Asetram Nsɛm

Anigye A Biribiara Ne No Nsɛ!

SƐNEA REGINALD WALLWORK KA KYERƐE

“Biribiara nni wiase yi mu a yebetumi de atoto anigye a yɛanya wɔ Yehowa asɛmpatrɛw bere nyinaa som adwuma no mu ho!” Saa asɛm ketewa yi na mihui wɔ me yere nkrataa mu wɔ ne wu akyi bere tiaa bi wɔ May 1994 mu.

SƐ MISUSUW Irene nsɛm no ho a, mekae mfe 37 a anigye ne abotɔyam wom a yɛde somee sɛ asɛmpatrɛwfo wɔ Peru no. Yenyaa Kristofo biakoyɛ a edi mu fi bere a yehyiaa ayeforo wɔ December 1942 mu no—na ɛno ne beae pa a ɛsɛ sɛ mifi m’asɛm no ase.

Wɔtetee Irene sɛ Yehowa Ɔdansefo wɔ Liverpool, England. Ná ɔyɛ mmabea baasa mu biako, na ɔhweree ne papa wɔ Wiase Ko I no mu. Enti ne maame waree Winton Fraser, na wɔwoo babarima, Sidney. Bere tiaa bi ansa na Wiase Ko II reba no, abusua no tu kɔɔ Bangor, Wales Atifi fam, baabi a wɔbɔɔ Irene asu wɔ 1939 mu no. Wɔbɔɔ Sidney asu wɔ afe a edi anim no mu, enti ɔne Irene nyinaa boom somee sɛ akwampaefo—bere nyinaa asɛmpakafo—wɔ Wales atifi fam mpoano, fi Bangor kosi Caernarvon, a Anglesey supɔw ka ho.

Saa bere no, na mewɔ Runcorn Asafo a ɛwɔ Liverpool anafo fam apuei bɛyɛ kilomita 20 no mu resom sɛ ɔhwɛfo guamtrani, sɛnea wɔfrɛ no nnɛ no. Irene baa me nkyɛn wɔ ɔmansin nhyiam bi ase bebisae sɛ obetumi anya asasesin bi aka mu asɛm anaa, efisɛ na ɔne ne nuabea panyin Vera a waware a ɔte Runcorn no na ɛrebɛtra. Me ne Irene nyaa abusuabɔ a ɛkɔ akyiri wɔ adapɛn abien a obedii wɔ yɛn nkyɛn no mu, na akyiri yi mekɔsraa no wɔ Bangor mpɛn dodow bi. Hwɛ anigye ara a minyae bere a dapɛn awiei bi Irene penee aware ho adwenkyerɛ a mede too n’anim so no!

 Bere a meresan aba fie Kwasida no, mifii ase yɛɛ nhyehyɛe maa yɛn ayeforohyia ntɛm ara, nanso me nsa kaa telegram Benada. Ɛkenkanee sɛ: “Ɛyɛ me yaw sɛ saa telegram yi bɛhaw wo. Meretwa yɛn ayeforohyia no mu. Mɛkyerɛw wo krataa akyerɛkyerɛ mu.” Me ho dwiriw me. Dɛn na na atoto?

Irene krataa no bae da a edi hɔ no. Ɔka kyerɛɛ me sɛ ɔne Hilda Padgett rekɔ Horsforth a ɛwɔ Yorkshire no akɔyɛ akwampae adwuma. * Ɔkyerɛkyerɛɛ mu sɛ asram 12 a atwam no, ɔpenee so sɛ ɔbɛkɔ akɔsom wɔ baabi a mmoa ho hia kɛse sɛ wɔsrɛ no sɛ ɔnyɛ saa a. Ɔkyerɛwee sɛ: “Me fam no, na eyi te sɛ nea mahyɛ Yehowa bɔ, na mete nka sɛ esiane sɛ mehyɛɛ no bɔ ansa na merehu wo nti, ɛsɛ sɛ midi so.” Ɛwom sɛ na me werɛ ahow de, nanso mekyerɛɛ ne nokwaredi no ho anigye kɛse na mede mmuae faa telegraph so kɔmaa no sɛ: “Kɔ. Mɛtwɛn wo.”

