Hwehwɛ Adepa A Ɛwɔ Obiara ho
Hwehwɛ Adepa A Ɛwɔ Obiara ho
“Kae me, me Nyankopɔn, ma ensi yiye.”—NEHEMIA 13:31.
1. Ɔkwan bɛn so na Yehowa yɛ adepa ma nnipa nyinaa?
SƐ MUNUNKUM ma wim yɛ kusuu nna dodow bi a, owia a ɛbɔ no de nsakrae a ɛyɛ anigye ba. Nkurɔfo ho bae wɔn, na wonya akomatɔyam. Saa ara na sɛ owia bɔ na wim yɛ wesee bere tenten a, nsu kakra a ɛtɔ—ahum mpo—ma yenya ahomeka ne abotɔyam. Yɛn Bɔfo, Yehowa, a ɔwɔ dɔ no ahyehyɛ akyɛde a ɛne wim nsakrae a ɛyɛ anigye yi wɔ ahunmu. Yesu twee adwene sii Onyankopɔn ayamye so bere a ɔkyerɛkyerɛɛ eyi no: “Monnɔ mo atamfo, (munhyira wɔn a wɔdome mo, monyɛ wɔn a wɔtan mo yiye), na mommɔ mpae mma wɔn a (wɔhaw mo, na) wɔtaa mo; na moayɛ mo agya a ɔwɔ soro no mma; efisɛ ɔma ne wia pue nnipa bɔne ne nnipa pa so, na ɔma osu tɔ gu wɔn a wɔteɛ ne wɔn a wɔnteɛ so.” (Mateo 5:43-45) Yiw, Yehowa yɛ adepa ma nnipa nyinaa. Ɛsɛ sɛ n’asomfo bɔ mmɔden sɛ wobesuasua no denam adepa a wɔbɛhwehwɛ wɔ afoforo ho no so.
2. (a) Dɛn na Yehowa gyina so yɛ papa? (b) Dɛn na Yehowa hwɛ wɔ sɛnea yɛyɛ yɛn ade wɔ ne papayɛ ho no?
2 Dɛn na Yehowa gyina so yɛ papa? Efi bere a Adam yɛɛ bɔne no, Yehowa nnyaee sɛ ɔbɛhwehwɛ adepa a ɛwɔ nnipa ho. (Dwom 130:3, 4) N’atirimpɔw ne sɛ ɔbɛsan de adesamma asoɔmmerɛfo akɔ Paradise asetra mu. (Efesofo 1:9, 10) N’adom no ama yɛanya akwanhwɛ sɛ wobegye yɛn afi bɔne ne sintɔ mu denam Aseni a wɔahyɛ ne ho bɔ no so. (Genesis 3:15; Romafo 5:12, 15) Agyede nhyehyɛe no a yebegye atom no na ebebue kwan ama yɛn na awiei koraa no ɛde yɛn akɔ pɛyɛ mu. Nea ɛka nneɛma a Yehowa rehwɛ wɔ yɛn mu biara ho mprempren ho biako ne sɛnea yɛreyɛ yɛn ade wɔ n’ayamye ho. (1 Yohane 3:16) Ohu biribiara a yɛyɛ de kyerɛ ne papayɛ ho anisɔ no. Ɔsomafo Paulo kyerɛwee sɛ: “Onyankopɔn nyɛ nea ɔnteɛ a ne werɛ befi mo adwuma ne mo dɔ mmɔden a mobɔe ne din ho.”—Hebrifo 6:10.
3. Asɛmmisa bɛn na ɛsɛ sɛ yesusuw ho?
3 Ɛnde, ɔkwan bɛn so na yebetumi asuasua Yehowa wɔ adepa a ɔhwehwɛ wɔ afoforo ho no mu? Ma yensusuw asetram mmeae anan ho mfa mmua saa asɛmmisa yi: (1) Kristofo som adwuma, (2) abusua no, (3) asafo no, ne (4) yɛne afoforo ntam abusuabɔ.
Wɔ Asɛnka ne Asuafoyɛ Adwuma no Mu
4. Ɔkwan bɛn so na Kristofo som adwuma no mu kyɛfa a yenya no kyerɛ sɛ yɛrehwehwɛ adepa a ɛwɔ afoforo mu no?
