So Ɛyɛ Amanne Ara Kwa Anaa Adanmudegye?

WƆ Poland kɔlege ahorow bi mu no, adesuafo no taa gyigye sika de tɔ akyɛde ma wɔn akyerɛkyerɛfo, a wɔn anidaso ne sɛ wɔbɛma wɔabɔ mmɔden wɔ wɔn sɔhwɛ mu. Ɛnyɛ nwonwa sɛ Kristoni kumaa bi a wɔfrɛ no Katarzyna hyiaa tebea a emu yɛ den wɔ ho. Osusuw ho sɛ: “So mintua sika no anaa minntua?” Ne mfɛfo sukuufo no kyerɛɛ no sɛ: “Ɛyɛ ade a obiara yɛ. Worenhwere biribiara, mmom wubenya so mfaso pii, enti adɛn na woma w’adwene mu yɛ wo naa?”

Katarzyna ka sɛ: “Ɛsɛ sɛ migye tom sɛ m’adesua afe a edi kan mu no, mede me ho hyɛɛ sikatua no mu. Akyiri yi na mibehui sɛ menam saa kwan no so de me ho hyɛɛ adanmudegye a Bible no kasa tia mu.” Ɔkaee kyerɛw nsɛm a ɛkyerɛ sɛ Yehowa mpene adanmudegye so koraa no. (Deuteronomium 10:17; 16:19; 2 Beresosɛm 19:7) Katarzyna ka sɛ: “Metee nea enti a ɛyɛ mmerɛw sɛ obi begyae ne ho mu ama atipɛnfo nhyɛso ase. Mesan susuw asɛm no ho bio na efi saa bere no mamfa me ho anhyɛ amanne yi mu bio.” Wɔ mfe abiɛsa a atwam no, ɛmfa ho sɛ adesuafo no dii ne ho fɛw no, otumi kyerɛkyerɛɛ mu kyerɛɛ wɔn mu binom sɛ ɔmfa ne ho nhyɛ saa “akyɛde” gyigye no mu esiane ne gyidi a egyina Bible so no nti.

Ebinom kasa tiaa Katarzyna sɛ ɔyɛ pɛsɛmenkominya na ɔmpɛ nnipa. Ɔka sɛ: “Mintumi ne wɔn mu binom mmɔ. Nanso pii kyerɛ obu ma me gyidi no, na ɛno ma m’ani gye.” Katarzyna bɛyɛɛ obi a wonim no sɛ Yehowa Adansefo no mu biako, a okura Bible nnyinasosɛm mu da biara da.