18) Afei Yehowa maa Filistifo no kɔtow hyɛɛ asase no so, na ɛmaa Saul gyaee n’akyi di.—1 Samuel 23:27, 28.
17. Bere a Yesu baa nhyɛso a emu yɛ den mu no, ɛhe na ɔdan kɔhwehwɛɛ mmoa?
17 Yesu Kristo ankasa baa nhyɛso kɛse ase bere a na n’asase so asetra reba awiei no. Ná onim sɛnea ne nneyɛe betumi aka ne soro Agya no din ne sɛnea ebetumi aka adesamma nyinaa daakye no yiye. Ɔbɔɔ mpae anibere so, na ‘ɔbaa owu yaw mu’ mpo. Onyankopɔn hwɛ hui sɛ Yesu benya mmoa a ohia wɔ saa ahokyere bere no mu.—Luka 22:41-44.
18. Awerɛkyekye bɛn na Onyankopɔn de maa tete Kristofo a wɔtaa wɔn denneennen no?
18 Ná ɔtaa a wɔde baa Kristofo so bere a wɔhyehyɛɛ afeha a edi kan asafo no akyi no ano yɛ den araa ma enti wɔn nyinaa tu fii Yerusalem ma ɛkaa asomafo no nko. Wɔpam mmarima ne mmea fii wɔn afie mu ankasa. Awerɛkyekye bɛn na Onyankopɔn de maa wɔn? Wonyaa awerɛhyem fii N’asɛm mu sɛ wɔwɔ “ahode a eye kyɛn so,” agyapade a na enni huammɔ a ɛne sɛ wɔne Kristo bedi ade wɔ soro no. (Hebrifo 10:34; Efesofo 1:18-20) Bere a wɔkɔɔ so kaa asɛm no, wohuu adanse a ɛkyerɛ sɛ Onyankopɔn honhom ka wɔn ho, na nea wohui no maa wonyaa biribi foforo a wobegyina so adi ahurusi.—Mateo 5:11, 12; Asomafo no Nnwuma 8:1-40.
19. Ɛwom sɛ Paulo hyiaa ɔtaa a emu yɛ den de, nanso ɔtee nka dɛn wɔ Onyankopɔn awerɛkyekye ho?
19 Bere bi akyi no, Saulo (Paulo), a na n’ankasa taa Kristofo denneennen no, bɛyɛɛ obi a na wɔtaa no esiane sɛ ɔbɛyɛɛ Kristoni nti. Na osumanni bi wɔ Kipro supɔw so a ɔbɔɔ mmɔden sɛ obetwitware Paulo som adwuma no mu denam dwowtwa ne nnaadaa a ɔde dii dwuma so. Wɔ Galatia no, wosiw Paulo abo gyaw no sɛ onwu. (Asomafo no Nnwuma 13:8-10; 14:19) Wɔ Makedonia no, wɔde nnade boroo no. (Asomafo no Nnwuma 16:22, 23) Bere a ohyiaa basabasayɛfo kuw ntua wɔ Efeso akyi no, ɔkyerɛwee sɛ: “Ɛhyɛɛ yɛn so boroo so sen sɛnea yetumi, ma yɛpaa yɛn nkwa ho abaw po. Na yɛn ankasa pɛɛ mu hui sɛ yebewu.” (2 Korintofo 1:8, 9) Nanso krataa koro no ara mu na Paulo kyerɛw awerɛkyekye nsɛm a wɔafa aka asɛm wɔ asɛm yi nkyekyɛm 2 no.—2 Korintofo 1:3, 4.
20. Dɛn na yebesusuw ho wɔ asɛm a edi hɔ no mu?
20 Ɔkwan bɛn so na wo nso wubetumi de awerɛkyekye a ɛte saa ama? Nnipa pii wɔ yɛn bere yi so a wohia awerɛkyekye bere a wɔredi awerɛhow, esiane ebia ɔhaw bi a ɛto nnipa mpempem pii anaa esiane amanehunu bi a ɛto wɔn nkutoo nti. Wɔ asɛm a edi hɔ mu no, yebesusuw ɔkwan a yɛbɛfa so de awerɛkyekye ama wɔ tebea abien no nyinaa mu ho.
So Wokae?
• Dɛn nti na awerɛkyekye a efi Onyankopɔn hɔ no som bo sen biara?
• Awerɛkyekye bɛn na wɔnam Kristo so de ma?
• Ɔkwan bɛn so na honhom kronkron no ayɛ ɔwerɛkyekyefo?
• Fa awerɛkyekye a Onyankopɔn de mae bere a n’asomfo baa nhyɛso kɛse ase ho nhwɛso horow ma.
[Adesua no ho Nsɛmmisa]
[Mfonini ahorow wɔ kratafa 15]
Bible da no adi sɛ Yehowa maa ne nkurɔfo awerɛkyekye denam gye a ogyee wɔn so
[Mfonini ahorow wɔ kratafa 16]
Yesu nam nkyerɛkyerɛ, ayaresa ne awufo a onyanee wɔn so de awerɛkyekye mae
[Mfonini wɔ kratafa 18]
Yesu nyaa mmoa fii soro