4 Yesu kyerɛkyerɛɛ mu wɔ mmuae a ɔde maa n’asuafo no wɔ nsɛmmisa a na ɛfa awi ne wura ho bɛ no mu sɛ: “Afuw no ne wiase.” Sɛ́ Kristo nnɛyi asuafo no, yehu nokwasɛm yi bere a yɛreyɛ yɛn asɛnka adwuma no. (Mateo 13:36-38; 28:19, 20) Nea ɛka yɛn asɛnka adwuma no ho ne yɛn gyidi a yɛbɛda no adi wɔ baguam. Nokwasɛm a ɛyɛ sɛ wɔde afie afie asɛnka adwuma ne mmɔnten so adansedi a Yehowa Adansefo yɛ no nim wɔn yiye nnɛ no di adanse sɛ yɛde nsi hwehwɛ wɔn a wɔfata sɛ yɛka Ahenni asɛm no kyerɛ wɔn no nyinaa. Nokwarem no, Yesu hyɛe sɛ: “Kurow anaa akuraa biara a mobɛhyɛn mu no, mummisa nea ɔsɛ wɔ hɔ.”—Mateo 10:11; Asomafo no Nnwuma 17:17; 20:20.
5, 6. Dɛn nti na yɛyere yɛn ho sɛ yɛbɛkɔ nkurɔfo nkyɛn mpɛn pii wɔ wɔn afie mu?
5 Sɛ yɛkɔ nkurɔfo nkyɛn bere a wɔmfrɛɛ yɛn a, yehu su a wɔda no adi wɔ asɛm a yɛka no ho. Ɛtɔ mmere bi a, yehu sɛ ofie no muni bi tie yɛn, na ɔfoforo nso ka sɛ, “Yɛn ani nnye ho,” na ɛno de nsrahwɛ no ba awiei. Hwɛ haw a ɛhaw yɛn sɛ onipa biako sɔre tia anaa anigye a ɔnkyerɛ no nya ɔfoforo so nkɛntɛnso! Ɛnde, dɛn na yebetumi ayɛ de akɔ so ahwehwɛ adepa a ɛwɔ obiara ho no?
6 Ofie hɔ a yɛbɛsan akɔ bio bere a yɛreka asɛm wɔ saa beae no betumi ama yɛanya hokwan ne onii a otwaa nsrahwɛ a edi kan so no akasa tẽẽ. Nea esii saa bere no a yɛbɛma atra yɛn adwene mu no betumi aboa yɛn ma yɛasiesie yɛn ho. Ebetumi aba sɛ adwempa bi na ɔsɔretiafo no de yɛɛ saa, a na osusuw sɛ ɛsɛ sɛ ɔma wɔn a wɔretie Ahenni asɛm no gyae tie. Ɛbɛyɛ sɛ atosɛm a na ɔte fa yɛn ho no na ɛma ɔdaa saa su no adi. Nanso ɛno nsiw yɛn kwan sɛ yɛbɛkɔ so aka Ahenni ho asɛmpa no wɔ saa fie no mu, na yɛde anifere asiesie adwemmɔne biara. Yɛn ani gye ho sɛ yɛbɛboa nnipa nyinaa ma wɔabenya Onyankopɔn ho nokware nimdeɛ. Enti ebetumi aba sɛ Yehowa bɛtwe saa onipa no abɛn no.—Yohane 6:44; 1 Timoteo 2:4.
7. Dɛn na ebetumi aboa yɛn ma yɛanya adwene a ɛfata bere a yɛkɔ nkurɔfo nkyɛn no?
7 Ná abusua ɔsɔretia ho asɛm wɔ Yesu ahyɛde a ɔde maa n’asuafo no mu. So wanka sɛ: “Meba mebɛpaapaee mu na onipa asɔre atia n’agya, na ɔbabea asɔre atia ne na, na osew asɔre atia n’ase”? Yesu de kaa ho sɛ: “Onipa fifo bɛyɛ n’atamfo.” (Mateo 10:35, 36) Nanso, nsɛm tebea ne suban sesa. Yare a ɛba mpofirim, obi busuani a ɔhwere no, asiane, nkate fam haw, ne nneɛma foforo pii nya sɛnea nkurɔfo yɛ wɔn ade wɔ asɛm a yɛka no ho so nkɛntɛnso. Sɛ yɛwɔ adwene a ɛmfata—sɛ nkurɔfo a yɛka asɛm no kyerɛ wɔn no rentie asɛm no bere nyinaa—a, so na yɛrehwehwɛ adepa a ɛwɔ wɔn ho no ankasa? Dɛn nti na wonsan mfa anigye nkɔsra wɔn wɔ fie bere foforo? Ebia na wɔn su bɛsesa saa bere yi. Ɛtɔ mmere bi a, ɛnyɛ nea yɛka no na ɛma nkurɔfo sesa wɔn nneyɛe, na mmom ɔkwan a yɛfa so ka no no. Komam a yebefi abɔ Yehowa mpae ansa na yɛafi asɛnka ase no bɛboa yɛn ankasa ma yɛanya adwene a ɛfata aka Ahenni asɛm no wɔ ɔkwan a ɛbɛma obiara ani agye ho so.—Kolosefo 4:6; 1 Tesalonikafo 5:17.