Bere a Irene wɔ Yorkshire no, wɔde no too afiase asram abiɛsa esiane ahonim mu a ofi poe sɛ obegyina ɔko no akyi nti. Nanso asram 18 akyi, wɔ December 1942 mu no, yɛwaree.

Me Kan Asetra

Wɔ 1919 mu no, me maame tɔɔ Studies in the Scriptures apo no bi. * Ɛwom sɛ, sɛnea me papa ka ma ɛfatae saa bere no, na Maame nkenkanee nhoma da de, nanso na wasi ne bo sɛ obesua saa nhoma ahorow yi ne Bible no yiye. Ɔyɛɛ saa na wɔbɔɔ no asu wɔ 1920 mu.

Ná me papa yɛ obi a n’asɛm nyɛ den, na wansiw me maame kwan wɔ biribiara a ɔpɛ sɛ ɔyɛ mu, a nea na ɛka ɛno ho ne sɛ ɔbɛtete wɔn mma baanan—me nuabeanom baanu, Gwen ne Ivy; m’ankasa, ne me nuabarima, Alec—wɔ nokware no mu. Stanley Rogers ne Adansefo anokwafo foforo a wɔwɔ Liverpool no tuu kwan bɛmaa Bible ho ɔkasa wɔ Runcorn, baabi a na asafo foforo baa hɔ nkyɛe no. Yɛn abusua no tuu mpɔn wɔ honhom fam wɔ asafo no mu.

Ná Gwen reyɛ Church of England ahosohyira ho adesua nanso ogyaee ntɛm ara bere a ɔne Maame nyinaa fii ase suaa Bible no. Bere a ɔsɔfo no bɛsraa yɛn sɛ ɔrebɛhwɛ nea enti a Gwen nkɔ adesua no bio no, yɛtaataa no nsɛmmisa pii a na onsiesie ne ho yiye sɛ ɔbɛma ho mmuae. Gwen bisaa nea Awurade Mpaebɔ no kyerɛ na nea ɛkowiei ne sɛ n’ankasa kyerɛkyerɛɛ mu kyerɛɛ no! Ɔkenkanee 1 Korintofo 10:21 de wiei, na osii no pi kyerɛɛ no sɛ ontumi nkɔ so ‘nnidi pon abien so’ bio. Bere a ɔsɔfo no refi yɛn fie hɔ no, ɔkae sɛ ɔbɛbɔ mpae ama Gwen na ɔbɛsan aba abebua ne nsɛmmisa no, nanso wamma bio. Wɔ Gwen asubɔ akyi no, ankyɛ koraa na ɔbɛyɛɛ bere nyinaa ɔsɛmpakafo.

Ɔhwɛ a na wɔde ma mmofra a wɔwɔ yɛn asafo no mu no yɛ biribi a na ɛkyɛn so. Mekae sɛ mitiee ɔkasa bi a ɔpanyin bi a ɔbɛsraa yɛn asafo no mae bere a na madi mfe ason no. Ɛno akyi no, ɔbaa me nkyɛn ne me bɛbɔɔ nkɔmmɔ. Meka kyerɛɛ no sɛ makenkan Abraham ho asɛm ne sɛnea ɔbɔɔ mmɔden sɛ ɔde ne babarima, Isak, bɛbɔ afɔre no. Ɔkae sɛ: “Kogyina asɛnka agua no nkyɛn na ka biribiara kyerɛ me.” Hwɛ anigye ara a minyae sɛ mikogyinaa hɔ maa me “baguam ɔkasa” a edi kan!

Wɔbɔɔ me asu wɔ 1931 mu, bere a na madi mfe 15, afe a me maame wui no, na migyaee sukuu kosuaa anyinam ahoɔden ho adwuma. Wɔ 1936 mu no, na wɔbɔ Bible mu ɔkasa a wɔakyere agu kasɛt so wɔ baguam, na onuawa bi a ne mfe akɔ anim hyɛɛ me ne me nuabarima nkuran sɛ yɛmfa yɛn ho nhyɛ saa adwuma yi mu kɛse. Enti me ne Alec kɔɔ Liverpool kɔtɔɔ baesekre na yɛyɛɛ adaka a ntwahonan wɔ ase a ɛbɛsoa afiri a yɛde ma ɔkasa no. Yɛde akasam sii adaka afiri a wɔde atare baesekre no ho akyi wɔ hama bi a wotumi bobɔw a ne tenten yɛ mita 2 so. Afiri dwumfo no ka kyerɛɛ yɛn sɛ ɔnyɛɛ biribi a ɛte saa da, nanso ɛyɛɛ yiye! Yɛde anigye yɛɛ  yɛn asasesin mu adwuma esiane nkuranhyɛ a onuawa no de maa yɛn ne hokwan ahorow a na wɔde ahyɛ yɛn nsa nti.

