Nea Yebetumi Asua Afi Nnomaa Hɔ

“MONHWƐ wim nnomaa sɛ wongu na wontwa, na wɔmmoaboa ano ngu asan so, nanso mo soro agya yɛn wɔn; na monsom bo nsen wɔn anaa?” (Mateo 6:26) Yesu Kristo kaa saa nsɛm yi wɔ ne bepɔw so asɛnka a agye din no mu wɔ Galilea Po no ho. Ɛnyɛ n’akyidifo nkutoo na wotiee asɛm no. Na nnipakuw kɛse a wobetumi abɛyɛ n’asuafo nso fi mmeae pii aba hɔ. Na wɔn mu pii yɛ ahiafo a wɔde ayarefo abrɛ Yesu sɛ ɔnsa wɔn yare.—Mateo 4:23–5:2; Luka 6:17-20.

Bere a Yesu saa ayarefo no nyinaa yare wiei no, ɔdan adwene kɔɔ honhom mu nneɛma a ɛho hia paa so. Nea ɛka asuade a ɔkyerɛɛ wɔn no ho ne asɛm a yɛkae wɔ atifi hɔ no.

Wim nnomaa atra hɔ mmere tenten. Ebinom di nkoekoemmoa, afoforo nso di nnuaba. Sɛ Onyankopɔn ayɛ nsiesiei pii saa ama nnomaa no a, akyinnye biara nni ho sɛ obetumi aboa n’asomfo nnipa ama wɔn nsa aka wɔn da biara da aduan. Ebia ɔbɛyɛ saa denam adwuma a ɔbɛma wɔanya so na ama wɔanya sika atɔ aduan. Anaasɛ ɔbɛma nnuan a wɔn ankasa dua no ayɛ yiye. Wɔ ahokyere mmere mu no, Onyankopɔn betumi aka afipamfo ne nnamfo a wɔwɔ ayamye koma ma wɔne wɔn a wohia mmoa no akyɛ wɔn nnuan biara a wɔwɔ no.

Pii wɔ hɔ a yebetumi asua denam anomaa asetra a yɛbɛhwɛ no yiye no so. Onyankopɔn de nkate nwonwaso abɔ nnomaa a etumi ma wɔnwene berebuw a wɔyɛn wɔn mma wom. Hwɛ mmerebuw abien a ɛsono emu biara no. Asomfena berebuw mfonini na ɛwɔ benkum so no. Wɔnwenee wɔ ɔbotan so anaa ɔdan ho. Ɔbotan a ɛkonkɔn hɔ, anaa sɛnea wɔakyerɛ wɔ mfonini no mu no, ɔdan ntɔnoa na ɔde yɛ saa berebuw no suhyɛ. Ɔde dɔte nkuruwankuruwa nketenkete bom de yɛ berebuw no ase ma ɛyɛ te sɛ kuruwa. Onini ne ɔbere no nyinaa yɛ adwumaden de tetew dɔte nkuruwankuruwa pii na etumi gye wɔn bɛboro ɔsram biako ansa na wɔawie wɔn berebuw no. Afei wɔde sare ne ntakra sesɛw emu no. Wɔn abien nyinaa ma wɔn mma no aduan. Ase hɔ de no yɛ akyem polisi berebuw. Saa Afrika anomaa nsiyɛfo yi de sare anaa wuram nhama afoforo na ɛnwene ne berebuw no. Obetumi de da koro awie berebuw no, na obetumi anwene bɛboro 30 wɔ bere a wɔde nwene berebuw no mu!

Asuade bɛn na ɛwom? Sɛ Onyankopɔn ma nnomaa ahokokwaw ne nneɛma pii ma wɔde nwene mmerebuw a, akyinnye biara nni ho sɛ obetumi aboa n’asomfo a wɔyɛ nnipa no ama wɔanya dabere a wohia. Nanso Yesu kyerɛe sɛ biribi foforo ho hia, sɛ yɛpɛ sɛ Yehowa Nyankopɔn boa yɛn ma yɛn nsa ka yɛn honam fam ahiade a. Yesu hyɛɛ bɔ sɛ: “Na monhwehwɛ Onyankopɔn ahenni ne ne trenee kan; na wɔde eyinom nyinaa bɛka mo ho.” (Mateo 6:33) Ebia wubebisa sɛ, ‘Dɛn na Onyankopɔn Ahenni a wɔhwehwɛ no kan no hwehwɛ?’ Yehowa Adansefo a wɔkyekyɛ saa nsɛmma nhoma yi no ani begye ho sɛ wobebua saa asɛmmisa no.