8. Dɛn na ebetumi aba bere a Kristofo hwehwɛ adepa a ɛwɔ wɔn abusuafo a wonnye nni ho no?
8 Wɔ asafo ahorow bi mu no, abusua koro mufo pii som Yehowa. Mpɛn pii no, nea ɛma mmofra a wɔwɔ saa abusua no mu no kyerɛ anigye yɛ obu ne nsi a obusuani bi a wanyin da no adi, abusuabɔ pa a ɔne abusuafo no wɔ ne abusuabɔ pa a ɛwɔ n’aware mu a ɛka mmofra no koma. Ɔsomafo Petro afotu a ɔyerenom Kristofo pii atie no aboa wɔn ma wɔanya wɔn kununom “a ɔkasa nnim.”—1 Petro 3:1, 2.
Wɔ Abusua no Mu
9, 10. Ɔkwan bɛn so na Yakob ne Yosef nyinaa hwehwɛɛ adepa a ɛwɔ wɔn abusuafo ho?
9 Abusuabɔ pa a ɛka abusuafo bom no yɛ beae foforo a yebetumi ahwehwɛ adepa a ɛwɔ afoforo ho no. Susuw asuade bi a ɛwɔ sɛnea Yakob ne ne mmabarima no dii nsɛm mu no ho hwɛ. Wɔ Genesis ti 37, nkyekyɛm 3 ne 4 no, Bible no kyerɛ sɛ na Yakob dɔ Yosef yiye. Yosef nuanom twee ne ho ninkunu, na wɔpam wɔn nua no tiri so mpo sɛ wobekum no. Nanso, hyɛ su a Yakob ne Yosef daa no adi akyiri yi wɔ wɔn asetra mu no nsow. Wɔn baanu nyinaa hwehwɛɛ adepa a ɛwɔ wɔn abusuafo ho.
10 Bere a Yosef bɛyɛɛ aduan sohwɛfo wɔ Misraim a na ɔkɔm asi hɔ no, ogyee ne nuanom fɛw so. Bere a wanna ne ho adi amonom hɔ ara no, ɔyɛɛ nneɛma bi de hwɛ hui sɛ wahwɛ wɔn na wɔanya aduan a wɔde bɛkɔ akɔma wɔn papa a ne mfe akɔ anim no. Yiw, ɛmfa ho sɛ wɔtanee Yosef no, ɔyɛɛ nneɛma de bɔɔ wɔn yiyedi ho ban. (Genesis 41:53–42:8; 45:23) Saa ara na bere a Yakob rewu no, ohyiraa ne mmabarima no nyinaa wɔ nkɔmhyɛ kwan so. Ɛwom sɛ wɔn nneyɛe bɔne maa wɔhweree hokwan ahorow bi de, nanso wɔn mu biara nni hɔ a wannya agyapade wɔ asase no so. (Genesis 49:3-28) Ɔdɔ a ɛkyɛn so bɛn ara na Yakob daa no adi ma ɛyɛɛ nwonwa sɛɛ yi!
11, 12. (a) Nkɔmhyɛ kwan so nhwɛso bɛn na esi hia a ehia sɛ yɛhwehwɛ adepa a ɛwɔ abusuafo ho so dua? (b) Asuade bɛn na yenya fi agya a ɔwɔ Yesu bɛ a ɛfa ɔba hohwini ho mu no hɔ?