Wiase Ko II—Sɔhwɛ Bere

Bere a na ɔko no repenpɛn so no, me ne Stanley Rogers yeree yɛn ho bɔɔ baguam ɔkasa a na wɔbɛma wɔ Royal Albert Hall wɔ London wɔ September 11, 1938, a n’asɛmti ne “Hu Nokwasɛm No,” ho dawuru. Akyiri yi, meboa ma wɔkyekyɛɛ ɔkasa yi a wɔatintim wɔ nhomawa mu, ɛne Fascism or Freedom nhomawa a wotintim no afe a edi hɔ no. Nhomawa abien yi nyinaa paa katabaako su a na Hitler Germany reda no adi no ho ntama pefee. Saa bere yi no, na mabɛyɛ obi a nkurɔfo nim no yiye wɔ Runcorn esiane m’asɛnka adwuma no nti, na na ɛno nti wobu me. Nokwarem no, di a na midi teokrase dwumadi ahorow anim bere nyinaa no maa me nyaa gyinabea pa wɔ afoforo ani so.

Ná adwumakuw a mewom no akogye paa sɛ wɔbɛhyehyɛ anyinam nhama wɔ adwumakuw foforo bi a ɛwɔ kurow no kurotia mu. Bere a mihui sɛ saa adwinnan no bɛyɛ akode ho adwuma no, medaa no adi sɛ mintumi nyɛ adwuma wɔ hɔ. Ɛwom sɛ m’adwumawuranom ani annye ho de, nanso me panyin no kaa bi maa me, na wɔmaa me adwuma foforo. Mibehui akyiri yi sɛ na ɔwɔ sewaa bi a ɔno nso yɛ Yehowa Ɔdansefo.

Me yɔnko bi hyɛɛ me nkuran kɛse bere a ɔkaa eyi no: “Yɛrenhwɛ biribi foforo biara kwan mfi wo hɔ, Reg, efisɛ wode wo ho ahyɛ saa Bible dwumadi no mu mfirihyia pii.” Nanso, na ɛsɛ sɛ meyɛ ahwɛyiye efisɛ na me mfɛfo adwumayɛfo no pii pɛ sɛ wɔma me ho kyere me.

Asɛnnibea a ɛwɔ Liverpool no gyee me nsa a mede hyɛɛ mmara ase sɛ obi a metumi afi ahonim pa mu apo biribi no toom wɔ June 1940 mu a na ahwehwɛde a ɛwɔ ho ne sɛ mɛkɔ so atra adwuma a meyɛ no mprempren no mu. Nokwarem no, eyi maa mitumi yɛɛ me Kristofo som adwuma no.

Meyɛ Bere Nyinaa Som Adwuma

Bere a ɔko no baa awiei no, misii gyinae sɛ megyae m’adwuma na makɔka Irene ho wɔ bere nyinaa som adwuma no mu. Wɔ 1946 mu no, meyɛɛ teaseɛnam bi a ne tenten yɛ mita 5 a ɛbɛyɛɛ yɛn fie, na afe a edi hɔ no, wɔkyerɛe sɛ yentu nkɔ Alveston, akuraa bi a ɛwɔ Gloucestershire. Enti, yɛyɛɛ akwampae adwuma wɔ kurow dedaw Cirencester ne Bath kurow mu. Wɔ 1951 mu no, wɔtoo nsa frɛɛ me sɛ menkɔsrasra asafo ahorow a ɛwɔ Wales kesee fam no sɛ ɔhwɛfo kwantufo, nanso aka kakra ma yɛanya mfe abien no, wɔtoo nsa frɛɛ yɛn sɛ yɛmmra Ɔwɛn Aban Gilead Bible Sukuu a wɔde tete asɛmpatrɛwfo no bi.

