Adema A Ɛsɔ Onyankopɔn Ani

NA YESU ne n’asuafo no ne wɔn nnamfo a wɔbɛn wɔn paa a Maria, Marta ne Lasaro a onyan no fii awufo mu nkyɛe no redi aduan dɛdɛ bi wɔ Betania. Bere a Maria faa ngo huamhuam a ne bo yɛ den karibo biako de sraa Yesu nan ho no, Yuda Iskariot bo fuwii na ɔkasae. Ɔkasa tiae sɛ: “Adɛn nti na wɔantɔn ngo huamhuam yi annye denare ahasa, [bɛyɛ ɔpaani afe akatua] na wɔamfa amma ahiafo?” Afoforo nso nwiinwii saa ara.—Yohane 12:1-6; Marko 14:3-5.

Nanso, Yesu buae sɛ: “Munnyaa no! . . . Na mowɔ ahiafo mo nkyɛn daa, na da biara a mopɛ no, mutumi yɛ wɔn yiye; na me de, munni me daa.” (Marko 14:6-9) Yudafo nyamesom akannifo no kyerɛkyerɛe sɛ ahiafo a wɔbɛyɛ wɔn adɔe kyerɛ ɔbra pa na afei nso etumi pata bɔne mpo. Nanso, nea ɛne eyi bɔ abira no, Yesu maa emu daa hɔ sɛ ɛnyɛ adɔe a yɛbɛyɛ ahiafo no nkutoo ne adema a ɛsɔ Onyankopɔn ani.

Ɔkwan a na Kristofo a wodi kan fa so ma ade no ho a yebesusuw tiawa no bɛtwe adwene asi akwan pa bi a yebetumi afa so akyerɛ sɛ yɛdwen afoforo ho na ama yɛn adema asɔ Onyankopɔn ani so. Ɛbɛma yɛahu adema soronko bi a ɛso mfaso sen biara nso.

‘Monyɛ Adɔe’

Yesu hyɛɛ n’asuafo no nkuran mpɛn pii sɛ ‘wɔnyɛ adɔe,’ anaa sɛnea nkyerɛase afoforo kyerɛ saa kasasin no ase no, ‘womfi mmɔborɔhunu mu nkyɛ ade,’ anaasɛ ‘wonyi bi mma.’ (Luka 12:33; New English Bible, A Translation in the Language of the People, a Charles B. Williams yɛe) Nanso, Yesu de kɔkɔbɔ mae wɔ adema a wɔyɛ no nnipa anim a adwene a ɛwɔ akyi ne sɛ ɛbɛhyɛ nea ɔde rema no anuonyam sen sɛ ɛbɛhyɛ Onyankopɔn anuonyam. Ɔkae sɛ: “Sɛ woyɛ adɔe a, nhyɛn torobɛnto nni w’anim, sɛnea nyaatwomfo no yɛ no hyia adan mu ne mmorɔn so, sɛnea wobenya nnipa anim anuonyam.” (Mateo 6:1-4) Esiane afotu yi a tete Kristofo no de dii dwuma nti, wɔkwatii nyaatwom kwan a na wɔn bere so nyamesom akannifo nam so no na wɔpawee sɛ wɔbɛboa wɔn a ade ahia wɔn no denam wɔn pɛ mu a wofi boaa wɔn anaa kokoam akyɛde a wɔde mae so.

Sɛ nhwɛso no, wɔka kyerɛ yɛn wɔ Luka 8:1-3 sɛ Maria Magdalene, Yohana, Susana ne afoforo de “wɔn ahode” som Yesu ne n’asomafo no a wɔamfa anhoahoa wɔn ho. Ɛwom sɛ na saa mmarima yi nyɛ ahiafo de, nanso na wɔagyaw  adwuma a ɛbɛma wɔanya wɔn asetrade hɔ de wɔn ho nyinaa ama ɔsom adwuma no. (Mateo 4:18-22; Luka 5:27, 28) Mmea yi nam mmoa a wɔde maa wɔn na ama wɔawie adwuma a na Onyankopɔn de ahyɛ wɔn nsa no so hyɛɛ Onyankopɔn anuonyam. Na Onyankopɔn nso kyerɛɛ ho anisɔ denam wɔn ayamye ade no ho kyerɛwtohɔ a ɔma wɔkoraa so wɔ Bible mu sɛnea ɛbɛyɛ a awo ntoatoaso a ɛbɛba akyiri yi nyinaa bɛkenkan so.—Mmebusɛm 19:17; Hebrifo 6:10.