11 Abodwokyɛre a Yehowa daa no adi bere a ɔne Israel man a na wonni gyidi redi nsɛm no ma yɛsan hu sɛnea ɔhwehwɛ adepa a ɛwɔ ne nkurɔfo ho. Yehowa de odiyifo Hosea abusua mu nsɛm tebea dii dwuma de kyerɛkyerɛɛ ne dɔ a ɛtra hɔ daa no mu. Hosea yere Gomer sɛee aware mpɛn pii. Ne nyinaa akyi no, Yehowa hyɛɛ Hosea sɛ: “Kɔ bio na kɔdɔ ɔbea a adamfo dɔ no, nanso ɔyɛ ɔwaresɛefo, sɛ [Yehowa, NW] dɔ Israel mma na wɔn de, wɔdan kɔ anyame foforo nkyɛn na wɔdɔ bobe aba tetare no.” (Hosea 3:1) Dɛn nti na ɔmaa no ahyɛde a ɛte saa? Ná Yehowa nim sɛ ankorankoro bi betumi afi ɔman a wɔawae afi n’akwan ho no mu ayɛ ne boasetɔ ho biribi. Hosea kae sɛ: “Akyiri no Israel mma bɛsan abɛhwehwɛ [Yehowa, NW] wɔn Nyankopɔn ne wɔn hene Dawid, na wɔn ho bɛpopo de aba [Yehowa, NW] ne ne papa ho, nna a edi akyiri no mu.” (Hosea 3:5) Nokwarem no, eyi yɛ nhwɛso pa a ɛsɛ sɛ yesusuw ho bere a yehyia abusua mu nsɛnnennen no. Anyɛ yiye koraa no, adepa a ɛwɔ w’abusuafo afoforo ho a wobɛkɔ so ahwehwɛ no bɛyɛ boasetɔ ho nhwɛso pa.
12 Yesu bɛ a ɛfa ɔba hohwini ho no ma yenya nhumu foforo fa sɛnea yebetumi ahwehwɛ adepa a ɛwɔ yɛn ankasa abusuafo ho no. Ɔba kumaa no san baa fie bere a ogyaee n’ahohwibra no. Agya no huu no mmɔbɔ. Ɔkwan bɛn so na agya no yɛɛ n’ade wɔ ɔba panyin a na onnyaw n’abusua hɔ da no anwiinwii no ho? Agya no see ne ba panyin no sɛ: “Ɔba, wowɔ me nkyɛn daa, na nea mewɔ nyinaa yɛ wo dea.” Ná eyi nyɛ nsɛm bi a ɛyɛ yaw a agya no de reka ne ba no anim, na mmom na ɛyɛ nsɛm a ɔde resi ne dɔ so dua. Ɔtoaa so sɛ: “Na ɛsɛ sɛ yɛn ani gye na yɛn bo tɔ yɛn yam, efisɛ wo nua yi wui, na wanyan; na ɔyerae, na wɔahu no.” Saa ara na yɛn nso yebetumi ahwehwɛ adepa a ɛwɔ afoforo ho.—Luka 15:11-32.
Wɔ Kristofo Asafo no Mu
13, 14. Dɛn ne ɔkwan biako a yebetumi afa so ada mmara a edi hene a ɛne ɔdɔ no adi wɔ Kristofo asafo no mu?
13 Sɛ́ Kristofo no, yɛn botae ne sɛ yɛde mmara a edi hene a ɛne ɔdɔ no bɛyɛ adwuma. (Yakobo 2:1-9) Ampa, ebia yebegye yɛn asafo mufo a wɔn honam fam tebea yɛ soronko wɔ yɛn de ho atom. Nanso, so “nnipa mu nyiyim” a egyina abusua, amammerɛ, anaa nyamesom so mpo wɔ yɛn mu? Sɛ saa a, ɔkwan bɛn so na yebetumi de Yakobo afotu no adi dwuma?
14 Obiara a ɔba Kristofo nhyiam ahorow ase a yegye no fɛw so no kyerɛ ayamye a yɛwɔ. Sɛ yefi yɛn pɛ mu ne wɔn a wɔba Ahenni Asa so foforo no kasa a, eyi hu ne fɛre biara fi hɔ koraa. Nokwarem no, ebinom a wɔba Kristofo nhyiam bere a edi kan no ka sɛ: “Ná obiara anim tew. Ná ɛte sɛ nea obiara nim me dedaw. Minyaa abotɔyam ankasa.”
15. Ɔkwan bɛn so na yebetumi aboa mmofra a wɔwɔ asafo no mu ma wɔakyerɛ wɔn a wɔn mfe akɔ anim ho anigye?