 Wɔyɛɛ sukuu no adesua a ɛto so 21 no wɔ South Lansing, a ɛwɔ New York atifi fam, na yewiee yɛn adesua no wɔ 1953 mu wɔ Wiase Foforo Asafo Nhyiam a wɔyɛe wɔ New York City no ase. Ná me ne Irene nnim beae a wɔde dwumadi bɛma yɛn kosi da a yɛrewie adesua no. Hwɛ anigye ara a yenyae bere a yehui sɛ yɛrekɔ Peru no. Dɛn ntia? Efisɛ na Sidney Fraser, a ɔyɛ Irene nua, ne ne yere, Margaret, asom wɔ Lima baa dwumadibea hɔ bɛboro afe bere a wowiee Gilead adesuakuw a ɛto so 19 no!

Bere a yɛretwɛn yɛn visa no, yɛde bere tiaa bi yɛɛ adwuma wɔ Brooklyn Betel, nanso ankyɛ na yɛkɔɔ Lima. Mmeae ahorow du a yɛkɔyɛɛ asɛmpatrɛw adwuma wɔ hɔ no mu nea edi kan ne Callao, po so hyɛn gyinabea titiriw a ɛwɔ Peru, Lima atɔe fam no. Ɛwom sɛ na me ne Irene asua Spania kasa no kakra de, nanso saa bere no na yentumi mfa nni nkɔmmɔ. Ná yɛbɛyɛ nneɛma dɛn?

Ɔhaw Ahorow ne Asɛnka Mu Hokwan Ahorow

Wɔ Gilead no, wɔka kyerɛɛ yɛn sɛ ɛnã nkyerɛ ne ba kasa. Mmom no, abofra no na osua kasa no bere a ne maame kasa kyerɛ no no. Enti, afotu a wɔde maa yɛn ne sɛ, “Monkɔyɛ asɛnka adwuma ntɛm ara, na munsua kasa no mfi ɔmanfo no hɔ. Wɔbɛboa mo.” Bere a mifii ase bɔɔ mmɔden sɛ mehu kasa foforo yi no, susuw sɛnea metee nka wɔ dapɛn abien pɛ a yɛadi wɔ hɔ mu no, sɛ wɔpaw me sɛ ɔhwɛfo guamtrani wɔ Callao Asafo no mu no ho hwɛ! Mikohuu Sidney Fraser, nanso afotu a ɔde maa me no te sɛ nea wɔde maa yɛn wɔ Gilead no ara—wo ne asafo no ne nnipa a wɔwɔ w’asasesin mu no mmɔ. Misii me bo sɛ medi saa afotu yi akyi.

Memeneda anɔpa bi, mekɔtoo duadwumfo bi wɔ n’adwumam. Ɔkae sɛ: “Ɛsɛ sɛ metoa m’adwuma so, nanso mesrɛ wo tra ase ka asɛm no bi kyerɛ me.” Meka kyerɛɛ no sɛ mɛyɛ saa nanso wɔ tebea biako mu: “Mesrɛ wo, sɛ midi mfomso a, teɛ me so. Ɛrenhaw me.” Ɔserewee na ɔpenee m’abisade no so. Mekɔsraa no mprenu dapɛn biara na mihui sɛ ɛyɛ ɔkwan pa a menam so behu me kasa foforo no, sɛnea wɔka kyerɛɛ me no.

Nea ɛne asɛm hyia no, wɔ Ica, baabi a wɔmaa yɛn dwumadi sɛ asɛmpatrɛwfo bere a ɛtɔ so abien no, mihyiaa duadwumfo foforo na mekyerɛkyerɛɛ nhyehyɛe a meyɛe wɔ Callao no mu kyerɛɛ no. Ɔno nso gyee pene sɛ ɔbɛboa me, enti me Spania kasa no kɔɔ so tuu mpɔn yiye, ɛwom sɛ egyee mfe abiɛsa ansa na me ho rekokwaw wom ankasa de. Ná saa barima yi nni adagyew bere nyinaa, nanso mebɔɔ mmɔden ne no yɛɛ Bible adesua denam Kyerɛwnsɛm no a mekenkan kyerɛkyerɛ mu kyerɛɛ no so. Dapɛn bi, bere a mekɔe sɛ merekɔsra no no, n’adwumawura ka kyerɛɛ me sɛ wanya adwuma foforo wɔ Lima. Bere bi akyi, a me ne Irene kɔɔ nhyiam wɔ Lima no, mihyiaa saa barima yi bio. Hwɛ anigye ara a minyae bere a metee sɛ okohuu hɔnom Adansefo no sɛnea ɛbɛyɛ a ɔbɛtoa n’adesua no so, na ɔne n’abusua nyinaa abɛyɛ Yehowa asomfo a wɔahyira wɔn ho so no!