Dorka yɛ ɔbea yamyefo foforo a ‘na nnwuma pa ne mmɔborohunu adeyɛ ayɛ no ma.’ Na ɔpam ntaade ma akunafo ahiafo a na wɔwɔ ne kurom Yopa a ɛda mpoano no. Sɛ́ ebia na otua ho ka nyinaa anaasɛ ɔpam kyɛ wɔn ara kwa no de, yennim. Nanso, nnwuma pa a na ɔyɛ no maa wɔn a na ɔboa wɔn no ne Onyankopɔn a ofi mmɔborɔhunu mu tuaa n’ayamye no so ka no ani gyee ne ho.—Asomafo no Nnwuma 9:36-41.

Adwempa Ho Hia

Dɛn na ɛkanyan saafo no ma wɔmaa ade? Ɛnyɛ nkate mu adeyɛ a obi fi de mmoa ma ara kɛkɛ. Wɔtee nka sɛ ɛyɛ wɔn asɛyɛde sɛ wɔyɛ nea wobetumi da biara de boa wɔn a wodi hia, wɔwɔ amanehunu mu, wɔyare, anaa wohyia nsɛnnennen afoforo. (Mmebusɛm 3:27, 28; Yakobo 2:15, 16) Eyi ne adema a ɛsɔ Onyankopɔn ani. Ɛyɛ Onyankopɔn ho dɔ a emu dɔ ne ɔpɛ a yɛwɔ sɛ yebesuasua ne mmɔborohunu ne n’ayamye su na ɛkanyan wɔn.—Mateo 5:44, 45; Yakobo 1:17.

Ɔsomafo Yohane sii adema a ɛho hia yi so dua bere a obisae sɛ: “Na nea ɔwɔ wiase asetrade na ohu ne nua sɛ ahia no na ɔbɔ no ayamɔnwene no, Onyankopɔn dɔ no te ne mu dɛn?” (1 Yohane 3:17) Mmuae no da adi pefee. Onyankopɔn dɔ kanyan nnipa ma wɔyɛ adɔe. Onyankopɔn ani sɔ wɔn a, te sɛ ɔno no, wɔda ayamye su adi no, na otua wɔn ka. (Mmebusɛm 22:9; 2 Korintofo 9:6-11) So yehu saa ayamye yi bi nnɛ? Susuw nea esii nnansa yi ara wɔ Yehowa Adansefo asafo bi mu no ho hwɛ.

Ná Kristoni bea panyin bi fie asɛe a ehia sɛ wosiesie. Na ne nkutoo na ɛte a na onni obusuani biara a ɔbɛboa no. Wɔayɛ Kristofo nhyiam ahorow wɔ ne fie mfe pii ni, na mpɛn pii no ɔto nsa frɛ obiara a ɔpɛ ma wɔto nsa didi. (Asomafo no Nnwuma 16:14, 15, 40) Bere a asafo no mufo huu ne tebea no, wɔkaa wɔn ti pam ho sɛ wɔbɛboa. Ebinom yii sika, na foforo nso de wɔn ahoɔden boae. Wɔ adapɛn awiei kakraa bi akyi no, atuhoamafo bɔɔ ɔdan no so foforo, yɛɛ aguare foforo, kokwaw asa a edi kan no mu nyinaa kaa mu aduru, na wɔhyehyɛɛ nneɛma foforo wɔ mukaase hɔ. Ɛnyɛ ɔbea no ahiade ho dwuma nko na wɔn adɔe yi dii na mmom ɛmaa asafo no mufo bɛnee wɔn ho wɔn ho na afipamfo nso hui sɛ ɛyɛ nokware Kristofo adema ho nhwɛso.

