Nsɛmmisa a Efi Akenkanfo Hɔ

So ɛyɛ mfomso sɛ wubekum afieboa a ɔyare paa anaasɛ wanyin dodo?

Nnipa dodow no ara bu mmoa ahorow sɛ wɔma wonya anigye. Afiemmoa bi wɔ hɔ a, wotumi ne wɔn fa nnamfo de wɔn gye wɔn ani. Sɛ nhwɛso no, wonim akraman sɛ mmoa a wɔyɛ setie kɛse ma wɔn wuranom na wɔdɔ wɔn yiye. Enti, ntease wom sɛ nkurɔfo benya ɔdɔ ama afieboa a ɔte saa, titiriw afieboa a wɔne no atra mfe pii no.

Nanso, afiemmoa pii ntra ase nkyɛ. Akraman tumi di mfe 10 kosi 15 anaa nea ɛte saa, na saa ara na agyinamoa nso te, a egyina mmoa ko a wɔyɛ so. Sɛ afiemmoa nyin a, wotumi nya yare anaa dɛmdi bi, na ebetumi ahaw wɔn wuranom a wɔkae mmoa yi mmofraberem ne bere a na wɔn ho yɛ den no. So ɛbɛyɛ mfomso sɛ wobekum mmoa yi de ayi wɔn afi wɔn haw no mu?

Kristoni bɛpɛ sɛ ɔyɛ ade ma ɛne Onyankopɔn apɛde hyia bere a ɔne mmoa redi nsɛm no. Atirimɔden so a wɔne wɔn bedi no tia Onyankopɔn apɛde koraa, efisɛ N’asɛm ka sɛ: “Ɔtreneeni nim n’afieboa kra.” (Mmebusɛm 12:10) Nanso, eyi nkyerɛ sɛ Onyankopɔn bu mmoa sɛnea obu nnipa no. Bere a Onyankopɔn bɔɔ nnipa no, ɔkyerɛe sɛ nsonsonoe kɛse da wɔne mmoa ntam. Sɛ nhwɛso no, ɔde daa nkwa ho anidaso maa nnipa, nanso wamfa saa anidaso yi amma mmoa. (Romafo 6:23; 2 Petro 2:12) Sɛ́ Ɔbɔadeɛ no, ɔwɔ hokwan sɛ ɔbɛhyehyɛ abusuabɔ a ɛfata wɔ nnipa ne mmoa ntam.

Genesis 1:28 kyerɛ yɛn abusuabɔ ko a ɛyɛ. Onyankopɔn ka kyerɛɛ nnipa a wodi kan no sɛ: “Munni ɛpo mu mpataa ne wim nnomaa ne mmoa a wɔkeka wɔn ho wɔ asase so nyinaa so.” Saa ara na Dwom 8:6-8 ka sɛ: ‘Wo Onyankopɔn de nneɛma nyinaa ahyɛ onipa anan ase: nguan ne anantwi nyinaa ne wuram mmoa nso, wim nnomaa ne po mu mpataa.’

Onyankopɔn daa no adi pefee sɛ onipa betumi de mmoa adi dwuma ɔkwan a ɛfata so na wakum wɔn. Sɛ nhwɛso no, yebetumi de wɔn honam ayɛ ntade. Afei nso, Onyankopɔn maa nnipa kwan sɛ wonni mmoa nam wɔ Noa bere so Nsuyiri no akyi, na ɛno bɛkaa nnuadewa a wɔde maa wɔn mfiase no ho.—Genesis 3:21; 4:4; 9:3.

Eyi nkyerɛ sɛ wonkum mmoa ɔkwan a ɛmfata so mfa nnye wɔn ani. Wɔ Genesis 10:9 no, Bible ka Nimrod ho asɛm sɛ “ɔbɔmmɔfo a ɔwɔ tumi.” Nanso nkyekyɛm koro yi ara ka sɛ eyi ma ‘ɔsɔre tia Yehowa.’

Enti, bere a onipa wɔ mmoa so tumi no, ɛnsɛ sɛ ɔde saa tumi no di dwuma ɔkwammɔne so, na mmom ɛsɛ sɛ ɔde di dwuma ma ɛne Onyankopɔn Asɛm mu nnyinasosɛm hyia. Nea ebetumi aka eyi ho ne sɛ wɔremma afieboa nhu amane ɔkwan a ɛnsɛ so esiane onyin, opira a emu yɛ den, anaa yare a ebetumi akum no nti. Wɔ tebea a ɛte saa mu no, ɛyɛ Kristoni no asɛyɛde sɛ obesi nea ɛsɛ sɛ ɔyɛ ho gyinae. Sɛ osi gyinae sɛ ɛbɛkyerɛ mmɔborohunu sɛ ɔremma afieboa bi nhu amane bere a anidaso biara nni hɔ sɛ ne ho bɛtɔ no a, ɛnde obetumi asi gyinae akum no.