Nsɛmmisa a Efi Akenkanfo Hɔ

So Satan Ɔbonsam wɔ tumi a ɔde hu nea ɛwɔ nnipa adwenem?

Ɛwom sɛ yentumi nka no pefee de, nanso ɛte sɛ nea Satan anaa n’adaemone no nni tumi a wɔde hu nea ɛwɔ yɛn adwenem.

Susuw edin a ɛwɔ nkyerɛase a wɔde ma Satan no ho hwɛ. Wɔfrɛ no Satan (Ɔsɔretiafo), Ɔbonsam (Otwirifo), Ɔwɔ (ɛte sɛ Ɔdaadaafo), Ɔsɔhwɛfo, ne Ɔtorofo. (Hiob 1:6; Mateo 4:3; Yohane 8:44; 2 Korintofo 11:3; Adiyisɛm 12:9) Edin ahorow a ɛwɔ nkyerɛase yi mu biara nni hɔ a ɛkyerɛ sɛ Satan wɔ tumi a ɔde hu nea ɛwɔ nnipa adwenem.

Nanso, sɛ yɛyɛ ntotoho a, wɔfrɛ Yehowa Nyankopɔn ‘nea ɔhwehwɛ koma mu.’ (Mmebusɛm 17:3; 1 Samuel 16:7; 1 Beresosɛm 29:17) Hebrifo 4:13 ka sɛ: “Enni abɔde biara a ɛnna adi [Yehowa anim], na ade nyinaa ho da hɔ, na ɛso abue, nea yɛne no wɔ asɛm no anim.” Ɛnyɛ nwonwa sɛ Yehowa ama ne Ba Yesu tumi a ɔde hwehwɛ koma mu no. Yesu a wɔanyan no no kae sɛ: “Mene nea ɔhwehwɛ asaabo ne koma mu, na mɛma mo mu biara sɛnea mo nnwuma te.”—Adiyisɛm 2:23.

Bible nka sɛ Satan tumi hwehwɛ nnipa koma ne wɔn adwene mu. Eyi ho hia efisɛ ɔsomafo Paulo ma yɛn awerɛhyem sɛ Kristofo ‘nim Satan adwene.’ (2 Korintofo 2:11) Enti ɛnsɛ sɛ yesuro sɛ Satan wɔ tumi soronko bi a yennim ho hwee koraa.

Nanso, eyi nkyerɛ sɛ yɛn Tamfo no ntumi nhu yɛn mmerɛwyɛ ahorow. Satan de mfehaha pii na asua nnipa su. Enhia sɛ otumi hu nea ɛwɔ yɛn adwenem na ama wahu yɛn su ahorow, anigyede a yedi akyi, anaa watie nneɛma a yɛbɔ ho nkɔmmɔ, ne nea ɛkeka ho. Yɛn anim yɛbea ne yɛn ahokeka nso betumi ama wahu nea yɛresusuw ho anaa sɛnea yɛte nka.

Nanso, ne nyinaa mu no, mfiri a Satan de dii dwuma wɔ Eden turom no ara na ɔde di dwuma—atorodi, nnaadaa, ne ntwatoso. (Genesis 3:1-5) Bere a enhia sɛ Kristofo suro sɛ Satan behu nea ɛwɔ wɔn adwenem no, wɔwɔ nea enti a ɛsɛ sɛ wodwen nsusuwii a Satan betumi abɔ mmɔden sɛ ɔde bɛhyɛ wɔn adwenem no ho. Ɔpɛ sɛ Kristofo ‘adwene sɛe na nokware no bɔ wɔn.’ (1 Timoteo 6:5) Ɛnyɛ nwonwa sɛ Satan wiase no de nsɛm ne anigyede a ɛsɛe adwene pii aba wiase. Nea ɛbɛyɛ na Kristofo atumi agyina ntua yi ano no, ɛsɛ sɛ wɔhyɛ “nkwagye dade kyɛw” de bɔ wɔn adwene ho ban. (Efesofo 6:17) Wɔnam Bible nokware ahorow a wɔde hyɛ wɔn adwenem ne Satan wiase no mu nneɛma a ɛho ntew a wɔtwe wɔn ho fi ho so na ɛyɛ eyi.

Satan yɛ ɔtamfo a ɔyɛ den. Nanso ɛnsɛ sɛ yenya ɔno anaa n’adaemone ho osuro bɔne. Yakobo 4:7 ma yɛn awerɛhyem sɛ: “Munsiw ɔbonsam kwan, na obeguan afi mo nkyɛn.” Sɛ yedi afotu yi akyi a, te sɛ Yesu no, yebetumi aka sɛ Satan rennya yɛn ho hwee.—Yohane 14:30.