Ɔdɔ a Edi Mu Sen Biara

WƆ Kristofo Hela Kyerɛwnsɛm anaa Apam Foforo no mu no, mpɛn dodow no ara na wɔkyerɛ Hela asɛmfua a·gaʹpe ase “ɔdɔ.”

Bere a nhwehwɛmu nhoma Insight on the Scriptures * rekyerɛkyerɛ nea asɛmfua no kyerɛ mu no, ɛka sɛ: “[A·gaʹpe] nyɛ nkate mu a wofi yɛ ade, ennyina abusuabɔ a obi ne obi wɔ so, sɛnea yesusuw bere nyinaa no, na mmom ɛyɛ abrabɔ anaa asetram ɔdɔ a egyina nnyinasosɛm a ɛne sɛ obi befi ne pɛ mu ayɛ biribi, ɔde bɛyɛ n’asɛyɛde, ahwehwɛde ankasa, na wafi komam agyina nea ɛteɛ so ahwehwɛ ɔfoforo no yiyedi. A·gaʹpe (dɔ) yi ɔtan biara fi hɔ, na ɛmma obi mpo trenee nnyinasosɛm na ɔnyɛ biribi ntua nea obi ayɛ no so ka.”

A·gaʹpe betumi akyerɛ nkate a ɛkɔ akyiri nso. Ɔsomafo Petro tuu fo sɛ: ‘Momfa ɔdɔ a emu yɛ den [a·gaʹpe] nnodɔ mo ho.’ (1 Petro 4:8) Enti, yebetumi aka sɛ a·gaʹpe fi koma ne adwene nyinaa mu. Adɛn nti na wunsusuw kyerɛw nsɛm bi a ɛkyerɛ tumi a ɔdɔ pa yi wɔ ne sɛnea ɛte no ho? Kyerɛwnsɛm a edidi so yi betumi aboa: Mateo 5:43-47; Yohane 15:12, 13; Romafo 13:8-10; Efesofo 5:2, 25, 28; 1 Yohane 3:15-18; 4:16-21.

[Ase hɔ asɛm]