15 Wɔ asafo ahorow bi mu no, sɛ nhyiam bi ba awiei a, mmabun bi hyiam wɔ Ahenni Asa no so anaa akyi, na wɔkwati mpanyimfo fekubɔ. Adepa bɛn na yebetumi ayɛ de adi saa su yi so? Nokwarem no, ade a edi kan ne sɛ awofo bɛtete wɔn mma wɔ fie, na wɔasiesie wɔn ama nhyiam ahorow. (Mmebusɛm 22:6) Wobetumi de adwuma te sɛ nhoma a wɔbɛboa ano agu baabi ahyɛ wɔn nsa, sɛnea ɛbɛyɛ a wobenya nea wohia de akɔ nhyiam ahorow. Ɛyɛ papa koraa nso sɛ awofo bɛhyɛ wɔn mma nkuran ma wɔne wɔn a wɔn mfe akɔ anim anaa wɔn a wonni ahoɔden no abɔ nkɔmmɔ wɔ Ahenni Asa so. Biribi a ntease wom a wobenya aka akyerɛ saafo no bɛma mmofra no anya abotɔyam.
16, 17. Ɔkwan bɛn so na wɔn a wɔanyinyin no betumi ahwehwɛ adepa a ɛwɔ mmofra a wɔwɔ asafo no mu ho?
16 Ɛsɛ sɛ anuanom mmarima ne mmea a wɔn mfe akɔ anim no kyerɛ asafo no mu mmofra ho anigye. (Filipifo 2:4) Wobetumi afi wɔn pɛ mu ne mmofra no abɔ nkɔmmɔ ahyɛ wɔn nkuran. Mpɛn pii no, yetumi nya nsɛm bi a ɛyɛ soronko wɔ nhyiam no mu. Yebetumi abisa mmofra sɛ wɔn ani gyee nhyiam no ho ne sɛ ebia wonyaa nsɛm bi a wɔn ani gye ho titiriw a wobetumi de adi dwuma anaa. Mmofra yɛ asafo no fã titiriw, enti ɛsɛ sɛ yɛde adwene si wɔn so wɔ nsɛm a wotie no ho na yɛkamfo wɔn wɔ mmuae biara a wɔma wɔ nhyiam ase anaasɛ kyɛfa biara a wonya wɔ dwumadi afã ahorow mu no ho. Ɔkwan a mmofra ne mpanyin fa so di nkitaho wɔ asafo no mu ne sɛnea wodi nneɛma nketenkete ho dwuma wɔ fie no bɛkyerɛ sɛ wobetumi adi asɛyɛde akɛse ho dwuma akyiri yi wɔ asetra mu.—Luka 16:10.
17 Mmofra bi nam asɛyɛde a wogye tom so nya nkɔso kodu baabi a wɔn honhom fam su ahorow ma wonya dwumadi a emu yɛ duru. Biribi a wobenya ayɛ no betumi aboa ma wɔadi nneyɛe a ɛmfata so. (2 Timoteo 2:22) Dwumadi a ɛtete saa betumi ama ‘wɔasɔ wɔn ahwɛ’ sɛ wɔyɛ anuanom a wobetumi asom sɛ asafo mu asomfo anaa. (1 Timoteo 3:10) Ahoboa a wɔyɛ nya nhyiam ahorow mu kyɛfa ne nsi a wɔde yɛ ɔsom adwuma no, ne asafo no mufo nyinaa ho anigye a wɔkyerɛ no ma mpanyimfo no hu nneɛma a wɔbɔ mu mmɔden bere a wɔresusuw wɔn ho de nnwuma foforo ahyehyɛ wɔn nsa no.
Adepa a Ɛwɔ Obiara Ho a Wobɛhwehwɛ
18. Atemmu mu akwanside bɛn na ɛsɛ sɛ wɔkwati, na dɛn ntia?
18 Mmebusɛm 24:23 ka sɛ: “Atemmu mu animhwɛ nye.” Ɔsoro nyansa hwehwɛ sɛ mpanyimfo kwati animhwɛ bere a wɔredi asɛm wɔ asafo no mu no. Yakobo kae sɛ: “Nyansa a efi soro no de, nea edi kan ne sɛ ɛho tew, ɛwɔ asomdwoe, ɛwɔ odwo, ɛwɔ asoɔmmerɛw; mmɔborohunu ne aba pa ayɛ no ma, ennye akyinnye, ɛnyɛ nyaatwom.” (Yakobo 3:17) Ɛda adi sɛ, bere a mpanyimfo rehwehwɛ adepa a ɛwɔ afoforo ho no, ehia sɛ wɔhwɛ hu sɛ abusuabɔ a ɛda wɔne afoforo ntam ne wɔn nkate ahorow nkɛntɛn atɛn a wobu so. Odwontofo Asaf kyerɛwee sɛ: “Onyankopɔn gyina Onyankopɔn asafo mu, obu atɛn anyame [“nnipa a wɔte sɛ anyame,” NW ase hɔ asɛm, a ɛkyerɛ nnipa atemmufo] ntam. Da bɛn na mubebu ntɛnkyew, na moahwɛ abɔnefo anim akosi?” (Dwom 82:1, 2) Sɛnea ɛte no, Kristofo mpanyimfo kwati animhwɛ biara bere a wɔredi nsɛm a ɛfa adamfo bi anaa obusuani bi ho no. Saa kwan yi so no, wɔma biakoyɛ tra asafo no mu na wɔma Yehowa honhom yɛ adwuma koraa.—1 Tesalonikafo 5:23.
