Dɛn Na Ɛreba Adɔe So?

BERE a wɔde ntua baa New York City ne Washington, D.C., so wɔ September 11, 2001 akyi no, sɛnea ɔmanfo boaa wɔn a wohuu amane wɔ saa asiane no mu no yɛ nwonwa. Ntoboa a ano si U.S dɔla ɔpepepem 2.7 a ɔmanfo yii sɛ wɔmfa mmoa wɔn a wɔn ho kaa mu abusuafo no yɛɛ adɔe akuw no nwonwa. Esiane sɛnea nneɛma sɛee no nti, na nnipa nyinaa pɛ sɛ wɔboa.

Nanso, ɔmanfo no mu binom dii yaw ntɛm ara bere a ɛbɛdaa adi sɛ adɔe akuw a wɔagye din no redi sika no. Nnipa pii bo fuwii bere a wɔtee sɛ adɔe kuw kɛse bi pɛe sɛ wɔtew sika U.S. dɔla ɔpepem 546 a wɔn nsa kae no bi to hɔ de di dwuma foforo no. Ɛwom sɛ akyiri yi ahyehyɛde no sesaa n’adwene, paa ho kyɛw de, nanso sɛnkyerɛwfo bi kae sɛ: “Akasatiafo hu nsakrae yi sɛ aka akyiri dodo a ɛrentumi nsakra ahotoso a na kan wɔwɔ wɔ ahyehyɛde no mu” ansa na ntua no reba a wɔahwere no. Wo nso ɛ? So ahotoso a wowɔ wɔ adɔe akuw mu no ho aba asɛm nnansa yi?

Mfaso Wɔ so Anaa Mfaso Nni So?

Nnipa pii bu ntoboa a woyi ma adɔe akuw sɛ su pa. Nanso ɛnyɛ nnipa nyinaa na wosusuw saa. Bɛboro mfe 200 a atwam ni no, Engiresi anwensɛm kyerɛwfo Samuel Johnson kyerɛwee sɛ: “Sɛ wode sika ma wɔn a wɔyɛ adwuma sɛ wɔn adwumayɛ ho akatua a, wuhu sɛ woreyɛ ade pa sen sɛ wode sika bɛma aka sɛ ɛyɛ adɔe ara kwa.” Nnipa binom wɔ hɔ nnɛ a wɔn ani nnye ho saa ara, na amanneɛbɔ ahorow a ɛkyerɛ sɛ adɔe akuw redi sika no ama nkurɔfo nni wɔn mu ahotoso bio. Susuw nhwɛso abien bi a esii nnansa yi ara ho hwɛ.

Woyii ɔkwankyerɛfo panyin bi a na ɔda nyamesom adɔe kuw bi ano wɔ San Francisco adi bere a wɔtee sɛ ɔde ne honam ani oprehyɛn ho ka too kuw no so, na bɛboro mfe abien ntam no, ɔde U.S. dɔla 500 tuaa ɛka a na ɔbɔ wɔ adidibea dapɛn biara no wɔ kuw no din mu. Wɔ Britain no, nnipa bi a na wɔnam television so gyigye sika ma adɔe kuw bi no fɛree bere a wobehui sɛ afie a enni mu 12 pɛ na na wɔatumi de sika pɔn ɔpepem 6.5 (bɛyɛ U.S. dɔla ɔpepem 10) a nkurɔfo yii sɛ wɔmfa nkosi adan foforo  a wɔhwɛ nyisaa wom wɔ Romania no asisi, na wɔantumi ammu dɔla ɔpehaha pii ho akontaa no. Amanneɛbɔ a ɛhaw adwene a ɛte sɛɛ ama wɔn a wɔyɛ adɔe no ayɛ ahwɛyiye wɔ sika dodow a woyi ne nnipa ko a wɔde ma wɔn ho.

Sɛ́ Wobɛma Anaasɛ Woremma

Nanso ɛbɛyɛ aniwu sɛ yɛbɛma nnipa kakraa bi nneyɛe abrɛ ayamhyehye ne sɛnea yedwen afoforo ho no ase. Bible no ka sɛ: “Onyamesom a ɛho tew na ɛho nni fĩ agya Onyankopɔn anim ne sɛ obi kɔhwɛ nyisaa ne akunafo wɔn ahohia mu.” (Yakobo 1:27) Yiw, ahiafo ne mmɔborɔwafo a yɛbɛkɔ so adwene wɔn ho no yɛ Kristosom fã titiriw.

Nanso ebia wubebisa sɛ: ‘So ɛsɛ sɛ mekɔ so yi ntoboa ma adɔe kuw, anaasɛ ɛsɛ sɛ meyɛ ankorankoro adɔe de boa wɔn kɛkɛ?’ Adema bɛn na Onyankopɔn hwehwɛ? Asɛm a edi hɔ no bɛka nsɛmmisa yi ho asɛm.