 Akwan pii wɔ hɔ a yɛn ankasa betumi afa so aboa afoforo. So yebetumi anya bere ne obi a ɔyɛ ayisaa abɔ? Yebetumi atotɔ nneɛma kakra anaasɛ yɛbɛpam okunafo bi a yenim no a ne mfe akɔ anim ntaade ama no? So yebetumi anoa aduan anaasɛ yɛama obi a ne ho kyere no wɔ sika fam no sika? Enhia sɛ yɛyɛ adefo ansa na yɛatumi aboa afoforo. Ɔsomafo Paulo kyerɛwee sɛ: “Sɛ koma a ɛpɛ wɔ hɔ a, ɛsɔ ani sɛnea onii no wɔ ade, na ɛnyɛ sɛnea onni.” (2 Korintofo 8:12) Nanso, so adema a ankorankoro fi wɔn pɛ mu ma tẽẽ saa no nkutoo na Onyankopɔn behyira so? Dabi.

Ná Mmoa Akuw De Ma Nso Ɛ?

Ɛtɔ mmere bi a mmɔden a yɛbɛbɔ sɛ ankorankoro no nkutoo nnɔɔso. Nokwasɛm ne sɛ, na Yesu ne n’asomafo no wɔ foto a wɔde boa ahiafo, na na wogye ntoboa fi nnipa a wodwen afoforo a na wohyia wɔn asɛnka mu no hɔ. (Yohane 12:6; 13:29) Saa ara na afeha a edi kan asafo ahorow no gyegyee tow bere a ɛho behiae no na wɔyɛɛ mmoa a kuw de ma ho nhyehyɛe.—Asomafo no Nnwuma 2:44, 45; 6:1-3; 1 Timoteo 5:9, 10.

Tebea a ɛte saa sɔree bɛyɛ afe 55 Y.B. mu. Ná asafo ahorow a ɛwɔ Yudea no redi hia, ebia na efi aduankɔm kɛse a na esii nkyɛe no. (Asomafo no Nnwuma 11:27-30) Ɔsomafo Paulo, a daa na odwen ahiafo ho no hwehwɛɛ mmoa fii asafo ahorow no hɔ a na asafo a ɛwɔ Makedonia a ɛwɔ akyirikyiri no mpo ka ho. N’ankasa hwɛ ma wogyigyee tow na ɔmaa mmarima a na wɔfata de kɔmae. (1 Korintofo 16:1-4; Galatifo 2:10) Ɔno anaa afoforo a na wɔka dwumadi no ho mu biara annye adwuma a wɔyɛe no ho akatua.—2 Korintofo 8:20, 21.

Yehowa Adansefo a wɔwɔ hɔ nnɛ nso yɛ ntɛm de mmoa ma bere a asiane bi asi no. Sɛ nhwɛso no, wɔ 2001 ahohuru bere mu no, osu kɛse bi tɔe ma eyirii Houston, Texas, U.S.A. Sɛ wɔka ne nyinaa bom a Adansefo afie 723 na ɔkwan bi so no ɛsɛee, na emu pii sɛee paa. Ntɛm ara na wɔhyehyɛɛ boayikuw a wɔde mmoa ma wɔ asiane bere mu a na Kristofo mpanyimfo a wɔfata wom, na wɔahwɛ ankorankoro a wɔn ho kaa mu no ahiade ne sika a na wɔde bɛma ma wɔde aboa Adansefo a wɔwɔ hɔ no ma wɔagyina tebea no ano na wɔasiesie wɔn afie. Atuhoamafo a wofi asafo ahorow a ɛbemmɛn no mu na wɔyɛɛ adwuma no nyinaa. Ɔdansefo biako ani gyee mmoa no ho ara ma bere a ne nsa kaa sika fii ne insurance adwumakuw hɔ sɛ ɔmfa ntua ɛka a wabɔ wɔ ne fie no siesie ho no, ntɛm ara na ɔde sika no kɔtoo mmoa a wɔde ma wɔ asiane bere mu foto no mu sɛnea ɛbɛyɛ a ɛbɛboa afoforo nso a wohia mmoa.