Wɔ asafo bi mu no, yehui sɛ awarefo nkumaa bi nwaree mmara kwan so, nanso wɔabɔ wɔn asu. Bere a yɛne wɔn susuw Kyerɛwnsɛm mu nnyinasosɛm a ɛfa ho ho no, wosii wɔn bo sɛ wɔde wɔn aware no bɛhyɛ mmara ase, a na ɛno bɛma wɔafata sɛ Adansefo a wɔabɔ wɔn asu. Enti meyɛɛ nhyehyɛe de wɔn kɔɔ kurow no aban adwumayɛbea de wɔn aware no kɔhyɛɛ mmara ase. Nanso ɔhaw bi sɔree bio efisɛ na wɔwɔ mma baanan a wɔmfaa wɔn din nhyɛɛ mmara ase, na na eyi yɛ mmara mu ahwehwɛde. Enti, yesusuw nea kurow sohwɛfo no bɛyɛ ho. Kurow sohwɛfo no kae sɛ: “Esiane sɛ saa nnipa pa yi, mo nnamfonom Yehowa Adansefo, ahwɛ ama mo abɛware wɔ mmara kwan so nti, meretwa samana ahorow a anka ɛsɛ sɛ asɛnnibea no de ma mmofra no biara no mu ma wɔde wɔn din ahyɛ mmara mu a wontua hwee.” Hwɛ anisɔ ara a yenyae, efisɛ na abusua yi di hia na sika biara a anka wobetwa ama wɔn no bɛyɛ adesoa kɛse ama wɔn!

Akyiri yi, Albert D. Schroeder a ofi Brooklyn, a ɛyɛ Yehowa Adansefo adwumayɛbea ti no, bɛsraa yɛn na ɔkamfo kyerɛe sɛ wonsi asɛmpatrɛwfo fie foforo wɔ Lima beae foforo. Enti me ne Irene ne anuanom mmea baanu, Frances ne Elizabeth Good a wofi United States, ne awarefo  bi a wofi Canada tu kɔɔ San Borja mantam mu. Wɔ mfe abien anaa abiɛsa ntam no, yenyaa asafo foforo a emu yɛ hyew bio.

Bere a yɛresom wɔ Huancayo, a ɛda mfinimfini mmepɔw so bɛyɛ mita 3,000, mu no, yɛne ɛhɔ asafo a emu Adansefo yɛ 80 no na ɛbɔe. Ɛhɔ no, meboa ma wosii Ahenni Asa a ɛto so abien wɔ ɔman no mu. Wɔpaw me sɛ Yehowa Adansefo mmara mu nanmusifo efisɛ na ɛsɛ sɛ yɛkɔ asɛnnibea mprɛnsa so de kyerɛ mmara mu hokwan a yɛwɔ wɔ asase a yɛatɔ no ho. Nneyɛe a ɛtete saa, ne asuafoyɛ adwuma no a asɛmpatrɛwfo anokwafo yɛɛ no kɛse wɔ saa kan mfe no mu no na ɛtoo fapem pa maa nkɔanim a yehu wɔ Peru nnɛ no—fi Adansefo 283 wɔ 1953 mu kodu Adansefo bɛboro 83,000 nnɛ.

Akwantu a Ɛyɛ Awerɛhow

Yɛne mfɛfo asɛmpatrɛwfo nyaa fekubɔ a ɛyɛ anigye wɔ yɛn asɛmpatrɛwfo afie nyinaa mu, baabi a minyaa hokwan somee mpɛn pii sɛ ofie sohwɛfo no. Dwoda anɔpa biara, na yehyiam susuw dwuma a yebedi dapɛn a edi hɔ no ho, na na yɛkyekyɛ nnwuma a yɛde hwɛ fie hɔ nso. Ade titiriw a yɛn nyinaa hui sɛ ɛho hia ne asɛnka adwuma no, enti yɛn nyinaa de biakoyɛ yɛɛ adwuma. Ɛyɛ me anigye sɛ mɛka sɛ ntawntawdi kɛse biara ansi yɛn ntam wɔ yɛn fie no mu biara mu da.