19. Akwan bɛn so na yebetumi ahwehwɛ adepa a ɛwɔ afoforo ho?
19 Sɛ yɛhwehwɛ adepa a ɛwɔ yɛn nuanom mmarima ne mmea ho a, yɛda su a Paulo daa no adi bere a ɔkasa kyerɛɛ Tesalonika asafo no bi adi. Ɔkae sɛ: “Na yɛn ani da mo so Awurade mu, sɛ moyɛ na mobɛyɛ nea yɛhyɛ mo.” (2 Tesalonikafo 3:4) Sɛ yɛhwehwɛ adepa a ɛwɔ afoforo ho a, yɛbɛbɔ mmɔden kɛse sɛ yebebu yɛn ani agu wɔn mfomso so. Yɛbɛhwehwɛ mmeae a yebetumi akamfo yɛn nuanom, na yɛakwati kateeyɛ biara. Paulo kyerɛwee sɛ: “Nea wɔhwehwɛ ofiehwɛfo ho ne sɛ wohu no ɔnokwafo.” (1 Korintofo 4:2) Ɛnyɛ wɔn a wɔyɛ ofiehwɛ adwuma wɔ asafo no mu nkutoo na wɔn nokwaredi ma wɔsom bo ma yɛn, na mmom anuanom Kristofo mmarima ne mmea nyinaa nso. Yɛnam ɛno so bɛn wɔn, na ɛhyɛ Kristofo adamfofa hama no mu den. Yenya adwene a Paulo nya maa anuanom a na wɔwɔ ne bere so no bi. Wɔyɛ “yɔnko adwumayɛfo Onyankopɔn Ahenni no fam” na ‘wɔyɛ yɛn awerɛkyekyefo.’ (Kolosefo 4:11) Yɛnam saayɛ so da Yehowa su adi.
20. Nhyira bɛn na wɔn a wɔhwehwɛ adepa a ɛwɔ obiara ho no benya?
20 Nokwarem no, yɛbɔ mpae a Nehemia bɔe no bi sɛ: “Kae me, me Nyankopɔn, ma ensi yiye.” (Nehemia 13:31) Hwɛ anigye ara a yenya sɛ Yehowa hwehwɛ adepa a ɛwɔ nkurɔfo ho! (1 Ahene 14:13) Ɛmmra sɛ yɛbɛyɛ saa ara bere a yɛne afoforo di nsɛm no. Saa a yɛbɛyɛ no bɛma yɛanya anidaso sɛ wobegye yɛn na yɛanya daa nkwa wɔ wiase foforo a abɛn pɛɛ no mu.—Dwom 130:3-8.
Wubebua Dɛn?
• Ɔkwan bɛn so na Yehowa yɛ nnipa nyinaa yiye?
• Ɔkwan bɛn so na yebetumi ahwehwɛ adepa a ɛwɔ afoforo ho
• wɔ yɛn som adwuma mu?
• wɔ yɛn abusua mu?
• wɔ yɛn asafo mu?
• wɔ yɛne nnipa nyinaa abusuabɔ mu?
[Adesua no ho Nsɛmmisa]
[Mfonini wɔ kratafa 18]
Ɛmfa ho sɛ na Yosef nuanom tan no no, ɔhwehwɛɛ wɔn yiyedi
[Mfonini wɔ kratafa 19]
Ɔsɔretia nsiw yɛn kwan sɛ yɛbɛboa nnipa nyinaa
[Mfonini wɔ kratafa 20]
Ɛmfa ho wɔn kan asetra no, Yakob mma no mu biara nni hɔ a wanhyira no
[Mfonini wɔ kratafa 21]
Gye obiara a ɔba Kristofo nhyiam ase no fɛw so