 Nanso, ɛdefa adɔe kuw ho no, ɛsɛ sɛ yɛma yɛn ani da hɔ bere a yesusuw mmoa dodow a wɔhwehwɛ fi yɛn hɔ ho no. Ɛka a adɔe kuw binom bɔ wɔ wɔn adwumayɛ nhyehyɛe anaa ɛho dawurubɔ ho no kɔ soro ara ma sika a wogyigye no mu kakraa bi pɛ na wɔde di ɛho atirimpɔw ho dwuma. Mmebusɛm 14:15 ka sɛ: “Atetekwaa gye nsɛm nyinaa di, na onitefo hwɛ ne nantew mu yiye.” Enti nyansa wom sɛ yɛbɛhwehwɛ nokwasɛm no mu yiye.

Adema a Mfaso Wɔ so Paa

Adema bi wɔ hɔ a ɛho hia sen adɔe a yɛbɛyɛ koraa. Yesu kaa eyi ho asɛm bere a aberante sodifo bi a ɔyɛ ɔdefo bisaa no nea ɔnyɛ na wanya daa nkwa no. Yesu ka kyerɛɛ no sɛ: “Kɔ na kɔtɔn nea wowɔ, na fa ma ahiafo, na woanya ademude ɔsoro, na bra bedi m’akyi!” (Mateo 19:16-22) Hyɛ no nsow sɛ Yesu anka sɛ, ‘Fa ma ahiafo na wubenya nkwa.’ Mmom no, ɔde kaa ho sɛ, “Bra bedi m’akyi.” Ɔkwan foforo so no, adɔe nnwuma fata nkamfo na mfaso wɔ so de, nanso Kristofo asuafoyɛ adwuma no sen saa.

Nea na Yesu ani gye ho kɛse ne sɛ ɔbɛboa afoforo wɔ honhom fam. Bere tiaa bi ansa na ɔrebewu no, ɔka kyerɛɛ Pilato sɛ: “Me de, eyi nti na wɔwoo me, na mebaa wi yi ase, sɛ merebedi nokware no ho adanse.” (Yohane 18:37) Bere a Yesu ankasa dii anim boaa ahiafo, saa wɔn a wɔyare yare, maa wɔn a ɔkɔm de wɔn aduan no, ɔtetee n’asuafo no titiriw sɛ wɔnyɛ asɛmpakafo. (Mateo 10:7, 8) Nokwasɛm ne sɛ, nea ɛka akwankyerɛ a etwa to a ɔde maa wɔn no ho bi ne ahyɛde: “Monkɔ nkɔyɛ amanaman nyinaa m’asuafo.”—Mateo 28:19, 20.

Ɛwom, asɛmpaka ntumi nnyi wiase haw nyinaa mfi hɔ. Nanso, Onyankopɔn Ahenni no ho asɛmpa a yɛbɛka akyerɛ nnipa nyinaa no hyɛ Onyankopɔn anuonyam efisɛ asɛnka no di Onyankopɔn apɛde ho dwuma na ebue hokwan ma wɔn a wogye Onyankopɔn nkrasɛm no nya mfaso horow a ɛtra hɔ daa. (Yohane 17:3; 1 Timoteo 2:3, 4) Dɛn nti na wuntie nea Yehowa Adansefo wɔ ka bere foforo a wɔbɛba wo nkyɛn no? Wɔde honhom fam akyɛde na ɛnam. Na wonim sɛ eyi ne ɔkwan a eye sen biara a wobetumi afa so ama wo ade.

[Mfonini ahorow wɔ kratafa 6]

Akwan pii wɔ hɔ a yebetumi afa so akyerɛ sɛ yɛdwen afoforo ho

[Mfonini wɔ kratafa 7]

Asɛmpa no a yɛka no ma Onyankopɔn ani gye na ebue kwan ma mfaso horow a ɛtra hɔ daa