Ná yɛn dwumadi a etwa to ne Breña, wɔ Lima borɔn foforo so. Ɛhɔ asafo a emu yɛ anigye a Adansefo 70 na wɔwom no nyinii ntɛmntɛm boroo adawurubɔfo 100, ma enti yɛtew asafo foforo wɔ Palominia. Saa bere yi na Irene yaree. Mfiase no, mihui sɛ ɛtɔ mmere bi a ɔnkae biribi a waka, na ɛtɔ mmere bi mpo a, na ɔnkae ɔkwan a ɔbɛfa so akɔ fie. Ɛwom sɛ onyaa aduruyɛ a edi mu de, nanso ne tebea no kɔɔ so sɛee nkakrankakra.

Awerɛhosɛm ne sɛ, wɔ 1990 mu no, na ɛsɛ sɛ meyɛ nhyehyɛe ma yɛsan kɔ England, baabi a me nuabea Ivy gyee yɛn fɛw so kɔɔ ne fie no. Mfe anan akyi, bere a Irene dii mfe 81 biako no, owui. Makɔ so ara ayɛ bere nyinaa som adwuma no, na mesom sɛ ɔpanyin wɔ asafo ahorow abiɛsa a ɛwɔ me kurom no biako mu. Ɛtɔ mmere bi a, mekɔ Manchester kɔhyɛ kuw a ɛwɔ hɔ a wɔka Spania kasa no den.

Nnansa yi, minyaa osuahu bi a ɛka koma a efii ase mfe pii a atwam bere a mede simma anum bɔɔ nsɛmpa a m’akyere agu gramafon so kyerɛɛ afiewuranom no. Mekae abeawa ketewa bi a na ogyina ne maame akyi wɔ pon no ano retie asɛm no pefee.

Bere bi akyi no, abeawa yi tu kɔɔ Canada, na adamfo bi a na ɔda so te Runcorn a ɔyɛ Ɔdansefo seesei ne no kɔɔ so dii nkitaho. Nnansa yi, abeawa no kyerɛwee sɛ Adansefo baanu baa ne nkyɛn na wɔkaa nsɛm bi a ɛma ɔkaee nsɛm a ɔtee wɔ simma anum ɔkasa no mu a na ɔnhwɛ kwan. Esiane nokwasɛm yi a ohui nti, seesei ɔyɛ Yehowa somfo a wahyira ne ho so, na ɔsrɛe sɛ wɔnna aberantewaa a ɔkɔsraa ne maame wɔ fie bɛboro mfe 60 a atwam ni no ase! Nokwarem no, yennim sɛnea nokware ho aba begye ntini na anyin.—Ɔsɛnkafo 11:6.

Yiw, mede anisɔ kɛse hwɛ m’akyi wɔ me nkwa nna a mede ayɛ Yehowa adwuma a ɛsom bo no ho. Efi bere a wɔbɔɔ me asu wɔ 1931 mu no, Yehowa nkurɔfo nhyiam biara nni hɔ a apa me ti so. Ɛwom sɛ me ne Irene ankasa nni mma de, nanso ɛyɛ me anigye sɛ me honhom fam mmabarima ne mmabea boro 150, a wɔn nyinaa resom yɛn soro Agya, Yehowa. Sɛnea me yere a medɔ no kae no, hokwan ahorow a yenyae no yɛ anigye a biribiara ne no nsɛ koraa.

[Ase hɔ nsɛm]

[Mfonini wɔ kratafa 24]

Maame, 1900 mfiase

[Mfonini wɔ kratafa 24, 25]

Atifi: Me ne Irene a yegyina yɛn teaseɛnam fie no anim

[Mfonini wɔ kratafa 25]

Benkum: Hilda Padgett, me, Irene, ne Joyce Rowley wɔ Leeds, England, 1940

[Mfonini wɔ kratafa 27]

Yɛrebɔ baguam ɔkasa bi ho dawuru, wɔ Cardiff, Wales, 1952